ದೇಶದ ಇನ್ನೂ ಐವರಲ್ಲಿ ಬ್ರಿಟನ್ ಹೈಸ್ಪೀಡ್‌ ವೈರಸ್ ಪತ್ತೆ..!

ಜಗತ್ತಿನಾದ್ಯಂತ ಆತಂಕ ಸೃಷ್ಟಿಸುತ್ತಿರುವ ರೂಪಾಂತರಿ ಕೊರೋನಾ ವೈರಸ್‌ ಗುರುವಾರ ಮತ್ತೆ ಐವರು ಭಾರತೀಯರಲ್ಲಿ ಕಾಣಿಸಿಕೊಂಡಿದೆ. ಈ ಕುರಿತಾದ ಒಂದು ರಿಪೋರ್ಟ್ ಇಲ್ಲಿದೆ ನೋಡಿ. 

ನವದೆಹಲಿ(ಜ.01): ಬ್ರಿಟನ್‌ನಿಂದ ಭಾರತಕ್ಕೆ ಆಗಮಿಸಿರುವ ಪ್ರಯಾಣಿಕರ ಪೈಕಿ ಮತ್ತೆ ಐವರಿಗೆ ಗುರುವಾರ ರೂಪಾಂತರಿ ಕೊರೋನಾ ವೈರಸ್‌ ದೃಢಪಟ್ಟಿದೆ. ಈ ಮೂಲಕ ಮಂಗಳವಾರ ಮತ್ತು ಬುಧವಾರ ಹೊಸ ತಳಿಯ ಸೋಂಕು ಪತ್ತೆಯಾಗಿದ್ದ 20 ಮಂದಿಯೂ ಸೇರಿದಂತೆ ದೇಶದಲ್ಲಿ ಬ್ರಿಟನ್‌ ರೂಪಾಂತರಿ ಕೊರೋನಾ ಸೋಂಕು ತಗುಲಿದವರ ಸಂಖ್ಯೆ 25ಕ್ಕೆ ಏರಿಕೆಯಾಗಿದೆ.

ಈ ಎಲ್ಲಾ 25 ಮಂದಿಯನ್ನೂ ಕ್ವಾರಂಟೈನ್‌ನಲ್ಲಿ ಇಡಲಾಗಿದ್ದು, ಇವರ ಸಂಪರ್ಕಕ್ಕೆ ಬಂದವರನ್ನು ಪತ್ತೆ ಹಚ್ಚಲಾಗುತ್ತಿದೆ ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ತಿಳಿಸಿದೆ. ಪುಣೆಯ ನ್ಯಾಷನಲ್‌ ಇನ್‌ಸ್ಟಿಟ್ಯೂಟ್‌ ಆಫ್‌ ವೈರಾಲಜಿ (ಎನ್‌ಐವಿ)ಯಲ್ಲಿ 4 ಮತ್ತು ದೆಹಲಿಯ ಇನ್‌ಸ್ಟಿಟ್ಯೂಟ್‌ ಆಫ್‌ ಜೀನಾಮಿಕ್ಸ್‌ ಅಂಡ್‌ ಇಂಟಿಗ್ರೇಟಿವ್‌ ಬಯಾಲಜಿ (ಐಜಿಐಬಿ)ಯಲ್ಲಿ ಒಂದು ಬ್ರಿಟನ್‌ನ ರೂಪಾಂತರಿ ವೈರಸ್‌ ಪತ್ತೆಯಾಗಿದೆ. ಈ ಹಿನ್ನೆಲೆಯಲ್ಲಿ ಡಿ.23ರವರೆಗೆ ಅದರ ಹಿಂದಿನ 14 ದಿನಗಳ ಕಾಲ ಬ್ರಿಟನ್‌ನಿಂದ ಬಂದ ಸುಮಾರು 30 ಸಾವಿರಕ್ಕೂ ಹೆಚ್ಚು ಪ್ರಯಾಣಿಕರ ಮೇಲೆ ರಾಜ್ಯ ಸರ್ಕಾರಗಳು ತೀವ್ರ ನಿಗಾ ಇರಿಸಿವೆ.

ಬ್ರಿಟನ್‌ನ ಹೈಸ್ಪೀಡ್‌ ಕೊರೋನಾ ವೈರಸ್‌ ಈಗಾಗಲೇ ಭಾರತ, ಡೆನ್ಮಾರ್ಕ್, ನೆದರ್ಲೆಂಡ್‌, ಆಸ್ಪ್ರೇಲಿಯಾ, ಸ್ವೀಡನ್‌, ಸ್ಪೇನ್‌, ಜರ್ಮನಿ, ಕೆನಡಾ, ಜಪಾನ್‌, ಸಿಂಗಾಪುರ ಮತ್ತಿತರ ದೇಶಗಳಲ್ಲಿ ಪತ್ತೆಯಾಗಿದೆ.