ಮಹಿಳಾ ಬಲ: ಗಣರಾಜ್ಯೋತ್ಸವ ಪರೇಡ್ ಮುನ್ನಡೆಸಿದ ಕ್ಯಾಪ್ಟನ್ ತಾನ್ಯಾ!

ಸೇನೆಯಲ್ಲಿ ವೃದ್ಧಿಸುತ್ತಿದೆ ಮಹಿಳಾ ಬಲ| ಗಣರಾಜ್ಯೋತ್ಸವ ಪರೇಡ್’ನಲ್ಲಿ ಗಮನ ಸೆಳೆದ ಕ್ಯಾ. ತಾನ್ಯಾ ಶೆರ್ಗಿಲ್|  ಕಾರ್ಪ್ಸ್ ಆಫ್ ಸಿಗ್ನಲ್ಸ್‌’ನ ತುಕಡಿ ಮುನ್ನಡೆಸಿದ ಕ್ಯಾ. ತಾನ್ಯಾ| ಆರ್ಮಿ ಡೇ ಪೆರೇಡ್‌ನಲ್ಲಿ ಅಡ್ಜುಟಂಟ್ ಆಗಿ ನೇಮಕಗೊಂಡಿದ್ದ ಕ್ಯಾ. ತಾನ್ಯಾ| 

ನವದೆಹಲಿ(ಜ.26): ಈ ಬಾರಿಯ ಗಣರಾಜ್ಯೋತ್ಸವ ದೇಶದ ಮಹಿಳಾ ಸಮುದಾಯದ ಶಕ್ತಿ ಪ್ರದರ್ಶನಕ್ಕೆ ವೇದಿಕೆ ಕಲ್ಪಿಸಿದ್ದು ವಿಶೇಷ. ಆಧುನಿಕ ಮಹಿಳೆ ಈ ದೇಶದ ಗಡಿ ಕಾಯುವಲ್ಲಿ ಸಶಕ್ತಳಾಗಿದ್ದಾಳೆ ಎಂಬ ಸಂದೇಶ ರಾಜ್‌ಪಥ್ ದಿಂದ ರವಾನೆಯಾಗಿದೆ.

ಕ್ಯಾಪ್ಟನ್ ತಾನ್ಯಾ ಶೆರ್ಗಿಲ್ ನವದೆಹಲಿಯಲ್ಲಿ ನಡೆದ 71ನೇ ಗಣರಾಜ್ಯೋತ್ಸವದಲ್ಲಿ ಕಾರ್ಪ್ಸ್ ಆಫ್ ಸಿಗ್ನಲ್ಸ್‌’ನ ತುಕಡಿಯನ್ನು ಮುನ್ನಡೆಸಿ ಇತಿಹಾಸ ನಿರ್ಮಿಸಿದ್ದಾರೆ.

ಕಾರ್ಪ್ಸ್ ಆಫ್ ಸಿಗ್ನಲ್ಸ್‌’ನ ತುಕಡಿ ರಾಷ್ಟ್ರಪತಿಗಳ ಸಮ್ಮುಖ ಬರುತ್ತಿದ್ದಂತೇ ಸಭಿಕರೆಲ್ಲಾ ಎದದು ನಿಂತು ಚಪ್ಪಾಳೆ ತಟ್ಟಿದ್ದು ವಿಶೇಷವಾಗಿತ್ತು. ಕ್ಯಾಪ್ಟನ್ ತಾನ್ಯಾ ಶೆರ್ಗಿಲ್ ಈ ತುಕಡಿಯ ಸಂಚಾಲಕರಾಗಿದ್ದರು.

ಈ ತಿಂಗಳ ಆರಂಭದಲ್ಲಿ ಆರ್ಮಿ ಡೇ ಪೆರೇಡ್‌ನಲ್ಲಿ ಅಡ್ಜುಟಂಟ್ ಆಗಿ ತಾನ್ಯಾ ಶೆರ್ಗಿಲ್ ಆಯ್ಕೆಯಾಗಿದ್ದರು. ಅಡ್ಜುಟಂಟ್ ಆಗಿ ಆಯ್ಕೆಗೊಂಡ ಮೊದಲ ಮಹಿಳಾ ಅಧಿಕಾರಿ ಎಂಬ ಹೆಗ್ಗಳಿಕೆಯನ್ನು ಕ್ಯಾಪ್ಟನ್ ತಾನ್ಯಾ ಶೆರ್ಗಿಲ್ ಮುಡಿಗೇರಿಸಿಕೊಂಡಿದ್ದಾರೆ.