'ದೊಡ್ಮನೆ ಹುಡುಗ'ನಿಗೆ ಯು/ಎ ಸರ್ಟಿಫಿಕೇಟ್

ಬೆಂಗಳೂರು(ಸೆ. 15): ಪವರ್ ಸ್ಟಾರ್ ಪುನೀತ್ ಮತ್ತು ರಾಧಿಕಾ ಪಂಡಿತ್ ಅಭಿನಯದ "ದೊಡ್ಮನೆ ಹುಡ್ಗ" ಚಿತ್ರಕ್ಕೆ ಇಂದು ಸೆನ್ಸಾರ್ ಆಗಿದ್ದು, ಯು/ಎ ಪ್ರಮಾಣ ಪತ್ರ ಸಿಕ್ಕಿದೆ. ಆದರೆ, ಚಿತ್ರದ ಬಿಡುಗಡೆ ದಿನ ಒಂದು ವಾರ ಮುಂದಕ್ಕೆ ಹೋಗಿದೆ. ಸೂರಿ ನಿರ್ದೇಶನದ ಈ ಚಿತ್ರ ಸೆ. 23ಕ್ಕೆ ಬಿಡುಗಡೆಯಾಗಬೇಕಿತ್ತು. ಆದರೆ, ಸೆ.30ಕ್ಕೆ ರಿಲೀಸ್ ಆಗುತ್ತದೆ ಎಂದು ನಿರ್ದೇಶಕ ಸೂರಿ ಸ್ವತಃ ಸ್ಪಷ್ಟಪಡಿಸಿದ್ದಾರೆ.

ಪುನೀತ್, ರಾಧಿಕಾ ಪಂಡಿತ್ ಅಲ್ಲದೇ ರೆಬಲ್ ಸ್ಟಾರ್ ಅಂಬರೀಶ್ ಕೂಡ ಅಭಿನಯಿಸಿರುವ "ದೊಡ್ಮನೆ ಹುಡ್ಗ" ಈ ವರ್ಷದ ಮೋಸ್ಟ್ ಎಕ್ಸ್'ಪೆಕ್ಟೆಡ್ ಸಿನಿಮಾಗಳಲ್ಲೊಂದೆನಿಸಿದೆ. 'ಜಾಕಿ' ನಂತರ ಪುನೀತ್ ಮತ್ತು ಸೂರಿ ಕಾಂಬಿನೇಷನ್ ಈ ಸಿನಿಮಾ ಮೂಲಕ ಮತ್ತೆ ಒಂದಾಗುತ್ತಿದೆ. ಇತ್ತೀಚೆಗೆ ಯಾವುದೇ ದೊಡ್ಡ ಹಿಟ್ ಚಿತ್ರವಿಲ್ಲದೇ ನಿರಾಶೆಗೊಂಡಿರುವ ಪುನೀತ್ ರಾಜಕುಮಾರ್ ದೊಡ್ಮನೆ ಹುಡುಗನಾಗಿ ಯಶಸ್ಸು ಕಾಣುತ್ತಾರಾ ಎಂಬುದು ಕುತೂಹಲ ಮೂಡಿಸಿದೆ.

ಮುಂದೂಡಿದ್ದು ಯಾಕೆ?
ಕಾವೇರಿ ಗಲಭೆ ಹಿನ್ನೆಲೆಯಲ್ಲಿ ಕೆಲ ದಿನಗಳ ಕಾಲ ಸಿನಿಮಾ ಪ್ರದರ್ಶನಕ್ಕೆ ಅಡಚಣೆಯಾಗಿದೆ. ಈ ಸಂದರ್ಭದಲ್ಲಿ ಬಿಡುಗಡೆಯಾದ ಚಿತ್ರಗಳ ಗಳಿಕೆ ತೀರಾ ಕಡಿಮೆ ಇದೆ. ಇಂಥ ವೇಳೆಯಲ್ಲಿ ಬಿಗ್ ಬಜೆಟ್ ದೊಡ್ಮನೆ ಹುಡುಗನ ಬಿಡುಗಡೆಯಾದರೆ ಇನ್ನಷ್ಟು ಕ್ಲಿಷ್ಟ ಸ್ಥಿತಿ ಏರ್ಪಡುತ್ತದೆ. ಈ ಸಿನಿಮಾಗಳು ಇನ್ನೊಂದು ವಾರವಾದರೂ ಓಡಲಿ ಎಂಬ ಉದ್ದೇಶದಿಂದ ಹೊಸ ಸಿನಿಮಾಗಳ ಬಿಡುಗಡೆಯನ್ನು ಮುಂದೂಡಲಾಗಿದೆ ಎಂಬ ಮಾತು ಗಾಂಧಿನಗರದಲ್ಲಿದೆ.