NTRಗಾಗಿ ದಪ್ಪಗಾದಳು: ವೇದಿಕೆಯಲ್ಲೇ ಸ್ಟಾರ್ ನಟಿಗೆ ಅವಮಾನಿಸಿದ್ದ ಅಕ್ಕಿನೇನಿ ನಾಗೇಶ್ವರ್ ರಾವ್‌

ಅಕ್ಕಿನೇನಿ ನಾಗೇಶ್ವರ್‌ ರಾವ್ ಹಾಗೂ ನಂದಮೂರಿ ತಾರಕ ರಾಮರಾವ್ ಆ ಕಾಲದ ತೆಲುಗು ಸಿನಿಮಾಗಳ ಖ್ಯಾತ ನಾಯಕ ನಟರು, ಆದರೆ ಅಕ್ಕಿನೇನಿ ನಾಗೇಶ್ವರ್‌ ರಾವ್  ಎನ್‌ಟಿಆರ್‌ ಮುಂದೆಯೇ ಓರ್ವ ಸ್ಟಾರ್ ನಾಯಕಿಯನ್ನು ಅವಮಾನ ಮಾಡಿದ್ದಾರಂತೆ. ಈ ಕುರಿತ ಒಂದು ವೀಡಿಯೋ ಈಗ ಸಾಮಾಜಿಕ ಜಾಲತಾಣದಲ್ಲಿ ಸಖತ್‌ ವೈರಲ್ ಆಗ್ತಿದೆ.  ಆ ಬಗ್ಗೆ ಒಂದು ವರದಿ

ನಂದಮೂರಿ ತಾರಕ ರಾಮರಾವ್ ಹಾಗೂ ಅಕ್ಕಿನೇನಿ ನಾಗೇಶ್ವರ ರಾವ್ ತೆಲುಗು ಸಿನಿಮಾ ರಂಗದ ಎರಡು ಕಣ್ಣುಗಳಿದ್ದಂತೆ. ಮೊದಲ ತಲೆಮಾರಿನ ಕಮರ್ಷಿಯಲ್‌ ಹಿಟ್‌ ನಾಯಕರು ಇವರು. ಅತಿ ದೊಡ್ಡ ಸ್ಟಾರ್‌ಡಮ್, ಅಭಿಮಾನಿ ಬಳಗ ಇಬ್ಬರಿಗೂ ಇತ್ತು. ಇಬ್ಬರೂ ನೀನಾ, ನಾನಾ ಅನ್ನೋತರ ಬಾಕ್ಸ್ ಆಫೀಸಿನಲ್ಲಿ ಪೈಪೋಟಿ ನಡೆಸುತ್ತಿದ್ದರು. ಎನ್‌ಟಿಆರ್ ಮಾಸ್, ಪೌರಾಣಿಕ ಚಿತ್ರಗಳಲ್ಲಿ ತಮ್ಮದೇ ಛಾಪು ಮೂಡಿಸಿದ್ರು. ಮತ್ತೊಂದೆಡೆ ಕ್ಲಾಸ್ ವಿಷಯಗಳ ಸಿನಿಮಾದಲ್ಲಿ ನಾಗೇಶ್ವರ್ ರಾವ್ ಮಿಂಚುತ್ತಾ ಎನ್‌ಟಿಆರ್‌ಗೆ ಟಕ್ಕರ್‌ ಕೊಡುತ್ತಿದ್ದರು.  

ಎನ್‌ಟಿಆರ್-ಎಎನ್‌ಆರ್‌ ಅವರಲ್ಲಿದ್ದ ಒಂದು ಒಳ್ಳೆಯ ಗುಣ ಎಂದರೆ, ಅವರಿಬ್ಬರೂ ಪರಸ್ಪರ ಪರದೆ ಹಂಚಿಕೊಳ್ಳಲು ಹಿಂಜರಿಯುತ್ತಿರಲಿಲ್ಲ. ಇಬ್ಬರು ಸ್ಟಾರ್ ನಾಯಕರು, ಒಟ್ಟಿಗೇ ಸಿನಿಮಾ ಮಾಡೋದು ತೀರಾ ಅಪರೂಪ. ಆದರೆ ಭಾರೀ ಪೈಪೋಟಿ ಇದ್ದರೂ, ಈ ನಾಯಕರು ಮಾತ್ರ ಮಲ್ಟಿಸ್ಟಾರರ್‌ ಸಿನಿಮಾಗಳಲ್ಲಿ ಜೊತೆಯಾಗಿ ನಟಿಸುತ್ತಿದ್ದರು. ಕೆಲವು ಚಿತ್ರಗಳಲ್ಲಿ ಒಬ್ಬರ ಪಾತ್ರಕ್ಕೆ ಮಹತ್ವ ಕಡಿಮೆ ಇರುತ್ತಿತ್ತು. ಆದರೂ ಅಹಂ ಬಿಟ್ಟು ಇಬ್ಬರು ಜೊತೆಗೆ ನಟಿಸುತ್ತಿದ್ದರು.  

ಎನ್‌ಟಿಆರ್-ಎಎನ್‌ಆರ್‌ ಜೊತೆಯಾಗಿ ಬರೋಬ್ಬರಿ 15 ಸಿನಿಮಾಗಳಲ್ಲಿ ನಟಿಸಿದ್ದರು. ಇದು ಅಪರೂಪದ ದಾಖಲೆ. 70ರ ದಶಕದಲ್ಲಿ ಎನ್‌ಟಿಆರ್‌ ಜೊತೆ ಜಯಸುಧಾ, ಜಯಪ್ರದಾ, ಶ್ರೀದೇವಿ, ವಾಣಿಶ್ರೀ, ಶಾರದಾ, ಲಕ್ಷ್ಮಿ, ಜಯಚಿತ್ರ ಹೀಗೆ ಹಲವು ನಾಯಕಿಯರು ಹೆಚ್ಚಿನ ಚಿತ್ರಗಳಲ್ಲಿ ನಟಿಸಿದ್ದಾರೆ. ಅದರಲ್ಲೂ ಶ್ರೀದೇವಿ, ಜಯಸುಧಾ, ಜಯಪ್ರದಾ ಮುಂಚೂಣಿಯಲ್ಲಿದ್ದಾರೆ.  

ಎನ್‌ಟಿಆರ್, ಎಎನ್‌ಆರ್‌ ಅವರ ಮಲ್ಟಿಸ್ಟಾರರ್ ರಾಮಕೃಷ್ಣುಲು ಚಿತ್ರದಲ್ಲಿ ಜಯಸುಧಾ, ಜಯಪ್ರದಾ ನಾಯಕಿಯರಾಗಿ ನಟಿಸಿದ್ದರು. ಎನ್‌ಟಿಆರ್ ಜೊತೆ ಜಯಸುಧಾ ಜೋಡಿಯಾದರೆ, ಎಎನ್‌ಆರ್‌ ಜೊತೆ ಜಯಪ್ರದಾ ನಟಿಸಿದ್ದರು. ಈ ಸಿನಿಮಾದ ಲಾಂಚಿಂಗ್ ಅನ್ನಪೂರ್ಣ ಸ್ಟುಡಿಯೋದಲ್ಲಿ ನಡೆದಿತ್ತು.  ಶಿವಾಜಿ ಗಣೇಶನ್ ಈ ವೇಳೆ ಉಪಸ್ಥಿತರಿದ್ದು, ಸಿನಿಮಾಗೆ ಕ್ಲಾಪ್ ಮಾಡಿದ್ದರು.

ಆಗ ಶ್ರೀದೇವಿ, ಜಯಪ್ರದಾರನ್ನು ಉದ್ದೇಶಿಸಿ, ಎಎನ್‌ಆರ್‌ ಕಾಮೆಂಟ್ ಮಾಡಿದ್ದು, ಸ್ಲಿಮ್ ಆಗಿರಬೇಕು ಅಂತ ಊಟ ಸರಿಯಾಗಿ ಮಾಡ್ತಿಲ್ಲವಾ ಅಂತ ಜಯಪ್ರದಾಗೆ ಎಎನ್‌ಆರ್‌ ಕೇಳಿದ್ರಂತೆ. ಅದಕ್ಕೆ ಪ್ರತಿಕ್ರಿಯಿಸಿದ ಜಯಪ್ರದಾ ಹಾಗೇನಿಲ್ಲ, ನಾನು ಇರುವುದೇ ಹಾಗೆ ಎಂದು ಉತ್ತರಿಸಿದರಂತೆ. ನಂತರ ಜಯಸುಧಾರನ್ನು ಉದ್ದೇಶಿಸಿ... ನೀನು ಮಾತ್ರ ಸ್ವಲ್ಪ ದಪ್ಪ ಆಗಿದ್ದೀಯಾ ಅಂದ್ರಂತೆ ಎಎನ್‌ಆರ್‌. ಅದು ಒಳ್ಳೇದೇ ಅಲ್ವಾ ಅಂತ ಎನ್‌ಟಿಆರ್ ಹೇಳಿದ್ರಂತೆ. ಅದಕ್ಕೆ ಎಎನ್‌ಆರ್‌ ನಿಮ್ಮನ್ನು ದೃಷ್ಟಿಯಲ್ಲಿ ಇಟ್ಟುಕೊಂಡೇ ಜಯಸುಧಾ ದಪ್ಪ ಆಗ್ತಿದ್ದಾರೆ ಅಂತ ಹಾಸ್ಯ ಮಾಡಿದ್ದರಂತೆ ಎಎನ್ಆರ್‌.

ಈ ವೇಳೆ ಜಯಸುಧಾಗೆ ಏನು ಮಾತನಾಡಬೇಕು ಅಂತ ಗೊತ್ತಾಗದೇ ಸುಮ್ಮನೆ ಇದ್ರಂತೆ. ಆ ಕಾಲದಲ್ಲಿ ನಟರೆಲ್ಲರೂ ತೆಲುಗಿನವರಿದ್ದರು. ಹಲವು ಬಾರಿ ಒಟ್ಟಿಗೆ ನಟಿಸುತ್ತಿದ್ದರು.ಇದರಿಂದ  ಗಟ್ಟಿಯಾದ ಸ್ನೇಹವಿತ್ತು. ಆತ್ಮೀಯತೆಯಿಂದ ಒಬ್ಬರ ಕಾಲನ್ನು ಮತ್ತೊಬ್ಬರು ಎಳೆಯುತ್ತಿದ್ದರು. ಆದರೀಗ ಕಾಲ ಬದಲಾಗಿದೆ. ನಾಯಕಿ ದೇಹದ ಬಗ್ಗೆ ಮಾತನಾಡಿದರೆ ಅದು ಬಾಡಿ ಶೇಮಿಂಗ್ ಆಗುತ್ತದೆ. ಕೇಸ್ ಬೀಳುತ್ತದೆ. ಅಷ್ಟರ ಮಟ್ಟಿಗೆ ಪರಿಸ್ಥಿತಿ ಬದಲಾಗಿದೆ.

ಎನ್‌ಟಿಆರ್ ಎಎನ್ಆರ್ ಜೋಡಿಯಲ್ಲಿ ಮಿಸ್ಸಮ್ಮ, ಗುಂಡಮ್ಮ ಕಥ, ಮಾಯಾಬಜಾರ್ ಇತ್ಯಾದಿ ಕ್ಲಾಸಿಕ್‌ ಸಿನಿಮಾಗಳು ತೆರೆಕಂಡವು. ಎನ್‌ಟಿಆರ್ ರಾಜಕೀಯಕ್ಕೆ ಬಂದ ನಂತರ ಇಬ್ಬರ ನಡುವೆ ಮನಸ್ತಾಪ ಉಂಟಾಯಿತು. ನಾನು ಮಾಡಿದ ಕೆಲವು ಕಾಮೆಂಟ್‌ಗಳ ಬಗ್ಗೆ ಕೆಲವರು ಚಾಡಿ ಹೇಳಿದ್ದರಿಂದ.. ಮುಖ್ಯಮಂತ್ರಿಯಾದ ಎನ್‌ಟಿಆರ್ ತನಗೆ ತೊಂದರೆ ಕೊಟ್ಟರು ಅಂತ ಎಎನ್‌ಆರ್ ಸಂದರ್ಶನವೊಂದರಲ್ಲಿ ಹೇಳಿಕೊಂಡಿದ್ದರು.