400 ಎಕರೆ ಸರ್ವನಾಶ, ಇದು ನಮ್ಮ ಕರ್ಮವೆಂದ ಕಲ್ಕಿ ಸಿನಿಮಾ ಡೈರೆಕ್ಟರ್ ನಾಗ್ ಅಶ್ವಿನ್!

ಕಲ್ಕಿ 2898 ಎಡಿ ಚಿತ್ರದ ಮೂಲಕ ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ನಾಗ್ ಅಶ್ವಿನ್ ಮಿಂಚಿದ್ದಾರೆ. ರಾಜಮೌಳಿ, ಸುಕುಮಾರ್ ಅವರಂತಹ ನಿರ್ದೇಶಕರಿಗೆ ಸರಿಸಮಾನವಾದ ನಿರ್ದೇಶಕ ಎಂದು ಪ್ರಶಂಸೆ ಪಡೆದಿದ್ದಾರೆ. ಕಲ್ಕಿ ಪಾರ್ಟ್ 2 ಗಾಗಿ ಇಡೀ ದೇಶ ಕಾಯುತ್ತಿದೆ. ನಿರ್ದೇಶಕರಾಗಿ ಅವರು ನಿರ್ದೇಶಿಸಿದ ಮೊದಲ ಚಿತ್ರ 'ಎವಡೆ ಸುಬ್ರಹ್ಮಣ್ಯಂ' ಸಿನಿಮಾ ಬಿಡುಗಡೆಯಾಗಿ 10 ವರ್ಷ ಪೂರ್ಣಗೊಂಡ ಹಿನ್ನೆಲೆಯಲ್ಲಿ ಮರು ಬಿಡುಗಡೆ ಮಾಡುತ್ತಿದ್ದಾರೆ.

ಈ ಸಂದರ್ಭದಲ್ಲಿ ನಾಗ್ ಅಶ್ವಿನ್ ಮಾಧ್ಯಮ ಗೋಷ್ಠಿಯಲ್ಲಿ ಭಾಗವಹಿಸಿದ್ದರು. ಮಾಧ್ಯಮ ಪ್ರತಿನಿಧಿಗಳು ಕೇಳಿದ ಪ್ರಶ್ನೆಗಳಿಗೆ ಉತ್ತರಿಸಿದರು. ಈ ವೇಳೆ ಹಲವು ವಿಷಯಗಳು ಪ್ರಸ್ತಾಪಕ್ಕೆ ಬಂದವು. ಕಲ್ಕಿ ಚಿತ್ರದ ಬಗ್ಗೆಯೂ ಮಾಧ್ಯಮ ಪ್ರತಿನಿಧಿಗಳು ಪ್ರಶ್ನಿಸಿದರು. ಕಲ್ಕಿ ಸೆಕೆಂಡ್  ಪಾರ್ಟ್‌ನಲ್ಲಿ ಹೆಚ್ಚಾಗಿ ಭೈರವ, ಕರ್ಣ ಪಾತ್ರಗಳ ಬಗ್ಗೆ ಇರುತ್ತದೆ ಎಂದು ನಾಗ್ ಅಶ್ವಿನ್ ತಿಳಿಸಿದರು.

ಇತ್ತೀಚೆಗೆ ನಾಗ್ ಅಶ್ವಿನ್ ತೆಲಂಗಾಣ ಸರ್ಕಾರದ ವಿರುದ್ಧ ಟ್ವೀಟ್ ಮಾಡಿದ್ದರು. 400 ಎಕರೆ ಪ್ರದೇಶದಲ್ಲಿ ಐಟಿ ಪಾರ್ಕ್ ನಿರ್ಮಿಸಲು ಸರ್ಕಾರ ನಿರ್ಧರಿಸಿದೆ. ಅದನ್ನು ಉದ್ದೇಶಿಸಿ ನಾಗ್ ಅಶ್ವಿನ್ ನಮ್ಮ ಕರ್ಮ ಎಂದು ಪೋಸ್ಟ್ ಮಾಡಿದ್ದಾರೆ. ಏಕೆ ಹಾಗೆ ಪೋಸ್ಟ್ ಮಾಡಿದ್ದೀರಿ ಎಂದು ಕೇಳಿದಾಗ ನಾಗ್ ಅಶ್ವಿನ್ ದಿಟ್ಟ ಉತ್ತರ ನೀಡಿದರು. ಆ ನಿರ್ಧಾರ ತನಗೆ ಇಷ್ಟವಿಲ್ಲ ಎಂದರು. ಸರ್ಕಾರ ಆಯ್ಕೆ ಮಾಡಿಕೊಂಡ 400 ಎಕರೆ ಪ್ರದೇಶವು ತುಂಬಾ ಹಚ್ಚ ಹಸಿರಿನಿಂದ ಕೂಡಿದ್ದು, ಮರಗಳಿಂದ ತುಂಬಿರುವ ಪ್ರದೇಶವಾಗಿದೆ.

ಐಟಿ ಪಾರ್ಕ್ ಡೆವಲಪ್ ಮಾಡಬೇಕು ಅಂದುಕೊಂಡರೆ ಖಾಲಿ ಜಾಗದಲ್ಲಿ ಸಾಕಷ್ಟು ಐಟಿ ಪಾರ್ಕ್‌ಗಳಿವೆ. ಅವುಗಳನ್ನು ಡೆವಲಪ್ ಮಾಡಬಹುದು. ಈಗ ಹೊಸದಾಗಿ ಮತ್ತೊಂದು 400 ಎಕರೆ ಪ್ರದೇಶದಲ್ಲಿ ಮರಗಳನ್ನು ನಾಶಪಡಿಸುವ ಅಗತ್ಯವಿಲ್ಲ. ಇದು ನನ್ನ ಅಭಿಪ್ರಾಯ ಎಂದು ನಾಗ್ ಅಶ್ವಿನ್ ತಿಳಿಸಿದರು. ನಾಗ್ ಅಶ್ವಿನ್ ಕಾಮೆಂಟ್ಸ್ ಸದ್ಯ ವೈರಲ್ ಆಗಿವೆ.