ಗಂಡ ಬಿಟ್ಟೋದ್ರೂ ಎದೆಗುಂದಲಿಲ್ಲ, ಕಸ ಗುಡಿಸುವ ಮಹಿಳೆ ಈಗ ಆರ್‌ಎಎಸ್‌ ಅಧಿಕಾರಿ!

* ರಾಜಸ್ಥಾನ ಆಡಳಿತಾತ್ಮಕ ಸೇವೆ (ಆರ್‌ಎಎಸ್‌) 2018ರ ಫಲಿತಾಂಶ ಪ್ರಕಟ * ಕಸ ಗುಡಿಸುವ ಮಹಿಳೆ ಈಗ ಆರ್‌ಎಎಸ್‌ ಅಧಿಕಾರಿ * ಜೋಧ್‌ಪುರ ಪಾಲಿಕೆಯಲ್ಲಿ ಹಲವು ವರ್ಷಗಳಿಂದ ಸ್ವೀಪರ್‌ ಆಗಿ ಕೆಲಸ ಮಾಡುತ್ತಿದ್ದರು

ಜೋಧ್‌ಪುರ(ಜು.16): ರಾಜಸ್ಥಾನ ಆಡಳಿತಾತ್ಮಕ ಸೇವೆ (ಆರ್‌ಎಎಸ್‌) 2018ರ ಫಲಿತಾಂಶ ಹೊರಬಿದ್ದಿದ್ದು, ಇಲ್ಲಿ ಕಸಗುಡಿಸುವ ಮಹಿಳೆ ಆಶಾ ಕಂದರಾ ಆರ್‌ಎಎಸ್‌ ಅಧಿಕಾರಿಯಾಗಿ ಆಯ್ಕೆಯಾಗಿ ಅದ್ವಿತೀಯ ಸಾಧನೆ ಮಾಡಿದ್ದಾರೆ.

8 ವರ್ಷದ ಹಿಂದೆ ಸಾಂಸಾರಿಕ ಜೀವನದಲ್ಲಿ ಬಿರುಕು ಉಂಟಾಗಿ ಆಶಾ ಗಂಡನನ್ನು ತ್ಯಜಿಸಿ ಏಕಾಂಗಿಯಾಗಿ ವಾಸಿಸುತ್ತಿದ್ದರು. ಎರಡು ಮಕ್ಕಳ ಜವಾಬ್ದಾರಿಯೂ ಈಕೆಯ ಮೇಲಿತ್ತು. ಹೀಗಾಗಿ ಜೋಧ್‌ಪುರ ಪಾಲಿಕೆಯಲ್ಲಿ ಹಲವು ವರ್ಷಗಳಿಂದ ಸ್ವೀಪರ್‌ ಆಗಿ ಕೆಲಸ ಮಾಡುತ್ತಿದ್ದರು.

ಈ ನಡುವೆಯೂ ಸಾಧಿಸುವ ಛಲ ಬಿಡದೆ ಹಗಲಿನಲ್ಲಿ ಜೋಧ್‌ಪುರ ರಸ್ತೆ ಸ್ವಚ್ಛಗೊಳಿಸುತ್ತಾ, ರಾತ್ರಿ ಅಭ್ಯಾಸ ನಡೆಸಿ ಅಂತೂ ಅತ್ಯುನ್ನತ ಹುದ್ದೆಗೇರಿ ಎಲ್ಲರಿಗೂ ಮಾದರಿಯಾಗಿದ್ದಾರೆ.

ಇನ್ನು ಈ ಬಗ್ಗೆ ಮಾತನಾಡಿರುವ ಆಶಾ 'ತಾನು ಕಸ ಗುಡಿಸುವಾಗ ಮಹಾನಗರ ಪಾಲಿಕೆಯಲ್ಲಿ ಕುಳಿತ ಅಧಿಕಾರಿಗಳನ್ನು ನೋಡುತ್ತಿದ್ದೆ. ಅವರಂತೆ ಅಧಿಕಾರಿಯಾಗಬೇಕು ಅನ್ನೋ ಹಂಬಲ ನನ್ನ ಮನಸ್ಸಿನಲ್ಲಿ ಹುಟ್ಟಿತ್ತು. ಪದವಿ ಪಡೆದೆ. ನಂತ್ರ ಆರ್‌ಎಎಸ್ ತಯಾರಿಯಲ್ಲಿ ತೋಡಗಿ, ಅಂತಿಮವಾಗಿ ನನ್ನ ಕಠಿಣ ಪರಿಶ್ರಮ ಫಲ ​​ನೀಡಿತು. ನನ್ನ ಕನಸು ಇಂದು ನನಸಾಗಿದೆ ಎಂದು ಖುಷಿ ವ್ಯಕ್ತಪಡಿಸಿದ್ದಾರೆ.