ವಾರ್ನರ್ ಗುಡುಗು: ಲಂಕಾ ಎದುರು ಆಸಿಸ್ T20 ಸರಣಿ ಕ್ಲೀನ್ ಸ್ವೀಪ್

ಶ್ರೀಲಂಕಾ ವಿರುದ್ಧದ 3 ಪಂದ್ಯಗಳ ಟಿ20 ಸರಣಿಯನ್ನು ಆಸ್ಟ್ರೇಲಿಯಾ ಕ್ಲೀನ್ ಸ್ವೀಪ್ ಮಾಡಿಕೊಂಡಿದೆ. ಕೊನೆಯ ಪಂದ್ಯದಲ್ಲೂ ಅಜೇಯರಾಗುಳಿದೆ ಡೇವಿಡ್ ವಾರ್ನರ್ 3 ಅಪರೂಪದ ದಾಖಲೆಗಳನ್ನು ಬರೆದರು. ಈ ಕುರಿತಾದ ವರದಿ ಇಲ್ಲಿದೆ ನೋಡಿ...

ಮೆಲ್ಬರ್ನ್[ನ.02]: ಶ್ರೀಲಂಕಾ ವಿರುದ್ಧದ 3 ಪಂದ್ಯಗಳ ಟಿ20 ಸರಣಿಯನ್ನು ಆಸ್ಟ್ರೇಲಿಯಾ ಕ್ಲೀನ್ ಸ್ವೀಪ್ ಮಾಡಿದೆ. ಶುಕ್ರವಾರ ಇಲ್ಲಿ ನಡೆದ 3ನೇ ಹಾಗೂ ಅಂತಿಮ ಪಂದ್ಯದಲ್ಲಿ ಆತಿಥೇಯ ಆಸ್ಟ್ರೇಲಿಯಾ 7 ವಿಕೆಟ್‌ಗಳಿಂದ ಜಯಿಸಿತು.

ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಶ್ರೀಲಂಕಾ ಕುಸಾಲ್ ಪೆರೇರಾ (57) ಅವರ ಆಕರ್ಷಕ ಅರ್ಧಶತಕದ ನೆರವಿನಿಂದ 20 ಓವರಲ್ಲಿ 6 ವಿಕೆಟ್ ನಷ್ಟಕ್ಕೆ 142 ರನ್ ಗಳಿಸಿತು. ಆಸೀಸ್ ಪರ ಸ್ಟಾರ್ಕ್, ರಿಚರ್ಡ್‌ಸನ್ ಹಾಗೂ ಕಮಿನ್ಸ್ ತಲಾ 2 ವಿಕೆಟ್ ಕಿತ್ತರು.

ಇನ್ನು ಸುಲಭ ಗುರಿ ಬೆನ್ನತ್ತಿದ ಆಸ್ಟ್ರೇಲಿಯಾಗೆ ವಾರ್ನರ್ ಆಸರೆಯಾದರು. ಅಜೇಯ 57 ರನ್ ಗಳಿಸಿದ ವಾರ್ನರ್, ಸರಣಿಯಲ್ಲಿ ಒಮ್ಮೆಯೂ ಔಟಾಗದೆ 217 ರನ್ ಕಲೆಹಾಕಿದರು. ಆಸ್ಟ್ರೇಲಿಯಾ 17.4 ಓವರಲ್ಲಿ 3 ವಿಕೆಟ್ ಕಳೆದುಕೊಂಡು ಗೆಲುವಿನ ದಡ ಮುಟ್ಟಿತು.

ಒಂದೇ ಪಂದ್ಯದಲ್ಲಿ ವಾರ್ನರ್ ಮೂರು ದಾಖಲೆ:

ಐಸಿಸಿ ಏಕದಿನ ವಿಶ್ವಕಪ್ ಟೂರ್ನಿಯಲ್ಲಿ ಅಬ್ಬರಿಸಿದ್ದ ಡೇವಿಡ್ ವಾರ್ನರ್ ಬ್ಯಾಟ್, ಇಂಗ್ಲೆಂಡ್ ವಿರುದ್ಧ ನಡೆದ ಆ್ಯಷಸ್ ಸರಣಿಯಲ್ಲಿ ಅಕ್ಷರಶಃ ಮಂಕಾಗಿತ್ತು. ಆದರೀಗ ಶ್ರೀಲಂಕಾ ವಿರುದ್ಧದ ಟಿ20 ಸರಣಿಯಲ್ಲಿ 3 ಪಂದ್ಯದಲ್ಲಿ ಆಕರ್ಷಕ ಬ್ಯಾಟಿಂಗ್ ನಡೆಸುವ ಮೂಲಕ ಸರಣಿ ಕ್ಲೀನ್ ಸ್ವೀಪ್ ಮಾಡುವಲ್ಲಿ ಪ್ರಮುಖ ಪಾತ್ರವಹಿಸಿದರು. ಅದರಲ್ಲೂ ಅಂತಿಮ ಪಂದ್ಯವೊಂದರಲ್ಲೇ ವಾರ್ನರ್ ಮೂರು ಅಪರೂಪದ ದಾಖಲೆಗಳನ್ನೂ ಬರೆದರು.

1. ಡೇವಿಡ್ ವಾರ್ನರ್ 37 ರನ್ ಬಾರಿಸುತ್ತಿದ್ದಂತೆ, ಟಿ20 ಕ್ರಿಕೆಟ್’ನಲ್ಲಿ 9 ಸಾವಿರ ರನ್ ಬಾರಿಸಿದ ಆಸ್ಟ್ರೇಲಿಯಾದ ಮೊದಲ ಕ್ರಿಕೆಟಿಗ ಎನಿಸಿದರು.

2. ಇನ್ನು ವಾರ್ನರ್ 49 ರನ್ ಬಾರಿಸಿದಾಗ, ಆಸ್ಟ್ರೇಲಿಯಾ ಪರ ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್’ನಲ್ಲಿ 2 ಸಾವಿರ ರನ್ ಪೂರೈಸಿದ ಮೊದಲ ಕ್ರಿಕೆಟಿಗ ಎನಿಸಿದರು.

3. ಲಂಕಾ ಬೌಲರ್ ಲಹಿರು ಕುಮಾರ ಎದುರು ಸಿಕ್ಸರ್ ಬಾರಿಸುತ್ತಿದ್ದಂತೆ, ಆಸ್ಟ್ರೇಲಿಯಾ ನೆಲದಲ್ಲಿ 100+ ಸಿಕ್ಸರ್ ಬಾರಿಸಿದ ಎರಡನೇ ಕ್ರಿಕೆಟಿಗ ಎನ್ನುವ ಗೌರವಕ್ಕೆ ವಾರ್ನರ್ ಭಾಜನರಾದರು. ಈ ಮೊದಲು ಆ್ಯಡಂ ಗಿಲ್ ಕ್ರಿಸ್ಟ್[105] ಈ ಸಾಧನೆ ಮಾಡಿದ್ದರು.  

ಸ್ಕೋರ್:

ಶ್ರೀಲಂಕಾ 142/6 (ಕುಸಾಲ್ 57, ಕಮಿನ್ಸ್ 2-23),

ಆಸ್ಟ್ರೇಲಿಯಾ 145/3(ವಾರ್ನರ್ 57, ಫಿಂಚ್ 37)