ದಕ್ಷಿಣ ಸ್ಟಾರ್ ನಟನ ಪುತ್ರ ದನೂಷ್ ಮದುವೆ ಅದ್ಧೂರಿಯಾಗಿ ನಡೆದಿದೆ. ಈ ಅದ್ಧೂರಿ ಮದುವೆ ಕಾರ್ಯಕ್ರಮ ಜಪಾನ್‌ನಲ್ಲಿ ಆಯೋಜಿಸಲಾಗಿತ್ತು. ಈ ಮದುವೆಯಲ್ಲಿ ಬರೋಬ್ಬರಿ 70ಕ್ಕೂ ಹೆಚ್ಚು ವಿಶೇಷ ಖಾದ್ಯಗಳನ್ನು ನೀಡಲಾಗಿದೆ. ಈ ಮದುವೆಯ ವಿಶೇಷತೆ ಇಲ್ಲಿದೆ.
80 ಮತ್ತು 90 ರ ದಶಕದಲ್ಲಿ ತಮಿಳು ಚಿತ್ರರಂಗದಲ್ಲಿ ಮುಂಚೂಣಿಯ ನಟರಾಗಿದ್ದವರು ನೆಪೋಲಿಯನ್. ತಮ್ಮ ಮಾವ ರಾಜಕೀಯದಲ್ಲಿದ್ದ ಕಾರಣ, ನೆಪೊಲಿಯನ್ ಕೂಡ ರಾಜಕೀಯಕ್ಕೂ ಇಳಿದು ಯಶಸ್ಸು ಗಳಿಸಿದ್ದರು. ಆದರೆ ತಮ್ಮ ಪುತ್ರರಾದ ದನುಷ್ ಮತ್ತು ಗುಣಾಳ್ ಇಬ್ಬರೂ ತಮ್ಮೊಂದಿಗೆ ಇರಬೇಕೆಂದು ಬಯಸಿದ್ದರಿಂದ, ರಾಜಕೀಯ ಹಾಗೂ ಸಿನಿಮಾದಿಂದ ಸಂಪೂರ್ಣವಾಗಿ ದೂರವಾಗಿ ಪತ್ನಿ ಮತ್ತು ಮಕ್ಕಳೊಂದಿಗೆ ಅಮೆರಿಕದಲ್ಲಿ ನೆಲೆಸಿದರು.
ತಾನು ಸಂಪಾದಿಸಿದ ಎಲ್ಲಾ ಹಣದಿಂದ, ಅಮೆರಿಕದಲ್ಲಿ ಬೃಹತ್ ಫಾರ್ಮ್‌ಹೌಸ್ ಕಟ್ಟಿಸಿದ ನೆಪೋಲಿಯನ್ ಅಲ್ಲಿ ಕೃಷಿ ಕೆಲಸಗಳನ್ನು ಮಾಡುತ್ತಿದ್ದಾರೆ. ಅದೇ ರೀತಿ ಇವರು ನಡೆಸುತ್ತಿರುವ ಐಟಿ ಕಂಪನಿ ಅಮೆರಿಕದಲ್ಲಿ ಬಹಳ ಪ್ರಸಿದ್ಧವಾಗಿದೆ. ನೆಪೋಲಿಯನ್ ನಡೆಸುವ ಐಟಿ ಕಂಪನಿಯಲ್ಲಿ, ಚಿತ್ರರಂಗದಲ್ಲಿ ಲೈಟ್‌ಮ್ಯಾನ್, ಮೇಕಪ್ ಮ್ಯಾನ್ ಮುಂತಾದ ಕೆಲಸಗಳನ್ನು ಮಾಡುತ್ತಿದ್ದವರ ಮಕ್ಕಳು ಕೆಲಸ ಮಾಡುತ್ತಿದ್ದಾರೆ. ಈ ಕಂಪನಿಯನ್ನು ನೆಪೋಲಿಯನ್ ಪುತ್ರರಾದ ದನುಷ್ ಮತ್ತು ಗುಣಾಳ್ ನೋಡಿಕೊಳ್ಳುತ್ತಿದ್ದಾರೆ.
ನೆಪೋಲಿಯನ್ ತಿರುಚಿಯವರಾಗಿದ್ದರೂ ಅಮೆರಿಕದಲ್ಲಿ ನೆಲೆಸಲು ಮುಖ್ಯ ಕಾರಣ ಅವರ ಮಗ ದನುಷ್. ಚಿಕ್ಕ ವಯಸ್ಸಿನಲ್ಲೇ ಸ್ನಾಯು ಕ್ಷೀಣತೆಯಿಂದ ಬಳಲುತ್ತಿದ್ದ ಕಾರಣ, 10 ವರ್ಷ ತುಂಬಿದಾಗ ಸಂಪೂರ್ಣವಾಗಿ ನಡೆಯಲು ಸಾಧ್ಯವಿಲ್ಲದಾಯಿತು. ಮೊದಲು ಸಿದ್ಧ ಔಷಧವನ್ನು ಆಶ್ರಯಿಸಿದ ನೆಪೋಲಿಯನ್, ಅದರಿಂದ ಸ್ವಲ್ಪ ಪ್ರಯೋಜನವಾಗಿದ್ದರೂ... ಮಗನ ಚಿಕಿತ್ಸೆಗಾಗಿ ಅಮೆರಿಕಕ್ಕೆ ಹೋಗಬೇಕಾಯಿತು. ನಂತರ ಮಗನ ಅನುಕೂಲಕ್ಕಾಗಿ ಅಲ್ಲಿಯೇ ಮನೆ ಖರೀದಿಸಿ ನೆಲೆಸಿದರು.
ತನ್ನ ಇಬ್ಬರು ಮಕ್ಕಳ ಮೇಲೂ ಅಪಾರವಾದ ಪ್ರೀತಿ ಹೊಂದಿರುವ ನೆಪೋಲಿಯನ್... ಮಕ್ಕಳು ಏನು ಕೇಳಿದರೂ ತಕ್ಷಣ ಮಾಡುತ್ತಾರೆ. ಮಕ್ಕಳಿಗೆ ಇಷ್ಟವಾದ ರೀತಿಯಲ್ಲಿ ಮನೆಯನ್ನು ಬದಲಾಯಿಸಿರುವ ನೆಪೋಲಿಯನ್, ದನುಷ್‌ಗಾಗಿ ಪ್ರತ್ಯೇಕವಾಗಿ ಈಜುಕೊಳ, ಲಿಫ್ಟ್ ಮುಂತಾದ ಸೌಲಭ್ಯಗಳೊಂದಿಗೆ ಈ ಮನೆಯನ್ನು ವಿನ್ಯಾಸಗೊಳಿಸಿದ್ದಾರೆ. ಇದಲ್ಲದೆ, ನೆಪೋಲಿಯನ್ ಮಗ ದನುಷ್ ಕಳೆದ ಹತ್ತು ವರ್ಷಗಳಿಂದ ಜಪಾನ್‌ಗೆ ಹೋಗಬೇಕೆಂದು ತನ್ನ ಆಸೆಯನ್ನು ವ್ಯಕ್ತಪಡಿಸುತ್ತಿದ್ದರು, ಆದರೆ ಅವರಿಗೆ ವಿಮಾನದಲ್ಲಿ ಪ್ರಯಾಣಿಸಲು ಸಾಧ್ಯವಾಗದ ಕಾರಣ, ಹಡಗಿನ ಮೂಲಕ ಜಪಾನ್‌ಗೆ ಹೋಗಲು ಕುಟುಂಬಸ್ಥರು ಯೋಜಿಸಿದರು.
ಇದರ ನಡುವೆ ಧನೂಷ್ ಮದುವೆ ನಿಶ್ಚಯವಾಗಿದೆ. ಜಪಾನ್‌ಗೆ ಹೋಗುವ ನಿರ್ಧಾರವನ್ನು ಕೈಬಿಡಬೇಕು ಅನ್ನುವಷ್ಟರಲ್ಲೇ, ದನುಷ್, ಜಪಾನ್‌ಗೆ ಹೋಗಿ ಅಕ್ಷಯಾಳನ್ನು ಅಲ್ಲಿಗೆ ಕರೆದು ಮದುವೆಯಾಗಬಹುದು ಅನ್ನೋ ಮಾತು ಮುಂದಿಟ್ಟಿದ್ದರು. ಬಳಿಕ ಈ ಮದುವೆ ಒಂದು ವಿವರವಾದ ಯೋಜನೆ ರೂಪಿಸಲಾಗಿತು. ಇದರಂತೆ ಅಕ್ಷಯಾ - ದನುಷ್ ಮದುವೆ ಜಪಾನ್‌ನಲ್ಲಿ ತಮಿಳು ಸಂಪ್ರದಾಯದಂತೆ ನೆರವೇರಿದೆ.
ದನುಷ್ - ಅಕ್ಷಯಾ ಮದುವೆ ಜಪಾನ್ ರಾಜಧಾನಿ ಟೋಕಿಯೋದಲ್ಲಿ ನಡೆದಿದ್ದು, ಇದರಲ್ಲಿ ತಮಿಳುನಾಡಿನ ಹಲವು ಗಣ್ಯರು ಮತ್ತು ಸಂಬಂಧಿಕರು ಭಾಗವಹಿಸಿ ಶುಭ ಹಾರೈಸಿದ್ದಾರೆ. ಇವರ ಮದುವೆಯ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿವೆ.
ಜಪಾನ್‌ನಲ್ಲಿ ಭಾರತೀಯ ಖಾದ್ಯಗಳು ಸಿಗುವುದು ಬಹಳ ಕಷ್ಟ. ಆದರೆ ನೆಪೋಲಿಯನ್ ಕಳೆದ 4 ತಿಂಗಳಿನಿಂದ ಇದಕ್ಕಾಗಿ ತಯಾರಿ ನಡೆಸಿದ್ದಾರೆ. ತನ್ನ ಮಗನ ಮದುವೆ ಔತಣಕೂಟದಲ್ಲಿ 70 ಬಗೆಯ ಭಾರತೀಯ ಖಾದ್ಯಗಳನ್ನು ಬಡಿಸಿ ಎಲ್ಲರನ್ನೂ ಅಚ್ಚರಿಗೊಳಿಸಿದ್ದಾರೆ. ಮದುವೆ ಔತಣಕೂಟದಲ್ಲಿ, ಅನ್ನ, ಸಾಂಬಾರ್, ವಡೆ, ಪಾಯಸದಿಂದ ಹಿಡಿದು.. ವಿವಿಧ ರೀತಿಯ ಪಲ್ಯ, ಕೂಟು, ಅವಿಯಲ್, ಟೊಮೆಟೊ ರಸಂ ಹೀಗೆ ಪಕ್ಕಾ ತಮಿಳುನಾಡು ಖಾದ್ಯಗಳು ಲಭ್ಯವಿತ್ತು. ಈ ಮಾಹಿತಿ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ.