*ಅಮೆರಿಕದಲ್ಲಿ ಈ ತನಕ ಒಟ್ಟು 4,639 ಮಂಕಿಪಾಕ್ಸ್ ಪ್ರಕರಣಗಳು ಪತ್ತೆ
*ಭಾರತದಲ್ಲಿ ಹರಿಯಾಣ ಮೂಲದ ಪ್ರಾಧ್ಯಾಪಕರೊಬ್ಬರಿಗೆ ಮಂಕಿಪಾಕ್ಸ್ ಶಂಕೆ
*ಭಾರತದಲ್ಲಿ ಈ ತನಕ ನಾಲ್ಕು ಮಂಕಿಪಾಕ್ಸ್ ಪ್ರಕರಣಗಳು ಪತ್ತೆ
ನವದೆಹಲಿ (ಜು.28): ಮಂಕಿಪಾಕ್ಸ್ ಪ್ರಕರಣಗಳ ಸಂಖ್ಯೆಯಲ್ಲಿ ದಿನದಿಂದ ದಿನಕ್ಕೆ ಹೆಚ್ಚಳ ಕಂಡುಬರುತ್ತಿದ್ದು, ಆತಂಕ ಹುಟ್ಟು ಹಾಕಿದೆ. ಅಮೆರಿಕದಲ್ಲಿ ಒಂದೇ ದಿನ 1,048 ಹೊಸ ಮಂಕಿಪಾಕ್ಸ್ ಪ್ರಕರಣಗಳು ವರದಿಯಾಗಿದ್ದು, ಇದು ಒಂದು ದಿನದ ದಾಖಲೆಯ ಹೆಚ್ಚಳವಾಗಿದೆ. ಇನ್ನು ಅಮೆರಿಕದಲ್ಲಿ ಈ ತನಕ ಒಟ್ಟು 4,639 ಮಂಕಿಪಾಕ್ಸ್ ಪ್ರಕರಣಗಳು ಪತ್ತೆಯಾಗಿದ್ದು, ಈ ಮೂಲಕ 3,738 ಸೋಂಕಿತರನ್ನು ಹೊಂದಿರುವ ಸ್ಪಾನಿಷ್ ಅನ್ನು ಹಿಂದಿಕ್ಕಿ ಜಾಗತಿಕ ಮಂಕಿಪಾಕ್ಸ್ ರಾಜಧಾನಿ ಎಂಬ ಬಿರುದು ಪಡೆದುಕೊಂಡಿದೆ. ಭಾರತದಲ್ಲಿ ಇಲ್ಲಿಯವರೆಗೆ ನಾಲ್ಕು ಮಂಕಿಪಾಕ್ಸ್ ಪ್ರಕರಣಗಳು ಪತ್ತೆಯಾಗಿವೆ. ಇದರಲ್ಲಿ ಮೂರು ಕೇರಳದಲ್ಲಿ ಹಾಗೂ ಒಂದು ನವದೆಹಲಿಯಲ್ಲಿ ವರದಿಯಾಗಿವೆ. ಇನ್ನು ಹರಿಯಾಣ ಮೂಲದ ಪ್ರಾಧ್ಯಾಪಕರೊಬ್ಬರನ್ನು ಮಂಕಿಪಾಕ್ಸ್ ರೋಗಲಕ್ಷಣಗಳ ಹಿನ್ನೆಲೆಯಲ್ಲಿ ಅವರ ಮನೆಯಲ್ಲೇ ಐಸೋಲೇಷನ್ ನಲ್ಲಿರಿಸಲಾಗಿದೆ. ಇವರು ಮಂಕಿಪಾಕ್ಸ್ ಲಕ್ಷಣಗಳಾದ ದೇಹದ ಮೇಲೆ ಹಲವು ಕೆಂಪು ಕಲೆಗಳು, ಊದಿಕೊಂಡ ದುಗ್ಧರಸ ಗ್ರಂಥಿಗಳ ಬಗ್ಗೆ ಮಾಹಿತಿ ನೀಡಿದ ಹಿನ್ನೆಲೆಯಲ್ಲಿ ಐಸೋಲೇಷನ್ ನಲ್ಲಿ ಇರಿಸಲಾಗಿದೆ. ಇವರು ಕೇರಳದಲ್ಲಿದ್ದು, ಇತ್ತೀಚೆಗಷ್ಟೇ ವಿಮಾನದಲ್ಲಿ ಹಿಂತಿರುಗಿದ್ದರು. ಇವರ ರಕ್ತ, ಮೂತ್ರ ಹಾಗೂ ಊದಿಕೊಂಡ ದುಗ್ಧರಸ ಗ್ರಂಥಿಗಳನ್ನು ದೆಹಲಿಯ ಅಖಿಲ ಭಾರತ ವೈದ್ಯಕೀಯ ವಿಜ್ಞಾನಗಳ ಸಂಸ್ಥೆಗೆ (AIIMS)ಪರೀಕ್ಷೆಗಾಗಿ ಕಳುಹಿಸಲಾಗಿದೆ.
ಕಿಟ್, ವ್ಯಾಕ್ಸಿನ್ ಅಭಿವೃದ್ಧಿಗೆ ಯತ್ನ
ಐಸಿಎಂಆರ್ (ICMR) ಅಡಿಯಲ್ಲಿ ಪುಣೆಯ ರಾಷ್ಟ್ರೀಯ ವೈರಾಣು ಸಂಸ್ಥೆ (NIV) ರೋಗಿಯೊಬ್ಬರಿಂದ ಮಂಕಿಪಾಕ್ಸ್ ( Monkeypox) ವೈರಸ್ ಸ್ಯಾಂಪಲ್ ಸಂಗ್ರಹಿಸಿಟ್ಟಿದೆ. ಇದು ರೋಗಪತ್ತೆ ಕಿಟ್ ಗಳು ಹಾಗೂ ವ್ಯಾಕ್ಸಿನ್ ಅಭಿವೃದ್ಧಿಪಡಿಸಲು ನೆರವು ನೀಡುವ ನಿರೀಕ್ಷೆಯಿದೆ ಎಂದು ಐಸಿಎಂಆರ್ ತಿಳಿಸಿದೆ. ಇನ್ನು ಮಂಕಿಪಾಕ್ಸ್ ಸೋಂಕುಪತ್ತೆ ಕಿಟ್ ಗಳು ಹಾಗೂ ವ್ಯಾಕ್ಸಿನ್ ಅಭಿವೃದ್ಧಿಗೆ ಸಂಬಂಧಿಸಿ ಆಸಕ್ತಿ ವ್ಯಕ್ತಪಡಿಸಲು (EOI) ಭಾರತದ ಆಸಕ್ತ ವ್ಯಾಕ್ಸಿನ್ ಉತ್ಪಾದಕರು, ಫಾರ್ಮ್ ಕಂಪನಿಗಳು ಹಾಗೂ ಇನ್ ವಿಟ್ರೋ ಡಯಾಗ್ನೋಸ್ಟಿಕ್ ಸಂಸ್ಥೆಗಳಿಗೆ ಭಾರತೀಯ ವೈದ್ಯಕೀಯ ಸಂಶೋಧನೆಗಳ ಮಂಡಳಿ (ICMR) ಆಹ್ವಾನ ನೀಡಿದೆ.
ಮಂಕಿಪಾಕ್ಸ್ ಈಗ ಜಾಗತಿಕ ತುರ್ತು: ಭಾರತ ಸೇರಿ 74 ದೇಶದಲ್ಲಿ 16,000 ಕೇಸ್‌
'ಸಿಡುಬಿಗೆ ಈ ಹಿಂದೆ ಹೇಗೆ ವ್ಯಾಕ್ಸಿನ್ ಅಭಿವೃದ್ಧಿಪಡಿಸಲಾಯಿತೋ ಅದೇ ಮಾದರಿಯಲ್ಲಿ ಮಂಕಿಪಾಕ್ಸಿಗೆ ಕೂಡ ಹೊಸ ವೇದಿಕೆಯಲ್ಲಿ ಅದೇ ಮಾದರಿಯ ಪ್ರಯತ್ನಗಳ ಮೂಲಕ ವ್ಯಾಕ್ಸಿನ್ ಸಿದ್ಧಪಡಿಸಲು ಪ್ರಯತ್ನಿಸಬಹುದು. ವೈರಸ್ ಐಸೋಲೇಷನ್ ನಿಂದ ಅನೇಕ ಇತರ ಆಯಾಮಗಳಲ್ಲಿ ಕೂಡ ಮಂಕಿಪಾಕ್ಸ್ ಕುರಿತು ಸಂಶೋಧನೆ ಹಾಗೂ ಅಭಿವೃದ್ಧಿಗಳನ್ನು ಕೈಗೊಳ್ಳಲು ಭಾರತದ ಸಾಮರ್ಥ್ಯ ಹೆಚ್ಚಳಗೊಂಡಿದೆ' ಎಂದು ರಾಷ್ಟ್ರೀಯ ವೈರಾಣು ಸಂಸ್ಥೆಯ (NIV) ಹಿರಿಯ ವಿಜ್ಞಾನಿ ಡಾ.ಪ್ರಗ್ಯಾ ಯಾದವ್ ತಿಳಿಸಿದ್ದಾರೆ.
ಸೆಕ್ಸ್ ಪಾರ್ಟನರ್ ಗಳ ಸಂಖ್ಯೆ ತಗ್ಗಿಸಲು ಸಲಹೆ
ಮಂಕಿಪಾಕ್ಸ್ ಲೈಂಗಿಕ ಕ್ರಿಯೆಯಿಂದ ಹರಡುವ ಕಾರಣ ಸೆಕ್ಸ್ ಪಾರ್ಟನರ್ ಗಳ ಸಂಖ್ಯೆ ತಗ್ಗಿಸಲು ಡಬ್ಲ್ಯುಎಚ್ ಒ (WHO) ಮುಖ್ಯಸ್ಥರು ಸಲಹೆ ನೀಡಿದ್ದಾರೆ. ಮಂಕಿಪಾಕ್ಸ್ ಪ್ರಕರಣ ಮೇನಲ್ಲಿ ಗೇ, ದ್ವಿಲಿಂಗಿಗಳು ಹಾಗೂ ಇತರ ಪುರುಷರು ಪುರುಷರ ಜೊತೆ ಲೈಂಗಿಕ ಕ್ರಿಯೆ ನಡೆಸಿದವರಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಪತ್ತೆಯಾಗಿತ್ತು. ಶೇ.98ರಷ್ಟು ಮಂಕಿಪಾಕ್ಸ್ ಪ್ರಕರಣಗಳು ಇವರಲ್ಲೇ ಪತ್ತೆಯಾಗಿತ್ತು ಎಂದು ಅವರು ತಿಳಿಸಿದ್ದಾರೆ. ಹೀಗಾಗಿ ನಿಮ್ಮನ್ನು ಹಾಗೂ ಇತರರನ್ನು ಸುರಕ್ಷಿತವಾಗಿಡಲು ಲೈಂಗಿಕ ಸಂಗಾತಿಗಳ ಸಂಖ್ಯೆಯನ್ನು ಕಡಿಮೆ ಮಾಡಿಕೊಳ್ಳುವಂತೆ ಡಬ್ಲ್ಯುಎಚ್ ಒ ಮುಖ್ಯಸ್ಥರು ಸಲಹೆ ನೀಡಿದ್ದಾರೆ.
ದೇಹದ ಸಣ್ಣ ಗಾಯವೂ ಮಂಕಿಪಾಕ್ಸ್ ಲಕ್ಷಣವಾಗಿರಬಹುದು, ಎಚ್ಚರ !
ಅಮೆರಿಕದಲ್ಲಿ 800,000 ಡೋಸ್ ಗಳಷ್ಟು ವ್ಯಾಕ್ಸಿನ್ ಗಳನ್ನು ವಿತರಿಸಲು ಸಿದ್ಧತೆ ನಡೆಸಲಾಗಿದೆ ಎಂದು ಅಮೆರಿಕದ ಆರೋಗ್ಯ ನಿಯಂತ್ರಕರು ಮಾಹಿತಿ ನೀಡಿದ್ದಾರೆ. ಮಂಕಿಪಾಕ್ಸ್ ವಿರುದ್ಧ ಲಸಿಕೆ ನೀಡುವ ಕಾರ್ಯ ನಿಧಾನವಾಗುತ್ತಿದೆ ಎಂದು ಅಮೆರಿಕದಲ್ಲಿ ಜನರು ಅಧಿಕಾರಿಗಳ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ ಬೆನ್ನಲ್ಲೇ ಈ ಕ್ರಮ ಕೈಗೊಳ್ಳಲಾಗಿದೆ.