ಕುತೂಹಲದ ಲವ್​ಸ್ಟೋರಿ ಹೇಳಿದ ನಟಿ ದಿಶಾ: ಪೂರ್ಣ ಸಂದರ್ಶನದಲ್ಲಿ 8 ಕನ್ನಡ ಪದ ಬಳಕೆಗೆ ನೆಟ್ಟಿಗರ ಧನ್ಯವಾದ!

'ಲಕ್ಷ್ಮೀನಿವಾಸ' ಸೀರಿಯಲ್ ಖ್ಯಾತಿಯ ನಟಿ ದಿಶಾ ಮದನ್ ತಮ್ಮ ಲವ್ ಸ್ಟೋರಿ ಬಗ್ಗೆ ಮಾತನಾಡಿದ್ದಾರೆ. ಸೋಷಿಯಲ್ ಮೀಡಿಯಾದಲ್ಲಿ ಶಶಾಂಕ್ ವಾಸುಕಿ ಗೋಪಾಲ್ ಜೊತೆ ಶುರುವಾದ ಪ್ರೀತಿ, ಸುಲಭವಾಗಿ ಮದುವೆಯಾದ ಕಥೆಯನ್ನು ಹಂಚಿಕೊಂಡಿದ್ದಾರೆ. 

ಸೈಲೆಂಟ್​ ಭಾವನಾ

ನಟಿ ದಿಶಾ ಮದನ್​ (Disha Madan) ಎಂದರೆ ಕಿರುತೆರೆ ವೀಕ್ಷಕರಿಗೆ ಯಾರೆಂದು ತಿಳಿಯದೇ ಹೋಗಬಹುದು. ಆದರೆ ಲಕ್ಷ್ಮೀನಿವಾಸ ಸೀರಿಯಲ್​ ಭಾವನಾ, ಸಿದ್ದೇಗೌಡ್ರ ಮುದ್ದಿನ ಹೆಂಡ್ತಿ ಎಂದರೆ, ಸಾಫ್ಟ್​ ಆಗಿರೋ ತುಂಬಾ ಮಿತವಾಗಿ ಮಾತನಾಡುವ ಹೆಣ್ಣುಮಗಳೊಬ್ಬಳು ಕಣ್ಣೆದುರು ಬರುತ್ತಾಳೆ. ಆಕೆಯೇ ನಿಜ ಜೀವನದಲ್ಲಿ ಸ್ಟೈಲಿಷ್​ ಆಗಿರೋ ನಟಿ ದಿಶಾ ಮದನ್​.

ಕರ್ನಾಟಕಕ್ಕೆ ಕೀರ್ತಿ

ಕಳೆದ ವರ್ಷ ಕೇನ್ಸ್​ ಫಿಲ್ಮ್​ಫೆಸ್ಟಿವಲ್​ನ ರೆಡ್​​ ಕಾರ್ಪೆಟ್​ ಮೂಲಕ ಮಿಂಚುವ ಮೂಲಕ ಕರುನಾಡಿಗೂ ಕೀರ್ತಿ ತಂದಿರುವ ನಟಿ ಈಕೆ. ಅಸಲಿ ಜೀವನದಲ್ಲಿ ಇಬ್ಬರು ಮಕ್ಕಳ ಅಮ್ಮನಾಗಿರುವ ನಟಿ ದಿಶಾ ಅವರು ರೇಡಿಯೋಸಿಟಿ ಕನ್ನಡ ಚಾನೆಲ್​ಗೆ ಸಂದರ್ಶನ ನೀಡಿದ್ದು, ಅದರಲ್ಲಿ ತಮ್ಮ ಕುತೂಹಲದ ಲವ್​ಸ್ಟೋರಿ ಬಗ್ಗೆ ಮಾತನಾಡಿದ್ದಾರೆ.

ಜಾಲತಾಣದಲ್ಲಿ ಲವ್​ಸ್ಟೋರಿ ಶುರು

ನನಗೆ ಸೋಷಿಯಲ್​ ಮೀಡಿಯಾದಲ್ಲಿ 25 ಸಾವಿರ ಫಾಲೋವರ್ಸ್​ ಇದ್ರು. ನನ್ನ ಪ್ರೊಫೈಲ್ ನೋಡಿದ ಶಶಾಂಕ್​ ವಾಸುಕಿ ಗೋಪಾಲ್​ ಅವರು ನಿಮ್ಮ ಪ್ರೊಫೈಲ್​ ನೋಡಿದ್ರೆ ಫನ್ನಿ ಎನ್ನಿಸುತ್ತದೆ ಎಂದು ಮೆಸೇಜ್​ ಮಾಡಿದ್ರು. ನಾನು ಕೂಡ ಅವರ ಮೆಸೇಜ್​ ನೋಡಿ ರಿಪ್ಲೈ ಮಾಡಿದೆ. ಹೀಗೆ ಮಾತನಾಡುತ್ತಾ ನಮ್ಮಿಬ್ಬರಲ್ಲಿ ಎಲ್ಲವೂ ಕಾಮನ್​ ಇದೆ ಎನ್ನುವುದು ತಿಳಿಯಿತು ಎಂದಿದ್ದಾರೆ.

ಈಸಿಯಾಗಿ ಮದ್ವೆಯಾಯ್ತು

ಆಗಿನ್ನೂ ನನಗೆ 24 ವರ್ಷ ವಯಸ್ಸಾಗಿತ್ತು. ಆದರೆ ಅದಾಗಲೇ ಮನೆಯಲ್ಲಿ ಮದುವೆಗೆ ಸಿಕ್ಕಾಪಟ್ಟೆ ಪ್ರೆಷರ್​ ಇತ್ತು. ಬ್ರೋಕರ್​ಗೆಲ್ಲಾ ಜಾತಕ ಕೊಟ್ಟುಬಿಟ್ಟಿದ್ರು. ಆದ್ದರಿಂದ ನಾನು ಶಶಾಂಕ್​ ಅವರಲ್ಲಿ ಈ ಬಗ್ಗೆ ಮಾತನಾಡಿದಾಗ ಅವರು ಮದುವೆಗೆ ಒಪ್ಪಿಗೆ ಕೊಟ್ಟೇ ಬಿಟ್ಟರು. ಆದ್ದರಿಂದ ಕುತೂಹಲದ ತಿರುವಿನಲ್ಲಿ ನಾವಿಬ್ಬರು ತುಂಬಾ ಈಸಿಯಾಗಿ ಮದ್ವೆಯಾದ್ವಿ ಎಂದಿದ್ದಾರೆ ನಟಿ. ಅವರು ಈಗ ವಿಯಾನ್​, ಅವೈರಾ ಎನ್ನುವ ಮಕ್ಕಳ ಅಪ್ಪ-ಅಮ್ಮ.

ಎಂಟು ಕನ್ನಡ ಶಬ್ದ

ಆದರೆ, ಇವರ ಈ ಸಂಪೂರ್ಣ ಸಂದರ್ಶನದಲ್ಲಿ ಇವರ ಲವ್​ಸ್ಟೋರಿ ಕೇಳುವುದನ್ನು ಬಿಟ್ಟು ನೆಟ್ಟಿಗರು ನಿಮ್ಮ ಎರಡು ನಿಮಿಷಗಳ ಲವ್​ಸ್ಟೋರಿಯಲ್ಲಿ 8 ಶಬ್ದ ಬಳಕೆ ಮಾಡಿರುವುದಕ್ಕೆ ಧನ್ಯವಾದ ಎಂದು ಹೇಳುತ್ತಿದ್ದಾರೆ! ಇದು ಇಂಗ್ಲಿಷ್​ ಸಂದರ್ಶನ ಎಂದುಕೊಂಡ್ವಿ. ಆದರೆ ಕನ್ನಡ ಮಾತನಾಡಿದ ಕಾರಣ, ಕನ್ನಡದ ಸಂದರ್ಶನ ಎಂದು ತಿಳಿಯಿತು, ಕೆಲವು ಶಬ್ದ ಕನ್ನಡದಲ್ಲಿ ಮಾತನಾಡಿದ್ದಕ್ಕೆ ಥ್ಯಾಂಕ್ಸ್ ಎಂದಿದ್ದಾರೆ.