1 ರನ್ ವಿರೋಚಿತ ಸೋಲು! ನಿನ್ನೆ ನಡೆದ ಡೆಲ್ಲಿ ಕ್ಯಾಪಿಟಲ್ಸ್ vs ಗುಜರಾತ್ ಟೈಟಾನ್ಸ್ ನಡುವಿನ ಮ್ಯಾಚ್ ಗೆದ್ದಿದ್ದು ಯಾರು?

ಕೆ.ಎಲ್. ರಾಹುಲ್ ಮತ್ತು ಡೇವಿಡ್ ಮಿಲ್ಲರ್ ಅವರ ಹೋರಾಟದ ಹೊರತಾಗಿಯೂ, ಡೆಲ್ಲಿ ಕ್ಯಾಪಿಟಲ್ಸ್ ತಂಡವು ಗುಜರಾತ್ ಟೈಟಾನ್ಸ್ ವಿರುದ್ಧದ ರೋಚಕ ಪಂದ್ಯದಲ್ಲಿ ಕೇವಲ 1 ರನ್‌ನಿಂದ ಸೋತಿದೆ. 211 ರನ್‌ಗಳ ಗುರಿ ಬೆನ್ನಟ್ಟಿದ ಡೆಲ್ಲಿ, ಕೊನೆಯ ಓವರ್‌ನಲ್ಲಿ ಎಡವಿ 209 ರನ್‌ ಗಳಿಸಲಷ್ಟೇ ಶಕ್ತವಾಯಿತು. ಈ ಸೋಲಿನೊಂದಿಗೆ ಡೆಲ್ಲಿ ಐಪಿಎಲ್‌ನಲ್ಲಿ ನಾಲ್ಕನೇ ಬಾರಿಗೆ 1 ರನ್ ಅಂತರದಲ್ಲಿ ಸೋತಂತಾಗಿದೆ.

ನವದೆಹಲಿ: ಕೆ.ಎಲ್‌.ರಾಹುಲ್‌, ಡೇವಿಡ್‌ ಮಿಲ್ಲರ್‌ ಹೋರಾಟದ ಹೊರತಾಗಿಯೂ ಕೊನೆ ಓವರ್‌ನಲ್ಲಿ ಎಡವಿದ ಡೆಲ್ಲಿ ಕ್ಯಾಪಿಟಲ್ಸ್‌ ತಂಡ ಬುಧವಾರ ಗುಜರಾತ್‌ ಟೈಟಾನ್ಸ್‌ ವಿರುದ್ಧ ಪಂದ್ಯದಲ್ಲಿ 1 ರನ್‌ ವೀರೋಚಿತ ಸೋಲನುಭವಿಸಿದೆ. ಸತತ 2ರಲ್ಲಿ ಗೆದ್ದಿದ್ದ ಡೆಲ್ಲಿಗಿದು ಮೊದಲ ಸೋಲು. ಗುಜರಾತ್‌ ಮೂರರಲ್ಲಿ ಮೊದಲ ಜಯ ದಾಖಲಿಸಿತು.

ಮೊದಲು ಬ್ಯಾಟ್‌ ಮಾಡಿದ ಗುಜರಾತ್‌ 4 ವಿಕೆಟ್‌ಗೆ 210 ರನ್‌ ಗಳಿಸಿತು. ನಾಯಕ ಶುಭ್‌ಮನ್‌ ಗಿಲ್‌ 45 ಎಸೆತಕ್ಕೆ 70, ಜೋಸ್ ಬಟ್ಲರ್‌ 27 ಎಸೆತಕ್ಕೆ 52, ವಾಷಿಂಗ್ಟನ್‌ ಸುಂದರ್‌ 32 ಎಸೆತಗಳಲ್ಲಿ 55 ರನ್‌ ಸಿಡಿಸಿದರು. ಮುಕೇಶ್‌ 2 ವಿಕೆಟ್‌ ಕಿತ್ತರು.

ದೊಡ್ಡ ಗುರಿ ಬೆನ್ನತ್ತಿದ ಡೆಲ್ಲಿ 8 ವಿಕೆಟ್‌ ನಷ್ಟದಲ್ಲಿ 209 ರನ್‌ ಗಳಿಸಿ ಸೋಲೊಪ್ಪಿಕೊಂಡಿತು. ಆರಂಭಿಕ 2 ಪಂದ್ಯದಲ್ಲಿ ವಿಫಲರಾಗಿದ್ದ ಕೆ.ಎಲ್‌.ರಾಹುಲ್‌ ಈ ಪಂದ್ಯದಲ್ಲಿ 52 ಎಸೆತಕ್ಕೆ 92 ರನ್‌ ಸಿಡಿಸಿದರು. ಇತರರು ಕೈಕೊಟ್ಟರೂ ಕೊನೆವರೆಗೂ ಕ್ರೀಸ್‌ನಲ್ಲಿದ್ದ ಡೇವಿಡ್‌ ಮಿಲ್ಲರ್‌ 20 ಎಸೆತಕ್ಕೆ 41 ರನ್‌ ಗಳಿಸಿದರೂ ತಂಡವನ್ನು ಗೆಲ್ಲಿಸಲು ಸಾಧ್ಯವಾಗಲಿಲ್ಲ. ರಶೀದ್‌ 3 ವಿಕೆಟ್‌ ಕಿತ್ತರು.

ಸ್ಕೋರ್: ಗುಜರಾತ್‌ 210/4 (ಗಿಲ್‌ 70, ಸುಂದರ್‌ 55, ಬಟ್ಲರ್‌ 52, ಮುಕೇಶ್‌ 2-55), ಡೆಲ್ಲಿ 209/8 (ರಾಹುಲ್‌ 92, ಮಿಲ್ಲರ್‌ ಔಟಾಗದೆ 41, ರಶೀದ್‌ 3-17)

ಪಂದ್ಯಶ್ರೇಷ್ಠ:

2 ಎಸೆತಕ್ಕೆ 2 ರನ್‌ಗಳಿಸದೆ ಸೋಲು!

ಡೆಲ್ಲಿಗೆ ಕೊನೆ 2 ಓವರ್‌ನಲ್ಲಿ 36 ರನ್‌ ಬೇಕಿತ್ತು. ಸಿರಾಜ್‌ ಎಸೆದ 19ನೇ ಓವರ್‌ನಲ್ಲಿ ತಂಡ 23 ರನ್‌ ಸಿಡಿಸಿತು. ಮಿಲ್ಲರ್‌ 2 ಸಿಕ್ಸರ್‌, 1 ಬೌಂಡರಿ, ವಿಪ್ರಾಜ್‌ 1 ಬೌಂಡರಿ ಬಾರಿಸಿದರು. ಕೊನೆ ಓವರ್‌ನಲ್ಲಿ 13 ರನ್‌ ಅಗತ್ಯವಿತ್ತು. ಪ್ರಸಿದ್ಧ್‌ ದಾಳಿಗಿಳಿದರು. ವಿಪ್ರಾಜ್‌ ಮೊದಲ ಎಸೆತಕ್ಕೆ ಬೌಂಡರಿ, 2ನೇ ಎಸೆತಕ್ಕೆ ಔಟ್‌. 3ನೇ ಎಸೆತದಲ್ಲಿ ಕುಲ್ದೀಪ್‌ 1 ರನ್. 4ನೇ ಎಸೆತದಲ್ಲಿ ಮಿಲ್ಲರ್‌ ಸಿಕ್ಸರ್‌. 5ನೇ ಎಸೆತದಲ್ಲಿ ಸಿಂಗಲ್‌ ಪಡೆಯುವ ಅವಕಾಶವಿದ್ದರೂ ಮಿಲ್ಲರ್‌ ಓಡಲಿಲ್ಲ. ಕೊನೆ ಎಸೆತಕ್ಕೆ 2 ರನ್‌ ಬೇಕಿದ್ದಾಗ ಬೌನ್ಸರ್ ಬಾಲ್‌ ಡಾಟ್‌ ಆಗಿ, ಮಿಲ್ಲರ್‌ ರನೌಟ್‌ ಆದರು.

ಡೆಲ್ಲಿಗೆ 4ನೇ ಬಾರಿ 1 ರನ್‌ ಸೋಲು!

ಡೆಲ್ಲಿ ಐಪಿಎಲ್‌ನಲ್ಲಿ 4 ಬಾರಿ 1 ರನ್‌ ಅಂತರದಲ್ಲಿ ಸೋತಿದೆ. 2015ರಲ್ಲಿ ಸಿಎಸ್‌ಕೆ, 2016ರಲ್ಲಿ ಗುಜರಾತ್‌ ಲಯನ್ಸ್‌, 2021ರಲ್ಲಿ ಆರ್‌ಸಿಬಿ, 2026ರಲ್ಲಿ ಗುಜರಾತ್‌ ವಿರುದ್ಧ ವೀರೋಚಿತ ಸೋಲು ಕಂಡಿದೆ. ಇಷ್ಟು ಬಾರಿ 1 ರನ್‌ ಅಂತರದಲ್ಲಿ ಬೇರೆ ಯಾವುದೇ ತಂಡ ಸೋತಿಲ್ಲ.