ಬಾಂಗ್ಲಾದೇಶದಲ್ಲಿರೋ ನಿರ್ದೇಶಕ ಸತ್ಯಜಿತ್‌ ರೇ ಪೂರ್ವಜರ ಮನೆ ಧ್ವಂಸಕ್ಕೆ ತೀರ್ಮಾನ; ಭಾರತ ಸರ್ಕಾರದಿಂದ ವಿರೋಧ

ಸತ್ಯಜಿತ್ ರೇ ಅವರ ಪೂರ್ವಜರ ಮನೆಯನ್ನು ಧ್ವಂಸ ಮಾಡುವ ನಿರ್ಧಾರ ವಿವಾದಕ್ಕೆ ಕಾರಣವಾಗಿದೆ. ಬಾಂಗ್ಲಾದೇಶದಲ್ಲಿರುವ ಈ ಮನೆ ಐತಿಹಾಸಿಕ ಮಹತ್ವವನ್ನು ಹೊಂದಿದೆ. 

ಭಾರತೀಯ ಸಿನಿಮಾ ಇತಿಹಾಸದಲ್ಲಿ ಸತ್ಯಜಿತ್‌ ರೇ ಎಂಬ ಲೇಖಕ, ನಿರ್ದೇಶಕನ ಹೆಸರು ಅಗ್ರಗಣ್ಯ ಸ್ಥಾನದಲ್ಲಿದೆ. ಅವರ ಪೂರ್ವಜರ ಮನೆಯನ್ನು ಸತ್ಯಜಿತ್ ರೇ ಒಂದು ಡಾಕ್ಯುಮೆಂಟರಿಯಲ್ಲಿ ಇರಿಸಿಕೊಳ್ಳಲು ಬಯಸಿದ್ದರು. ಇದಕ್ಕಾಗಿ ಬಾಂಗ್ಲಾದೇಶಕ್ಕೆ ಹೋಗುವ ಇಚ್ಛೆಯನ್ನೂ ಹೊಂದಿದ್ದರು. ಇತ್ತೀಚೆಗೆ ಪೂರ್ವಜರ ಮನೆಯ ಬಗ್ಗೆ ಸಂದೀಪ್ ರೇ ಮಾತನಾಡಿದ್ದಾರೆ. 

"ಒಂದು ಸುದ್ದಿ ಸಂಸ್ಥೆಗೆ ನೀಡಿದ ಸಂದರ್ಶನದಲ್ಲಿ ಸಂದೀಪ್ ರೇ ಹೇಳಿದ್ದಾರೆ, 1987 ರಲ್ಲಿ ಸುಕುಮಾರ್ ರೇ ಅವರ ಮೇಲೆ ಡಾಕ್ಯುಮೆಂಟರಿ ಮಾಡುತ್ತಿದ್ದರು ಅಪ್ಪ. ಆಗ ಅವರಿಗೆ ಬಾಂಗ್ಲಾದೇಶಕ್ಕೆ ಹೋಗುವ ಆಸೆ ಇತ್ತು. ಆ ಪೂರ್ವಜರ ಮನೆಯನ್ನು ಸಾಕ್ಷ್ಯಚಿತ್ರದಲ್ಲಿ ಇರಿಸಿಕೊಳ್ಳುವ ಇಚ್ಛೆ ಇತ್ತು. ಅಪ್ಪ ತಮ್ಮ ಒಬ್ಬ ಸಹಾಯಕರನ್ನು ಕಳುಹಿಸಿದ್ದರು. ಅವರು ಫೋಟೋ ತೆಗೆದು ತಂದಿದ್ದರು. ಅಪ್ಪ ಫೋಟೋ ನೋಡಿ ತುಂಬಾ ಬೇಸರಪಟ್ಟರು. ಪೂರ್ವಜರ ಮನೆಯ ಸ್ಥಿತಿ ತುಂಬಾ ಕೆಟ್ಟದಾಗಿತ್ತು. ಆ ಭಾಗವನ್ನು ಡಾಕ್ಯುಮೆಂಟರಿಯಿಂದ ತೆಗೆದುಹಾಕಲಾಗಿತ್ತು.

“ನಮಗೆ ನಿಜವಾಗಿಯೂ ಏನೂ ತಿಳಿದಿಲ್ಲ. ಮಧ್ಯದಲ್ಲಿ ಮನೆಯನ್ನು ದುರಸ್ತಿ ಮಾಡಲಾಗುವುದು ಎಂದು ಹೇಳಿದ್ದೆವು. ಪಾರಂಪರಿಕ ತಾಣದಂತೆ ಮಾಡಲಾಗುವುದು ಎಂದಿದ್ದೆವು. ಈಗ ಬೇರೆ ವಿಷಯ ಕಾಣುತ್ತಿದೆ. ನಾನು ಅಲ್ಲಿಗೆ ಯಾವತ್ತೂ ಹೋಗಿಲ್ಲ. ಅಪ್ಪ ಬಹಳ ಹಿಂದೆ ಒಮ್ಮೆ ಹೋಗಿದ್ದಿರಬಹುದು. ಆದ್ದರಿಂದ ನಮಗೆ ಹೇಳುವುದು ಕಷ್ಟ. ಆದರೆ ಮನೆಯ ಸ್ಥಿತಿ ತುಂಬಾ ಕೆಟ್ಟದಾಗಿತ್ತು ಎಂದು ಹೇಳಬಲ್ಲೆ” ಎಂದಿದ್ದಾರೆ. 

ಬಾಂಗ್ಲಾದೇಶದ ಮೈಮೆನ್ಸಿಂಗ್ ಜಿಲ್ಲೆಯ ಹರಿಕಿಶೋರ್ ರೇ ರಸ್ತೆಯಲ್ಲಿ ಸತ್ಯಜಿತ್ ರೇ ಅವರ ಪೂರ್ವಜರ ಮನೆ ಇದೆ. ಸತ್ಯಜಿತ್ ರೇ ಅವರ ಅಜ್ಜಿ ಮತ್ತು ಸಾಹಿತಿ ಉಪೇಂದ್ರಕಿಶೋರ್ ರಾಯ್ ಚೌಧರಿ ಅವರ ಮನೆ ಇದಾಗಿತ್ತು. ಈ ಮನೆಯನ್ನು ಬಾಂಗ್ಲಾದೇಶ ಶಿಶು ಅಕಾಡೆಮಿಯ ಕಟ್ಟಡವಾಗಿ ಬಳಸಲಾಗುತ್ತಿತ್ತು. ಆದರೆ, ಯೂನುಸ್ ಸರ್ಕಾರ ಈಗ ಅದನ್ನು ಧ್ವಂಸ ಮಾಡುವ ಕೆಲಸವನ್ನು ಪ್ರಾರಂಭಿಸಿದೆ. ಆ ಕೆಲಸವನ್ನು ನಿಲ್ಲಿಸುವಂತೆ ಮಮತಾ ಬ್ಯಾನರ್ಜಿ ಸಂದೇಶ ನೀಡಿದ್ದಾರೆ. ಮತ್ತು ರಾಜ್ಯದ ಮುಖ್ಯಮಂತ್ರಿ ಧ್ವನಿ ಎತ್ತಿದ ತಕ್ಷಣ ಕೇಂದ್ರ ಸರ್ಕಾರ ಬೆಂಬಲ ನೀಡಿದೆ.

ಹಸೀನಾ ಸರ್ಕಾರದ ಪತನ ಮತ್ತು ಮೊಹಮ್ಮದ್ ಯೂನುಸ್ ನೇತೃತ್ವದಲ್ಲಿ ಮಧ್ಯಂತರ ಸರ್ಕಾರ ರಚನೆಯಾದಾಗಿನಿಂದ, ಬಾಂಗ್ಲಾದೇಶದಲ್ಲಿ ಸಾಹಿತಿಗಳಿಂದ ಹಿಡಿದು ಸಂಗೀತಗಾರರು, ಗಣ್ಯ ವ್ಯಕ್ತಿಗಳ ಮನೆಗಳ ಮೇಲೆ ದಾಳಿ ನಡೆದಿದೆ. ಒಂದು ತಿಂಗಳ ಹಿಂದೆ ಬಾಂಗ್ಲಾದೇಶದಲ್ಲಿ ರವೀಂದ್ರನಾಥ ಟ್ಯಾಗೋರ್ ಅವರ ಪೂರ್ವಜರ ಮನೆಯನ್ನು ದುಷ್ಕರ್ಮಿಗಳು ಧ್ವಂಸಗೊಳಿಸಿದ್ದರು. ಈಗ ಸತ್ಯಜಿತ್ ರೇ ಅವರ ಪೂರ್ವಜರ ಮನೆಯೂ ಧ್ವಂಸದ ಅಂಚಿನಲ್ಲಿದೆ.

ಭಾರತ ಸರ್ಕಾರ ಈ ಮನೆಯ ಐತಿಹಾಸಿಕ ಮಹತ್ವ ಮತ್ತು ಬಂಗಾಳದ ಸಂಸ್ಕೃತಿಯೊಂದಿಗಿನ ಸಂಬಂಧವನ್ನು ಉಲ್ಲೇಖಿಸಿ, ಮನೆಯನ್ನು ಧ್ವಂಸ ಮಾಡುವ ನಿರ್ಧಾರವನ್ನು ಪುನರ್ವಿಮರ್ಶಿಸುವಂತೆ ಕೇಳಿದೆ ಎಂದು ತಿಳಿದುಬಂದಿದೆ. ಈಗ ಬಾಂಗ್ಲಾದೇಶ ಸರ್ಕಾರ ಏನು ನಿರ್ಧಾರ ತೆಗೆದುಕೊಳ್ಳುತ್ತದೆ ಎಂದು ನೋಡಬೇಕಾಗಿದೆ.