ಟೀಂ ಇಂಡಿ​ಯಾದ ಜೆರ್ಸಿಗೆ ಆ್ಯಡಿ​ಡಾ​ಸ್‌ ಪ್ರಾಯೋ​ಜ​ಕ​ತ್ವ..! ಪ್ರತಿ ಪಂದ್ಯಕ್ಕೆ 85 ಲಕ್ಷ ರುಪಾಯಿ?

ಭಾರತ ಕ್ರಿಕೆಟ್ ತಂಡದ ಜೆರ್ಸಿಗೆ ಆ್ಯಡಿ​ಡಾ​ಸ್‌ ಪ್ರಾಯೋ​ಜ​ಕ​ತ್ವ 4 ವರ್ಷಕ್ಕೆ 370 ಕೋಟಿ ರು.ಗೆ ಒಪ್ಪಂದ? ಆ್ಯಡಿ​ಡಾಸ್‌ ಸಂಸ್ಥೆ​ಯು ಪ್ರತಿ ಪಂದ್ಯಕ್ಕೆ 85 ಲಕ್ಷ ರುಪಾಯಿ ಬಿಸಿಸಿಐಗೆ

ನವ​ದೆ​ಹ​ಲಿ(ಮೇ.23): ಭಾರತ ತಂಡದ ನೂತನ ಜೆರ್ಸಿ ಪ್ರಾಯೋಜಕರಾಗಿ ಪ್ರತಿಷ್ಠಿತ ಆ್ಯಡಿಡಾಸ್‌ ಸಂಸ್ಥೆ ಬಿಸಿಸಿಐ ಜೊತೆ ಒಪ್ಪಂದಕ್ಕೆ ಸಹಿ ಹಾಕಿದೆ. ಇದನ್ನು ಸೋಮ​ವಾರ ಬಿಸಿ​ಸಿಐ ಕಾರ‍್ಯ​ದರ್ಶಿ ಜಯ್‌ ಶಾ ಖಚಿ​ತ​ಪ​ಡಿ​ಸಿ​ದ್ದಾರೆ. ಆದರೆ ಒಪ್ಪಂದದ ಅವಧಿ ಮತ್ತು ಮೌಲ್ಯವನ್ನು ಬಹಿ​ರಂಗ​ಪ​ಡಿ​ಸಿ​ಲ್ಲ. ವರ​ದಿ​ಗಳ ಪ್ರಕಾರ ಜರ್ಮನ್ ಕ್ರೀಡಾ ಉತ್ಪನ್ನವಾದ ಆ್ಯಡಿ​ಡಾಸ್‌ ಸಂಸ್ಥೆ​ಯು ಪ್ರತಿ ಪಂದ್ಯಕ್ಕೆ 85 ಲಕ್ಷ ರುಪಾಯಿ ಹಾಗೂ ರಾಯಲ್ಟಿ ರೂಪದಲ್ಲಿ ಬಿಸಿ​ಸಿ​ಐಗೆ ವಾರ್ಷಿಕ 15 ಕೋಟಿ ರುಪಾಯಿ ಪಾವತಿಸಲಿದೆ ಎಂದು ಹೇಳಲಾ​ಗು​ತ್ತಿದೆ. ಈ ಹಿಂದೆ ನೈಕಿ ಸಂಸ್ಥೆಯು 4 ವರ್ಷಕ್ಕೆ 370 ಕೋಟಿ ರು. ಪಾವತಿಸಿತ್ತು. ಆ್ಯಡಿಡಾಸ್‌ ಜೊತೆಗೂ ಅಷ್ಟೇ ಮೌಲ್ಯದ ಒಪ್ಪಂದಕ್ಕೆ ಬಿಸಿಸಿಐ ಸಹಿ ಹಾಕಿದೆ ಎನ್ನಲಾಗುತ್ತಿದೆ.

ಈ ಕುರಿತಂತೆ ಟ್ವೀಟ್ ಮಾಡಿರುವ ಬಿಸಿಸಿಐ ಕಾರ್ಯದರ್ಶಿ ಜಯ್ ಶಾ, " ಕ್ರಿಕೆಟ್ ಬೆಳವಣಿಗೆಗೆ ನಾವು ಎಂದಿನಂತೆ ಕಠಿಬದ್ದವಾಗಿದ್ದು, ಇದೀಗ ಜಗತ್ತಿನ ಅತಿದೊಡ್ಡ ಕ್ರೀಡಾ ಜೆರ್ಸಿ ಉತ್ಪನ್ನ ತಯಾರಿಕಾ ಬ್ರ್ಯಾಂಡ್ ಆಗಿರುವ ಆ್ಯಡಿಡಾಸ್‌ ನಮ್ಮ ಜತೆ ಕೈಜೋಡಿಸಿದಕ್ಕೆ ನಾವೆಲ್ಲರೂ ಉತ್ಸುಕರಾಗಿದ್ದೇವೆ" ಎಂದು ಟ್ವೀಟ್ ಮಾಡಿದ್ದಾರೆ. ಆ್ಯಡಿಡಾಸ್‌ ಸಂಸ್ಥೆಯು ಈಗಾಗಲೇ ವಿಶ್ವದಾದ್ಯಂತ ಹಲವು ಪ್ರಖ್ಯಾತ ಕ್ರೀಡಾ ತಂಡಗಳಾದ ಮ್ಯಾಂಚೆಸ್ಟರ್ ಯುನೈಟೆಡ್‌, ರಿಯಲ್ ಮ್ಯಾಡ್ರಿಡ್‌ನಂತಹ ತಂಡಗಳಿಗೆ ಜೆರ್ಸಿ ಸ್ಪಾನ್ಸರ್ ನೀಡಿದೆ. 

ಜೂನ್‌ 7ರಿಂದ ಆರಂಭ​ವಾ​ಗ​ಲಿ​ರುವ ವಿಶ್ವ ಟೆಸ್ಟ್‌ ಫೈನಲ್‌ನಲ್ಲಿ ಭಾರತ ಹೊಸ ಜೆರ್ಸಿಯೊಂದಿಗೆ ಕಣಕ್ಕಿಳಿ​ಯ​ಲಿದೆ. ಈ ಮೊದಲು 2016ರಿಂದ 2020ರ ವರೆಗೆ ನೈಕಿ ಸಂಸ್ಥೆಯು ಭಾರ​ತದ ಜೆರ್ಸಿ ಪ್ರಾಯೋ​ಜ​ಕತ್ವ ಹೊಂದಿತ್ತು. 2020ರಲ್ಲಿ ಎಂಪಿ​ಎ​ಲ್‌ ಸ್ಪೋರ್ಟ್ಸ್‌ ಸಂಸ್ಥೆಯು 3 ವರ್ಷ​ಗಳ ಅವ​ಧಿಗೆ ಪ್ರಾಯೋ​ಜ​ಕತ್ವ ಪಡೆ​ದಿತ್ತು. ಆದರೆ ಅವ​ಧಿಗೂ ಮುನ್ನ ಒಪ್ಪಂದ​ದಿಂದ ಹಿಂದೆ ಸರಿದ ಕಾರಣ 2023ರ ಜನ​ವ​ರಿ​ಯಲ್ಲಿ ಕಿಲ್ಲರ್‌ ಜೀನ್ಸ್‌ ಸಂಸ್ಥೆಯು ಭಾರ​ತದ ಜೆರ್ಸಿಗೆ ಹಂಗಾಮಿ ಪ್ರಾಯೋ​ಜ​ಕ​ರಾಗಿತ್ತು. ಕಿಲ್ಲರ್ ಜೀನ್ಸ್‌ ಸಂಸ್ಥೆ ಜತೆಗಿನ ಒಪ್ಪಂದವು ಇದೇ ಮೇ 31ಕ್ಕೆ ಕೊನೆಯಾಗಲಿದೆ.

ಇನ್ನು ತುಂಬಾ ಅಚ್ಚರಿಯ ಸಂಗತಿಯೆಂದರೆ 2006ಕ್ಕಿಂತ ಮೊದಲು ಭಾರತ ತಂಡಕ್ಕೆ ಯಾವುದೇ ಕಿಟ್ ಸ್ಪಾನ್ಸರ್‌ಗಳಿರಲಿಲ್ಲ. ಆದರೆ 2006ರಲ್ಲಿ ಮೊದಲ ಬಾರಿಗೆ ನೈಕಿ ಸಂಸ್ಥೆಯು ಕಿಟ್‌ ಸ್ಪಾನ್ಸರ್ ಆಗಿ 7 ವರ್ಷಗಳ ಅವಧಿಗೆ ಬಿಸಿಸಿಐ ಜತೆ ಒಪ್ಪಂದಕ್ಕೆ ಸಹಿ ಮಾಡಿತ್ತು. ಇದಾದ ಬಳಿಕ ಬಿಸಿಸಿಐ ಹಿಂತಿರುಗಿ ನೋಡುವ ಪ್ರಶ್ನೆಯೇ ಬರಲಿಲ್ಲ.