'ಯುಪಿಐ ಲೈಟ್‌' ವಹಿವಾಟು ಮಿತಿ ಏರಿಸಿದ ಆರ್‌ಬಿಐ, ವ್ಯಾಲೆಟ್‌ನಲ್ಲಿ ಈಗ 5 ಸಾವಿರ ಇಡಬಹುದು!

ಆರ್‌ಬಿಐ UPI ಲೈಟ್ ವ್ಯಾಲೆಟ್ ಮಿತಿಯನ್ನು ₹5,000ಕ್ಕೆ ಮತ್ತು ಪ್ರತಿ ವಹಿವಾಟಿನ ಮಿತಿಯನ್ನು ₹1,000ಕ್ಕೆ ಹೆಚ್ಚಿಸಿದೆ. ಇದರಿಂದಾಗಿ ಗ್ರಾಹಕರು ಯಾವುದೇ ಸಮಯದಲ್ಲಿ ಅವರ UPI ಲೈಟ್ ವ್ಯಾಲೆಟ್‌ನಲ್ಲಿ ₹5,000 ಇರಿಸಿಕೊಳ್ಳಬಹುದು ಮತ್ತು ₹1,000 ವರೆಗಿನ ವಹಿವಾಟುಗಳನ್ನು ಪಿನ್ ಇಲ್ಲದೆ ಮಾಡಬಹುದು.

ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್‌ಬಿಐ) ಬುಧವಾರ ಯುಪಿಐ ಲೈಟ್ ವಾಲೆಟ್ ಮಿತಿಯನ್ನು ₹5,000ಕ್ಕೆ ಮತ್ತು ಪ್ರತಿ ವಹಿವಾಟಿನ ಮಿತಿಯನ್ನು ₹1,000ಕ್ಕೆ ಹೆಚ್ಚಿಸಿದೆ. ಪ್ರಸ್ತುತ, ಆಫ್‌ಲೈನ್ ಪಾವತಿ ವಹಿವಾಟಿನ ಗರಿಷ್ಠ ಮಿತಿ ₹500 ಮತ್ತು ಪಾವತಿ ಸಾಧನದಲ್ಲಿನ ಆಫ್‌ಲೈನ್ ವಹಿವಾಟುಗಳ ಒಟ್ಟು ಮಿತಿಯು ಯಾವುದೇ ಸಮಯದಲ್ಲಿ ₹2,000 ಆಗಿದೆ.

ಆಫ್‌ಲೈನ್ ಮೋಡ್‌ನಲ್ಲಿ ಸಣ್ಣ ಮೌಲ್ಯದ ಡಿಜಿಟಲ್ ಪಾವತಿಗಳನ್ನು ಸುಲಭಗೊಳಿಸುವ ಉದ್ದೇಶದಿಂದ 2022 ರ ಜನವರಿಯಲ್ಲಿ ನೀಡಲಾದ 'ಆಫ್‌ಲೈನ್ ಫ್ರೇಮ್‌ವರ್ಕ್' ಅನ್ನು ರಿಸರ್ವ್ ಬ್ಯಾಂಕ್ ಬುಧವಾರ ತಿದ್ದುಪಡಿ ಮಾಡಿದೆ. "...ಯುಪಿಐ ಲೈಟ್‌ಗೆ ವರ್ಧಿತ ಮಿತಿಗಳು ಪ್ರತಿ ವಹಿವಾಟಿಗೆ ₹1,000 ಆಗಿರುತ್ತದೆ, ಯಾವುದೇ ಸಮಯದಲ್ಲಿ ₹5,000 ಒಟ್ಟು ಮಿತಿಯಾಗಿರುತ್ತದೆ," ಎಂದು ರಿಸರ್ವ್ ಬ್ಯಾಂಕ್ ಸುತ್ತೋಲೆ ಹೇಳಿದೆ ಎಂದು ಪಿಟಿಐ ವರದಿ ಮಾಡಿದೆ.

ಈ ವರ್ಷದ ಅಕ್ಟೋಬರ್‌ನಲ್ಲಿ ಸೆಂಟ್ರಲ್ ಬ್ಯಾಂಕ್ ಈ ನಿಟ್ಟಿನಲ್ಲಿ ಘೋಷಣೆ ಮಾಡಿದೆ. ಇದರಿಂದಾಗಿ ಗ್ರಾಹಕರು ಯಾವುದೇ ಸಮಯದಲ್ಲಿ ಅವರ UPI ಲೈಟ್ ವ್ಯಾಲೆಟ್‌ನಲ್ಲಿ 5000ರೂಪಾಯಿ ಇರಿಸಿಕೊಳ್ಳಬಹುದು. ಹಾಗೂ ಆ ವ್ಯಾಲೆಟ್‌ನಿಂದ 1 ಸಾವಿರ ರೂಪಾಯಿಯನ್ನು ಯಾವುದೇ ಸಮಯದಲ್ಲಿ ಪಾವತಿ ಮಾಡಬಹುದು. ಇದಕ್ಕಾಗಿ ಅವರು ಯುಪಿಐ ಪಿನ್‌ ಅಥವಾ ದೃಢೀಕರಣದ ಅಗತ್ಯವಿರೋದಿಲ್ಲ.

ಆಫ್‌ಲೈನ್ ಪಾವತಿ ಎಂದರೆ ಇಂಟರ್ನೆಟ್ ಅಥವಾ ಟೆಲಿಕಾಂ ಸಂಪರ್ಕದ ಅಗತ್ಯವಿಲ್ಲದ ನಡೆಯುವ ವಹಿವಾಟು. UPI ಲೈಟ್ ವಹಿವಾಟುಗಳು ಆಫ್‌ಲೈನ್ ಆಗಿದ್ದು, ಬಳಕೆದಾರರು ತಮ್ಮ ಮೊಬೈಲ್ ಫೋನ್‌ಗಳ ಮೂಲಕ ವಹಿವಾಟು ಮಾಡಲು ಇದಕ್ಕೆ UPI ಪಿನ್ ಅಗತ್ಯವಿಲ್ಲ. ವಹಿವಾಟಿನ ಅಲರ್ಟ್‌ಗಳನ್ನು ರಿಯಲ್‌ ಟೈಮ್‌ನಲ್ಲಿ ಯೂಸರ್‌ಗಳಿಗೆ ಕಳಿಸಲಾಗುವುದಿಲ್ಲ.

Google Pay ಅಥವಾ PhonePe ನಂತಹ ಹಲವಾರು ಅಪ್ಲಿಕೇಶನ್‌ಗಳು ತಮ್ಮ ಗ್ರಾಹಕರಿಗೆ UPI ಲೈಟ್ ಸೇವೆಯನ್ನು ನೀಡುತ್ತವೆ. ಪ್ರಸ್ತುತ ಬಳಕೆದಾರರು ಅಂತಹ ವಹಿವಾಟುಗಳಿಗಾಗಿ ತಮ್ಮ ವ್ಯಾಲೆಟ್‌ಗಳಿಗೆ ಮೊದಲೇ ಹಣವನ್ನು  ಲೋಡ್ ಮಾಡಬೇಕಾಗುತ್ತದೆ. ಪ್ರಕ್ರಿಯೆಯನ್ನು ಸರಳಗೊಳಿಸಲು ಮತ್ತು  ಟಾಪ್-ಅಪ್ ಅಗತ್ಯವನ್ನು ತೊಡೆದುಹಾಕಲು ಹೊಸ ಸ್ವಯಂ ಟಾಪ್ ಅಪ್ ವೈಶಿಷ್ಟ್ಯವನ್ನು ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (NCPI) ಅಭಿವೃದ್ಧಿಪಡಿಸುತ್ತಿದೆ.