ಕ್ಯಾರವಾನ್‌ನಲ್ಲಿದ್ದ ರಹಸ್ಯ ಕ್ಯಾಮೆರಾ ಬಗ್ಗೆ ಮೋಹನ್‌ ಲಾಲ್ ಜೊತೆ ಮಾತನಾಡಿದ್ದೆ: ನಟಿ ರಾಧಿಕಾ ಶರತ್ ಕುಮಾರ್

ಮಲಯಾಳಂ ಚಿತ್ರರಂಗಕ್ಕೆ ಸಂಬಂಧಿಸಿದಂತೆ ಹೇಮಾ ಸಮಿತಿ ವರದಿ ಹೊರಬಿದ್ದಾಗ ಕೆಲವರು ಕ್ಯಾರವಾನ್‌ಗಳಲ್ಲಿ ರಹಸ್ಯ ಕ್ಯಾಮೆರಾ ಇಟ್ಟುಕೊಂಡಿದ್ದಾರೆ ಎಂದು ಹೇಳಿ ಸಂಚಲನ ಮೂಡಿಸಿದ್ದರು ರಾಧಿಕಾ ಶರತ್ ಕುಮಾರ್. ಈ ಸಂಬಂಧ ಮೋಹನ್‌ಲಾಲ್ ಜೊತೆ ಮಾತನಾಡಿದ್ದಾಗಿ ನಟಿ ಬಹಿರಂಗಪಡಿಸಿದ್ದಾರೆ.

ಕಳೆದ ಎರಡು ವಾರಗಳಿಂದ ಮಲಯಾಳಂ ಚಿತ್ರರಂಗದಲ್ಲಿ ಬಿಸಿಬಿಸಿ ಚರ್ಚೆಗೆ ಕಾರಣವಾಗಿದ್ದು ಹೇಮಾ ಸಮಿತಿ ವರದಿ. 2017 ರಲ್ಲಿ ಖ್ಯಾತ ನಟಿಯೊಬ್ಬರಿಗೆ ಕಾರಿನಲ್ಲಿ ನಡೆದ ಲೈಂಗಿಕ ದೌರ್ಜನ್ಯ ಪ್ರಕರಣದಲ್ಲಿ ಖ್ಯಾತ ಮಲಯಾಳಂ ನಟ ಸೇರಿದಂತೆ ನಾಲ್ವರು ಆರೋಪಿಗಳು ಕಾನೂನಿನ ಮುಂದೆ ನಿಂತಿದ್ದರು. ಈ ಹಿನ್ನೆಲೆಯಲ್ಲಿ ಮಲಯಾಳಂ ಚಿತ್ರರಂಗದಲ್ಲಿ ನಟಿಯರಿಗೆ ರಕ್ಷಣೆ ಇಲ್ಲ ಎಂಬ ಆರೋಪ ಕೇಳಿಬಂದಿತ್ತು. ಈ ಹಿನ್ನೆಲೆಯಲ್ಲಿ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ 'ಹೇಮಾ ಸಮಿತಿ'ಯನ್ನು ರಚಿಸಿದ್ದರು. ಈ ಸಮಿತಿ ಮಲಯಾಳಂ ನಟಿಯರನ್ನು ವಿಚಾರಣೆ ನಡೆಸಿ, ಅವರು ಎದುರಿಸಿದ ಲೈಂಗಿಕ ಕಿರುಕುಳ ಮತ್ತು ಈ ಘಟನೆಗಳಲ್ಲಿ ಭಾಗಿಯಾಗಿರುವ ನಟರ ಬಗ್ಗೆ ಮಾಹಿತಿ ಸಂಗ್ರಹಿಸಿತ್ತು.

ನಿವೃತ್ತ ನ್ಯಾಯಮೂರ್ತಿ ಹೇಮಾ ಈ ವರದಿಯನ್ನು 2019 ರಲ್ಲಿ ಮುಖ್ಯಮಂತ್ರಿಗೆ ಸಲ್ಲಿಸಿದ್ದರು. ನಾಲ್ಕು ವರ್ಷಗಳ ನಂತರ, ಈ ಪ್ರಕರಣದಲ್ಲಿ ಭಾಗಿಯಾಗಿರುವ ಕೆಲವು ಪ್ರಮುಖ ವ್ಯಕ್ತಿಗಳ ಹೆಸರುಗಳು ಬಹಿರಂಗಗೊಂಡಿವೆ. ಇದು ಮಲಯಾಳಂ ಚಿತ್ರರಂಗದಲ್ಲಿ ಸಂಚಲನ ಮೂಡಿಸಿದೆ. AMMA ನಟರ ಸಂಘದ ಅಧ್ಯಕ್ಷರಾಗಿದ್ದ ಮೋಹನ್‌ಲಾಲ್ ಈ ವಿವಾದವನ್ನು ನಿಭಾಯಿಸುವ ಬದಲು ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದರು. ಅಲ್ಲದೆ, ಅವರ ನೇತೃತ್ವದ 17 ಮಂದಿ ಕಾರ್ಯದರ್ಶಿಗಳು ಸಹ ಸ್ಥಾನ ತೊರೆದರು. ಈ ವಿವಾದ ಒಂದೆಡೆಯಾದರೆ, ಮತ್ತೊಂದೆಡೆ ಹಲವಾರು ನಟಿಯರು ತಮಗಾದ ಅನ್ಯಾಯದ ಬಗ್ಗೆ ಮುಕ್ತವಾಗಿ ಮಾತನಾಡಲು ಪ್ರಾರಂಭಿಸಿದ್ದಾರೆ.

ಇದೀಗ ನಟಿ ರಾಧಿಕಾ ಶರತ್ ಕುಮಾರ್, ಮಲಯಾಳಂ ಚಿತ್ರರಂಗದ ಕೆಲವರು ಕಾರವಾನ್‌ಗಳಲ್ಲಿ ರಹಸ್ಯ ಕ್ಯಾಮೆರಾ ಇಟ್ಟು ಬಟ್ಟೆ ಬದಲಾಯಿಸುವುದನ್ನು ಚಿತ್ರೀಕರಿಸುತ್ತಿದ್ದಾರೆ ಎಂದು ಆರೋಪಿಸಿ ಸಂಚಲನ ಮೂಡಿಸಿದ್ದಾರೆ. ಈ ಬಗ್ಗೆ ರಾಧಿಕಾ ಮಾತನಾಡಿ, 'ನಾನು ಮಲಯಾಳಂ ಚಿತ್ರವೊಂದರಲ್ಲಿ ನಟಿಸುತ್ತಿದ್ದಾಗ... ನಾಲ್ವರು ಒಟ್ಟಿಗೆ ಕುಳಿತು ಅಶ್ಲೀಲ ವಿಡಿಯೋ ನೋಡುತ್ತಿದ್ದರು. ಅಲ್ಲಿದ್ದ ತಮಿಳು ವ್ಯಕ್ತಿಯೊಬ್ಬರನ್ನು ಕರೆದು ಆ ನಾಲ್ವರು ಏನು ನೋಡುತ್ತಿದ್ದಾರೆ ಎಂದು ಕೇಳಿದೆ. ಅದಕ್ಕೆ ಅವರು... ನಟಿಯರು ಕಾರವಾನ್‌ನಲ್ಲಿ ಬಟ್ಟೆ ಬದಲಾಯಿಸುವ ವಿಡಿಯೋ ನೋಡಿ ನಗುತ್ತಿದ್ದಾರೆ ಎಂದು ಹೇಳಿದರು' ಎಂದಿದ್ದಾರೆ. ನಂತರ ರಾಧಿಕಾ ಕಿರುಚಿಕೊಂಡು ಆ ನಾಲ್ವರನ್ನೂ ಬೈದಿದ್ದಾರೆ ಎನ್ನಲಾಗಿದೆ.

ಈ ಘಟನೆ ಸಂಬಂಧ ಕೇರಳ ಪೊಲೀಸರು ರಾಧಿಕಾ ಶರತ್ ಕುಮಾರ್ ಅವರನ್ನು ವಿಚಾರಣೆ ನಡೆಸಲು ಫೋನ್ ಮೂಲಕ ಸಂಪರ್ಕಿಸಿದಾಗ, ಯಾವ ನಟನ ಚಿತ್ರೀಕರಣದ ಸಮಯದಲ್ಲಿ ಈ ಘಟನೆ ನಡೆಯಿತು ಎಂದು ಹೇಳಲು ಅವರು ನಿರಾಕರಿಸಿದ್ದಾರೆ ಎಂದು ವರದಿಯಾಗಿದೆ. ಆದರೆ, ಹಲವು ನಟಿಯರಿಗೆ ರಹಸ್ಯ ಕ್ಯಾಮೆರಾಗಳ ಬಗ್ಗೆ ಎಚ್ಚರಿಕೆ ನೀಡಿ ಜಾಗೃತಿ ಮೂಡಿಸಿದ್ದಾಗಿ ತಿಳಿಸಿದ್ದಾರೆ. ಈ ಆಘಾತಕಾರಿ ಘಟನೆ ಸಂಬಂಧ ಮಲಯಾಳಂ ನಟ ಮೋಹನ್‌ಲಾಲ್ ತಮಗೆ ಕರೆ ಮಾಡಿ ವಿಚಾರಿಸಿದ್ದಾಗಿ ರಾಧಿಕಾ ಇದೀಗ ತಿಳಿಸಿದ್ದಾರೆ. ಈ ಬಗ್ಗೆ ಅವರು ಮೋಹನ್‌ಲಾಲ್‌ಗೆ ಮಾಹಿತಿ ನೀಡಿದ್ದು, ಸೂಕ್ತ ಕ್ರಮ ಕೈಗೊಳ್ಳಲಾಗಿದೆ ಎನ್ನಲಾಗಿದೆ.