ಅಂಬಾನಿಯಿಂದ 700 ಕೋಟಿ ಆರ್ಡರ್ ಸಿಗ್ತಿದ್ದಂತೆ ಪುಟಿದೆದ್ದ ಕಂಪನಿ! ಹೂಡಿಕೆದಾರರು ಫುಲ್ ಜಿಂಗಾಲಾಲಾ!

ರಿಲಯನ್ಸ್ ಇಂಡಸ್ಟ್ರೀಸ್‌ನಿಂದ ₹700 ಕೋಟಿ ಮೌಲ್ಯದ ಆರ್ಡರ್ ಪಡೆದ ನಂತರ ಷೇರುಗಳು ಶೇ.6 ರಷ್ಟು ಏರಿಕೆಯಾಗಿವೆ. ಈ ಒಪ್ಪಂದವು ಗುಜರಾತ್‌ನ ದಹೇಜ್ ವಿನೈಲ್ ಯೋಜನೆಗೆ ಸಂಬಂಧಿಸಿದ ನಿರ್ಮಾಣ ಕಾರ್ಯಗಳಿಗೆ ಸಂಬಂಧಿಸಿದೆ.

ಮುಕೇಶ್ ಅಂಬಾನಿ ಒಡೆತನದ ರಿಲಯನ್ಸ್‌ನಿಂದ 700 ಕೋಟಿ ರೂಪಾಯಿ ಸಿಗುತ್ತಿದ್ದಂತೆ ಕಂಪನಿಯ ಷೇರುಗಳ ಬೆಲೆ ಏರಿಕೆ ಕಂಡಿದೆ. ಈ ಒಂದು ಆರ್ಡರ್‌ನಿಂದ ಹೂಡಿಕೆದಾರರು ಸಂತೋಷಗೊಂಡಿದ್ದಾರೆ. ಷೇರುಗಳ ಬೆಲೆಯಲ್ಲಿ ಶೇ.6ರಷ್ಟು ಜಿಗಿತ ಕಂಡಿದೆ. ವಾರದ ಮೊದಲ ವಹಿವಾಟಿನ ದಿನ ಸೋಮವಾರವೇ ಷೇರುಗಳ ಬೆಲೆಯಲ್ಲಿ ಉತ್ತಮ ಬೆಳವಣಿಗೆ ಕಂಡು ಬಂದಿದೆ.

ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್‌ನಿಂದ 700 ಕೋಟಿ ರೂಪಾಯಿ LoA ಪಡೆದುಕೊಂಡಿರುವ ಕಂಪನಿ ಷೇರು ಮಾರುಕಟ್ಟೆಗೆ ಮಾಹಿತಿಯನ್ನು ನೀಡಿದೆ. ಸೋಮವಾರ ಆಫ್ಕಾನ್ಸ್ ಇನ್ಫ್ರಾಸ್ಟ್ರಕ್ಚರ್ ಷೇರು ಶೇ. 6 ರಷ್ಟು ಜಿಗಿದು ಬೆಲೆ ರೂ. 460.7 ಕ್ಕೆ ತಲುಪಿದೆ

ಜೂನ್ 7ರಂದು ಆಫ್ಕಾನ್ಸ್ ಇನ್ಫ್ರಾಸ್ಟ್ರಕ್ಚರ್ (Afcons Infrastructure) ತಾನು ಪಡೆದುಕೊಂಡಿರುವ ಆರ್ಡರ್ ಬಗ್ಗೆ ಸ್ಟಾಕ್ ಎಕ್ಸ್‌ಚೇಂಜ್‌ಗೆ ಮಾಹಿತಿ ನೀಡಿತು. ಗುಜರಾತ್‌ನ ದಹೇಜ್ ವಿನೈಲ್ ಯೋಜನೆಗೆ ಸಂಬಂಧಿಸಿದ ನಿರ್ಮಾಣ ಕಾರ್ಯಗಳಿಗಾಗಿ ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್‌ ಜೊತೆ 700 ಕೋಟಿ ಒಪ್ಪಂದವನ್ನು ಆಫ್ಕಾನ್ಸ್ ಇನ್ಫ್ರಾಸ್ಟ್ರಕ್ಚರ್ ಮಾಡಿಕೊಂಡಿದೆ. ಒಪ್ಪಂದದ ಮೌಲ್ಯವು 700 ಕೋಟಿ ರೂ.ಗಳಾಗಿದ್ದರೂ, ಒಟ್ಟು ಯೋಜನೆಯ ಒಟ್ಟು ವೆಚ್ಚದ ಆಧಾರದ ಮೇಲೆ ಅಂತಿಮ ಪಾವತಿಯನ್ನು ಮಾಡಲಾಗುತ್ತದೆ. ಯೋಜನೆಯು ಜೂನ್ 2026 ರೊಳಗೆ ಪೂರ್ಣಗೊಳ್ಳುವ ನಿರೀಕ್ಷೆಯಿದೆ.

ವಿನೈಲ್ ಯೋಜನೆಗೆ ಸಿವಿಲ್, ಮೆಕ್ಯಾನಿಕಲ್, ಇನ್‌ಸ್ಟಾಲೇಶನ್, ಟೆಸ್ಟಿಂಗ್ ಮತ್ತು ಕಮಿಷನಿಂಗ್ ಕೆಲಸಗಳನ್ನು ಆಫ್ಕಾನ್ಸ್ ಇನ್ಫ್ರಾಸ್ಟ್ರಕ್ಚರ್ ನಿರ್ವಹಿಸಬೇಕಾಗುತ್ತದೆ. ಮೇ ತಿಂಗಳಲ್ಲಿ, ಡುಂಗರಪುರ ಜಿಲ್ಲೆಯ 353 ಹಳ್ಳಿಗಳಿಗೆ ಕಡನ ಹಿನ್ನೀರಿನಿಂದ (ಮಹಿ ಅಣೆಕಟ್ಟು) ನೀರು ಸರಬರಾಜು ಮಾಡಲು ಕಂಪನಿಯು 463.50 ಕೋಟಿ ರೂ.ಗಳ ಯೋಜನೆಯನ್ನು ಪಡೆದುಕೊಂಡಿತು. ಹಾಗಾಗಿ ಮೇನಿಂದಲೇ ಷೇರುಗಳ ಬೆಲೆ ಏರಿಕೆಯತ್ತ ಸಾಗುತ್ತಿದೆ.

ಮಾರ್ಚ್ 2025 ಕ್ಕೆ ಕೊನೆಗೊಂಡ ತ್ರೈಮಾಸಿಕದಲ್ಲಿ, ಆಫ್ಕಾನ್ಸ್ ಇನ್ಫ್ರಾಸ್ಟ್ರಕ್ಚರ್‌ನ ಲಾಭವು ಕಳೆದ ವರ್ಷದ ಇದೇ ತ್ರೈಮಾಸಿಕಕ್ಕೆ ಹೋಲಿಸಿದರೆ ಶೇ. 23.44 ರಷ್ಟು ಕುಸಿದು 110.93 ಕೋಟಿ ರೂ.ಗಳಿಗೆ ತಲುಪಿದೆ, ಆದರೆ ಕಳೆದ ವರ್ಷದ ಇದೇ ತ್ರೈಮಾಸಿಕದಲ್ಲಿ ಇದು 144.89 ಕೋಟಿ ರೂ.ಗಳಷ್ಟಿತ್ತು.

ಟ್ರೆಂಡ್‌ಲೈನ್ ವರದಿ ಪ್ರಕಾರ, ಆಫ್ಕಾನ್ಸ್ ಇನ್ಫ್ರಾಗೆ ಸರಾಸರಿ ಗುರಿ ಬೆಲೆ ರೂ 543 ಆಗಿದ್ದು, ಇದು ಶೇಕಡಾ 21 ರಷ್ಟು ಸಂಭಾವ್ಯ ಏರಿಕೆಯನ್ನು ಸೂಚಿಸುತ್ತದೆ. ಬೆಳಗ್ಗೆ 10:16 ರ ಹೊತ್ತಿಗೆ, ಷೇರುಗಳು ಬಿಎಸ್‌ಇಯಲ್ಲಿ ಶೇ 3.1 ರಷ್ಟು ಹೆಚ್ಚಾಗಿ ರೂ 448.6 ಕ್ಕೆ ವಹಿವಾಟು ನಡೆಸುತ್ತಿದ್ದವು. ಕಳೆದ ಆರು ತಿಂಗಳಲ್ಲಿ ಶೇ 14 ರಷ್ಟು ಮತ್ತು ಈ ವರ್ಷ ಇಲ್ಲಿಯವರೆಗೆ ಶೇ 16 ರಷ್ಟು ಕುಸಿದಿದೆ. ಇದರ ಪ್ರಸ್ತುತ ಮಾರುಕಟ್ಟೆ ಬಂಡವಾಳೀಕರಣ ರೂ 16,498 ಕೋಟಿ ಆಗಿದೆ.