ಭಾರತದ ಹಾಲಿ ಟಾಪ್-10 ಹೀರೋಗಳ ಪಟ್ಟಿ ಬಿಡುಗಡೆ; ಕನ್ನಡದ ಯಶ್, ರಿಷಭ್, ಸುದೀಪ್‌ಗೆ ಸ್ಥಾನವಿದೆಯೇ?

ಭಾರತದಲ್ಲಿ ಇತ್ತೀಚೆಗೆ ಬಾಲಿವುಡ್‌ ಅನ್ನೂ ಹಿಂದಿಕ್ಕಿ ದಕ್ಷಿಣ ಭಾರತದ ಸಿನಿಮಾಗಳು ನಾಗಾಲೋಟದಲ್ಲಿ ಮುನ್ನುಗ್ಗುತ್ತಿವೆ. ಆದರೆ, ಹಾಲಿಯಾಗಿ ಕಳೆದ ಡಿಸೆಂಬರ್ ತಿಂಗಳಲ್ಲಿ ಭಾರತದ ಟಾಪ್-10 ಸ್ಥಾನದಲ್ಲಿರುವ ಹೀರೋಗಳ ಪಟ್ಟಿಯನ್ನು ಒರ್ಮ್ಯಾಕ್ಸ್ ಮೀಡಿಯಾ ಸಂಸ್ಥೆ ಬಿಡುಗಡೆ ಮಾಡಿದೆ. ಇದರಲ್ಲಿ ಕನ್ನಡ ಯಾವ ನಟರು ಸ್ಥಾನ ಪಡೆದಿದ್ದಾರೆ ಎಂಬುದನ್ನು ನೀವೇ ನೋಡಿ..

ಭಾರತದಲ್ಲಿ ಪ್ಯಾನ್ ಇಂಡಿಯಾ ಸಿನಿಮಾಗಳು ಹೆಚ್ಚಾಗಿ  ದಕ್ಷಿಣ ಭಾರತದಿಂದಲೇ ಬರುತ್ತಿವೆ. ಅದರಲ್ಲಿ ತೆಲುಗು, ಕನ್ನಡ ಚಿತ್ರರಂಗದಿಂದಲೇ ಹೆಚ್ಚು ಪ್ಯಾನ್ ಇಂಡಿಯಾ ಸಿನಿಮಾ ಭಾರತದಲ್ಲಿ ಕಮಾಲ್ ಮಾಡುತ್ತಿವೆ. ಬಾಹುಬಲಿ, ಆರ್‌ಆರ್‌ಆರ್, ಪುಷ್ಪ, ಕೆಜಿಎಫ್, ಕಾಂತಾರ ಇತ್ಯಾದಿ ಸಿನಿಮಾಗಳು ಭಾರತೀಯ ಬಾಕ್ಸ್ ಆಫೀಸ್‌ನಲ್ಲಿ ಧೂಳೆಬ್ಬಿಸಿವೆ. ಹೀಗಾಗಿ ಬಾಲಿವುಡ್ ಸಿನಿಮಾಗಳು ಸೈಡ್‌ಲೈನ್ ಆಗುತ್ತಾ ಸಾಗುತ್ತಿವೆ.

ಇದೀಗ ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಮಿಂಚುತ್ತಿರುವ ಎಲ್ಲ ನಟರನ್ನು ಒಳಗೊಂಡಂತೆ ಯಾವ ನಟರು ಅತಿಹೆಚ್ಚು ಪ್ರಸಿದ್ಧಿ ಆಗಿದ್ದಾರೆ ಎಂಬುದನ್ನು ವಿಶ್ಲೇಷಣೆ ಮಾಡಿ ಒರ್ಮ್ಯಾಕ್ಸ್ ಮೀಡಿಯಾ ಎಂಬ ಸಂಸ್ಥೆಯು ವರದಿ ಬಿಡುಗಡೆ ಮಾಡಿದೆ. ಈ ಒರ್ಮ್ಯಾಕ್ಸ್ ಮೀಡಿಯಾ ಸಂಸ್ಥೆಯು ಡಿಸೆಂಬರ್ ತಿಂಗಳ ಭಾರತದ ಟಾಪ್-10 ನಟರ ಪಟ್ಟಿ ಬಿಡುಗಡೆ ಮಾಡಿದೆ. ಈ ಪಟ್ಟಿಯಲ್ಲಿ ಟಾಲಿವುಡ್ ನಟರದ್ದೇ ಕಾರುಬಾರು. ಹಾಗಾದರೆ,  ಕನ್ನಡ ಚಿತ್ರರಂಗದ ಯಾವ ನಟರು ಈ ಟಾಪ್-10ರಲ್ಲಿ ಸ್ಥಾನ ಪಡೆದಿದ್ದಾರೆ ಎಂಬುದು ಕುತೂಹಲ ಮೂಡಿಸಿದೆ.

ಒರ್ಮ್ಯಾಕ್ಸ್ ಮೀಡಿಯಾ ಬಿಡುಗಡೆ ಮಾಡಿದ ಟಾಪ್ 10 ಸ್ಟಾರ್ ನಟರ ಪಟ್ಟಿಯಲ್ಲಿ 5 ಸ್ಥಾನಗಳನ್ನು ತೆಲುಗು ಚಿತ್ರರಂಗದ ನಾಯಕರೇ ಪಡೆದುಕೊಂಡಿದ್ದಾರೆ. ಉಳಿದ 5 ಸ್ಥಾನಗಳನ್ನು ಬಾಲಿವುಡ್, ಕಾಲಿವುಡ್, ಮಾಲಿವುಡ್ ಹಾಗೂ ಸ್ಯಾಂಡಲ್‌ವುಡ್ ಚಿತ್ರರಂಗದ ನಾಯಕರು ಹಂಚಿಕೊಂಡಿದ್ದಾರೆ. , ಅಗ್ರ ಸ್ಥಾನ ಕೂಡ ಟಾಲಿವುಡ್ ಹೀರೋಗಳ ಪಾಲಾಗಿದೆ. 

1- ಯಂಗ್ ರೆಬೆಲ್ ಸ್ಟಾರ್ ಪ್ರಭಾಸ್- ತೆಲುಗು
2- ಐಕಾನ್ ಸ್ಟಾರ್ ಅಲ್ಲು ಅರ್ಜುನ್ - ತೆಲುಗು
3. ದಳಪತಿ ವಿಜಯ್ - ತಮಿಳು
4. ಬಾಲಿವುಡ್ ಕಿಂಗ್ ಶಾರುಖ್ ಖಾನ್ - ಹಿಂದಿ
5. ಯಂಗ್ ಟೈಗರ್ ಜ್ಯೂ.ಎನ್‌ಟಿಆರ್ - ತೆಲುಗು
6. ತಾಲ ಅಜಿತ್ ಕುಮಾರ್ - ತಮಿಳು
7. ಸೂಪರ್ ಸ್ಟಾರ್ ಮಹೇಶ್ ಬಾಬು- ತೆಲುಗು
8. ಮೆಗಾ ಪವರ್ ಸ್ಟಾರ್ ರಾಮ್‌ಚರಣ್ - ತೆಲುಗು
9. ಬಾಲಿವುಡ್‌ನ ಸಲ್ಮಾನ್ ಖಾನ್ - ಹಿಂದಿ
10. ಅಕ್ಷಯ್ ಕುಮಾರ್ - ಹಿಂದಿ

ಕನ್ನಡದ ಯಾವುದೇ ನಟರು ಸ್ಥಾನ ಪಡೆದಿಲ್ಲ: ಒರ್ಮ್ಯಾಕ್ಸ್ ಮೀಡಿಯಾ ಬಿಡುಗಡೆ ಮಾಡಿದ ಡಿಸೆಂಬರ್ ತಿಂಗಳ ಟಾಪ್-10 ನಟರ ಪಟ್ಟಿಯಲ್ಲಿ ಕನ್ನಡ ಚಿತ್ರರಂಗದಿಂದ ಯಾರೊಬ್ಬರೂ ಸ್ಥಾನ ಪಡೆದುಕೊಂಡಿಲ್ಲ. ಕಳೆದ 2 ವರ್ಷಗಳಿಂದ ರಾಕಿಂಗ್ ಸ್ಟಾರ್ ಯಶ್ ಅವರ ಯಾವುದೇ ಸಿನಿಮಾ ಬಿಡುಗಡೆ ಆಗಿಲ್ಲ. ರಿಷಭ್ ಶೆಟ್ಟಿ ಅವರು ಕಾಂತಾರ ಸಿನಿಮಾದಲ್ಲಿ ಕಾಣಿಸಿಕೊಂಡ ನಂತರ ಗ್ಯಾಪ್ ಮಾಡಿದ್ದಾರೆ. ಕಳೆದ ವರ್ಷ ರಕ್ಷಿತ್ ಶೆಟ್ಟಿ ಸಪ್ತ ಸಾಗರದಾಚೆ ಎಲ್ಲೋ ಸೈಡ್-ಬಿ ಬಿಡುಗಡೆ ಆದರೂ ಅವರ ಖ್ಯಾತಿ ವರ್ಷ ಪೂರ್ತಿ ಕೊಂಡಾಡುವಷ್ಟು ದೀರ್ಘ ಕಾಲ ಉಳಿಯಲಿಲ್ಲ.

ಕನ್ನಡ ಚಿತ್ರರಂಗದ ಬಾದ್‌ಷಾ ಕಿಚ್ಚ ಸುದೀಪ್ ಅವರ 'ಮ್ಯಾಕ್ಸ್' ಸಿನಿಮಾ ಡಿಸೆಂಬರ್‌ನಲ್ಲಿ ಕೊನೆಯ ವಾರದಲ್ಲಿ ಬಿಡುಗಡೆ ಆಗಿದೆ. ಆದ್ದರಿಂದ ಡಿಸೆಂಬರ್ ತಿಂಗಳ ಟಾಪ್-10 ನಟರದಲ್ಲಿ ಸುದೀಪ್ ಕೂಡ ಸ್ಥಾನ ಪಡೆದಿಲ್ಲ. ಉಳಿದಂತೆ, ಗೋಲ್ಡನ್ ಸ್ಟಾರ್ ಗಣೇಶ್ ಅವರ ಕೃಷ್ಣಂ ಪ್ರಣಯಂ ಸಖಿ ಹಾಗೂ ದುನಿನಾ ವಿಜಯ್ ಅವರ ಭೀಮ ಸಿನಿಮಾ ಕನ್ನಡದ ಗಡಿ ಬಿಟ್ಟು ಬೇರೆಡೆ ಹೋಗಲಿಲ್ಲ. ಹಾಗಾಗಿ, ರಾಷ್ಟ್ರ ಮಟ್ಟದ ಟಾಪ್-10 ನಟರ ಪಟ್ಟಿಯಲ್ಲಿ ಕನ್ನಡದ ಯಾರೊಬ್ಬರೂ ಸ್ಥಾನ ಪಡೆದಿಲ್ಲ.