ಬೆಂಗಳೂರು(ಸೆ.26): ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ ಹೊಸ ಸಾಧನೆ ಮಾಡುತ್ತಿದೆ. ಒಂದೇ ರಾಕೆಟ್ ಮೂಲಕ ಎಂಟು ಉಪಗ್ರಹಗಳನ್ನು ಇಸ್ರೋ ಕಕ್ಷೆಗೆ ಸೇರಿಸಿಸಲಿದೆ. ಈ ಕ್ಷಣಕ್ಕಾಗಿ ಈಗಾಗಲೇ ಇಸ್ರೋ ವಿಜ್ಞಾನಿಗಳು ಕಾತುರತೆಯಿಂದ ಕಾಯುತ್ತಿದ್ದಾರೆ.
ಈಗಾಗಲೇ ಹಲವು ಉಪಗ್ರಹಗಳನ್ನು ಉಡಾವಣೆ ಮೂಲಕ ವಿಶ್ವದ ಪ್ರಶಂಸೆಗೆ ಪಾತ್ರವಾಗಿರುವ ಭಾರತೀಯ ಬಾಹ್ಯಾಕಾಶ ಸಂಸ್ಥೆ , ಇದೀಗ ಮತ್ತೊಂದು ಮೈಲುಗಲ್ಲಿಗೆ ಸಿದ್ಧತೆ ನಡೆಸಿದೆ. ಏಕಕಾಲಕ್ಕೆ ಎರಡು ಕಕ್ಷೆಗಳಿಗೆ 8 ಉಪಗ್ರಹಗಳನ್ನು ಉಡಾವಣೆ ಮಾಡಲು ಸಿದ್ಥತೆ ನಡೆಸಿದೆ. ಇಂದು ಬೆಳಗ್ಗೆ 9.12ಕ್ಕೆ ಆಂಧ್ರಪ್ರದೇಶದ ಶ್ರೀಹರಿಕೋಟಾ ಉಡಾವಣಾ ನೆಲೆಯಿಂದ ಉಡಾವಣೆಗೊಳ್ಳಲಿದೆ.
8 ಉಪಗ್ರಗಳ ಹೊತ್ತೊಯ್ಯಲಿದೆ PSLV-C35
8 ಉಪಗ್ರಹಗಳ ಪೈಕಿ ಮೂರು ಉಪಗ್ರಹಗಳು ಭಾರತದ್ದಾಗಿದ್ದು, ಉಳಿದ ಐದು ವಿದೇಶಿ ಉಪಗ್ರಹಗಳು. ಇದಕ್ಕಾಗಿ ಇಸ್ರೋದ ಯಶಸ್ವೀ ಉಡಾವಣಾ ವಾಹಕ ಪಿಎಸ್ಎಲ್ವಿ ರಾಕೆಟ್ ರೆಡಿಯಾಗಿದೆ. ಈ ಉಡಾವಣೆಯು ಇಸ್ರೋದ ಸುದೀರ್ಘಾವಧಿಯ ಕಾರ್ಯವಾಗಿದ್ದು, ಸುಮಾರು 2 ಗಂಟೆ, 15 ನಿಮಿಷಗಳ ಕಾಲ ತಗುಲಲಿದೆ. 320 ಟನ್ ತೂಕ ಹೊಂದಿರುವ ಈ ರಾಕೆಟ್ 8 ಉಪಗ್ರಹಗಳನ್ನು ಬೇರೆ ಬೇರೆ ಕಕ್ಷೆಗೆ ಸೇರಿಸೋದು ಸದ್ಯ ಇಸ್ರೋ ಮುಂದಿರುವ ಕ್ಲಿಷ್ಟಕರ ಸವಾಲು. ಯಾಕಂದ್ರೆ ಬಾಹ್ಯಾಕಾಶದಲ್ಲಿ ರಾಕೆಟ್ ಎಂಜಿನ್ ಅನ್ನು ಆಫ್ ಮಾಡಿ ಮತ್ತೆ ಎಂಜಿನ್ ಸ್ಟಾರ್ಟ್ ಮಾಡಬೇಕಿರುತ್ತದೆ. ಇದು ಇಸ್ರೋ ಮುಂದಿರುವ ಅತೀ ದೊಡ್ಡ ಸವಾಲು.
ಉಪಗ್ರಹಗಳ ಪಟ್ಟಿಯಲ್ಲಿ ಬೆಂಗಳೂರಿನ ಪಿಇಎಸ್ ಇನ್ಸ್ಟ್ಟಿಟ್ಯೂಟ್ ಆಫ್ ಟೆಕ್ನಾಲಜಿಯ 250 ವಿದ್ಯಾರ್ಥಿಗಳು ಸಿದ್ಧಪಡಿಸಿರುವ ಪೈಸ್ಯಾಟ್ ಹೆಸರಿನ ಉಪಗ್ರಹವೂ ಒಂದಾಗಿದೆ. ವಿದ್ಯಾರ್ಥಿಗಳ 5 ವರ್ಷಗಳ ಶ್ರಮ ನಾಳೆ ಫಲ ಕೊಡುತ್ತಿದೆ.
ಒಟ್ಟಾರೆ ಬಾಹ್ಯಾಕಾಶದಲ್ಲಿ ಭಾರತೀಯ ಬಾಹ್ಯಾಕಾಶ ಸಂಸ್ಥೆ ಹೊಸ ದಾಖಲೆ ಬರೆಯಲು ಕ್ಷಣಗಣನೆ ಆರಂಭವಾಗಿದೆ.