ಮಗಳ ಆನ್‌ಲೈನ್‌ ಶಿಕ್ಷಣಕ್ಕಾಗಿ ರೈತ ಹಸು ಮಾರಿದ್ದು ಸುಳ್ಳು!

ಮಗಳ ಆನ್‌ಲೈನ್‌ ಶಿಕ್ಷಣಕ್ಕಾಗಿ ರೈತ ಹಸು ಮಾರಿದ್ದು ಸುಳ್ಳು!| ಕೊಟ್ಟಿಗೆಯಲ್ಲಿ ಜಾಗ ಇಲ್ಲದ್ದಕ್ಕೆ ಮಾರಿದ್ದ

ಕಾಂಗ್ರಾ(ಜು.27): ಹಿಮಾಚಲ ಪ್ರದೇಶದ ಕಾಂಗ್ರಾ ಜಿಲ್ಲೆಯ ರೈತ ಕುಲದೀಪ್‌ ಕುಮಾರ್‌ ಎಂಬಾತ ಮಗಳ ಆನ್‌ಲೈನ್‌ ಶಿಕ್ಷಣಕ್ಕಾಗಿ ಇದ್ದ ಒಂದು ಹಸುವನ್ನು 6 ಸಾವಿರ ರು.ಗೆ ಮಾರಿ, ಆಕೆಗೆ ಸ್ಮಾರ್ಟ್‌ಫೋನ್‌ ಕೊಡಿಸಿದ್ದ ವಿಷಯ ಇತ್ತೀಚೆಗೆ ದೊಡ್ಡ ಸುದ್ದಿಯಾಗಿತ್ತು. ಆದರೆ ಈ ಸುದ್ದಿ ಸುಳ್ಳು ಎಂದು ಈಗ ತಿಳಿದುಬಂದಿದೆ.

ಕುಲದೀಪ್‌ನ ಈ ಸಂಕಷ್ಟಮಾಧ್ಯಮಗಳಲ್ಲಿ ವರದಿ ಆದ ಬೆನ್ನಲ್ಲೇ ಖ್ಯಾತ ಬಾಲಿವುಡ್‌ ನಟ ಸೋನು ಸೂದ್‌ ಅವರು, ಮಾರಾಟವಾಗಿದ್ದ ಹಸುವನ್ನು ಖರೀದಿಸಿ ಪುನಃ ಕುಲದೀಪ್‌ನ ಕೊಟ್ಟಿಗೆ ಸೇರಿಸುವ ವಾಗ್ದಾನ ಮಾಡಿದ್ದರು. ಆದರೆ ಕಾಂಗ್ರಾ ಜಿಲ್ಲಾಧಿಕಾರಿ ರಾಕೇಶ್‌ ಪ್ರಜಾಪತಿ ಹಾಗೂ ಇತರ ಅಧಿಕಾರಿಗಳು ಈ ವಿಷಯದ ಪರಿಶೀಲನೆಗೆ ಕುಲದೀಪ್‌ನ ಸ್ವಂತ ಊರಿಗೆ ಭೇಟಿ ನೀಡಿದಾಗ ವಸ್ತುಸ್ಥಿತಿ ಬೇರೆಯೇ ಇದೆ ಎಂದು ಗೊತ್ತಾಗಿದೆ.

ಕುಲದೀಪ್‌ ಕೊಟ್ಟಿಗೆಯಲ್ಲಿ ಈಗಾಗಲೇ 7 ಹಸುಗಳಿದ್ದು, ಅವುಗಳಿಗೆ ನಿಲ್ಲಲೂ ಜಾಗವಿರಲಿಲ್ಲ. ಹೀಗಾಗಿ ಈ ಪೈಕಿ ಒಂದು ಹಸುವನ್ನು ಆತ ಜು.10ರಂದು ತನ್ನ ಪರಿಚಯಸ್ಥನಿಗೇ ಮಾರಿದ್ದ. 3 ತಿಂಗಳ ಹಿಂದೆಯೇ, ಅಂದರೆ ಏಪ್ರಿಲ್‌ 30ರಂದು ತನ್ನ ಮಗಳಿಗೆ ಆತ ಆನ್‌ಲೈನ್‌ ಶಿಕ್ಷಣಕ್ಕಾಗಿ ಸ್ಮಾರ್ಟ್‌ಫೋನ್‌ ಕೊಡಿಸಿದ್ದ. ಅಲ್ಲದೆ, ಸಮೀಪದಲ್ಲೇ ಸರ್ಕಾರಿ ಶಾಲೆ ಇದ್ದರೂ ತನ್ನ ಮಕ್ಕಳನ್ನು ದುಬಾರಿ ಶುಲ್ಕದ ಖಾಸಗಿ ಶಾಲೆಗೆ ಸೇರಿಸಿದ್ದ ಎಂದು ಅಧಿಕಾರಿಗಳಿಗೆ ಮನವರಿಕೆ ಆಗಿದೆ.

‘ಇಷ್ಟಾಗಿಯೂ 6 ಸಾವಿರ ರು.ಗೆ ಮಾರಿದ ಹಸುವನ್ನು ಖರೀದಿಸಿ ಪುನಃ ನಿನಗೆ ಕೊಡಿಸುತ್ತೇವೆ’ ಎಂದು ನಾವು ಹೇಳಿದೆವು. ಆದರೆ ‘ನನ್ನ ಕೊಟ್ಟಿಗೆಯಲ್ಲಿ ಅದನ್ನು ಸಾಕಲು ಜಾಗವಿಲ್ಲ’ ಎಂದು ನಮ್ಮ ಆಫರ್‌ ಅನ್ನು ಕುಲದೀಪ್‌ ತಿರಸ್ಕರಿಸಿದ ಎಂದು ಜಿಲ್ಲಾಧಿಕಾರಿ ಸ್ಪಷ್ಟಪಡಿಸಿದ್ದಾರೆ.