ತಮ್ಮ ಮೇಲೆ ದಾಳಿ ನಡೆಸಿದ್ದ ಮಹಿಳಾ ನಕ್ಸಲ್‌ಗೆ CRPF ಯೋಧರಿಂದ ರಕ್ತದಾನ!

ತಮ್ಮ ಮೇಲೆ ದಾಳಿ ನಡೆಸಲು ಸಜ್ಜಾಗಿ, ಗಾಯಗೊಂಡ ಮಹಿಳಾ ನಕ್ಸಲ್‌ಗೆ ರಕ್ತ ನೀಡುವ ಮೂಲಕ CRPF ಯೋಧರು ಮಾನವೀಯತೆ ಮೆರೆದಿದ್ದಾರೆ.

ಜೆಮ್‌ಶೆಡ್‌ಪುರ[ಫೆ.18]: ತಮ್ಮ ಮೇಲೆ ದಾಳಿ ನಡೆಸಲು ಸಜ್ಜಾಗಿ, ಕೊನೆಗೆ ಗಾಯಗೊಂಡು ಜೀವನ್ಮರಣ ಸ್ಥಿತಿಯಲ್ಲಿದ್ದ ಮಹಿಳಾ ನಕ್ಸಲ್‌ಗೆ ಸ್ವತಃ ಸಿಆರ್‌ಪಿಎಫ್‌ ಯೋಧರೇ ರಕ್ತದಾನ ಮಾಡಿದ ಮಾನವೀಯ ಘಟನೆ ಇಲ್ಲಿ ನಡೆದಿದೆ.

ಜೆಮ್ಷೆಡ್‌ಪುರ ಸಮೀಪದ ಕಾಡಿನಲ್ಲಿ ನಕ್ಸಲ್‌ ನಾಯಕ ಕಂಡೇ ಹೊನಗಾ ನೇತೃತ್ವದ ತಂಡ ಭದ್ರತಾ ಪಡೆಗಳ ಮೇಲೆ ದಾಳಿಗೆ ಸಂಚು ರೂಪಿಸಿ ಹೊಂಚು ಹಾಕಿ ಕುಳಿತಿತ್ತು. ಈ ಮಾಹಿತಿ ಪಡೆದ ಸಿಆರ್‌ಪಿಎಫ್‌ ಅತ್ತ ಕಡೆ ತೆರಳಿದಾಗ, ಉಭಯ ಬಣಗಳ ನಡುವೆ ಗುಂಡಿನ ಚಕಮಕಿ ನಡೆದಿತ್ತು. ಈ ವೇಳೆ ಭದ್ರತಾ ಪಡೆಗಳ ದಾಳಿ ತಪ್ಪಿಸಿಕೊಳ್ಳಲಾಗದೆ 24 ಜನರ ನಕ್ಸಲ್‌ ತಂಡದಲ್ಲಿದ್ದ ಹಲವರು ಪರಾರಿಯಾದರು.

ಈ ವೇಳೆ ಗುಂಡೇಟಿನಿಂದ ಗಾಯಗೊಂಡಿದ್ದ ಮಹಿಳಾ ನಕ್ಸಲ್‌ ಪರಾರಿಯಾಗಲಾಗದೇ ಅಲ್ಲಿಯೇ ಬಿದ್ದು ಒದ್ದಾಡುತ್ತಿದ್ದರು. ಕೂಡಲೇ ಆಕೆಯನ್ನು ಆಸ್ಪತ್ರೆಗೆ ದಾಖಲಿಸಿದ ಸಿಆರ್‌ಫಿಎಫ್‌ ಯೋಧರು, ಆಕೆಗೆ ಅಗತ್ಯವಾದ ರಕ್ತ ನೀಡುವ ಮೂಲಕ ಮಾನವೀಯತೆ ಮೆರೆದಿದ್ದಾರೆ.