ಕೋಲ್ಕತಾದಲ್ಲಿ ದೇಶದ ಮೊದಲ ಅಂಡ​ರ್‌​ ವಾ​ಟ​ರ್‌ ಮೆಟ್ರೋ ಸೇವೆ ಶೀಘ್ರ ಶುರು

ಎಲ್ಲ ರೀತಿಯ ಅಗತ್ಯ ಸುರಕ್ಷತಾ ಪರೀಕ್ಷೆ ನಡೆಸಿ, ರೈಲ್ವೆ ಸುರಕ್ಷತಾ ಆಯುಕ್ತರು ಪರಿಶೀಲನೆ ನಡೆಸಿದ ಬಳಿಕ ಶೀಘ್ರವೇ ಈ ಅಂಡರ್‌ವಾಟರ್‌ ಮೆಟ್ರೋವನ್ನು ಪ್ರಾರಂಭಿಸಲಾಗುವುದು. ಈ ನದಿಯಾಳದ ಸುರಂಗವು ಒಂದು ಮೈಲಿಗಲ್ಲಾಗಿದೆ. ನದಿಯೊಳಗೆ 16 ಮೀ. ಆಳದಲ್ಲಿ ಸುರಂಗ ನಿರ್ಮಿಸಲಾಗಿದೆ: ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್‌ 

ಕೋಲ್ಕತಾ(ಜೂ.23): ದೇಶದ ಮೊದಲ ಅಂಡರ್‌ವಾಟರ್‌ ಮೆಟ್ರೋ ಶೀಘ್ರದಲ್ಲೇ ಪ್ರಯಾಣಿಕರಿಗೆ ಮುಕ್ತವಾಗಲಿದೆ ಎಂದು ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್‌ ತಿಳಿಸಿದ್ದಾರೆ.

ಪಶ್ಚಿಮ ಬಂಗಾಳದ ಹೌರಾ ಮೈದಾನದಿಂದ ಎಸ್‌ಪ್ಲ್ಯಾನೇಡ್‌ವರೆಗೆ 4.8 ಕಿ.ಮೀ ಮಾರ್ಗವನ್ನು ಹೂಗ್ಲಿ ನದಿಯ ಆಳದಲ್ಲಿ ನಿರ್ಮಿ​ಸ​ಲಾ​ಗಿದೆ. ಇದರ ಪರಿ​ಶೀ​ಲನೆ ನಡೆ​ಸಿ ಸುದ್ದಿಗಾರರೊಂದಿಗೆ ಮಾತನಾಡಿದ ವೈಷ್ಣವ್‌, ‘ಎಲ್ಲ ರೀತಿಯ ಅಗತ್ಯ ಸುರಕ್ಷತಾ ಪರೀಕ್ಷೆ ನಡೆಸಿ, ರೈಲ್ವೆ ಸುರಕ್ಷತಾ ಆಯುಕ್ತರು ಪರಿಶೀಲನೆ ನಡೆಸಿದ ಬಳಿಕ ಶೀಘ್ರವೇ ಈ ಅಂಡರ್‌ವಾಟರ್‌ ಮೆಟ್ರೋವನ್ನು ಪ್ರಾರಂಭಿಸಲಾಗುವುದು. ಈ ನದಿಯಾಳದ ಸುರಂಗವು ಒಂದು ಮೈಲಿಗಲ್ಲಾಗಿದೆ. ನದಿಯೊಳಗೆ 16 ಮೀ. ಆಳದಲ್ಲಿ ಸುರಂಗ ನಿರ್ಮಿಸಲಾಗಿದೆ’ ಎಂದರು.

‘ಹೌರಾ ನಿಲ್ದಾಣವು ದೇಶದ ಅತ್ಯಂತ ಆಳದ ಮೆಟ್ರೋ ನಿಲ್ದಾಣವಾಗಲಿದೆ. ಮೇಲ್ಮೈ ಭಾಗದಿಂದ 33 ಮೀಟರ್‌ ಆಳದಲ್ಲಿ 5ಲಕ್ಷ ಚ.ಮೀ ಆಳದಲ್ಲಿ ಇದನ್ನು ನಿರ್ಮಿಸಲಾಗಿದೆ’ ಎಂದರು. ಇನ್ನು ಡಿಸೆಂಬರ್‌ನಲ್ಲಿ ಈ ಮಾರ್ಗ ಉದ್ಘಾಟನೆಯಾಗುವ ನಿರೀಕ್ಷೆ ಇದೆ ಎಂದು ರೈಲ್ವೆ ವಕ್ತಾರರು ತಿಳಿಸಿದ್ದಾರೆ.