ಗಂಡು ಮಗು ಬೇಕೆಂದು ಪತ್ನಿಗೆ 8 ಸಾರಿ ಅಬಾರ್ಶನ್ ಮಾಡಿಸಿದ ವಕೀಲ!

* ಗಂಡು ಮಗು ಬೇಕೆಂದು ಪತ್ನಿಗೆ ಚಿತ್ರಹಿಂಸೆ * ಎಂಟು ಸಾರಿ ಅಬಾರ್ಶನ್ ಮಾಡಿಸಿದ ಕ್ರೂರಿ * ವಿದೇಶಕ್ಕೆ ಕರೆದುಕೊಂಡು ಹೋಗಿ ಚಿಕಿತ್ಸೆ

ಮುಂಬೈ(ಆ. 17)  ಗಂಡು ಸಂತಾನವೇ  ಬೇಕೆಂದು ಪಟ್ಟು ಹಿಡಿದ ಪತಿರಾಯ ಹೀನ ಕೆಲಸ ಮಾಡಿದ್ದಾನೆ.   ಗಂಡು ಸಂತಾನದ ಹಪಹಪಿಯಿಂದ ಪತ್ನಿಗೆ ಎಂಟು ಸಾರಿ ಅಬಾರ್ಶನ್ ಮಾಡಿಸಿದ್ದಾನೆ.

ಮುಂಬೈನ ದಾದರ್ ದಿಂದ ಘಟನೆ ವರದಿಯಾಗಿದೆ. 40 ವರ್ಷದ ಮಹಿಳೆ  ಗಂಡನಿಂದ ಪಡಬಾರದ ಸಂಕಷ್ಟ ಅನುಭವಿಸಿದ್ದಾಳೆ.  ಗಂಡು ಮಗು  ಬೇಕೆಂಬ ಕಾರಣಕ್ಕೆ ಪತ್ನಿಗೆ  1500 ಸ್ಟೀರಾಯ್ಡ್ ಮತ್ತು ಹಾರ್ಮೋನುಗಳ ಚುಚ್ಚುಮದ್ದು ನೀಡಿಸಿದ್ದಾನೆ ಎಂಬ ಆರೋಪವೂ ಇದೆ.

ನೊಂದ ಮಹಿಳೆ ಕೊನೆಗೆ ಪೊಲೀಸರ ಮೊರೆ ಹೋಗಿದ್ದಾರೆ.  ಉನ್ನತ ಶಿಕ್ಷಣ ಪಡೆದ ಕುಟುಂಬಕ್ಕೆ ಸೇರಿದ ವ್ಯಕ್ತಿಯನ್ನು ಮಹಿಳೆ  2007 ರಲ್ಲಿ ಮದುವೆಯಾಗಿದ್ದಳು. ಮಹಿಳೆಯ ಪತಿ ಮತ್ತು ಅತ್ತೆ ವಕೀಲರಾಗಿದ್ದು, ಆಕೆಯ ಅತ್ತಿಗೆ ವೈದ್ಯೆ.  ಮದುವೆಯಾದ ಕೆಲವು ವರ್ಷಗಳ ನಂತರ, ಆರೋಪಿ ಮಹಿಳೆಯ ಮೇಲೆ ಹಲ್ಲೆ ಮಾಡಲು ಪ್ರಾರಂಭಿಸಿ ಗಂಡು ಮಗು ಬೇಕೆಂಬ ಪಟ್ಟು ಹಿಡಿದಿದ್ದ.

ತನ್ನ ಕುಟುಂಬ ಮತ್ತು ಪ್ರತಿಷ್ಠೆ ಕಾಪಾಡಲು ಗಂಡು ಮಗು ಬೇಕು ಎನ್ನುವುದು ಆರೋಪಿಯ ವಾದವಾಗಿತ್ತು. 2009  ರಲ್ಲಿ ಮಹಿಳೆ ಹೆಣ್ಣು ಮಗುವೊಂದಕ್ಕೆ ಜನ್ಮ ನೀಡಿದಳು. ಇದಾಗಿ ಎರಡು ವರ್ಷದ ನಂತರ ಆಕೆ ಮತ್ತೆ ಗರ್ಭ ಧರಿಸಿದಳು.  ವೈದ್ಯರ  ಬಳಿಮ ಕರೆದುಕೊಂಡು ಹೋದ ಪಾಪಿ ಪತಿರಾಯ ಆಕೆಗೆ ಮಗು ಬೇಡ ಎಂದು  ಹೇಳಿಸಿ ಅಬಾರ್ಶನ್ ಮಾಡಿಸಿದ.

ಇದಾದ ಮೇಲೆ 2011  ರಲ್ಲಿ ಚಿಕಿತ್ಸೆಗೆಂದು ಆರೋಪಿ ಪತ್ನಿಯನ್ನು ಬ್ಯಾಂಕಾಕ್ ಗೆ ಕರೆದುಕೊಂಡು ಹೋದ.  ಅಲ್ಲಿ ಆಕೆಗೆ  ಹಾರ್ಮೋನ್ ಚಿಕಿತ್ಸೆ ಎಂದು ಚಿತ್ರಹಿಂಸೆ ನೀಡಿದ.  ಭಾರತದಲ್ಲಿ ನಿಷೇಧಕ್ಕೆ ಗುರಿಯಾಗಿರುವ ಚಿಕಿತ್ಸೆಯನ್ನು ನೀಡಿದ ಎಂದು ನೊಂದ ಮಹಿಳೆ ದೂರಿನಲ್ಲಿ ತಿಳಿಸಿದ್ದಾಳೆ.