ಕಲರ್ಸ್ ಕನ್ನಡದಲ್ಲಿ ಸದ್ಯದಲ್ಲೆ ಹೊಸದೊಂದು ಸೀರಿಯಲ್ ಪ್ರಸಾರವಾಗಲಿದೆ. ಈಗಾಗಾಲೇ ಸೀರಿಯಲ್ ಪ್ರೋಮೋ ರಿಲೀಸ್ ಆಗಿದ್ದು, ಭಾರಿ ಜನಮೆಚ್ಚುಗೆ ಪಡೆದಿದೆ. ತಂದೆ ಮಗಳ ಬಾಂಧವ್ಯದ ಕತೆ ಹೊಂದಿರೋ ಚುಕ್ಕಿ ತಾರೆ ತೆರೆ ಮೇಲೆ ಬರೋಕೆ ರೆಡಿಯಾಗ್ತಿದೆ.
ಕಲರ್ಸ್ ಕನ್ನಡ (Colors Kannada) ವಾಹಿನಿಯೂ ಸದಾ ವಿಭಿನ್ನ. ಕಥೆಯೊಂದಿಗೆ ಜನರ ಮುಂದೆ ಬರುತ್ತೆ. ಈ ಬಾರಿಯೂ ಅಪ್ಪ ಮತ್ತು ಮಗಳ ಬಾಂಧವ್ಯದ ಕಥೆ ಹೇಳೋಕೆ ಬರ್ತಿದೆ ಚುಕ್ಕಿ ತಾರೆ. ಈಗಾಗಲೇ ಪ್ರೋಮೋ ಬಿಡುಗಡೆಯಾಗಿದ್ದು, ಭಾರಿ ಸದ್ದು ಮಾಡುತ್ತಿದೆ.
ಬಿಗ್ ಬಾಸ್ ಸೀಸನ್ 6ರ (Bigg Boss Season 6 ) ರನ್ನರ್ ಅಪ್ ಆಗಿರುವ ಗಾಯಕ ಮತ್ತು ಸಂಗೀತ ನಿರ್ದೇಶಕ ನವೀನ್ ಸಜ್ಜು ಚುಕ್ಕಿ ತಾರೆ ಮೂಲಕ ಕಿರುತೆರೆಗೆ ಅದರಲ್ಲೂ ನಟನಾ ಲೋಕಕ್ಕೆ ಎಂಟ್ರಿ ಕೊಡ್ತಿದ್ದಾರೆ. ಹೊಸ ಧಾರಾವಾಹಿಯಲ್ಲಿ ಪ್ರಮುಖ ಪಾತ್ರದಲ್ಲಿ ನವೀನ್ ಅಭಿನಯಿಸಲಿದ್ದಾರೆ.
ಮಗಳನ್ನು ದೇವತೆಯಂತೆ ಪ್ರೀತಿಸೋ ಅಪ್ಪನಾಗಿ ನವೀನ್ ಸಜ್ಜು (Naveen Sajju) ಅಭಿನಯಿಸಿದ್ರೆ, ಫೈಟ್ ಮಾಡದಿದ್ರೂ ಅಪ್ಪನೇ ತನ್ನ ಹೀರೋ ಎನ್ನುವ ಮಗಳು ಚುಕ್ಕಿ ಪಾತ್ರದಲ್ಲಿ ನಮ್ಮಮ್ಮ ಸೂಪರ್ ಸ್ಟಾರ್ ಖ್ಯಾತಿಯ ಮಹಿತಾ (Mahitha) ಅಭಿನಯಿಸುತ್ತಿದ್ದಾರೆ. ಇಬ್ಬರ ನಟನೆಯೂ ಅದ್ಭುತವಾಗಿ ಮೂಡಿ ಬಂದಿದೆ.
ಕಲರ್ಸ್ ಕನ್ನಡ ವಾಹಿನಿಯು ಪ್ರೋಮೋ (Chukki Taare promo) ಹಂಚಿಕೊಂಡಿದು, ಚುಕ್ಕಿ ಕೇಳೋ ಎಲ್ಲಾ ಪ್ರಶ್ನೆಗಳಿಗೂ ಸರಿಯಾಗಿ ಉತ್ತರಿಸೋ ಅಪ್ಪನಿಗೆ, ಅವಳ ಆ ಒಂದು ಪ್ರಶ್ನೆಗೆ ಮಾತ್ರ ಸಮಾಧಾನಕರ ಉತ್ತರ ಗೊತ್ತಿಲ್ಲ! ಎಂದು ಕ್ಯಾಪ್ಶನ್ ಕೂಡ ಬರೆದಿದೆ. ವಿಡಿಯೋ ನೋಡಿ ಪ್ರೇಕ್ಷಕರು ಭಾವುಕರಾಗುತ್ತಿದ್ದಾರೆ.
ನನಗೆ ಡಿಶ್ಯೂಂ ಡಿಶ್ಯೂಂ ಹೀರೋಗಳಂದ್ರೆ ಇಷ್ಟ ಎನ್ನುವ ಚುಕ್ಕಿಯ ಮುದ್ದು ಮುದ್ದು ಮಾತಿನಿಂದ ಆರಂಭವಾಗುವ ಪ್ರೋಮೋ, ನಮ್ಮಪ್ಪ ಫೈಟ್ ಮಾಡದೇ ಇದ್ರು ಅವರೇ ನನ್ನ ಸೂಪರ್ ಹೀರೋ ಎನ್ನುತ್ತಾ ಸಾಗುತ್ತದೆ. ಮಗಳನ್ನು ಎಂದಿಗೂ ನೆಲದ ಮೇಲೆ ಬಿಡದ ಅಪ್ಪ, ಅಪ್ಪನನ್ನು ಏನೇ ಕೇಳಿದ್ರೂ ಆಗೋದೆ ಇಲ್ಲ ಎನ್ನುವ ಮಾತೆ ಇಲ್ಲ ಎನ್ನುವ ಮಾತು ಹೀಗೆ ಸಾಗುತ್ತದೆ.
ಕೊನೆ ಸೀನ್ ನಲ್ಲಿ ತಮ್ಮೂರ ಜಾತ್ರೆಯಲ್ಲಿ ಮಗಳು ಚುಕ್ಕಿಯನ್ನು ತಂದೆ ಎತ್ತಿಕೊಂಡೇ ದೇವರ ಮೆರವಣಿಗೆ ತೋರಿಸುತ್ತಾನೆ. ಆಗ ಚುಕ್ಕಿ ಅಪ್ಪಾ... ಎಲ್ಲರೂ ಕಳಗಡೆ ನಿಂತು ನೋಡ್ತಾ ಇದ್ದಾರೆ, ಆದ್ರೆ ನೀನು ಮಾತ್ರ ನನ್ನ ಯಾಕೆ ಎತ್ಕೊಂಡಿದೀಯಾ?ʼ ಅಂದಾಗ ಅಪ್ಪ, ʼಚುಕ್ಕಿ... ನನ್ನ ತಪಸ್ಸಿಗೆ ಹುಟ್ಟಿರೋ ದೇವತೆ ನೀನು... ಹೀಗಾಗಿ ನಿನ್ನ ಕೆಳಗಡೆ ಇಳಿಸಲು ಆಗುತ್ತಾ?ʼ ಎನ್ನುತ್ತಾ ಆಕೆಯ ರಾಡ್ ಹಾಕಿದ ಕಾಲುಗಳನ್ನು ನೋಡಿ ಕಣ್ಣೀರು ಒರೆಸುತ್ತಾನೆ ಅಪ್ಪ.
ಯಾವಾಗಲೂ ಅದೇ ಪ್ರೀತಿ ದ್ವೇಷದ ಕಥೆ ನೋಡಿರುವ ಪ್ರೇಕ್ಷಕರಿಗೆ ಇದೀಗ ಹೊಸ ವಿಭಿನ್ನ ಕಥೆ ನೋಡಿ ತುಂಬಾನೆ ಖುಷಿಯಾಗಿದೆ. ಇನ್ನು ಈ ಸೀರಿಯಲ್ ನಲ್ಲಿ ದಿವ್ಯಶ್ರೀ ಅವರು ಸಜ್ಜು ಅವರ ಪತ್ನಿಯಾಗಿ ಅಭಿನಯಿಸುತ್ತಿದ್ದಾರೆ. ಶೀಘ್ರದಲ್ಲೇ ಸೀರಿಯಲ್ (serial) ತೆರೆಕಾಣಲಿದೆ, ಯಾವಾಗ ಅನ್ನೋದನ್ನು ಕಾದು ನೋಡಬೇಕು.