ಡಾಕ್ಟರ್ ಗಂಡನ ಕೊಲೆ ಮಾಡಿ ಸಾವಿಗೆ ವೈಜ್ಞಾನಿಕ ವಿಶ್ಲೇಷಣೆ ನೀಡಿದ ಕೆಮಿಸ್ಟ್ರಿ ಪ್ರೊಫೆಸರ್‌ಗೆ ಜೀವಾವಧಿ ಶಿಕ್ಷೆ

ಮಧ್ಯಪ್ರದೇಶದ ನಿವೃತ್ತ ವೈದ್ಯರ ಕೊಲೆ ಪ್ರಕರಣದಲ್ಲಿ ಪತ್ನಿ, ರಸಾಯನಶಾಸ್ತ್ರದ ಪ್ರೊಫೆಸರ್ ಮಮತಾ ಪಾಠಕ್‌ಗೆ ಜೀವಾವಧಿ ಶಿಕ್ಷೆ ವಿಧಿಸಲಾಗಿದೆ. ಸ್ವತಃ ವಾದ ಮಂಡಿಸಿದ್ದರೂ, ನ್ಯಾಯಾಲಯವು ಅವರ ವಿರುದ್ಧದ ಸಾಕ್ಷ್ಯಗಳನ್ನು ಪರಿಗಣಿಸಿ ಶಿಕ್ಷೆ ಪ್ರಕಟಿಸಿದೆ.

ಛತರ್‌ಪುರ: ಮಧ್ಯಪ್ರದೇಶವನ್ನೇ ಬೆಚ್ಚಿ ಬೀಳಿಸಿದ 2021ರ ಸರ್ಕಾರಿ ನಿವೃತ್ತ ವೈದ್ಯನ ಕೊಲೆ ಪ್ರಕರಣದಲ್ಲಿ ಪತ್ನಿ ರಸಾಯನಶಾಸ್ತ್ರದ ಪ್ರೊಫೆಸರ್‌ ಮಮತಾ ಪಾಠಕ್ ಅವರಿಗೆ ಜೀವಾವಧಿ ಶಿಕ್ಷೆಯಾಗಿದೆ. ಛತರ್‌ಪುರದಲ್ಲಿ ಹಿಂದೆ ರಸಾಯನಶಾಸ್ತ್ರದ ಪ್ರೊಫೆಸರ್‌ ಆಗಿದ್ದ ಅವರು ತಮ್ಮ ಪತಿ ಸರ್ಕಾರಿ ಆಸ್ಪತ್ರೆಯ ನಿವೃತ್ತ ವೈದ್ಯ ನೀರಜ್ ಪಾಠಕ್ ಅವರನ್ನು ಹತ್ಯೆ ಮಾಡಿದ್ದ ಪ್ರಕರಣದಲ್ಲಿ ಜೈಲು ಶಿಕ್ಷೆಗೊಳಗಾಗಿದ್ದರು. ತಮ್ಮ ವಿರುದ್ಧದ ಈ ಪ್ರಕರಣದಲ್ಲಿ ತಮ್ಮ ಪರ ತಾವೇ ಕೋರ್ಟ್‌ನಲ್ಲಿ ವಾದಿಸಿದ್ದರೂ ಮಮತಾ ಅವರಿಗೆ ಜೀವಾವಧಿ ಶಿಕ್ಷೆಯನ್ನು ನ್ಯಾಯಾಲಯ ಕಾಯಂಗೊಳಿಸಿದೆ.

ಮಧ್ಯಪ್ರದೇಶ ಹೈಕೋರ್ಟ್ ನೀಡಿದ 97 ಪುಟಗಳ ವಿವರವಾದ ತೀರ್ಪಿನಲ್ಲಿ ಜಿಲ್ಲಾ ನ್ಯಾಯಾಲಯದ ಹಿಂದಿನ ತೀರ್ಪನ್ನು ಪುನರುಚ್ಚರಿಸಿದ್ದಲ್ಲದೆ, ಪ್ರಕರಣದ ಅಸಾಮಾನ್ಯ ಸ್ವರೂಪ ಹಾಗೂ ಅದರ ಕೇಂದ್ರಬಿಂದುವಾಗಿರುವ ಮಹಿಳೆಯಿಂದಾಗಿ ವ್ಯಾಪಕ ಸಾರ್ವಜನಿಕ ಹಿತಾಸಕ್ತಿಯನ್ನು ಹುಟ್ಟುಹಾಕಿದೆ ಎಂದು ಹೇಳಿದೆ.

ಛತ್ತರ್‌ಪುರದಲ್ಲಿ ಒಂದು ಕಾಲದಲ್ಲಿ ರಸಾಯನಶಾಸ್ತ್ರ ಪ್ರಾಧ್ಯಾಪಕಿಯಾಗಿದ್ದ ಮಮತಾ ಪಾಠಕ್ ಅವರ ಪತಿ ಸರ್ಕಾರಿ ವೈದ್ಯ ಡಾ. ನೀರಜ್ ಪಾಠಕ್ 2021 ರಲ್ಲಿ ತಮ್ಮ ಮನೆಯಲ್ಲಿ ನಿಗೂಢವಾಗಿ ಸಾವನ್ನಪ್ಪಿದ್ದರು. 2022 ರಲ್ಲಿ ಈ ಪ್ರಕರಣದಲ್ಲಿ ಮಮತಾ ಪಾಠಕ್ ಆರೋಪಿ ಎಂಬುದು ಸಾಬೀತಾಗಿತ್ತು. ಈ ದಂಪತಿಯ ಮಧ್ಯೆ ದೀರ್ಘಕಾಲದ ಕಿತ್ತಾಟಗಳಿದ್ದವು. ಪೊಲೀಸರು ಆರಂಭದಲ್ಲಿ ವಿದ್ಯುತ್ ಆಘಾತದಿಂದ ಸಾವು ಸಂಭವಿಸಿದೆ ಎಂದು ದಾಖಲಿಸಿದ್ದರು. ಆದರೆ, ವಿಧಿವಿಜ್ಞಾನ ಮತ್ತು ಮರಣೋತ್ತರ ಪರೀಕ್ಷೆಯ ಫಲಿತಾಂಶಗಳು ಅನುಮಾನಗಳನ್ನು ಹುಟ್ಟುಹಾಕಿದವು ಮತ್ತು ತನಿಖಾಧಿಕಾರಿಗಳು ನಂತರ ಮಮತಾ ವಿರುದ್ಧ ಕೊಲೆ ಆರೋಪಗಳನ್ನು ಹೊರಿಸಿದರು.

ವೈದ್ಯಕೀಯ ವರದಿಗಳು ಮತ್ತು ಇತರ ಸಾಕ್ಷ್ಯಗಳನ್ನು ಆಧರಿಸಿ ಜಿಲ್ಲಾ ನ್ಯಾಯಾಲಯವು ಆಕೆಗೆ ಜೀವಾವಧಿ ಶಿಕ್ಷೆ ವಿಧಿಸಿತು. ಶಿಕ್ಷೆಗೊಳಗಾದ ನಂತರ, ಮಮತಾಗೆ ತನ್ನ ಮಾನಸಿಕ ಅಸ್ವಸ್ಥ ಮಗುವನ್ನು ನೋಡಿಕೊಳ್ಳಲು ಮಧ್ಯಂತರ ಜಾಮೀನು ನೀಡಲಾಯಿತು. ಈ ಅವಧಿಯಲ್ಲಿ, ಅವರು ಜಿಲ್ಲಾ ನ್ಯಾಯಾಲಯದ ತೀರ್ಪಿನ ವಿರುದ್ಧ ಮಧ್ಯಪ್ರದೇಶ ಹೈಕೋರ್ಟ್‌ನ ಜಬಲ್‌ಪುರ ಪೀಠದಲ್ಲಿ ಮೇಲ್ಮನವಿ ಸಲ್ಲಿಸಿದರು. ಸೀಮಿತ ಕಾನೂನು ಬೆಂಬಲದೊಂದಿಗೆ, ಅವರು ನ್ಯಾಯಾಲಯದಲ್ಲಿ ತಮ್ಮನ್ನು ತಾವು ಪ್ರತಿನಿಧಿಸಲು ನಿರ್ಧರಿಸಿದರು.

ಹಾಗೆಯೇ ವಿಚಾರಣೆ ವೇಳೆ ಅವರು ತಮ್ಮ ಪತಿಯ ಸಾವಿಗೆ ವಿಜ್ಞಾನದ ವಿಶ್ಲೇಷಣೆಯನ್ನು ನೀಡಿದ್ದರು. ಅವರ ಈ ವಿವರಣೆ ನೋಡಿ ನ್ಯಾಯಾಧೀಶರು ಅಚ್ಚರಿಪಟ್ಟು ನೀವು ರಸಾಯನಶಾಸ್ತ್ರ ಪ್ರಾಧ್ಯಾಪಕರೇ ಎಂದು ಕೇಳಿದ್ದರು. ಅದಕ್ಕೆ ಮಮತಾ ಪಾಠಕ್ ಹೌದು ಎಂದು ಉತ್ತರಿಸಿದರು. ಉಷ್ಣ ಸುಟ್ಟಗಾಯಗಳು ಮತ್ತು ವಿದ್ಯುತ್ ಸುಟ್ಟಗಾಯಗಳು ಮೋಸಗೊಳಿಸುವಷ್ಟು ಹೋಲುತ್ತವೆ ಮತ್ತು ಸರಿಯಾದ ರಾಸಾಯನಿಕ ವಿಶ್ಲೇಷಣೆ ಮಾತ್ರ ವ್ಯತ್ಯಾಸವನ್ನು ಸ್ಥಾಪಿಸಬಹುದು ಎಂದು ಮಮತಾ ಪಾಠಕ್ ಶಾಂತವಾಗಿ ಮತ್ತು ವಿಶ್ವಾಸದಿಂದ ಕೋರ್ಟ್‌ನಲ್ಲಿ ಹೇಳಿದ್ದರು. ಅವರ ವಿಚಾರಣೆ ವೈರಲ್ ಆಗಿತ್ತು.

ಆಕೆಯ ವೈಜ್ಞಾನಿಕತೆ ಬದ್ಧ ವಾದ, ಒತ್ತಡದಲ್ಲಿಯೂ ಶಾಂತತೆ ಮತ್ತು ಕೊಲೆ ಪ್ರಕರಣದ ವಿಚಾರಣೆಯಲ್ಲಿಯೂ ಸಹ ಎದೆಗುಂದದಿರುವುದು ಆಕೆಯನ್ನು ಇಂಟರ್ನೆಟ್‌ನಲ್ಲಿ ವೈರಲ್ ಆಗುವಂತೆ ಮಾಡಿತು. ಆಕೆಯ ವಿಚಾರಣೆಯ ವೀಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಭಾರಿ ಸಂಚಲನ ಸೃಷ್ಟಿಸಿದ್ದವು. ಭಾರಿ ಆತ್ಮವಿಶ್ವಾಸದಿಂದ ಅವರು ವಾದಿಸಿದ್ದರೂ ಮಾಡಿರುವ ಕೃತ್ಯಕ್ಕೆ ಸಾಕ್ಷ್ಯವಿದ್ದಿದ್ದರಿಂದ ನ್ಯಾಯಾಲಯ ಅವರ ವಿರುದ್ಧದ ಜೀವಾವಧಿ ಶಿಕ್ಷೆಯನ್ನು ಎತ್ತಿ ಹಿಡಿದಿದೆ.

ಈ ಪ್ರಕರಣವನ್ನು ನ್ಯಾಯಾಲಯವು ಗಂಭೀರವಾಗಿ ಪರಿಗಣಿಸಿತ್ತು ಹಾಗೂ ಮಮತಾ ಪಾಠಕ್ ನ್ಯಾಯಯುತ ವಿಚಾರಣೆ ನಡೆಯುವುದನ್ನು ಖಚಿತಪಡಿಸಿಕೊಳ್ಳಲು ಹಿರಿಯ ವಕೀಲ ಸುರೇಂದ್ರ ಸಿಂಗ್ ಅವರನ್ನು ಅಮಿಕಸ್ ಕ್ಯೂರಿಯಾಗಿ ನೇಮಿಸಿತ್ತು ಎಂದು ಸರ್ಕಾರಿ ವಕೀಲ ಮಾನಸ್ ಮಣಿ ವರ್ಮಾ ಮಾಧ್ಯಮಗಳಿಗೆ ಹೇಳಿದ್ದಾರೆ.

ಮಮತಾ ಪಾಠಕ್ ಸುದೀರ್ಘ ಚರ್ಚೆಯ ನಂತರ, ಸಾಕ್ಷ್ಯಾಧಾರಗಳು ಮತ್ತು ಸನ್ನಿವೇಶಗಳು ಅಪರಾಧದ ಕಡೆಗೆ ಸ್ಪಷ್ಟವಾಗಿ ಬೆರಳು ತೋರಿಸಿವೆ ಎಂದು ನ್ಯಾಯಾಲಯ ಗಮನಿಸಿತು. ಹೀಗಾಗಿ ಸಂಬಂಧಿತ ಸುಪ್ರೀಂಕೋರ್ಟ್ ತೀರ್ಪುಗಳು ಮತ್ತು ನ್ಯಾಯಾಂಗ ಪೂರ್ವ ನಿದರ್ಶನಗಳನ್ನು ಉಲ್ಲೇಖಿಸಿ, ಅಪರಾಧವು ಗಂಭೀರ ಸ್ವರೂಪದ್ದಾಗಿದೆ ಎಂದು ತೀರ್ಪು ನೀಡಿದ ಪೀಠ, ಮಮತಾ ಪಾಠಕ್ ಅವರಿಗೆ ತಕ್ಷಣವೇ ಶರಣಾಗುವಂತೆ ನಿರ್ದೇಶಿಸಿದೆ.