ಎಂಪುರಾನ್ ಚಿತ್ರದಲ್ಲಿ ಕ್ಯಾಮಿಯೋ ಯಾರು?: ಯೂಟ್ಯೂಬರ್ ಇರ್ಫಾನ್‌ಗೆ ಆ ಸೀಕ್ರೆಟ್ ಹೇಳಿದ ಮೋಹನ್ ಲಾಲ್

ಯೂಟ್ಯೂಬರ್ ಇರ್ಫಾನ್ ಅವರ ಚಾನೆಲ್​ಗೆ ನೀಡಿದ ಸಂದರ್ಶನದಲ್ಲಿ ನಟ ಮೋಹನ್​ಲಾಲ್, ಎಂಪುರಾನ್ ಚಿತ್ರದಲ್ಲಿ ಬರುವ ಕ್ಯಾಮಿಯೋ ರೋಲ್ ಬಗ್ಗೆ ತಮಾಷೆಯಾಗಿ ಉತ್ತರಿಸಿದ್ದಾರೆ.

ಮೋಹನ್ ಲಾಲ್ - ಪೃಥ್ವಿರಾಜ್ ಕಾಂಬಿನೇಷನ್​ನಲ್ಲಿ ಮೂಡಿಬಂದಿರುವ 'ಎಂಪುರಾನ್' ಸಿನಿಮಾ ಅನೌನ್ಸ್ ಆದಾಗಿನಿಂದಲೂ ಹೆಚ್ಚು ಗಮನ ಸೆಳೆದಿದೆ. 'ಲೂಸಿಫರ್' ಸಿನಿಮಾದ ಎರಡನೇ ಭಾಗವಾಗಿ ಬಿಡುಗಡೆಯಾಗುತ್ತಿರುವ ಇದು, ಸದ್ಯ ಭಾರತದಲ್ಲಿರುವ ಹಲವು ಭಾಷೆಗಳ ಸಿನಿಮಾಗಳ ಮುಂಗಡ ಬುಕ್ಕಿಂಗ್ ದಾಖಲೆಗಳನ್ನು ಮುರಿದಿದೆ. ಎಲ್ಲಿ ನೋಡಿದರೂ 'ಎಂಪುರಾನ್' ಚಿತ್ರದ ಬಗ್ಗೆಯೇ ಮಾತು. ಎಂಪುರಾನ್ ಸಿನಿಮಾ ಹಾಲಿವುಡ್ ಸಿನಿಮಾ ಶೈಲಿಯಲ್ಲಿ ತಯಾರಿಸಲಾಗಿದೆ ಎಂದು ಈಗಾಗಲೇ ಬಿಡುಗಡೆಯಾಗಿರುವ ಟ್ರೇಲರ್ ಮೂಲಕ ತಿಳಿದುಬಂದಿದೆ. ಎಂಪುರಾನ್ ಸಿನಿಮಾ ಮಾರ್ಚ್ 27 ರಂದು ವಿಶ್ವದಾದ್ಯಂತ ಬಿಡುಗಡೆಯಾಗುತ್ತಿದೆ. 

ಲೈಕಾ ಪ್ರೊಡಕ್ಷನ್ಸ್, ಆಶೀರ್ವಾದ್ ಸಿನಿಮಾಸ್, ಶ್ರೀ ಗೋಕುಲಂ ಮೂವೀಸ್ ಸಂಸ್ಥೆಗಳ ಅಡಿಯಲ್ಲಿ ಸುಭಾಸ್ಕರನ್, ಆಂಟನಿ ಪೆರುಂಬಾವೂರ್, ಗೋಕುಲಂ ಗೋಪಾಲನ್ ಈ ಚಿತ್ರವನ್ನು ನಿರ್ಮಿಸಿದ್ದಾರೆ. ಮುರಳಿ ಗೋಪಿ ಅವರ ಚಿತ್ರಕಥೆಯಲ್ಲಿ ಮೂಡಿಬಂದಿರುವ ಈ ಸಿನಿಮಾ ಮಲಯಾಳಂ ಸಿನಿಮಾ ಇತಿಹಾಸದಲ್ಲಿ ಮೊದಲ ಐಮ್ಯಾಕ್ಸ್ ಸಿನಿಮಾವಾಗಿ ಬಿಡುಗಡೆಯಾಗಲಿದೆ. ಈ ಚಿತ್ರದ ತಮಿಳುನಾಡು ವಿತರಣಾ ಹಕ್ಕನ್ನು ಶ್ರೀ ಗೋಕುಲಂ ಗೋಪಾಲನ್ ಅವರ ಶ್ರೀ ಗೋಕುಲಂ ಮೂವೀಸ್ ಪಡೆದುಕೊಂಡಿದೆ. 

ಈ ಚಿತ್ರದಲ್ಲಿ ಮೋಹನ್ ಲಾಲ್ ಕಥಾನಾಯಕನಾಗಿ ನಟಿಸಿದ್ದಾರೆ. ಅಲ್ಲದೆ, ಪೃಥ್ವಿರಾಜ್, ಮಂಜು ವಾರಿಯರ್, ಟೊವಿನೋ ಥಾಮಸ್, ಇಂದ್ರಜಿತ್ ಸುಕುಮಾರನ್, ಸೂರಜ್ ವೆಂಜಾರಮೂಡು, ಸಾನಿಯಾ ಅಯ್ಯಪ್ಪನ್ ಹೀಗೆ ದೊಡ್ಡ ತಾರಾ ಬಳಗವೇ ಇದೆ. ಗೇಮ್ ಆಫ್ ಥ್ರೋನ್ಸ್ ಮೂಲಕ ವಿಶ್ವ ಪ್ರಖ್ಯಾತಿ ಪಡೆದ ಜೆರೋಮ್ ಫ್ಲಿನ್ ಈ ಚಿತ್ರದಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸಿರುವುದು ಚಿತ್ರಕ್ಕೆ ಜಾಗತಿಕ ಮನ್ನಣೆ ತಂದುಕೊಟ್ಟಿದೆ. ಎಂಪುರಾನ್ ಸಿನಿಮಾದ ಪ್ರಮೋಷನ್​ಗಾಗಿ ತಮಿಳುನಾಡಿಗೆ ಬಂದಿದ್ದ ಮೋಹನ್ ಲಾಲ್ ಮತ್ತು ಪೃಥ್ವಿರಾಜ್ ಹಲವು ಯೂಟ್ಯೂಬ್ ಚಾನೆಲ್​ಗಳಿಗೆ ಸಂದರ್ಶನ ನೀಡಿದ್ದರು.

ಆ ರೀತಿಯಲ್ಲಿ ಪ್ರಸಿದ್ಧ ಯೂಟ್ಯೂಬರ್​ಗಳಲ್ಲಿ ಒಬ್ಬರಾದ ಇರ್ಫಾನ್ ಅವರ ಇರ್ಫಾನ್ಸ್ ವ್ಯೂ ಚಾನೆಲ್​ಗೆ ಮೋಹನ್​ಲಾಲ್ ಸಂದರ್ಶನ ನೀಡಿದ್ದರು. ಆಗ ಈ ಚಿತ್ರದಲ್ಲಿ ಶಾರುಖ್ ಖಾನ್ ಕ್ಯಾಮಿಯೋ ರೋಲ್​ನಲ್ಲಿ ನಟಿಸಿರುವುದು ನಿಜವೇ ಎಂದು ಇರ್ಫಾನ್ ಕೇಳಿದಾಗ, ಶಾಕ್ ಆದ ಮೋಹನ್​ಲಾಲ್, ಅವರನ್ನು ಕಾಲೆಳೆದು ಉತ್ತರಿಸಿದ್ದಾರೆ. ಅದರಂತೆ, ಹೌದು ಶಾರುಖ್ ಖಾನ್ ನಟಿಸಿದ್ದಾರೆ, ಆದರೆ ಅವರು ನಟಿಸಿದ ದೃಶ್ಯಗಳನ್ನು ಡಿಲೀಟ್ ಮಾಡಲಾಗಿದೆ ಎಂದು ಮೋಹನ್​ಲಾಲ್ ಹೇಳಲು, ತಕ್ಷಣ ಪೃಥ್ವಿರಾಜ್ ಕೂಡ, ನೀವು ಡಿಲೀಟೆಡ್ ಸೀನ್ಸ್ ಬಿಡುಗಡೆಯಾದಾಗ ನೋಡುತ್ತೀರಿ ಎಂದು ಸೇರಿ ಕಾಲೆಳೆದಿದ್ದಾರೆ. ಇದರ ಮೂಲಕ ಶಾರುಖ್ ಖಾನ್ ಈ ಚಿತ್ರದಲ್ಲಿ ಕ್ಯಾಮಿಯೋ ರೋಲ್​ನಲ್ಲಿ ನಟಿಸಿಲ್ಲ ಎಂಬುದು ಖಚಿತವಾಗಿದೆ. ಆದರೂ ಇದರಲ್ಲಿ ಕ್ಯಾಮಿಯೋ ರೋಲ್​ನಲ್ಲಿ ನಟಿಸಿರುವ ನಟ ಯಾರು ಎಂಬುದನ್ನು ಬಹಳ ರಹಸ್ಯವಾಗಿ ಇಟ್ಟಿದ್ದಾರೆ. ಸಿನಿಮಾ ರಿಲೀಸ್ ಆದಾಗ ಅದು ಸರ್ಪ್ರೈಸ್ ಆಗಿ ಇರಬಹುದು ಎಂದು ನಿರೀಕ್ಷಿಸಲಾಗಿದೆ.