Russia Ukraine War: ಯುದ್ಧದ ನಡುವೆ ಭುಗಿಲೆದ್ದ ನೋ ಫ್ಲೈ ಝೋನ್‌ ವಿವಾದ!

*ಉಕ್ರೇನ್‌ ‘ನೋ ಫ್ಲೈ ಜೋನ್‌’ ಎಂದು ಘೋಷಿಸಲು ಜೆಲೆನ್‌ಸ್ಕಿ ಬೇಡಿಕೆ *ಹಾಗೆ ಮಾಡಿದ್ರೆ ಯುದ್ಧ ಆಗುತ್ತೆ, ಅದು ಅಸಾಧ್ಯ ಎಂದ ಮಿತ್ರರಾಷ್ಟ್ರಗಳು *ನಮ್ಮ ಮೇಲೆ ದಾಳಿಗೆ ಅನುವು ಮಾಡಿದ್ದೀರಿ: ಉಕ್ರೇನ್‌ ಅಧ್ಯಕ್ಷ ಕಿಡಿ ಕಿಡಿ

ಕೀವ್‌ (ಮಾ. 06): ತಮ್ಮ ದೇಶದ ಮೇಲೆ ಬಾಂಬ್‌, ಕ್ಷಿಪಣಿ, ಶೆಲ್‌ಗಳ ಮಳೆ ಸುರಿಸುತ್ತಿರುವ ರಷ್ಯಾಗೆ ತಡೆಯೊಡ್ಡುವ ಕೊನೆಯ ಪ್ರಯತ್ನವಾಗಿ, ಉಕ್ರೇನ್‌ ಅನ್ನು ‘ವಿಮಾನ ಹಾರಾಟ ನಿರ್ಬಂಧಿತ ವಲಯ’ (ನೋ ಫ್ಲೈ ಜೋನ್‌) ಎಂದು ಘೋಷಿಸುವಂತೆ ಉಕ್ರೇನ್‌ ಅಧ್ಯಕ್ಷ ವೊಲೊಡಿಮಿರ್‌ ಜೆಲೆನ್‌ಸ್ಕಿ ಅವರು ನ್ಯಾಟೋಗೆ ಮನವಿ ಮಾಡಿದ್ದಾರೆ. ಆದರೆ ಈ ಬೇಡಿಕೆಯನ್ನು ಮನ್ನಿಸಲು ನ್ಯಾಟೋ ನಿರಾಕರಿಸಿದೆ. ಈ ಹಿನ್ನೆಲೆಯಲ್ಲಿ ನ್ಯಾಟೋ ವಿರುದ್ಧ ಜೆಲೆನ್‌ಸ್ಕಿ ತೀವ್ರ ಆಕ್ರೋಶ ಹೊರ ಹಾಕಿದ್ದಾರೆ. ಹೀಗಾಗಿ ‘ನೋ ಫ್ಲೈ ಜೋನ್‌’ ಈಗ ಯುದ್ಧದಲ್ಲಿ ಹೊಸ ಬಿಕ್ಕಟ್ಟಿನ ವಿಷಯವಾಗಿ ಮಾರ್ಪಟ್ಟಿದೆ.

ಉಕ್ರೇನ್‌ ಮೇಲೆ ರಷ್ಯಾದಿಂದ ಇನ್ನಷ್ಟುದಾಳಿ ನಡೆಯಲಿದೆ, ಅದರಿಂದ ಅನಾಹುತಗಳಾಗಲಿವೆ ಎಂದು ಗೊತ್ತಿದ್ದೂ ಉಕ್ರೇನ್‌ ಆಗಸವನ್ನು ಮುಚ್ಚಲು ನ್ಯಾಟೋ ನಿರಾಕರಿಸಿದೆ. ತನ್ಮೂಲಕ ಉಕ್ರೇನ್‌ನ ಮತ್ತಷ್ಟುನಗರ, ಹಳ್ಳಿಗಳ ಮೇಲೆ ಬಾಂಬ್‌ ಹಾಕಲು ರಷ್ಯಾಗೆ ಹಸಿರು ನಿಶಾನೆ ತೋರಿದೆ ಎಂದು ಜೆಲೆನ್‌ಸ್ಕಿ ವಿಡಿಯೋ ಹೇಳಿಕೆ ಬಿಡುಗಡೆ ಮಾಡಿದ್ದಾರೆ.

ಇದನ್ನೂ ಓದಿ: Russia-Ukraine War: ನಮ್ಮನ್ನು ಇಲ್ಲಿಂದ ಕಾಪಾಡಿ: ಉಕ್ರೇನ್‌ನಲ್ಲಿ ಭಾರತೀಯರ ಆರ್ತನಾದ

ಈ ಮಧ್ಯೆ, ಉಕ್ರೇನ್‌ ವಿಚಾರದಲ್ಲಿ ನಾವು ಮಧ್ಯಪ್ರವೇಶಿಸಿದರೆ ಮಾಸ್ಕೋ ಜತೆ ನೇರ ಸಂಘರ್ಷಕ್ಕೆ ಇಳಿದಂತಾಗುತ್ತದೆ. ಅದು ಗಂಭೀರ ಪರಿಣಾಮಗಳನ್ನು ಉಂಟು ಮಾಡುತ್ತದೆ. ಉಕ್ರೇನ್‌ ಬೇಡಿಕೆಯಂತೆ ನೋ ಫ್ಲೈ ಜೋನ್‌ ಪ್ರಸ್ತಾವವನ್ನು ಸಾಕಾರಕ್ಕೆ ತರಲು ನ್ಯಾಟೋ ವಿಮಾನಗಳನ್ನು ಉಕ್ರೇನ್‌ಗೆ ಕಳುಹಿಸಬೇಕು. ರಷ್ಯಾ ವಿಮಾನಗಳನ್ನು ಹೊಡೆದುರುಳಿಸಬೇಕು. ಹಾಗೆ ಮಾಡಿದರೆ, ಯುರೋಪ್‌ನಲ್ಲಿ ಪೂರ್ಣ ಪ್ರಮಾಣದ ಯುದ್ಧವೇ ಆರಂಭವಾಗುತ್ತದೆ. ಹಲವು ದೇಶಗಳು ಭಾಗಿಯಾಗಿ ಅಪಾರ ಜನರಿಗೆ ತೊಂದರೆಯಾಗುತ್ತದೆ ಎಂದು ನ್ಯಾಟೋ ಮುಖ್ಯಸ್ಥ ಜೆನ್ಸ್‌ ಸ್ಟೋಲ್ಟನ್‌ಬರ್ಗ್‌ ಹೇಳಿದ್ದಾರೆ.

ನೋ ಫ್ಲೈ ಜೋನ್‌ ಎಂದರೇನು?: ನೋ ಫ್ಲೈ ಜೋನ್‌ ಅಥವಾ ನೋ ಫ್ಲೈಟ್‌ ಝೋನ್‌ ಎಂದರೆ ಆಗಸದ ಮೇಲೆ ಯಾವುದೇ ವಿಮಾನ ಕಾರಾರ‍ಯಚರಣೆಯನ್ನು ನಡೆಸದೇ ಇರುವುದು. ಅಂದರೆ, ಪ್ರಯಾಣಿಕ, ಸರಕು ಸಾಗಣೆ, ಮಿಲಿಟರಿ ಸೇರಿದಂತೆ ಎಲ್ಲಾ ವಿಧದ ವಿಮಾನ ಕಾರಾರ‍ಯಚರಣೆ ಅಥವಾ ಹಾರಾಟ ರದ್ದು ಎಂದರ್ಥ.‌

ಒಂದು ವೇಳೆ ಈ ನಿಷೇಧ ವಲಯದಲ್ಲಿ ನಿಯಮ ಉಲ್ಲಂಘಿಸಿ ಯಾವುದೇ ವಿಮಾನ ಹಾರಾಟ ಕಂಡುಬಂದರೆ ಮಿಲಿಟರಿ ಶಕ್ತಿ ಬಳಸಿ ಅದನ್ನು ಹೊಡೆದುರುಳಿಸಲಾಗುತ್ತದೆ. ಹಿಂದೆ, ಇರಾಕ್‌ (ಗಲ್ಫ್ ಯುದ್ಧ), ಬೋಸ್ನಿಯಾ-ಹರ್ಜೆಗೋವಿನಾ (1995ರ ಕೊಸೊವೊ ಯುದ್ಧ) ಮತ್ತು ಲಿಬಿಯಾ (2011ರ ಅಂತಾರಾಷ್ಟ್ರೀಯ ಹಸ್ತಕ್ಷೇಪದ ಸಮಯದಲ್ಲಿ) ಮೇಲೆ ನೋ ಫ್ಲೈ ಜೋನ್‌ ಸ್ಥಾಪಿಸಲಾಗಿತ್ತು.

ಇದನ್ನೂ ಓದಿ: Russia Ukraine Crisis: ಮತ್ತೊಂದು ಅಣುಸ್ಥಾವರ ವಶದತ್ತ ರಷ್ಯಾ!

ಉಕ್ರೇನ್‌ ಬೇಡಿಕೆ ಏಕೆ?: ಉಕ್ರೇನ್‌ ಮೇಲೆ ರಷ್ಯಾ ಭೀಕರ ಕ್ಷಿಪಣಿ, ಬಾಂಬ್‌, ಶೆಲ್‌, ರಾಕೆಟ್‌ ದಾಳಿ ನಡೆಸುತ್ತಿದೆ. ಇದರಿಂದಾಗಿ ಭಾರೀ ಪ್ರಮಾಣದಲ್ಲಿ ಆಸ್ತಿ-ಪಾಸ್ತಿ ನಷ್ಟದ ಜೊತೆಗೆ ಸಾವು ನೋವು ಉಂಟಾಗುತ್ತಿದೆ. ನ್ಯಾಟೋ ಪಡೆಗಳು ಉಕ್ರೇನ್‌ನಲ್ಲಿ ನೋ ಫ್ಲೈ ಜೋನ್‌ ನಿರ್ಬಂಧ ವಿಧಿಸಿದರೆ ರಷ್ಯಾದ ಬಾಂಬ್‌, ಕ್ಷಿಪಣಿ, ಕ್ಷಸ್ಟರ್‌ ಬಾಂಬ್‌ ದಾಳಿಯಿಂದ ಉಕ್ರೇನ್‌ ಪಾರಾಗಬಹುದು. ಆಗ ಸುಲಭವಾಗಿ ರಷ್ಯಾಗೆ ಪ್ರತಿರೋಧ ಒಡ್ಡಿ ಅದನ್ನು ಎದುರಿಸಬಹುದು.

ನ್ಯಾಟೋ ನಿರಾಕರಿಸಿದ್ದೇಕೆ?: ಈ ಹಿಂದೆ ಇರಾಕ್‌, ಲಿಬಿಯಾ ಮುಂತಾದೆಡೆ ವಿಮಾನ ಹಾರಾಟ ನಿರ್ಬಂಧಿತ ವಲಯ ಎಂದು ಘೋಷಿಸಿದ ಪರಿಣಾಮ ಏನಾಗಿತ್ತು ಎಂಬ ಸ್ಪಷ್ಟತೆ ನ್ಯಾಟೋಗೆ ಇದೆ. ಈಗ ಉಕ್ರೇನ್‌ನಲ್ಲಿ ನೋ ಫ್ಲೈ ಜೋನ್‌ ಘೋಷಣೆ ಎಂದರೆ ನೇರವಾಗಿ ರಷ್ಯಾದೊಂದಿಗೆ ಯುದ್ಧಕ್ಕೆ ಇಳಿದಂತೆ. ರಷ್ಯಾ ವಿಮಾನಗಳನ್ನು ಹೊಡೆದುರುಳಿಸಬೇಕಾಗುತ್ತದೆ. ಹಾಗೆ ಮಾಡಿದರೆ, ಯುರೋಪ್‌ನಲ್ಲಿ ಪೂರ್ಣ ಪ್ರಮಾಣದ ಯುದ್ಧವೇ ಆರಂಭವಾಗುತ್ತದೆ. 

ಹಲವು ದೇಶಗಳು ಭಾಗಿಯಾಗಿ ಅಪಾರ ಜನರಿಗೆ ತೊಂದರೆಯಾಗುತ್ತದೆ. ನಾವು ಈ ಸಂಘರ್ಷದ ಭಾಗ ಅಲ್ಲ. ಈ ಯುದ್ಧ ಉಕ್ರೇನ್‌ನಿಂದ ಆಚೆಗೆ ವಿಸ್ತರಿಸದಂತೆ ನೋಡಿಕೊಳ್ಳುವ ಜವಾಬ್ದಾರಿ ನಮ್ಮ ಮೇಲಿದೆ ಎಂದು ನ್ಯಾಟೋ ಉಕ್ರೇನ್‌ ಮನವಿಯನ್ನು ನಯವಾಗಿ ತಿರಸ್ಕರಿಸಿದೆ.

ನೇರ ಯುದ್ಧ ಎಂದು ಪರಿಗಣಿಸಬೇಕಾಗುತ್ತೆ: ಪುಟಿನ್‌ ಎಚ್ಚರಿಕೆ:  ಉಕ್ರೇನ್‌ ಆಕಾಶವನ್ನು ‘ನೋ ಫ್ಲೈ ಜೋನ್‌’ ಎಂದು ಘೋಷಿಸಿದರೆ ಅದನ್ನು ನೇರವಾಗಿ ಯುದ್ಧ ಎಂದೇ ಪರಿಗಣಿಸಬೇಕಾಗುತ್ತದೆ ಎಂದು ರಷ್ಯಾ ಅಧ್ಯಕ್ಷ ವ್ಲಾದಿಮಿರ್‌ ಪುಟಿನ್‌ ಎಚ್ಚರಿಸಿದ್ದಾರೆ. ಶನಿವಾರ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ ಅವರು, ತೃತೀಯ ವ್ಯಕ್ತಿ/ಶಕ್ತಿಯು ‘ಹಾರಾಟ ನಿರ್ಬಂಧಿತ ವಲಯ’ ಎಂದು ಘೋಷಿಸುವುದು ನಮ್ಮ ಸೇನಾಪಡೆಗಳಿಗೆ ಅಪಾಯಕಾರಿ. 

ಯಾರಾದರೂ ಆ ಘೋಷಣೆ ಮಾಡಿದರೆ ಅವರನ್ನು ಮಿಲಿಟರಿ ಸಂಘರ್ಷದ ಪಾಲುದಾರರು ಎಂದೇ ಪರಿಗಣಿಸಬೇಕಾಗುತ್ತದೆ. ಅದು ಯಾರೇ ಆಗಿದ್ದರೂ ಸರಿ ಎನ್ನುವ ಮೂಲಕ ಉಕ್ರೇನ್‌ ವಿಷಯಕ್ಕೆ ತಲೆ ಹಾಕದಂತೆ ನ್ಯಾಟೋ ಮೈತ್ರಿಕೂಟಕ್ಕೆ ನೇರ ಎಚ್ಚರಿಕೆ ನೀಡಿದ್ದಾರೆ.