ಪುತ್ರಿಯ ವೆಬ್ ಸರಣಿಯಲ್ಲಿ ಶಿವಣ್ಣ ನಟನೆ

ನಿವೇದಿತಾ ಶಿವರಾಜ್‌ಕುಮರ್ ನಿರ್ಮಾಣದ ವೆಬ್ ಸೀರಿಸ್ ಓಂಕಾರ | ಈ ಚಿತ್ರದಲ್ಲಿ ಶಿವಣ್ಣ ನಟನೆ | ವೆಬ್ ಸೀರೀಸ್‌ನಲ್ಲಿ ಕನ್ನಡದ ಸ್ಟಾರ್ ನಟರೊಬ್ಬರು ನಟಿಸುತ್ತಿರುವುದು ಇದೇ ಮೊದಲು 

ಶಿವರಾಜ್‌ಕುಮಾರ್ ಹೊಸ ಹೆಜ್ಜೆ ಇಡುತ್ತಿದ್ದಾರೆ. ಕನ್ನಡದ ವೆಬ್ ಸೀರಿಸ್‌ನಲ್ಲಿ ನಟಿಸುತ್ತಿದ್ದಾರೆ. ಅವರು ಅಭಿನಯಿಸುತ್ತಿರುವ ವೆಬ್ ಸೀರಿಸ್ ಹೆಸರು ‘ಓಂಕಾರ’. ಕನ್ನಡದಲ್ಲಿ ಸ್ಟಾರ್ ನಟರೊಬ್ಬರು ವೆಬ್ ಸೀರಿಸ್‌ನಲ್ಲಿ ನಟಿಸುವುದು ಇದೇ ಮೊದಲು.

ಪುತ್ರಿ ನಿವೇದಿತಾ ಶಿವರಾಜ್‌ಕುಮಾರ್ ನಿರ್ಮಾಣದ ಸೀರಿಸ್ ಇದು. ಸದ್ಯಕ್ಕೆ ನಿರ್ದೇಶಕರು ಯಾರು ಎನ್ನುವುದು ಫೈನಲ್ ಆಗಿಲ್ಲ. ನಿವೇದಿತಾ ಅವರೇ ಕತೆ ಬರೆದಿದ್ದಾರೆ. ನಿರ್ಮಾಣದ ಸಿದ್ಧತೆಯೂ ಶುರುವಾಗಿದೆ. ಈ ವಿಚಾರವನ್ನು ಶಿವಣ್ಣ ಅವರೇ ಬಹಿರಂಗ ಪಡಿಸಿದ್ದಾರೆ.

‘ಸಿನಿ ಮುತ್ತು ಸಿನಿ ಕ್ರಿಯೇಷನ್ಸ್ ಮೂಲಕ ನಿರ್ಮಾಣವಾಗುತ್ತಿರುವ ಮೂರನೇ ವೆಬ್ ಸೀರಿಸ್ ಇದು. ಕತೆ ತುಂಬಾ ಚೆನ್ನಾಗಿದೆ. ಅದರಲ್ಲಿ ನಾನು ಅಭಿನಯಿಸುತ್ತಿದ್ದೇನೆ. ವೆಬ್ ಸೀರೀಸ್‌ನಲ್ಲಿ ನಟಿಸುತ್ತಿರುವುದು ಇದು ಮೊದಲು. ಆ ಅನುಭವ ಹೇಗಿರುತ್ತೆ ಅಂತ ನಾನು ಕೂಡ ಉತ್ಸುಕನಾಗಿದ್ದೇನೆ’ ಎಂದರು ಶಿವರಾಜ್ ಕುಮಾರ್.

ಚಿಕಿತ್ಸೆ ನಂತರ ವಿಶ್ರಾಂತಿ ಈ ಮಧ್ಯೆ ಶಿವರಾಜ್‌ಕುಮಾರ್ ಒಂದಷ್ಟು ದಿನ ಶೂಟಿಂಗ್‌ನಿಂದ ಬ್ರೇಕ್ ತೆಗೆದುಕೊಳ್ಳುತ್ತಿದ್ದಾರೆ. ಒಂದೂವರೆ ತಿಂಗಳ ಕಾಲ ಚಿತ್ರೀಕರಣದಿಂದ ದೂರ ಉಳಿದು ರೆಸ್ಟ್ ಪಡೆಯಲಿದ್ದಾರೆ. ಇದಕ್ಕೆ ಕಾರಣ ಭುಜದ ಶಸ್ತ್ರ ಚಿಕಿತ್ಸೆ.

ಬಲಭಾಗದ ಭುಜದ ನೋವಿಗೆ ಚಿಕಿತ್ಸೆ ಪಡೆಯಲು ಅವರು ಲಂಡನ್‌ಗೆ ಹೊರಟಿದ್ದಾರೆ. ಜುಲೈ 9 ರಂದು ಲಂಡನ್‌ನಲ್ಲಿ ಅವರಿಗೆ ಶಸ್ತ್ರ ಚಿಕಿತ್ಸೆ. ಅಲ್ಲಿಂದ ಬಂದ ನಂತರ ಒಂದಷ್ಟು ದಿನಗಳ ಕಾಲ ವಿಶ್ರಾಂತಿ ಪಡೆಯಲಿದ್ದಾರೆ. ಈ ಕುರಿತು ಅವರ ಮಾತುಗಳು ಇಲ್ಲಿವೆ.