ಬೆಂಗಳೂರಿನ ಬೆಡಗಿ, ಕನ್ನಡತಿ, ಮಾಜಿ ವಿಶ್ವಸುಂದರಿ, ಬಾಲಿವುಡ್ ತಾರೆ ಐಶ್ವರ್ಯ ರೈ ಅವರಿಗೆ ವಿಚಿತ್ರ ಖಾಯಿಲೆ ಇದೆಯಾ? ಅದಕ್ಕೇ ಅವರ ರೂಪದಲ್ಲಿ ಈ ಬದಲಾವಣೆಗಳಾಗುತ್ತಿವೆಯಾ? ಎಂಬ ಅನುಮಾನಗಳು ಕಾಡುತ್ತಿವೆ. ಈ ಬಗ್ಗೆ ಸಾಮಾಜಿಕ ಜಾಲತಾಣದಲ್ಲಿಯೂ ಕೆಲವೊಂದಿಷ್ಟು ವಿಡಿಯೋಗಳು ಹರಿದಾಡುತ್ತಿವೆ.
ಕನ್ನಡತಿ ಐಶ್ವರ್ಯ ರೈ ಒಂದು ಕಾಲದಲ್ಲಿ ಯುವಕರ ಕನಸಿನ ರಾಣಿ. ಯಾವಾಗಲೂ ಒಂದಲ್ಲ ಒಂದು ರೀತಿಯಲ್ಲಿ ವೈರಲ್ ಆಗುತ್ತಾರೆ ಈ ಬಾಲಿವುಡ್ ಬ್ಯೂಟಿ. ಈಗ ವಿಚ್ಛೇದನದ ಸುದ್ದಿಯಲ್ಲಿ ಸಿಲುಕಿದ್ದಾರೆ. ಬಚ್ಚನ್ ಕುಟುಂಬದ ಸೊಸೆಯಾಗಿ ಹೋದವರು, ಸುಮಾರು 17 ವರ್ಷಗಳಿಂದ ಕುಟುಂಬದೊಂದಿಗೆ ಸಂತೋಷವಾಗಿದ್ದಾರೆ. ಆದರೆ., ಕಳೆದೊಂದು ವರ್ಷದಿಂದ ಐಶ್ವರ್ಯ ರೈ ವಿಚ್ಛೇದನದ ಸುದ್ದಿ ವೈರಲ್ ಆಗುತ್ತಿದೆ.
ಇದೀಗ ಕುಟುಂಬದಲ್ಲಿ ಮನಸ್ತಾಪ ಬಂದಿದೆ. ಅದಕ್ಕೇ ವಿಚ್ಛೇದನ ಪಡೆಯುತ್ತಿದ್ದಾರೆ ಎಂಬ ಸುದ್ದಿ ವೈರಲ್ ಆಗುತ್ತಿದೆ. ಯಾವ ಕಾರ್ಯಕ್ರಮಕ್ಕೆ ಹೋದರೂ ಗಂಡನ ಜೊತೆ ಹೋಗುತ್ತಿದ್ದ ಐಶ್, ಇದೀಗ ಎಲ್ಲ ಕಡೆಗಳಲ್ಲಿ ಒಬ್ಬರೇ ಹೋಗುತ್ತಿದ್ದಾರೆ. ಇಲ್ಲವಾದರೆ ಮಗಳು ಆರಾಧ್ಯಳನ್ನು ಕರೆದುಕೊಂಡು ಹೋಗುತ್ತಿದ್ದಾರೆ. ಇತ್ತೀಚೆಗೆ ಅಂಬಾನಿ ಮದುವೆಗೂ ಕೂಡ ಕುಟುಂಬ ಸಮೇತ ಹೋಗಿರಲಿಲ್ಲ.
ಅಂಬಾನಿ ಕುಟುಂಬದ ಮದುವೆ ಕಾರ್ಯಕ್ರಮಕ್ಕೆ ಐಶ್ವರ್ಯ ರೈ ತಮ್ಮ ಮಗಳ ಜೊತೆ ಹೋಗಿದ್ದರು. ಆದರೆ, ಇದರಲ್ಲಿ ವಿಚಿತ್ರವೇನೆಂದರೆ, ಅದೇ ಮದುವೆಗೆ ಐಶ್ ಪತಿರಾಯ ಅಭಿಷೇಕ್ ತಮ್ಮ ತಾಯಿ ತಂದೆಯ ಜೊತೆ ಬಂದಿದ್ದರು. ಇವರೆಲ್ಲ ಒಟ್ಟಿಗೆ ಯಾಕೆ ಹೋಗಲಿಲ್ಲ ಎಂಬುದು ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಯಾಗುತ್ತಿದೆ. ಆದರೆ, ಇವರಿಗೆ ವಿಚ್ಛೇದನ ಆಗಿಲ್ಲ, ಒಟ್ಟಿಗೆ ಇದ್ದಾರೆ ಎಂಬುದು ಇನ್ನು ಕೆಲವರ ವಾದ. ಐಶ್ ಕೈಯಲ್ಲಿ ಮದುವೆ ಉಂಗುರ ಇದೆ ಎನ್ನುತ್ತಿದ್ದಾರೆ ಎಂದು ಅಭಿಮಾನಿಗಳು ಹೇಳುತ್ತಿದ್ದಾರೆ.
ಇನ್ನೊಂದೆಡೆ ರೆಡ್ಡಿಟ್‌ನಲ್ಲಿ ಒಬ್ಬ ಸಾಮಾಜಿಕ ಜಾಲತಾಣ ಬಳಕೆದಾರ ಮಾಡಿದ್ದ ಕಾಮೆಂಟ್ ವೈರಲ್ ಆಗಿದೆ. ಐಶ್ವರ್ಯ ರೈಗೆ ಏನೋ ವಿಚಿತ್ರ ಖಾಯಿಲೆ ಬಂದಿರಬಹುದು. ಅದಕ್ಕೇ ಅವರ ದೇಹದಲ್ಲಿ ಬದಲಾವಣೆಗಳು ಕಾಣಿಸಿಕೊಳ್ಳುತ್ತಿವೆ. ಒಂದು ಕಾಲದಲ್ಲಿ ಸಣ್ಣಗೆ ಇದ್ದವರು ಈಗ ತುಂಬಾ ದಪ್ಪ ಆಗಿದ್ದಾರೆ. ಅವರಲ್ಲಿ ಎಲ್ಲವೂ ವ್ಯತ್ಯಾಸ ಕಾಣಿಸುತ್ತಿದೆ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಈ ಕಾಮೆಂಟ್ ತುಂಬಾ ವೈರಲ್ ಆಗುತ್ತಿದೆ.
ಈ ಹಿಂದೆಯೂ ಕೂಡ ಬಾಲಿವುಡ್‌ನಲ್ಲಿ ಈ ವಿಷಯದ ಬಗ್ಗೆ ಚರ್ಚೆ ನಡೆದಿತ್ತು. ಐಶ್ವರ್ಯ ರೈ ಹೀಗೇಕಾದ್ರು? ಅವರು ಫಿಟ್ ಆಗಿ ಇರುತ್ತಾರೆ, ಆರೋಗ್ಯದ ಬಗ್ಗೆ ತುಂಬಾ ಕಾಳಜಿ ವಹಿಸುತ್ತಾರೆ ಅಂತ ಎಲ್ಲರೂ ಅಂದುಕೊಂಡಿದ್ದರು. ಇದೀಗ ಅವರ ದಪ್ಪ ಆಗಿರುವುದನ್ನು ನೋಡಿ ರೆಡ್ಡಿಟ್‌ನಲ್ಲಿ ಮಾಡಿರುವ ಕಾಮೆಂಟ್ ಅನ್ನು ಕೆಲವರು ಬೆಂಬಲಿಸುತ್ತಿದ್ದಾರೆ. ಆದರೆ, ಈ ಬಗ್ಗೆ ಯಾವುದೇ ಅಧಿಕೃತ ಮಾಹಿತಿಯನ್ನು ಐಶ್ವರ್ಯಾ ರೈ ಆಗಲಿ ಅಥವಾ ಅವರ ಕುಟುಂಬ ಸದಸ್ಯರಾಗಲೀ ಎಲ್ಲಿಯೂ ಹೇಳಿಕೊಂಡಿಲ್ಲ.
ಬೆಂಗಳೂರಿನ ಮೂಲದ ಐಶ್ವರ್ಯ, ಮಾಡೆಲ್ ಆಗಿ ವೃತ್ತಿಜೀವನ ಆರಂಭಿಸಿದರು. ಸೌಂದರ್ಯ ಸ್ಪರ್ಧೆಗಳಲ್ಲಿ ಮಿಸ್ ಇಂಡಿಯಾ, ಮಿಸ್ ಯೂನಿವರ್ಸ್ ಆಗಿದ್ದರು. ನಂತರ, ತಮಿಳು ಚಿತ್ರದ ಮೂಲಕ ಚಿತ್ರರಂಗ ಪ್ರವೇಶಿಸಿದ ಅವರು, ತಮಿಳಿನಲ್ಲಿ ಹೆಚ್ಚು ಚಿತ್ರಗಳನ್ನು ಮಾಡಿದ್ದಾರೆ. ನಂತರ ಬಾಲಿವುಡ್‌ಗೆ ಹೋದರು. ಅಲ್ಲೇ ನೆಲೆಸಿದರು. ಮಧ್ಯೆ ಮಧ್ಯೆ ತಮಿಳು ಚಿತ್ರಗಳನ್ನು ಮಾಡುತ್ತಾರೆ. ಆದರೆ ಅವರು ಯಾವುದೇ ಕನ್ನಡ ಅಥವಾ ತೆಲುಗು ಚಿತ್ರಗಳನ್ನು ಮಾಡಿಲ್ಲ.
ಬಾಲಿವುಡ್‌ಗೆ ಹೆಜ್ಜೆ ಇಟ್ಟಾಗ ಆರಂಭದಲ್ಲಿ ವಿವೇಕ್ ಓಬೆರಾಯ್ ಪ್ರೀತಿಸಿದ ಐಶ್ವರ್ಯ ರೈ, ನಂತರ ಸಲ್ಮಾನ್ ಖಾನ್ ಜೊತೆ ಡೇಟಿಂಗ್ ಮಾಡಿದರು. ಕೊನೆಗೆ 2007ರಲ್ಲಿ ಅಭಿಷೇಕ್ ಬಚ್ಚನ್ ಅವರನ್ನು ಮದುವೆಯಾಗಿ ಅಮಿತಾಬ್ ಮನೆಗೆ ಸೊಸೆಯಾದರು. ಇವರಿಗೆ ಆರಾಧ್ಯ ಎಂಬ ಮಗಳೂ ಇದ್ದಾಳೆ. ಇವರ ವಿಚ್ಛೇದನದ ಬಗ್ಗೆ ಯಾವಾಗ ಬಹಿರಂಗವಾಗಿ ಮಾತನಾಡುತ್ತಾರೆ ಎಂದು ಕಾದು ನೋಡಬೇಕು.