ಚೀನಾದ ಗೂಢಚಾರಿಕೆ ಹಡಗು ನಾಳೆ ಶ್ರೀಲಂಕಾಗೆ ಕಾಲಿಡಲಿದೆ. ಆದರೆ, ಈ ನಡುವೆ ಇಂದು ಭಾರತ ಶ್ರೀಲಂಕಾ ನೌಕೆಗೆ ಯುದ್ಧ ವಿಮಾನವನ್ನು ಉಡುಗೊರೆ ನೀಡಿದೆ.
ಚೀನಾದ ಗೂಢಚಾರಿಕೆ ನೌಕೆ (Chinesse Spy Ship) ನಾಳೆ ಶ್ರಿಲಂಕಾದ ಹಂಬನ್‌ತೋಟಗೆ (Hambantota) ಕಾಲಿಡಲಿದೆ. ಈ ನಡುವೆ ಶ್ರೀಲಂಕಾ ನೌಕೆಗೆ ಭಾರತ ಇಂದು ಡಾರ್ನಿಯರ್ ಯುದ್ಧ ವಿಮಾನವೊಂದನ್ನು (Dornier Aircraft) ಉಡುಗೊರೆ ನೀಡುತ್ತಿದೆ. ಇದು ಲಂಕಾದ ಕಡಲ ಕಣ್ಗಾವಲು ಸಾಮರ್ಥ್ಯಗಳು ಮತ್ತು ದ್ವಿಪಕ್ಷೀಯ ರಕ್ಷಣಾ ಸಂಬಂಧಗಳನ್ನು ಬಲಪಡಿಸಲಿದೆ ಎಂದು ಹೇಳಲಾಗಿದೆ.
ಈ ಸಂಬಂಧ ಕೊಲಂಬೋದಲ್ಲಿ ಮಾಹಿತಿ ನೀಡಿದ ಭಾರತ ಮತ್ತು ಶ್ರೀಲಂಕಾದ ಭದ್ರತೆಯು ಪರಸ್ಪರ ತಿಳುವಳಿಕೆ, ಪರಸ್ಪರ ನಂಬಿಕೆ ಮತ್ತು ಸಹಕಾರದಿಂದ ವರ್ಧಿಸುತ್ತದೆ ಎಂದು ಸೋಮವಾರ ಭಾರತೀಯ ರಾಯಭಾರಿ ಹೇಳಿದ್ದಾರೆ. ಭಾರತವು ತನ್ನ ಕಡಲ ಕಣ್ಗಾವಲು ಸಾಮರ್ಥ್ಯವನ್ನು ಹೆಚ್ಚಿಸಲು ಮತ್ತು ದ್ವಿಪಕ್ಷೀಯ ರಕ್ಷಣಾ ಸಂಬಂಧಗಳನ್ನು ಹೆಚ್ಚಿಸಲು ಶ್ರೀಲಂಕಾ ನೌಕಾಪಡೆಗೆ ಡಾರ್ನಿಯರ್ ವಿಮಾನವನ್ನು ಉಡುಗೊರೆಯಾಗಿ ನೀಡಿದೆ.
ಇದನ್ನು ಓದಿ: ಭಾರತದ ವಿರೋಧವಿದ್ದರೂ ಲಂಕಾಗೆ ಬರಲಿದೆ ಚೀನಿ ಗೂಢಚಾರಿಕೆ ಹಡಗು
ಭಾರತವು ತನ್ನ 76ನೇ ಸ್ವಾತಂತ್ರ್ಯ ದಿನಾಚರಣೆಯ ದಿನದಂದು ನಡೆದ ಹಸ್ತಾಂತರ ಸಮಾರಂಭದಲ್ಲಿ ಶ್ರೀಲಂಕಾ ಅಧ್ಯಕ್ಷ ರನಿಲ್ ವಿಕ್ರಮಸಿಂಘೆ ಉಪಸ್ಥಿತರಿದ್ದರು. 2 ದಿನಗಳ ಪ್ರವಾಸದಲ್ಲಿರುವ ಭಾರತೀಯ ನೌಕಾಪಡೆಯ ಉಪಾಧ್ಯಕ್ಷ ವೈಸ್ ಅಡ್ಮಿರಲ್ ಎಸ್.ಎನ್ ಘೋರ್ಮಾಡೆ ಅವರು ಕೊಲಂಬೋದಲ್ಲಿರುವ ಭಾರತೀಯ ಹೈಕಮೀಷನರ್ ಗೋಪಾಲ್ ಬಾಗ್ಲೇ ಅವರೊಂದಿಗೆ ಶ್ರೀಲಂಕಾ ವಾಯುಪಡೆ ನೆಲೆಯಲ್ಲಿ ಸಮುದ್ರ ಕಣ್ಗಾವಲು ವಿಮಾನವನ್ನು ಕೊಲಂಬೋ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಪಕ್ಕದಲ್ಲಿರುವ ಕಟುನಾಯಕೆಯಲ್ಲಿ ಶ್ರೀಲಂಕಾ ನೌಕಾಪಡೆಗೆ ಹಸ್ತಾಂತರಿಸಿದರು.
ಪರಸ್ಪರ ತಿಳುವಳಿಕೆ, ಪರಸ್ಪರ ನಂಬಿಕೆ ಮತ್ತು ಸಹಕಾರದಿಂದ ಭಾರತ ಮತ್ತು ಶ್ರೀಲಂಕಾದ ಭದ್ರತೆಯನ್ನು ಹೆಚ್ಚಿಸಲಾಗಿದೆ. ಡಾರ್ನಿಯರ್ 228 ಅನ್ನು ಉಡುಗೊರೆಯಾಗಿ ನೀಡುವುದು ಈ ಕಾರಣಕ್ಕೆ ಭಾರತದ ಇತ್ತೀಚಿನ ಕೊಡುಗೆಯಾಗಿದೆ ಎಂದು ಹಸ್ತಾಂತರ ಸಮಾರಂಭದಲ್ಲಿ ಹೈಕಮೀಷನರ್ ಬಾಗ್ಲೆ ಹೇಳಿದರು. ಭಾರತದೊಂದಿಗಿನ ಸಹಕಾರದ ಇತರ ಕ್ಷೇತ್ರಗಳ ಫಲಗಳಂತೆ, ಶ್ರೀಲಂಕಾ ನೌಕಾ ಪಡೆಗೆ ಡಾರ್ನಿಯರ್ ಕೊಡುಗೆಯು ಪ್ರಸ್ತುತವಾಗಿದೆ ಮತ್ತು ಕಡಲ ಸುರಕ್ಷತೆ ಹಾಗೂ ಭದ್ರತೆಗಾಗಿ ಅದರ ಅವಶ್ಯಕತೆಗಳನ್ನು ಪೂರೈಸುವ ಒಂದು ಹೆಜ್ಜೆಯಾಗಿದೆ. ಇದು ಭಾರತದ ಶಕ್ತಿಯು ತನ್ನ ಸ್ನೇಹಿತರ ಬಲವನ್ನು ಹೆಚ್ಚಿಸುವ ಒಂದು ಉದಾಹರಣೆಯಾಗಿದೆ ಎಂದು ಅವರು ಹೇಳಿದರು.
ಇನ್ನು, ಭಾರತೀಯ ನೌಕಾಪಡೆಯ ದಾಸ್ತಾನುಗಳಿಂದ ಶ್ರೀಲಂಕಾಕ್ಕೆ ವಿಮಾನವನ್ನು ಒದಗಿಸಲಾಗುತ್ತಿದೆ. ದೇಶವು ತನ್ನ ತಕ್ಷಣದ ಭದ್ರತಾ ಅಗತ್ಯಗಳನ್ನು ಪೂರೈಸಲು ಸಹಾಯ ಮಾಡುತ್ತದೆ ಎಂದು ನವದೆಹಲಿಯ ಮೂಲಗಳು ತಿಳಿಸಿವೆ. ಕಡಲ ಕಣ್ಗಾವಲು ವಿಮಾನವನ್ನು ನಿರ್ವಹಿಸಲು ಭಾರತೀಯ ನೌಕಾಪಡೆಯು ಈಗಾಗಲೇ ಶ್ರೀಲಂಕಾದ ನೌಕಾಪಡೆ ಮತ್ತು ವಾಯುಪಡೆಯ ತಂಡಕ್ಕೆ ವ್ಯಾಪಕ ತರಬೇತಿಯನ್ನು ನೀಡಿದೆ. 2018 ರ ಜನವರಿಯಲ್ಲಿ ನವದೆಹಲಿಯಲ್ಲಿ ನಡೆದ ಭಾರತ ಮತ್ತು ಶ್ರೀಲಂಕಾ ನಡುವಿನ ರಕ್ಷಣಾ ಸಂವಾದದ ಸಂದರ್ಭದಲ್ಲಿ, ದ್ವೀಪ ರಾಷ್ಟ್ರದ ಕಡಲ ಕಣ್ಗಾವಲು ಸಾಮರ್ಥ್ಯವನ್ನು ಹೆಚ್ಚಿಸಲು ಭಾರತದಿಂದ ಎರಡು ಡಾನಿಯರ್ ವಿಚಕ್ಷಣ ವಿಮಾನಗಳನ್ನು ಪಡೆಯುವ ಸಾಧ್ಯತೆಯನ್ನು ಶ್ರೀಲಂಕಾ ಕೋರಿತ್ತು ಎಂದು ಅಲ್ಲಿನ ಅಧಿಕಾರಿಗಳು ಹೇಳಿದರು.
ಭಾರತದ ಸನಿಹ ಬರಲಿದೆ ಚೀನಾದ ಗೂಢಚಾರ ಹಡಗು, ಇದರ ವಿಶೇಷತೆ ಕೇಳಿದ್ರೆ ಅಚ್ಚರಿಯಾಗೋದು ಖಂಡಿತ!
ಸರ್ಕಾರಿ ಸ್ವಾಮ್ಯದ ಏರೋಸ್ಪೇಸ್ ಪ್ರಮುಖ ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್ (Hindustan Aeronautics Limited) (ಎಚ್‌ಎಎಲ್) ತಯಾರಿಸುತ್ತಿರುವ ಎರಡು ಡಾರ್ನಿಯರ್ ವಿಮಾನಗಳನ್ನು ಭಾರತವು ಶ್ರೀಲಂಕಾಕ್ಕೆ ನೀಡಲಿದೆ ಎಂದು ನವದೆಹಲಿಯ ಮೂಲಗಳು ತಿಳಿಸಿವೆ. ಒಮ್ಮೆ ಎಚ್‌ಎಎಲ್ ತಯಾರಿಸಿದ ಈ ಎರಡು ವಿಮಾನಗಳನ್ನು ಹಸ್ತಾಂತರಿಸಿದ ನಂತರ ಸೋಮವಾರ ನೀಡಲಾದ ಡಾರ್ನಿಯರ್ ವಿಮಾನವು ಭಾರತೀಯ ನೌಕಾಪಡೆಗೆ ಮರಳುತ್ತದೆ.
ಚೀನಾದ ಹಡಗು 'ಯುವಾನ್ ವಾಂಗ್ 5' ಮಂಗಳವಾರ ದಕ್ಷಿಣ ಬಂದರಿನ ಹಂಬನ್‌ತೋಟಾದಲ್ಲಿ ಮರುಪೂರಣ ಉದ್ದೇಶಗಳಿಗಾಗಿ ಒಂದು ವಾರದವರೆಗೆ ಲಂಗರು ಹಾಕಲಿದ್ದು, ಅದಕ್ಕೂ ಒಂದು ದಿನ ಮೊದಲು ಭಾರತವು ಡಾರ್ನಿಯರ್ ವಿಮಾನವನ್ನು ಹಸ್ತಾಂತರಿಸಿದೆ. ಚೀನಾದ ಹಡಗು ಮೂಲತಃ ಆಗಸ್ಟ್ 11 ರಂದು ಬಂದರಿಗೆ ಆಗಮಿಸಬೇಕಿತ್ತು. ಆದರೆ ಶ್ರೀಲಂಕಾದ ಅಧಿಕಾರಿಗಳ ಅನುಮತಿ ಇಲ್ಲದ ಕಾರಣ ತಡವಾಯಿತು. ಈ ಬಗ್ಗೆ ಭಾರತ ಕಳವಳ ವ್ಯಕ್ತಪಡಿಸಿರುವ ಹಿನ್ನೆಲೆಯಲ್ಲಿ ಶ್ರೀಲಂಕಾ ಭೇಟಿಯನ್ನು ಮುಂದೂಡುವಂತೆ ಚೀನಾವನ್ನು ಕೋರಿತ್ತು.ಆದರೆ, ಕೊಲಂಬೋ ಆಗಸ್ಟ್ 16 ರಿಂದ 22 ರವರೆಗೆ ಹಡಗಿಗೆ ಬಂದರು ಪ್ರವೇಶವನ್ನು ನೀಡಿತು.