ಪೇರೆಂಟಿಂಗ್‌ನಲ್ಲಿ ಮುಖ್ಯವಾದ ವಿಷಯವೆಂದರೆ ಮಕ್ಕಳನ್ನು ಹಾಯಾಗಿ ನಿದ್ರಿಸಲು ಬಿಡುವುದು. ಸಾಮಾನ್ಯವಾಗಿ ಮಕ್ಕಳು ಪೇರೆಂಟ್ಸ್ ಹತ್ತಿರವಿದ್ದಾಗ ಪ್ರಶಾಂತವಾಗಿ ನಿದ್ರಿಸುತ್ತಾರೆ. ಆದರೆ ಎಷ್ಟು ವಯಸ್ಸಿನವರೆಗೆ ಮಕ್ಕಳು ತಂದೆ ತಾಯಿಯರ ಪಕ್ಕದಲ್ಲಿ ಮಲಗಬೇಕು ಎಂಬುದು ಬಹಳಷ್ಟು ಜನರಿಗೆ ತಿಳಿದಿರುವುದಿಲ್ಲ. ಮಕ್ಕಳು ತಂದೆ ತಾಯಿಯರ ಜೊತೆ ಮಲಗುವುದರಿಂದ ಉಂಟಾಗುವ ಉಪಯೋಗಗಳು, ಅನಾನುಕೂಲಗಳ ಬಗ್ಗೆ ಸಂಪೂರ್ಣ ಮಾಹಿತಿ ಇಲ್ಲಿದೆ.
ಭಾರತದಂತಹ ಅನೇಕ ದೇಶಗಳಲ್ಲಿ ಮಕ್ಕಳು ತಮ್ಮ ತಂದೆ ತಾಯಿಯರ ಜೊತೆ ಮಲಗುವುದು ಸರ್ವೇ ಸಾಮಾನ್ಯ. ತಂದೆ ತಾಯಿಯರ ಜೊತೆ ಜೀವಿಸುವಂತೆಯೇ ಅವರ ಜೊತೆ ಮಲಗುವುದು ಕೂಡ ವಾಡಿಕೆ. ಭಾರತದಲ್ಲಿ ಮಕ್ಕಳ ಜೊತೆ ಮಲಗುವುದನ್ನು ತಂದೆ ತಾಯಿಗಳು ತಪ್ಪಾಗಿ ಭಾವಿಸುವುದಿಲ್ಲ. ಆದರೆ ಕೆಲವು ದೇಶಗಳಲ್ಲಿ ಪೇರೆಂಟ್ಸ್ ತಮ್ಮ ಪ್ರೈವಸಿಗೆ ಭಂಗವಾಗುತ್ತದೆ ಎಂದು ಮಕ್ಕಳನ್ನು ಬೇರೆ ಕೋಣೆಯಲ್ಲೋ ಅಥವಾ ಬೇರೆ ಬೆಡ್ ಮೇಲೋ ಮಲಗಿಸುತ್ತಾರೆ. ಇದೀಗ ಇದೇ ವಿಷಯ ಚರ್ಚಾಸ್ಪದವಾಗಿದೆ. ಮಕ್ಕಳು ತಂದೆ ತಾಯಿಯರ ಜೊತೆ ಮಲಗುವುದರಿಂದ ಉಂಟಾಗುವ ಪ್ರಯೋಜನಗಳು, ಅನಾನುಕೂಲಗಳ ಬಗ್ಗೆ ಜನರು ಚರ್ಚಿಸುತ್ತಿದ್ದಾರೆ.
ಮಕ್ಕಳ ಜೊತೆ ತಂದೆ ತಾಯಿಗಳು ಮಲಗುವುದರಿಂದ ಅವರ ನಡುವೆ ಭಾವನಾತ್ಮಕ ಸಂಬಂಧ ಬೆಳೆಯುತ್ತದೆ. ಭವಿಷ್ಯದಲ್ಲಿ ಅವರ ನಡುವಿನ ಬಾಂಧವ್ಯ ಇನ್ನಷ್ಟು ಗಟ್ಟಿಯಾಗುತ್ತದೆ. ನಡೆಯಲಾರದ ಮಕ್ಕಳನ್ನು ದೂರ ಮಾಡಿ ಮಲಗಿಸುವುದು ಅಷ್ಟು ಸೂಕ್ತವಲ್ಲ. ಅವರನ್ನು ಪಕ್ಕದಲ್ಲೇ ಮಲಗಿಸಿಕೊಳ್ಳುವುದರಿಂದ ರಾತ್ರಿ ಹೊತ್ತು ಹಾಲುಣಿಸಲು ಅನುಕೂಲವಾಗುತ್ತದೆ. ಇದು ತಾಯಿ ಮತ್ತು ಮಗುವಿಗೆ ಸುಲಭವಾಗುತ್ತದೆ. ಮಗುವಿಗೂ ಆರೋಗ್ಯ ಸಮಸ್ಯೆಗಳು ಬರುವುದಿಲ್ಲ. ರಾತ್ರಿ ಹೊತ್ತು ಮಗು ಅತ್ತರೆ ಸಮಾಧಾನಪಡಿಸಲು, ಮಲಗಿಸಲು ಅನುಕೂಲವಾಗುತ್ತದೆ. ದೂರ ಮಲಗಿಸಿದರೆ ತಾಯಿ ಅಥವಾ ತಂದೆ ಎದ್ದು ಹೋಗಿ ಸಮಾಧಾನಪಡಿಸಬೇಕಾಗುತ್ತದೆ. ಪಕ್ಕದಲ್ಲೇ ಮಲಗುವುದರಿಂದ ತಂದೆ ತಾಯಿಗಳು, ಮಕ್ಕಳು ಚೆನ್ನಾಗಿ ನಿದ್ರಿಸಬಹುದು.
ಮಕ್ಕಳ ಮಾನಸಿಕ ಬೆಳವಣಿಗೆ ಕಡಿಮೆ ಇರುವುದರಿಂದ ಅವರು ಪ್ರತಿಯೊಂದು ವಿಷಯಕ್ಕೂ ಭಯಪಡುತ್ತಾರೆ. ಹಗಲಿನಲ್ಲಿ ನೋಡಿದ ಅಥವಾ ಕೇಳಿದ ವಿಷಯಗಳು ರಾತ್ರಿ ಕನಸಿನ ರೂಪದಲ್ಲಿ ಬರುತ್ತವೆ. ಹೀಗಾಗಿ ಅವರು ಆತಂಕಕ್ಕೊಳಗಾಗುವ ಸಾಧ್ಯತೆ ಇರುತ್ತದೆ. ಅಂತಹ ಸಮಯದಲ್ಲಿ ತಂದೆ ತಾಯಿಗಳು ಪಕ್ಕದಲ್ಲಿದ್ದರೆ ಅವರಿಗೆ ಧೈರ್ಯವಾಗಿರುತ್ತದೆ. ಬೇರೆ ಕಡೆ ಮಲಗಿದ್ದರೆ ಅವರು ಕನಸಿನಲ್ಲಿ ಹೆದರಿ ಕಿರುಚುತ್ತಾರೆ. ಇದರಿಂದ ತಂದೆ ತಾಯಿಗಳ ನಿದ್ದೆಯೂ ಕೆಡುತ್ತದೆ. ಇದು ಆಗಾಗ ಆದರೆ ಆರೋಗ್ಯ ಸಮಸ್ಯೆಗಳು ಕಾಡಬಹುದು. ಹೀಗಾಗಿ ತಂದೆ ತಾಯಿಗಳು ಮಕ್ಕಳ ಜೊತೆ ಮಲಗಬೇಕು ಎಂದು ಆರೋಗ್ಯ ತಜ್ಞರು ಸಲಹೆ ನೀಡುತ್ತಾರೆ. ಇದು ಭಾವನಾತ್ಮಕ ಬೆಂಬಲವನ್ನು ಹೆಚ್ಚಿಸುತ್ತದೆ. ರಾತ್ರಿ ಹೊತ್ತು ಮಕ್ಕಳನ್ನು ಗಮನಿಸಲು ಸಹಾಯಕವಾಗುತ್ತದೆ.
ಮಕ್ಕಳನ್ನು ಒಮ್ಮೆಲೇ ಬೇರೆ ಮಲಗಿಸುವ ಬದಲು ನಿಧಾನವಾಗಿ ಅಭ್ಯಾಸ ಮಾಡಿಸಬೇಕು. ಯಾವುದಾದರೂ ಸಮಾರಂಭ ಇದ್ದಾಗ ಬೇರೆ ಮಕ್ಕಳ ಜೊತೆ ಮಲಗಲು ಬಿಡಬೇಕು. ಸಂಬಂಧಿಕರ ಮನೆಗೆ ಹೋದಾಗ ಅವರ ಜೊತೆ ಮಲಗಲು ಬಿಡಬೇಕು. ಹೀಗೆ ಮಕ್ಕಳ ವಯಸ್ಸಿಗೆ ತಕ್ಕಂತೆ ಅವರಲ್ಲಿ ಆಲೋಚನಾ ಶಕ್ತಿ ಹೆಚ್ಚಾಗುವಂತೆ ನೋಡಿಕೊಳ್ಳಬೇಕು. ಬಲವಂತವಾಗಿ ಬೇರೆ ಕೋಣೆಯಲ್ಲಿ ಮಲಗಿಸಬಾರದು. ಇದರಿಂದ ಅವರು ಅಭದ್ರತೆಗೆ ಒಳಗಾಗುತ್ತಾರೆ. ನಿದ್ದೆಯ ವಿಷಯದಲ್ಲಿ ನಿರ್ಧಾರ ತೆಗೆದುಕೊಳ್ಳುವ ಸ್ವಾತಂತ್ರ್ಯವನ್ನು ಮಕ್ಕಳಿಗೆ ನೀಡಬೇಕು. ಅವರ ಭಾವನೆಗಳಿಗೆ ಬೆಲೆ ನೀಡಬೇಕು. ಅವರಲ್ಲಿ ಆಲೋಚನಾ ಶಕ್ತಿ ಹೆಚ್ಚಾದಾಗ ಸ್ವಯಂ ಆಗಿ ಬದಲಾವಣೆ ಆಗುತ್ತದೆ. ವಯಸ್ಸಿಗೆ ತಕ್ಕಂತೆ ಮನೆಯಲ್ಲಿ ಮಂಚ ಕೂಡ ಸರಿ ಹೊಂದದೇ ಇರಬಹುದು. ಆಗ ಅವರೇ ಯೋಚಿಸಿ ಬೇರೆ ಬೆಡ್ ಮೇಲೆ ಮಲಗುತ್ತೇವೆ ಎಂದು ಹೇಳಬಹುದು. ಆ ಸ್ವಾತಂತ್ರ್ಯವನ್ನು ನೀವು ನೀಡಬೇಕು. ಮಕ್ಕಳು ದೊಡ್ಡವರಾದ ಮೇಲೆ ಇಂತಹ ವಿಷಯಗಳನ್ನು ನೆನಪಿಸಿಕೊಳ್ಳುತ್ತಾರೆ. ಕೌಟುಂಬಿಕ ಸಂಬಂಧಗಳು ಗಟ್ಟಿಯಾಗಿರಬೇಕೆಂದರೆ ಇಂತಹ ಕೆಲವು ವಿಷಯಗಳಿಗೆ ಮಹತ್ವ ನೀಡಬೇಕು. ತಂದೆ ತಾಯಿಯರ ಜೊತೆ ಮಲಗುವುದರಿಂದ ಆಗುವ ನಷ್ಟ ಏನೆಂದರೆ.. ಮಕ್ಕಳು ತಮ್ಮ ತಂದೆ ತಾಯಿಯರ ಸಾಮೀಪ್ಯತೆ ಮತ್ತು ಭದ್ರತೆಯನ್ನು ಅವಲಂಬಿಸಿರುತ್ತಾರೆ. ಇದರಿಂದ ಅವರು ಸ್ವತಂತ್ರವಾಗಿ ಮಲಗುವ ಅಭ್ಯಾಸವನ್ನು ಮಾಡಿಕೊಳ್ಳುವುದಿಲ್ಲ. ಒಂದು ಹಂತದ ನಂತರ ಮಕ್ಕಳು ಒಬ್ಬರೇ ಮಲಗುವ ಅಭ್ಯಾಸ ಮಾಡಿಕೊಳ್ಳಬೇಕು. ಇದನ್ನು ತಂದೆ ತಾಯಿಗಳು ಪ್ರೋತ್ಸಾಹಿಸಬೇಕು.
ಮಕ್ಕಳು ಚಿಕ್ಕವರಿದ್ದಾಗ ತಂದೆ ತಾಯಿಗಳು ಅವರ ಜೊತೆ ಹೆಚ್ಚು ಅಟ್ಯಾಚ್ ಆಗಿರುತ್ತಾರೆ. ಈ ಕಾರಣಕ್ಕೆ ಮಕ್ಕಳ ಜೊತೆ ಮಲಗುವುದು ತಪ್ಪಲ್ಲ. ಆದರೆ ಮಕ್ಕಳು ದೊಡ್ಡವರಾದಂತೆ ಅವರು ಒಬ್ಬರೇ ಮಲಗುವ ಅಭ್ಯಾಸ ಮಾಡಿಕೊಳ್ಳಬೇಕು. ಕೆಲವೊಮ್ಮೆ ಮಕ್ಕಳು ಒಬ್ಬರೇ ಮಲಗಲು ಬಯಸುತ್ತಾರೆ. ಆದರೆ ತಂದೆ ತಾಯಿಗಳು ಅದಕ್ಕೆ ಅವಕಾಶ ನೀಡುವುದಿಲ್ಲ. ಇದು ಸರಿಯಲ್ಲ. ನೀವು ಹೀಗೆ ಮಾಡಿದರೆ ನಿಮ್ಮ ಮಗು ನೀವು ಇಲ್ಲದೆ ಮಲಗುವುದಿಲ್ಲ. ಇದು ನಿಮಗೂ ಕೂಡ ಸಮಸ್ಯೆಯಾಗುತ್ತದೆ. ಹೀಗಾಗಿ ನಿಮ್ಮ ಮಗುವನ್ನು ಒಮ್ಮೆಲೇ ಒಬ್ಬರೇ ಮಲಗು ಎಂದು ಬಲವಂತ ಮಾಡಬೇಡಿ. ಮೊದಲು ವಾರದಲ್ಲಿ ಎರಡು ಅಥವಾ ಮೂರು ಬಾರಿ ಅವರನ್ನು ಒಬ್ಬರೇ ಮಲಗಲು ಬಿಡಿ. ನಂತರ ನೀವು ನಿಧಾನವಾಗಿ ಒಬ್ಬರೇ ಮಲಗುವ ದಿನಗಳನ್ನು ಹೆಚ್ಚಿಸಬಹುದು. ಹೀಗೆ ಮಾಡುತ್ತಾ ಹೋದರೆ ಒಬ್ಬರೇ ಮಲಗುವ ಅಭ್ಯಾಸ ಆಗುತ್ತದೆ. ಮಕ್ಕಳು ಒಬ್ಬರೇ ಮಲಗಲು ಸೂಕ್ತ ವಯಸ್ಸು 8 ವರ್ಷ. ಆ ವಯಸ್ಸಿನಿಂದ ಮಕ್ಕಳನ್ನು ಒಬ್ಬರೇ ಮಲಗಲು ಪ್ರಯತ್ನಿಸಬಹುದು. ಈ ವಯಸ್ಸಿನ ನಂತರ ಮಕ್ಕಳು ದೊಡ್ಡವರಾಗುತ್ತಾರೆ. ಹೀಗಾಗಿ 8 ವರ್ಷದ ನಂತರ ಮಕ್ಕಳನ್ನು ಒಬ್ಬರೇ ಮಲಗಲು ಬಿಡಬೇಕು ಎಂದು ತಜ್ಞರು ಹೇಳುತ್ತಾರೆ.