ಒಂದು ರಾತ್ರಿ, ಒಂದು ಸಸ್ಪೆನ್ಸ್: ದಟ್ಟ ಕಾಡಿನಲ್ಲಿ ಮಿಸ್ಟ್ರಿ ಥ್ರಿಲ್ಲರ್ ಕಥೆ 'ವೃತ್ತ'

ಮಿಸ್ಟ್ರಿ ಥ್ರಿಲ್ಲರ್‌ ಕಥಾಹಂದರದ ವೃತ್ತ ಚಿತ್ರದಲ್ಲಿ ನಾಯಕ ಸಿದ್ಧಾರ್ಥ ಒಂದು ಫೋನ್‌ ಕರೆಯಿಂದ ದಾರಿ ತಪ್ಪುತ್ತಾನೆ.

‘ವೃತ್ತ’ ಹೊಸಬರೇ ಸೇರಿಕೊಂಡು ನಿರ್ಮಿಸುತ್ತಿರುವ ಸಿನಿಮಾ. ಆಗಸ್ಟ್‌ 1ರಂದು ಬಿಡುಗಡೆಯಾಗಲಿದೆ. ಮಿಸ್ಟ್ರಿ ಥ್ರಿಲ್ಲರ್‌ ಕಥಾಹಂದರದ ಈ ಚಿತ್ರದಲ್ಲಿ ನಾಯಕ ಸಿದ್ಧಾರ್ಥ ಒಂದು ಫೋನ್‌ ಕರೆಯಿಂದ ದಾರಿ ತಪ್ಪುತ್ತಾನೆ.

ಆತನ ಮನಸ್ಥಿತಿಯ ಮೇಲೆ ಸಿನಿಮಾದ ಕಥೆ ಕೇಂದ್ರೀಕೃತವಾಗಿದೆ. ಚೈತ್ರಾ ಆಚಾರ್‌ ವಿಶೇಷ ಪಾತ್ರವೊಂದರಲ್ಲಿ ಕಾಣಿಸಿಕೊಂಡಿದ್ದಾರೆ. ಸತೀಶ್‌ ನೀನಾಸಂ ಈ ಸಿನಿಮಾವನ್ನು ಪ್ರಸ್ತುತ ಪಡಿಸುತ್ತಿದ್ದಾರೆ.

ಲಿಖಿತ್ ಕುಮಾರ್‌ ನಿರ್ದೇಶನದ ಈ ಸಿನಿಮಾವನ್ನು ಟಿ ಶಿವಕುಮಾರ್‌ ನಿರ್ಮಾಣ ಮಾಡಿದ್ದಾರೆ. ಮಾಹಿರ್‌ ಮೊಯ್ಯುದ್ದೀನ್‌ ನಾಯಕ. ಹರಿಣಿ ಸುಂದರರಾಜನ್‌ ನಾಯಕಿ.

ಈ ಬಗ್ಗೆ ವಿವರ ನೀಡಿದ ಕತೆಗಾರ ಯೋಗಿ, ಈ ಸಿನಿಮಾ ಒಂದು ರಾತ್ರಿ ನಡೆಯುವ ಘಟನೆ. ಸಿನಿಮಾದ ಶೇ.90ರಷ್ಟು ಭಾಗ ನಾಯಕನೊಬ್ಬನೇ ಇರುತ್ತಾನೆ. ದಟ್ಟ ಕಾಡಿನಲ್ಲಿ ಮುಖ್ಯ ಕಥಾಹಂದರ ನಡೆಯುತ್ತದೆ.

ನೀವು ನಿಜಕ್ಕೂ ಭಯ ಪಡುವುದು ಬಯಲಿನ ಕತ್ತಲಿಗಾ ಅಥವಾ ನಿಮ್ಮೊಳಗಿನ ಅಸಹನೀಯ ಮೌನಕ್ಕಾ ಅನ್ನೋದನ್ನು ಈ ಸಿನಿಮಾ ಹೇಳುತ್ತದೆ ಎಂದು ಹೇಳಿದ್ದಾರೆ.