ಸಾಮಾಜಿಕ ಜಾಲತಾಣ ಟ್ವಿಟ್ಟರ್‌ನಲ್ಲಿ ಇಂದು ಬ್ಲ್ಯಾಕ್‌ ಮಂಡೇ ಎಂಬ ಹ್ಯಾಶ್‌ಟ್ಯಾಗೊಂದು ಸಾಕಷ್ಟು ವೈರಲ್ ಆಗುತ್ತಿದೆ. ಎಲ್ಲರೂ ಬ್ಲ್ಯಾಕ್‌ ಮಂಡೇ ಹ್ಯಾಶ್‌ಟ್ಯಾಗ್ ಬಳಸಿ ಮೀಮ್ಸ್ ಪೋಸ್ಟ್ ಮಾಡುತ್ತಿದ್ದು, ಹಾಗಿದ್ರೆ ಟ್ವಿಟ್ಟರ್ ಅಥವಾ ಎಕ್ಸ್‌ನಲ್ಲಿ ಬ್ಲ್ಯಾಕ್‌ ಮಂಡೇ ಟ್ರೆಂಡ್‌ ಆಗ್ತಿರೋದ್ಯಾಕೆ ಎಂಬುದನ್ನು ಇಲ್ಲಿ ನೋಡೋಣ.
ಸಾಮಾಜಿಕ ಜಾಲತಾಣ ಟ್ವಿಟ್ಟರ್‌ನಲ್ಲಿ ಇಂದು ಬ್ಲ್ಯಾಕ್‌ ಮಂಡೇ ಎಂಬ ಹ್ಯಾಶ್‌ಟ್ಯಾಗೊಂದು ಸಾಕಷ್ಟು ವೈರಲ್ ಆಗುತ್ತಿದೆ. ಎಲ್ಲರೂ ಬ್ಲ್ಯಾಕ್‌ ಮಂಡೇ ಹ್ಯಾಶ್‌ಟ್ಯಾಗ್ ಬಳಸಿ ಮೀಮ್ಸ್ ಪೋಸ್ಟ್ ಮಾಡುತ್ತಿದ್ದು, ಹಾಗಿದ್ರೆ ಟ್ವಿಟ್ಟರ್ ಅಥವಾ ಎಕ್ಸ್‌ನಲ್ಲಿ ಬ್ಲ್ಯಾಕ್‌ ಮಂಡೇ ಟ್ರೆಂಡ್‌ ಆಗ್ತಿರೋದ್ಯಾಕೆ ಎಂಬುದನ್ನು ಇಲ್ಲಿ ನೋಡೋಣ.
ಬ್ಲಾಕ್‌ ಮಂಡೇ ಎಂಬುದು ಷೇರು ಮಾರುಕಟ್ಟೆಯ ಮಹಾಪತನಕ್ಕೆ ಸಂಬಂಧಿಸಿದ್ದಾಗಿದೆ. ಈಗಾಗಲೇ ಷೇರು ಮಾರುಕಟ್ಟೆಯಲ್ಲಿ ಭಾರಿ ಕೋಲಾಹಲ ಎಬ್ಬಿಸಿ ಹಲವು ಷೇರುಗಳ ಕುಸಿತಕ್ಕೆ ಕಾರಣವಾಗಿರುವ ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತೆರಿಗೆ ನೀತಿ ಇಂದು ಮಾರುಕಟ್ಟೆಯಲ್ಲಿ 1987ರ ನಂತರ ಅತೀದೊಡ್ಡ ರಕ್ತಸ್ನಾನವನ್ನೇ ಮಾಡಬಹುದು ಎಂದು ಊಹಿಸಲಾಗುತ್ತಿದೆ.
ಅಮೆರಿಕದ ಟಿವಿ ಪರ್ಸನಾಲಿಟಿ ಹಾಗೂ ಮಾರುಕಟ್ಟೆ ವಿಶ್ಲೇಷಕ ಜಿಮ್ ಕ್ರೇಮರ್ ಅವರು ಏಪ್ರಿಲ್ 7ರ ಸೋಮವಾರ ಅಂದರೆ ಇಂದು 1987 ರ ನಂತರದ ಅತ್ಯಂತ ಕೆಟ್ಟ ಬ್ಲ್ಯಾಕ್‌ ಮಂಡೇ ಅಥವಾ ಕಪ್ಪು ಸೋಮವಾರ ಆಗಬಹುದು. ಅಂದರೆ ಅಂದು ಮಾರುಕಟ್ಟೆಯೂ 1987ರ ನಂತರದಲ್ಲೇ ಇದೇ ಮೊದಲ ಭಾರಿ ದೊಡ್ಡ ಕುಸಿತವನ್ನು ಕಾಣಬಹುದು ಎಂದು ಎಚ್ಚರಿಸಿದ್ದಾರೆ. 1987ರ ಆ ಸಮಯದಲ್ಲಿ ವಿಶ್ವದಾದ್ಯಂತ ಮಾರುಕಟ್ಟೆಗಳು ಕುಸಿದವು, ಯುಎಸ್ ಡೌ ಜೋನ್ಸ್ ಕೈಗಾರಿಕೆ(US Dow Jones Industrial Average) ಸರಾಸರಿ 22.6% ಕುಸಿತ ಕಂಡಿತು. ಅದೇ ರೀತಿ ಈ ವಾರ ಯುಎಸ್ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ವ್ಯಾಪಾರ ತೆರಿಗೆ ನೀತಿ ಪ್ರಪಂಚದೆಲ್ಲೆಡೆಯ ದೇಶಗಳನ್ನು ಬೆಚ್ಚಿಬೀಳಿಸಿದ ನಂತರ ಜಿಮ್ ಕ್ರೇಮರ್ ಅವರು ಈ ಎಚ್ಚರಿಕೆ ನೀಡಿದ್ದಾರೆ.
ಏಪ್ರಿಲ್ 2 ರಂದು ಸಿಎನ್‌ಬಿಸಿ ಚಾನೆಲ್‌ನಲ್ಲಿ ಪ್ರಸಾರವಾದ 'ಮ್ಯಾಡ್ ಮನಿ' ಕಾರ್ಯಕ್ರಮದಲ್ಲಿ ಮಾತನಾಡಿದ ಕ್ರೇಮರ್, 1987 ರಲ್ಲಿ ಸಂಭವಿಸಿದಂತೆ ಅತ್ಯತ ದೊಡ್ಡ ಕುಸಿತಕ್ಕೆ ಕಾರಣವಾಗಬಹುದು ಎಂದು ಹೇಳಿದ್ದಾರೆ. ಪ್ರತೀಕಾರದ ಸುಂಕಗಳನ್ನು ವಿಧಿಸದ ದೇಶಗಳನ್ನು ಟ್ರಂಪ್ ತಲುಪಿ ಅವುಗಳನ್ನು ಪಾಲಿಸಲು ಪ್ರೋತ್ಸಾಹ ನೀಡದಿದ್ದರೆ ಪರಿಸ್ಥಿತಿ ಇನ್ನಷ್ಟು ಹದಗೆಡುತ್ತದೆ ಎಂದು ಅನುಭವಿ ಮಾರುಕಟ್ಟೆ ನಿರೂಪಕ ಕ್ರೇಮರ್ ಪ್ರತಿಪಾದಿಸಿದ್ದಾರೆ.
ಅಮೆರಿಕಾದ ಅಧ್ಯಕ್ಷರು ನಿಯಮಗಳ ಪ್ರಕಾರ ಕೆಲಸ ಮಾಡುವ ದೇಶಗಳು ಮತ್ತು ಕಂಪನಿಗಳನ್ನು ತಲುಪಲು ಮತ್ತು ಅವರಿಗೆ ಪ್ರತಿಫಲ ನೀಡಲು ಪ್ರಯತ್ನಿಸದಿದ್ದರೆ, 1987 ರ ಸನ್ನಿವೇಶ ನಿರ್ಮಾಣ ಆಗಲಿದೆ. ಮೂರು ದಿನಗಳು ಕುಸಿಥಧ ನಂತರ ಸೋಮವಾರ 22% ರಷ್ಟು ಕುಸಿದ ಸನ್ನಿವೇಶವು ಅತ್ಯಂತ ದೃಢತೆಯನ್ನು ಹೊಂದಿದೆ. ಅದನ್ನು ತಿಳಿಯಲು ನಾವು ಹೆಚ್ಚು ಸಮಯ ಕಾಯಬೇಕಾಗಿಲ್ಲ. ಸೋಮವಾರದ ವೇಳೆಗೆ ನಮಗೆ ಅದು ತಿಳಿಯುತ್ತದೆ ಎಂದು ಅವರು ಹೇಳಿದ್ದಾರೆ.
ಟ್ರಂಪ್ ಸುಂಕದ ನಂತರ ಯುಎಸ್ ಮಾರುಕಟ್ಟೆಯಲ್ಲೂ ಕುಸಿತ
ಟ್ರಂಪ್ ಎಲ್ಲಾ ದೇಶಗಳಿಂದ ಆಮದು ಮಾಡಿಕೊಳ್ಳುವ ವಸ್ತುಗಳ ಮೇಲೆ 10% ಬೇಸ್‌ಲೈನ್ ಸುಂಕವನ್ನು ಘೋಷಿಸಿದ ನಂತರ ಗುರುವಾರ ಮತ್ತು ಶುಕ್ರವಾರ ಯುಎಸ್ ಮಾರುಕಟ್ಟೆ ಸೂಚ್ಯಂಕಗಳು ಕುಸಿದವು. ಚೀನಾ ಯುಎಸ್ ಮೇಲೆ ಪ್ರತಿ-ಸುಂಕಗಳನ್ನು ವಿಧಿಸಿದ್ದಕ್ಕೆ ಪ್ರತಿಕ್ರಿಯೆಯಾಗಿ ಎಸ್ & ಪಿ 500 (S&P 500 ಇದು ಅಮೆರಿಕಾದ ಸ್ಟಾಕ್ ಮಾರ್ಕೆಟ್ ಸೂಚ್ಯಂಕವಾಗಿದೆ) ಆ ವಾರವನ್ನು 6% ರಷ್ಟು ಕುಸಿತ ತೋರಿಸಿ ಕೆಂಪು ಬಣ್ಣದಲ್ಲಿ(ನಷ್ಟ) ಕೊನೆಗೊಳಿಸಿತು. 2020 ರ ಕೋವಿಡ್ -19 ಸಾಂಕ್ರಾಮಿಕ ರೋಗದ ನಂತರದ ಅತ್ಯಂತ ನಕಾರಾತ್ಮಕ ವಾರದ ಕಾರ್ಯಕ್ಷಮತೆ ಇದಾಗಿದೆ.
ಹಾಗೆಯೇ ಅಮೆರಿಕದ ಇತರ ಎರಡು ಮಾರುಕಟ್ಟೆ ಸೂಚ್ಯಂಕಗಳಾದ ಡೌ ಜೋನ್ಸ್ ಮತ್ತು ನಾಸ್ಡಾಕ್ ಕ್ರಮವಾಗಿ 5.5% ಮತ್ತು 5.8% ರಷ್ಟು ಕುಸಿದವು. ಗುರುವಾರ 1,679 ಅಂಕಗಳನ್ನು ಕಳೆದುಕೊಂಡ ನಂತರ ಡೌ ಜೋನ್ಸ್ ಶುಕ್ರವಾರ 2,231 ಅಂಕಗಳನ್ನು ಕುಸಿದಿದೆ. ಮಾರ್ಚ್ 2020 ರ ನಂತರದ ಎರಡು ದಿನಗಳ ಅತ್ಯಂತ ಕೆಟ್ಟ ಕುಸಿತ ಇದಾಗಿದೆ. ಈ ಹತ್ಯಾಕಾಂಡವು ಆರ್ಥಿಕ ರಕ್ತಸ್ನಾನ ಕೇವಲ ಅಮೆರಿಕಾ ಮಾರುಕಟ್ಟೆಗಳಿಗೆ ಸೀಮಿತವಾಗಿರಲಿಲ್ಲ, ಅದು ಯುರೋಪ್, ಏಷ್ಯಾ ಮತ್ತು ಭಾರತದಲ್ಲಿಯೂ ಸಹ ಸ್ಪಷ್ಟವಾಗಿ ಗೋಚರಿಸಿದೆ.
ಆದಾಗ್ಯೂ, ಉದ್ಯೋಗ ಸಂಖ್ಯೆಗಳು ಹೆಚ್ಚಾಗಿರುವುದರಿಂದ ಅಮೆರಿಕ ಆರ್ಥಿಕ ಹಿಂಜರಿತದಿಂದ ಪಾರಾಗಲಿದೆ ಇದು ಆರ್ಥಿಕ ಹಿಂಜರಿತಕ್ಕೆ ಕಾರಣವಾಗುವ ಸಾಧ್ಯತೆಯನ್ನು ಕಡಿಮೆ ಮಾಡುತ್ತದೆ ಎಂದು ಅವರು ಹೇಳಿದರು. ನಾನು ನನ್ನ ಕೋಪವನ್ನು ತಡೆದುಕೊಳ್ಳುತ್ತೇನೆ, ಆದರೆ ನಾನು 1987 ರಲ್ಲಿ ಬದುಕಿದ್ದರಿಂದ ಮತ್ತು ಕೊನೆಯಲ್ಲಿ ನಾನು ಚೆನ್ನಾಗಿ ಹೊರಬಂದಿದ್ದರಿಂದ ಮಾತ್ರ. ಇಂತಹ ಮಾರುಕಟ್ಟೆ ಅಪಘಾತದ ಪರಿಣಾಮವಾಗಿ ನಾನು ಹಣದ ಕೊರತೆಯನ್ನು ಅನುಭವಿಸಿದೆ. ಇದು ಹೇಗೆ ಅನಿಸುತ್ತದೆ ಎಂದು ನನಗೆ ತಿಳಿದಿದೆ ಎಂದು ಕ್ರೇಮರ್ ಹೇಳಿದ್ದಾರೆ.
2000 ದಲ್ಲಿ ಡಾಟ್-ಕಾಮ್ ಬೂಮ್‌ ಸೇರಿದಂತೆ 2007 ರಲ್ಲಿ ನಡೆದ ವಿಶ್ವಾದ್ಯಂತ ಆರ್ಥಿಕ ಹಿಂಜರಿತದವರೆಗೆ, ಕ್ರೇಮರ್ ಈಗಾಗಲೇ ವಿಶ್ವ ಆರ್ಥಿಕತೆಯ ಮಹತ್ವದ ಹಂತಗಳಲ್ಲಿ ಹಲವಾರು ಭವಿಷ್ಯವಾಣಿಗಳನ್ನು ವಿಶ್ಲೇಷಿಸಿದ್ದರು. ಆದಾಗ್ಯೂ, ಅವರ ಭವಿಷ್ಯವಾಣಿಗಳು ಈ ಹಿಂದೆ ವಿಫಲವಾಗಿವೆ. 2007-2008ರ ಆರ್ಥಿಕ ಬಿಕ್ಕಟ್ಟಿನ ಸಂದರ್ಭದಲ್ಲಿ ಜನರು ಬೇರ್ ಸ್ಟಿಯರ್ನ್ಸ್, ಮೆರಿಲ್ ಲಿಂಚ್, ಮಾರ್ಗನ್ ಸ್ಟಾನ್ಲಿ, ವಾಚೋವಿಯಾ ಮತ್ತು ಲೆಹ್ಮನ್ ಬ್ರದರ್ಸ್‌ನಲ್ಲಿ ಹೂಡಿಕೆ ಮಾಡಬೇಕೆಂದು ಸೂಚಿಸಿ ಬಾರಿ ಟೀಕೆಗೆ ಗುರಿಯಾದರು, ಏಕೆಂದರೆ ಆ ಷೇರುಗಳು ಕುಸಿದು ಮುಚ್ಚಲ್ಪಟ್ಟಿದ್ದವು.