ಎರಡು ದಿನದಲ್ಲಿ ಎರಡು ಸಾವು, ಮಂಕಿಪಾಕ್ಸ್ ವೈರಸ್‌ಗೆ ಸ್ಪೇನ್ ತತ್ತರ!

ಸ್ಪೇನ್‌ನಲ್ಲಿ ಮಂಕಿಪಾಕ್ಸ್ ವೈರಸ್ ಅತ್ಯಂತ ವೇಗವಾಗಿ ಹರಡುತ್ತಿದೆ. ಕಳೆದ ಎರಡು ದಿನದಲ್ಲಿ ಸ್ಪೇನ್‌ನಲ್ಲಿ ಮಂಕಿಪಾಕ್ಸ್‌ಗೆ ಎರಡು ಬಲಿಯಾಗಿದೆ. 

ಸ್ಪೇನ್(ಜು.30):  ಮಂಕಿಪಾಕ್ಸ್ ಪ್ರಕರಣ ಇದೀಗ ವಿಶ್ವಕ್ಕೆ ಮಾರಕವಾಗುವ ಲಕ್ಷಣಗಳು ಗೋಚರಿಸುತ್ತಿದೆ. ಸಾವಿನ ಪ್ರಕರಣ ಏರಿಕೆಯಾಗುತ್ತಿದೆ. ಭಾರತದಲ್ಲೂ 4 ಪ್ರಕರಣ ವರದಿಯಾಗಿದೆ, ಸ್ಯಾನ್ ಫ್ರಾನ್ಸಿಸ್ಕೋದಲ್ಲಿ ಮಂಕಿಪಾಕ್ಸ್ ಪ್ರಕರಣ ಅರಿಕೆಯಿಂದ ತುರ್ತು ಪರಿಸ್ಥಿತಿ ಘೋಷಿಸಲಾಗಿದೆ.  ಈಗಾಗಲೇ ವಿಶ್ವ ಆರೋಗ್ಯ ಸಂಸ್ಥೆ ಮಂಕಿಪಾಕ್ಸ್ ಎಚ್ಚರಿಕೆ ವಹಿಸುವಂತೆ ಸೂಚಿಸಲಾಗಿದೆ. ಇದೇವೆ ಜಾಗತಿಕ ತುರ್ತು ಪರಿಸ್ಥಿತಿ ಘೋಷಿಸಿದೆ. ಇದೀಗ ಸ್ಪೇನ್‌ನಲ್ಲಿ ಮಂಕಿಪಾಕ್ಸ್ ವೈರಸ್ ಅತ್ಯಂತ ವೇಗವಾಗಿ ಹರಡುತ್ತಿದೆ. ಕಳೆದ ಎರಡು ದಿನದಲ್ಲಿ ಸ್ಪೇನ್‌ನಲ್ಲಿ ಮಂಕಿಪಾಕ್ಸ್‌ಗೆ ಎರಡು ಬಲಿಯಾಗಿದೆ. ಶುಕ್ರವಾರ ಮಂಕಿಪಾಕ್ಸ್‌ನಿಂದ ಸ್ಪೇನ್‌ನಲ್ಲಿ ಮೊದಲ ಬಲಿಯಾಗಿದ್ದರೆ, ಶನಿವಾರ ಎರಡನೇ ಬಲಿಯಾಗಿದೆ. ಸದ್ಯ ಸ್ಪೇನ್‌ನಲ್ಲಿ 4,298 ಮಂಕಿಪಾಕ್ಸ್ ಪ್ರಕರಣ ವರದಿಯಾಗಿದೆ. 

ಇದೀಗ 80  ರಾಷ್ಟ್ರಗಳಲ್ಲಿ ಮಂಕಿಪಾಕ್ಸ್ ಪ್ರಕರಣ ವರದಿಯಾಗಿದೆ. 21,00 ಮಂಕಿಪಾಕ್ಸ್ ಪ್ರಕರಣ ವಿಶ್ವದಲ್ಲಿ ಪತ್ತೆಯಾಗಿದೆ. ಅಮೆರಿಕದಲ್ಲೂ ಮಂಕಿಪಾಕ್ಸ್ ಪ್ರಕರಣ ವೇಗವಾಗಿ  ಹರಡುತ್ತಿದೆ. ಇತ್ತ ಸ್ಪೇನ್‌ಲ್ಲಿ ಎರಡು ಸಾವು ತೀವ್ರ ಆತಂಕ ಹೆಚ್ಚಿಸಿದೆ.  

ಭಾರತದ ಮೊದಲ ಮಂಕಿಪಾಕ್ಸ್‌ ಸೋಂಕಿತ ಗುಣಮುಖ
ಭಾರತದ ಮೊದಲ ಮಂಕಿಪಾಕ್ಸ್‌ ಸೋಂಕಿತನಾದ ಕೇರಳದ 35 ವರ್ಷದ ವ್ಯಕ್ತಿಯು ಸಂಪೂರ್ಣವಾಗಿ ಗುಣಮುಖನಾಗಿದ್ದಾನೆ. ಇಲ್ಲಿನ ಸರ್ಕಾರಿ ವೈದ್ಯಕೀಯ ಕಾಲೇಜಿನಿಂದ ಶನಿವಾರ ಬಿಡುಗಡೆಯಾಗಿದ್ದಾನೆ ಎಂದು ರಾಜ್ಯ ಆರೋಗ್ಯ ಸಚಿವೆ ವೀಣಾ ಜಾಜ್‌ರ್‍ ಶನಿವಾರ ಹೇಳಿದ್ದಾರೆ. ಜು. 14ರಂದು ವಿದೇಶದಿಂದ ಮರಳಿದ ಕೊಲ್ಲಮ್‌ ನಿವಾಸಿಯಾದ ವ್ಯಕ್ತಿಗೆ ಮಂಕಿಪಾಕ್ಸ್‌ ಸೋಂಕು ಧೃಢಪಟ್ಟಿತ್ತು. ಇದು ದೇಶದ ಮೊದಲ ಮಂಕಿಪಾಕ್ಸ್‌ ಪ್ರಕರಣ ಎನಿಸಿಕೊಂಡಿತ್ತು.

‘ಆದರೆ ಈಗ ವ್ಯಕ್ತಿಯು ಸಂಪೂರ್ಣವಾಗಿ ಮಂಕಿಪಾಕ್ಸ್‌ನಿಂದ ಗುಣಮುಖನಾಗಿದ್ದಾನೆ. ಆತನ ಚರ್ಮದ ಮೇಲೆ ಎದ್ದ ಬೊಬ್ಬೆಗಳು ವಾಸಿಯಾಗಿವೆ. ನ್ಯಾಷನಲ್‌ ಇನ್ಸಿಟಿಟ್ಯೂಟ್‌ ಆಫ್‌ ವೈರಾಲಜಿಯಿಂದ ವ್ಯಕ್ತಿಯ ಮಾದರಿಗಳನ್ನು 72 ಗಂಟೆಗಳ ಅಂತರದಲ್ಲಿ 2 ಬಾರಿ ಪರೀಕ್ಷಿಸಲಾಗಿದೆ. 2 ಬಾರಿಯೂ ವ್ಯಕ್ತಿಗೆ ಮಂಕಿಪಾಕ್ಸ್‌ ನೆಗೆಟಿವ್‌ ವರದಿಯಾಗಿದೆ. ವ್ಯಕ್ತಿಯು ದೈಹಿಕ ಹಾಗೂ ಮಾನಸಿಕವಾಗಿ ಸ್ವಸ್ಥನಾಗಿರುವ ಕಾರಣ ಆತನನ್ನು ಆಸ್ಪತ್ರೆಯಿಂದ ಬಿಡುಗಡೆಗೊಳಿಸಲಾಗಿದೆ’ ಎಂದು ವೀಣಾ ಹೇಳಿದ್ದಾರೆ. ‘ಸೋಂಕಿತ ವ್ಯಕ್ತಿಯ ಕುಟುಂಬದವರು ಹಾಗೂ ಆತನ ಪ್ರಾಥಮಿಕ ಸಂಪರ್ಕದಲ್ಲಿರುವವರ ಮಾದರಿಯನ್ನು ಪರೀಕ್ಷೆಗೆ ಒಳಪಡಿಸಲಾಗಿದ್ದು, ಯಾರಿಗೂ ಸೋಂಕು ದೃಢಪಟ್ಟಿಲ್ಲ. ಕೇರಳದ ಇನ್ನಿಬ್ಬರು ಮಂಕಿಪಾಕ್ಸ್‌ ಸೋಂಕಿತರ ಆರೋಗ್ಯ ಕೂಡಾ ಸ್ಥಿರವಾಗಿದ್ದು, ಅವರಿಗೆ ಚಿಕಿತ್ಸೆ ಮುಂದುವರೆಸಲಾಗಿದೆ’ ಎಂದು ಸಚಿವೆ ಹೇಳಿದ್ದಾರೆ. ದಿಲ್ಲಿಯಲ್ಲಿ ಕೂಡ ಮಂಕಿಪಾಕ್ಸ್‌ ಕೇಸು ದೃಢಪಟ್ಟಿತ್ತು. ಹೀಗಾಗಿ ದೇಶದಲ್ಲಿ ಈವರೆಗೆ 4 ಪ್ರಕರಣ ದಾಖಲಾದಂತಾಗಿತ್ತು.

ಮಂಕಿಪಾಕ್ಸ್‌ ವೈರಸ್‌ ಪ್ರತ್ಯೇಕದಲ್ಲಿ ಎನ್‌ಐವಿ ಯಶಸ್ವಿ: ಲಸಿಕೆ
ಮಂಕಿಪಾಕ್ಸ್‌ ಸೋಂಕಿತ ವ್ಯಕ್ತಿಯೊಬ್ಬನ ರಕ್ತದಿಂದ ವೈರಸ್‌ ಅನ್ನು ಪ್ರತ್ಯೇಕಿಸುವಲ್ಲಿ ಪುಣೆಯ ರಾಷ್ಟ್ರೀಯ ವೈರಾಣು ಸಂಸ್ಥೆ ಯಶಸ್ವಿಯಾಗಿದೆ. ಇದು ದೇಶದಲ್ಲಿ ಮಂಕಿಪಾಕ್ಸ್‌ ಚಿಕಿತ್ಸಾ ಕಿಟ್‌ ಮತ್ತು ಲಸಿಕೆ ಅಭಿವೃದ್ಧಿಗೆ ಅತ್ಯಂತ ಮಹತ್ವದ ಬೆಳವಣಿಗೆಯಾಗಿ ಹೊರಹೊಮ್ಮಿದೆ. ಅದರ ಬೆನ್ನಲ್ಲೇ ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿಯು (ಐಸಿಎಂಆರ್‌), ಭಾರತದ ಲಸಿಕೆ ಉತ್ಪಾದಕರಿಂದ ಮಂಕಿಪಾಕ್ಸ್‌ ಚಿಕಿತ್ಸಾ ಕಿಟ್‌ ಮತ್ತು ಲಸಿಕೆ ಉತ್ಪಾದನೆಗೆ ಪ್ರಸ್ತಾವನೆ ಆಹ್ವಾನಿಸಿದೆ. ಆಯ್ಕೆಯಾದ ಕಂಪನಿಗಳಿಗೆ ಸ್ವತಃ ಎನ್‌ಐವಿ, ವೈರಸ್‌ನ ಮಾದರಿಯನ್ನು ನೀಡಲಿದೆ. ಭಾರತದಲ್ಲಿ 4 ಸೇರಿದಂತೆ ವಿಶ್ವದ 80 ದೇಶಗಳಲ್ಲಿ ಕಾಣಿಸಿಕೊಂಡು ಮಂಕಿಪಾಕ್ಸ್‌ ನಿಧಾನವಾಗಿ ವ್ಯಾಪಕವಾಗುತ್ತಿರುವ ಬೆನ್ನಲ್ಲೇ ಲಸಿಕೆ ಉತ್ಪಾದನೆಯತ್ತ ಸರ್ಕಾರ ಮಹತ್ವದ ಹೆಜ್ಜೆ ಇಟ್ಟಿದೆ.