ಹನಿ ಸಿಂಗ್‌ ಹಾಡಿನ ವಿರುದ್ಧ ಹೈಕೋರ್ಟ್‌ ಮೆಟ್ಟಿಲೇರಿದ ಪುನೀತ್‌ ಜೊತೆ ಐಟಂ ಡಾನ್ಸ್ ಮಾಡಿದ್ದ ನಟಿ!

ನಟಿ ನೀತು ಚಂದ್ರ ಹನಿ ಸಿಂಗ್ ಅವರ 'ಮ್ಯಾನಿಯಕ್' ಹಾಡಿನಲ್ಲಿ ಅಶ್ಲೀಲತೆಯಿದೆ ಎಂದು ಆರೋಪಿಸಿ ಪಾಟ್ನಾ ಹೈಕೋರ್ಟ್‌ನಲ್ಲಿ PIL ಸಲ್ಲಿಸಿದ್ದಾರೆ. ಹಾಡು ಮಹಿಳೆಯರನ್ನು ಲೈಂಗಿಕ ವಸ್ತುಗಳಾಗಿ ತೋರಿಸುತ್ತದೆ ಎಂದು ಅವರು ವಾದಿಸಿದ್ದಾರೆ.

ನವದೆಹಲಿ (ಮಾ.6): ಜನಪ್ರಿಯ ರ‍್ಯಾಪರ್ ಯೋ ಯೋ ಹನಿ ಸಿಂಗ್ ಅವರ ಇತ್ತೀಚಿನ ಹಾಡು 'ಮ್ಯಾನಿಯಕ್' ನಲ್ಲಿ ಅಶ್ಲೀಲತೆಯಿದೆ ಎಂದು ಆರೋಪಿಸಿದ್ದಾರೆ ಎಂದು ನಟಿ ನೀತು ಚಂದ್ರ ಪಾಟ್ನಾ ಹೈಕೋರ್ಟ್‌ನಲ್ಲಿ ಸಾರ್ವಜನಿಕ ಹಿತಾಸಕ್ತಿ ಮೊಕದ್ದಮೆ ಹೂಡಿದ್ದಾರೆ. 'ಗರಂ ಮಸಾಲ' ಮತ್ತು 'ಟ್ರಾಫಿಕ್' ನಂತಹ ಹಿಂದಿ ಸಿನಿಮಾಗಳಿಂದ ಫೇಮಸ್‌ ಆಗಿರುವ 40 ವರ್ಷದ ನೀತು ಚಂದ್ರ, ಈ ಹಾಡು "ಬಹಿರಂಗ ಲೈಂಗಿಕತೆಯನ್ನು ಚಿತ್ರಿಸುತ್ತದೆ" ಮತ್ತು "ಮಹಿಳೆಯರನ್ನು ಕೇವಲ ಲೈಂಗಿಕ ವಸ್ತುಗಳಾಗಿ ತೋರಿಸಲಾಗಿದೆ" ಎಂದು ವಾದಿಸಿದ್ದಾರೆ. ಶಾಲೆಗೆ ಹೋಗುವ ಹುಡುಗಿಯರು ತಾವು ಅಸುರಕ್ಷಿತರೆಂದು ಭಾವಿಸುತ್ತಾರೆ. ಇದಲ್ಲದೆ, ಅಶ್ಲೀಲ ಹಾಡುಗಳನ್ನು ಹಾಡುವ ಗಾಯಕರ ವಿರುದ್ಧ ಪ್ರಕರಣ ದಾಖಲಿಸಬೇಕು ಎಂದು ಅರ್ಜಿಯಲ್ಲಿ ಕೋರಿದ್ದಾರೆ. ನೀತು ಚಂದ್ರ ಸಾಕಷ್ಟು ಸಿನಿಮಾಗಳಲ್ಲಿ ನಟಿಸಿದ್ದು, ಕನ್ನಡದಲ್ಲಿ ಪುನೀತ್‌ ರಾಜ್‌ಕುಮಾರ್‌ ಅಭಿನಯದ ಪವರ್‌ ಸಿನಿಮಾದಲ್ಲಿ 'ವೈ ವೈ' ಎನ್ನುವ ಐಟಂ ಸಾಂಗ್‌ನಲ್ಲಿ ಕುಣಿದಿದ್ದರು.

ಈ ಹಾಡು "ಅಶ್ಲೀಲತೆಯನ್ನು ಸಾಮಾನ್ಯೀಕರಿಸಲು ಭೋಜ್‌ಪುರಿ ಭಾಷೆಯನ್ನು" ಬಳಸುತ್ತದೆ ಮತ್ತು "ಮಹಿಳಾ ಸಬಲೀಕರಣವನ್ನು ಅಮಮಾನಿಸುತ್ತದೆ' ಎಂದು ಆರೋಪಿಸಿದ್ದಾರೆ. ಅರ್ಜಿಯಲ್ಲಿ 41 ವರ್ಷದ ಹಿರ್ದೇಶ್ ಸಿಂಗ್ ಅಕಾ ಹನಿ ಸಿಂಗ್ ಮತ್ತು ಗೀತರಚನೆಕಾರ ಲಿಯೋ ಗ್ರೆವಾಲ್ ಮತ್ತು ಭೋಜ್‌ಪುರಿ ಗಾಯಕರಾದ ರಾಗಿಣಿ ವಿಶ್ವಕರ್ಮ ಮತ್ತು ಅರ್ಜುನ್ ಅಜನಾಬಿ ಸೇರಿದಂತೆ ಹಾಡಿನ ಇತರ ಹೆಸರುಗಳನ್ನು ಉಲ್ಲೇಖಿಸಲಾಗಿದೆ.

ವಿಮರ್ಶಾತ್ಮಕವಾಗಿ ಮೆಚ್ಚುಗೆ ಪಡೆದ ಎರಡು ಭೋಜ್‌ಪುರಿ ಮತ್ತು ಮೈಥಿಲಿ ಚಲನಚಿತ್ರಗಳನ್ನು ಸಹ ನಿರ್ಮಿಸಿರುವ ನೀತು ಚಂದ್ರ, ಈ ಹಾಡನ್ನು ರಚನೆ ಮಾಡಿರುವವರು "ಸಾಹಿತ್ಯವನ್ನು ತಿದ್ದುಪಡಿ ಮಾಡಲು" ನಿರ್ದೇಶಿಸುವಂತೆ ನ್ಯಾಯಾಲಯಕ್ಕೆ ಮನವಿ ಮಾಡಿದ್ದಾರೆ. ಮಾರ್ಚ್‌ನಲ್ಲಿ ಪಿಐಎಲ್ ವಿಚಾರಣೆಗೆ ಬರುವ ಸಾಧ್ಯತೆಯಿದೆ ಎಂದು ಸುದ್ದಿ ಸಂಸ್ಥೆ ಪಿಟಿಐ ವರದಿ ಮಾಡಿದೆ.

ಹನಿ ಸಿಂಗ್ ತಮ್ಮ ಹಾಡುಗಳಿಗೆ ಸಾಹಿತ್ಯದ ಆಯ್ಕೆಯ ಬಗ್ಗೆಯೂ ಈ ಹಿಂದೆ ವಿವಾದವನ್ನು ಎದುರಿಸಿದ್ದಾರೆ. ಪಂಜಾಬ್ ಮತ್ತು ಹರಿಯಾಣ ಹೈಕೋರ್ಟ್ 2023 ರಲ್ಲಿ ರ‍್ಯಾಪರ್ ವಿರುದ್ಧದ ಅರ್ಜಿಯನ್ನು "ನಿಷ್ಪರಿಣಾಮಕಾರಿ" ಎಂದು ಕರೆದು "ಅಶ್ಲೀಲ ಕೃತ್ಯಗಳು ಮತ್ತು ಹಾಡುಗಳ" ಆರೋಪದ ಪ್ರಕರಣದಲ್ಲಿ ಅವರ ವಿರುದ್ಧದ ಎಫ್‌ಐಆರ್ ಅನ್ನು ರದ್ದುಗೊಳಿಸುವಂತೆ ತಿಳಿಸಿತ್ತು.