ಹೆಚ್ಚಿದ ಕೊರೋನಾ: ಭಾರತದಿಂದ ಆಸ್ಟ್ರೇಲಿಯಾಗೆ ಬಂದ್ರೆ 5 ವರ್ಷ ಜೈಲು..!

ಭಾರತದ ಪ್ರಯಾಣಿಕರಿಗೆ ಆಸ್ಟ್ರೇಲಿಯಾದಲ್ಲಿ ನಿರ್ಬಂಧ | ಭಾರತದಿಂದ ಬಂದ್ರೆ 5 ವರ್ಷ ಜೈಲು ಪಕ್ಕಾ

ಸಿಡ್ನಿ(ಮೇ.01): ಕಳೆದ 14ದಿನಗಳಲ್ಲಿ ಭಾರತದಲ್ಲಿದ್ದಂತ ಆಸ್ಟ್ರೇಲಿಯಾದ ನಾಗರಿಕರಿಗೆ ಸೋಮವಾರದಿಂದ ಎಂಟ್ರಿ ಕ್ಲೋಸ್ ಆಗಿದೆ. ಆಸ್ಟ್ರೇಲಿಯಾ ಸೋಮವಾರದಿಂದ ತನ್ನದೇ ನಾಗರಿಕರನ್ನು ದೇಶ ಪ್ರವೇಶಿಸುವುದನ್ನು ನಿಷೇಧಿಸಿದೆ. ಈ ನಿಯಮವನ್ನು ಮೀರಿ ಆಸ್ಟ್ರೇಲಿಯಾಗೆ ಬಂದರೆ ಅವರಿಗೆ ದಂಡ ವಿಧಿಸಿ, ಜೈಲು ಶಿಕ್ಷೆ ವಿಧಿಸಲಾಗುತ್ತದೆ ಎಂದು ಅಲ್ಲಿನ ಸರ್ಕಾರ ತಿಳಿಸಿದೆ.

ಈ ತುರ್ತು ನಿರ್ಧಾರವನ್ನು ಶುಕ್ರವಾರ ತಿಳಿಸಲಾಗಿದೆ. ಇದೇ ಮೊದಲ ಬಾರಿ ತಮ್ಮದೇ ನಾಗರಿಕರು ತಮ್ಮ ದೇಶಕ್ಕೆ ಮರಳುವುದನ್ನು ಕ್ರಿಮಿನಲ್ ಅಪರಾಧ ಎಂದು ಘೋಷಿಸಿದೆ ಆಸ್ಟ್ರೇಲಿಯಾ. ಜಗತ್ತಿನ ಎರಡನೇ ದೊಡ್ಡ ಕೊರೋನಾ ಬಾಧಿತ ದೇಶ ಭಾರತದಿಂದ ಆಸ್ಟ್ರೇಲಿಯಾ ಜನರು ಮರಳುವುದನ್ನು ತಡೆಯಲು ಈ ಕಟ್ಟುನಿಟ್ಟಿನ ನಿರ್ಧಾರ ಮಾಡಲಾಗಿದೆ.

ಈ ನಿರ್ಬಂಧಗಳು ಮೇ 3 ರಿಂದ ಜಾರಿಗೆ ಬರಲಿವೆ. ನಿಷೇಧವನ್ನು ಉಲ್ಲಂಘಿಸಿದರೆ ದಂಡ ಮತ್ತು ಐದು ವರ್ಷಗಳ ಜೈಲು ಶಿಕ್ಷೆ ಉಂಟಾಗುತ್ತದೆ ಎಂದು ಆರೋಗ್ಯ ಸಚಿವ ಗ್ರೆಗ್ ಹಂಟ್ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ಸರ್ಕಾರವು ಈ ನಿರ್ಧಾರಗಳನ್ನು ಲಘುವಾಗಿ ತೆಗೆದುಕೊಳ್ಳುವುದಿಲ್ಲ ಎಂದು ಹಂಟ್ ಹೇಳಿದ್ದಾರೆ. ಆಸ್ಟ್ರೇಲಿಯಾದ ಸಾರ್ವಜನಿಕ ಆರೋಗ್ಯ ಮತ್ತು ಸಂಪರ್ಕತಡೆಯ ಪದ್ಧತಿಗಳ ಸಮಗ್ರತೆಯನ್ನು ಕಾಪಾಡುವುದು ನಿರ್ಣಾಯಕವಾಗಿದೆ. ಮೇ 15 ರಂದು ಸರ್ಕಾರ ನಿರ್ಬಂಧಗಳನ್ನು ಮರುಪರಿಶೀಲಿಸಲಿದೆ ಎಂದಿದ್ದಾರೆ.

ಭಾರತದ ಕೊರೋನವೈರಸ್ ಸಾವಿನ ಸಂಖ್ಯೆ ಈ ವಾರ 200,000 ದಾಟಿದೆ. ರಾಜಕೀಯ ರ್ಯಾಲಿಗಳು ಮತ್ತು ಧಾರ್ಮಿಕ ಉತ್ಸವಗಳಂತಹ ಸೂಪರ್-ಸ್ಪ್ರೆಡರ್ ಘಟನೆಗಳೊಂದಿಗೆ ತೀವ್ರವಾದ ಹೊಸ ಕೊರೋನಾ ವಿಧ ಸೇರಿಕೊಂಡಿರುವುದರಿಂದ ಪ್ರಕರಣಗಳು ತೀವ್ರಗತಿಯಲ್ಲಿ ಏರಿಕೆಯಾಗುತ್ತಿದೆ.

ಭಾರತದಿಂದ ಹಿಂದಿರುಗಿದ ಆಸ್ಟ್ರೇಲಿಯನ್ನರನ್ನು ಅಪರಾಧಿಗಳಾಗಿಸುವ ನಿರ್ಧಾರವು ಅಸಮರ್ಪಕ. ಇದು ಅತಿಯಾದ ಶಿಕ್ಷೆಯಾಗಿದೆ ಎಂದು ಭಾರತದಲ್ಲಿ ಕುಟುಂಬದೊಂದಿಗೆ ಆಸ್ಟ್ರೇಲಿಯಾದ ಸರ್ಜನ್ ನೀಲಾ ಜನಕಿರಮಣನ್ ಹೇಳಿದ್ದಾರೆ.

ಇದು ಅತಿರೇಕದ ನಿರ್ಧಾರ. ಆಸ್ಟ್ರೇಲಿಯನ್ನರು ತಮ್ಮ ದೇಶಕ್ಕೆ ಮರಳುವ ಹಕ್ಕನ್ನು ಹೊಂದಿದ್ದಾರೆ ಎಂದು ಹ್ಯೂಮನ್ ರೈಟ್ಸ್ ವಾಚ್‌ನ ಆಸ್ಟ್ರೇಲಿಯಾದ ನಿರ್ದೇಶಕ ಎಲೈನ್ ಪಿಯರ್ಸನ್ ಹೇಳಿಕೆಯಲ್ಲಿ ತಿಳಿಸಿದ್ದಾರೆ. ಜೈಲು ಶಿಕ್ಷೆ ಮತ್ತು ಕಠಿಣ ಶಿಕ್ಷೆಗಳ ಮೇಲೆ ತಮ್ಮ ಪ್ರಯತ್ನಗಳನ್ನು ಕೇಂದ್ರೀಕರಿಸುವ ಬದಲು ಭಾರತದಿಂದ ಹಿಂದಿರುಗಿದ ಆಸ್ಟ್ರೇಲಿಯನ್ನರನ್ನು ಸುರಕ್ಷಿತವಾಗಿ ಕ್ವಾರೆಂಟೈನ್ ಮಾಡುವ ಮಾರ್ಗಗಳನ್ನು ಸರ್ಕಾರ ಹುಡುಕಬೇಕು ಎಂದು ಹೇಳಿದ್ದಾರೆ.

ಸಮುದಾಯ ಪ್ರಸರಣವಿಲ್ಲದ ಆಸ್ಟ್ರೇಲಿಯಾ ಮಂಗಳವಾರ ಭಾರತದಿಂದ ನೇರ ವಿಮಾನಗಳನ್ನು ಮೇ ಮಧ್ಯದವರೆಗೆ ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಿದೆ. ಆದರೂ ಕ್ರಿಕೆಟಿಗರಾದ ಆಡಮ್ ಜಂಪಾ ಮತ್ತು ಕೇನ್ ರಿಚರ್ಡ್ಸನ್ ಸೇರಿದಂತೆ ಕೆಲವು ಆಸ್ಟ್ರೇಲಿಯನ್ನರು ದೋಹಾ ಮೂಲಕ ಮರಳಿದ್ದಾರೆ.

ಈ ಕ್ರಮದಿಂದ ಭಾರತದಲ್ಲಿ 9,000 ಕ್ಕೂ ಹೆಚ್ಚು ಆಸ್ಟ್ರೇಲಿಯನ್ನರು ಸಿಲುಕಿಕೊಂಡಿದ್ದಾರೆ. ಅವರಲ್ಲಿ 650 ಮಂದಿ ದುರ್ಬಲರು ಎಂದು ನೋಂದಾಯಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಸೂಚನೆ: ಕೊರೋನಾ ಮಹಾಮಾರಿ ಎಲ್ಲೆಡೆ ಹರಡುತ್ತಿದೆ. ಹೀಗಿರುವಾಗ ಎಲ್ಲರೂ ತಪ್ಪದೇ ಮಾಸ್ಕ್ ಧರಿಸಿ, ಸಾಮಾಜಿಕ ಅಂತರ ಕಾಪಾಡಿ ಹಾಗೂ ಲಸಿಕೆ ಪಡೆಯಿರಿ ಎಂಬುವುದು ಏಷ್ಯಾನೆಟ್‌ ನ್ಯೂಸ್‌ ಕಳಕಳಿಯ ವಿನಂತಿ. ಒಗ್ಗಟ್ಟಿನಿಂದ ನಾವು ಈ ಕೊರೋನಾ ಸರಪಳಿ ಮುರಿಯೋಣ #ANCares #IndiaFightsCorona