ಭಾರತ ಹಾಕಿ ಆಯ್ಕೆ ಸಮಿ​ತಿಯಲ್ಲಿ ರಾಜ್ಯದ ಮೂವ​ರಿಗೆ ಸ್ಥಾನ

ಭಾರತ ಹಾಕಿ ತಂಡದ ನೂತನ ಆಯ್ಕೆ ಸಮಿ​ತಿ​ ನೇಮಕ ಕರ್ನಾಟಕದ ಮೂವರು ಮಾಜಿ ಆಟಗಾರರಿಗೆ ಸ್ಥಾನ ಈ ಸಮಿ​ತಿ​ಗೆ ಮಾಜಿ ಆಟ​ಗಾರ ಆರ್‌ಪಿ ಸಿಂಗ್‌ ಮುಖ್ಯ​ಸ್ಥ​ರಾಗಿ ಆಯ್ಕೆ  

ನವ​ದೆ​ಹ​ಲಿ(ಏ.15): ಭಾರತ ಹಾಕಿ ತಂಡದ ನೂತನ ಆಯ್ಕೆ ಸಮಿ​ತಿ​ಯನ್ನು ಹಾಕಿ ಇಂಡಿ​ಯಾ ಗುರು​ವಾರ ನೇಮ​ಕ​ಗೊಳಿಸಿದ್ದು, ಕರ್ನಾ​ಟಕದ ಮೂವರು ಸ್ಥಾನ ಗಿಟ್ಟಿ​ಸಿ​ಕೊಂಡಿ​ದ್ದಾರೆ. ಭಾರ​ತದ ಮಾಜಿ ಆಟ​ಗಾ​ರ​ರಾದ ಕೊಡ​ಗಿ​ನ ಎಂ.ಎಂ.​ಸೋ​ಮಯ್ಯ, ಬಿ.ಪಿ.ಗೋವಿಂದ ಹಾಗೂ ವಿ.ಆ​ರ್‌.​ರ​ಘುನಾಥ್‌ 14 ಮಂದಿಯ ಸಮಿ​ತಿ​ಯಲ್ಲಿದ್ದಾರೆ. 

ಈ ಸಮಿ​ತಿ​ಗೆ ಮಾಜಿ ಆಟ​ಗಾರ ಆರ್‌ಪಿ ಸಿಂಗ್‌ ಮುಖ್ಯ​ಸ್ಥ​ರಾಗಿ ಆಯ್ಕೆಯಾಗಿ​ದ್ದಾರೆ. ಶನಿ​ವಾರದಿಂದ ಬೆಂಗ​ಳೂ​ರಿ​ನಲ್ಲಿ ನಡೆ​ಯ​ಲಿ​ರುವ ಭಾರತ ತಂಡದ ಆಯ್ಕೆ ಪ್ರಕ್ರಿಯೆ ಮೂಲಕ ನೂತನ ಸಮಿತಿ ಕಾರ್ಯಾ​ರಂಭಿ​ಸ​ಲಿದೆ.

ಮಹಿಳಾ ಟೆನಿ​ಸ್‌: ಸತ​ತ 2ನೇ ಸೋಲುಂಡ ಭಾರ​ತ

ತಾಷ್ಕೆಂಟ್‌: ವಿಶ್ವ ಮಹಿಳಾ ತಂಡಗಳ(ಬಿಲ್ಲಿ ಜೀನ್‌ ಕಿಂಗ್‌ ಕಪ್‌) ಚಾಂಪಿಯನ್‌ಶಿಪ್‌ನ ಏಷ್ಯಾ-ಓಷಿಯಾನಿಯಾ ಗುಂಪು-1ರಲ್ಲಿ ಭಾರತ ಸತತ 2ನೇ ಸೋಲ​ನು​ಭ​ವಿ​ಸಿದ್ದು, ಅಂಕ​ಪ​ಟ್ಟಿ​ಯಲ್ಲಿ 4ನೇ ಸ್ಥಾನಕ್ಕೆ ಕುಸಿ​ದಿದೆ. ಇದ​ರೊಂದಿಗೆ ಗುಂಪಿನಲ್ಲಿ ಅಗ್ರ 2 ಸ್ಥಾನ ಪಡೆದು ವಿಶ್ವ ಗುಂಪು ಪ್ಲೇ-ಆಫ್‌ಗೇ​ರುವ ಭಾರತದ ಸಾಧ್ಯತೆ ಕ್ಷೀಣಿ​ಸಿದೆ. ಮೊದ​ಲೆ​ರಡು ಪಂದ್ಯ ಗೆದ್ದಿದ್ದ ಭಾರತ ಶುಕ್ರ​ವಾ​ರ ಜಪಾನ್‌ ವಿರುದ್ಧ 0-3 ಅಂತ​ರ​ದಲ್ಲಿ ಪರಾ​ಭ​ವ​ಗೊಂಡಿತು. ಜಪಾನ್‌ 4 ಪಂದ್ಯ​ಗ​ಳನ್ನೂ ಗೆದ್ದು ಅಗ್ರ​ಸ್ಥಾ​ನ​ಕ್ಕೇ​ರಿದ್ದು, 3 ಪಂದ್ಯ ಗೆದ್ದಿ​ರುವ ಚೀನಾ 2ನೇ ಸ್ಥಾನ​ದ​ಲ್ಲಿದೆ. ಭಾರತ ಕೊನೆ ಪಂದ್ಯ​ದಲ್ಲಿ ಶನಿ​ವಾರ ಕೊರಿಯಾ ವಿರುದ್ಧ ಆಡ​ಲಿದೆ. ಇದ​ರಲ್ಲಿ ಗೆದ್ದು 3-4ನೇ ಸ್ಥಾನ ಪಡೆದರೆ ಗುಂಪು-1ರಲ್ಲೇ ಉಳಿಯಲಿದೆ.

ಇಂದು ಬೆಂಗಳೂರಲ್ಲಿ ಗ್ರ್ಯಾನ್‌ ಪ್ರಿ-4 ಅಥ್ಲೆಟಿಕ್‌

ಬೆಂಗಳೂರು: ಭಾರತೀಯ ಅಥ್ಲೆಟಿಕ್ಸ್‌ ಫೆಡರೇಷನ್‌(ಎಎಫ್‌ಐ) ಆಯೋಜಸುವ ಇಂಡಿಯನ್‌ ಗ್ರ್ಯಾನ್‌ ಪ್ರಿ-4 ಕೂಟ ಶನಿವಾರ ಇಲ್ಲಿನ ಕಂಠೀರವ ಕ್ರೀಡಾಂಗಣದಲ್ಲಿ ನಡೆಯಲಿದೆ. ಭಾರತದ ತಾರಾ ಅಥ್ಲೀಟ್‌ಗಳಾದ ಹಿಮಾ ದಾಸ್‌, ತಜೀಂದರ್‌ ಪಾಲ್‌ ಸಿಂಗ್‌, ಡಿ.ಪಿ. ಮನು, ದಾನೇಶ್ವರಿ ಸೇರಿ ಹಲವರು ಪಾಲ್ಗೊಳ್ಳಲಿದ್ದಾರೆ. ಈ ಕೂಟವು ಅಂ.ರಾ. ಕೂಟಗಳಿಗೆ ಸಿದ್ಧತೆ, ಆಯ್ಕೆಗೆ ಅನುಕೂಲವಾಗಲಿದೆ.

ಪ್ರಿಯಾನ್ಶು ರಾಜಾ​ವತ್‌ ವಿಶ್ವ ನಂ.38

ನವ​ದೆ​ಹ​ಲಿ: ಇತ್ತೀಚೆಗೆ ಆರ್ಲಿ​ಯಾನ್ಸ್‌ ಮಾಸ್ಟ​ರ್ಸ್‌ ಪ್ರಶಸ್ತಿ ಗೆದ್ದ ಭಾರ​ತದ ಯುವ ಶಟ್ಲರ್‌ ಪ್ರಿಯಾನ್ಶು ರಾಜಾ​ವತ್‌ ಬ್ಯಾಡ್ಮಿಂಟನ್‌ ವಿಶ್ವ ಶ್ರೇಯಾಂಕದಲ್ಲಿ ಜೀವ​ನ​ಶ್ರೇಷ್ಠ 38ನೇ ಸ್ಥಾನಕ್ಕೆ ಜಿಗಿ​ದಿ​ದ್ದಾರೆ. ಪರಿಷ್ಕೃತ ಪಟ್ಟಿಯಲ್ಲಿ ಅವರು 20 ಸ್ಥಾನ ಏರಿಕೆ ಕಂಡಿದ್ದಾರೆ. ಇದೇ ವೇಳೆ ಪಿ.ವಿ.ಸಿಂಧು ಮತ್ತೆ ಅಗ್ರ 10ರಿಂದ ಹೊರಬಿದ್ದಿದ್ದು, 11ನೇ ಸ್ಥಾನದಲ್ಲಿದ್ದಾರೆ.