ತನಗಿಂತ 10 ವರ್ಷ ಕಿರಿಯ ನಿಕ್ ಜತೆ ಮದುವೆಯಾಗಿದ್ದಕ್ಕೆ 5 ಗುಟ್ಟು ಬಿಚ್ಚಿಟ್ಟ ಪ್ರಿಯಾಂಕಾ ಚೋಪ್ರಾ

ಪ್ರಿಯಾಂಕಾ ಚೋಪ್ರಾ ನಿಕ್ ಜೋನಸ್‌ರನ್ನು ಪ್ರಾಮಾಣಿಕತೆ, ಕುಟುಂಬದ ಮೌಲ್ಯ, ವೃತ್ತಿಪರತೆ, ಸೃಜನಶೀಲತೆ ಮತ್ತು ದೃಢವಾದ ಇಚ್ಛಾಶಕ್ತಿಯಂತಹ ಐದು ಪ್ರಮುಖ ಗುಣಗಳಿಂದಾಗಿ ಮದುವೆಯಾದರು. ಸಮಾನ ಮನಸ್ಕ ಸಂಗಾತಿಯ ಆಯ್ಕೆ ಪ್ರಮುಖವೆಂದು ಅವರು ಭಾವಿಸುತ್ತಾರೆ.

ಬಾಲಿವುಡ್‌-ಹಾಲಿವುಡ್‌ ನಲ್ಲಿ ಮಿಂಚುತ್ತಿರುವ ನಟಿ ಪ್ರಿಯಾಂಕಾ ಚೋಪ್ರಾ 10 ವರ್ಷ ಚಿಕ್ಕವರಾದ ನಿಕ್ ಜೋನಸ್‌ರನ್ನ ಯಾಕೆ ಮದುವೆಯಾದ್ರು ಗೊತ್ತಾ? ನಟಿ ಪ್ರಿಯಾಂಕಾ ಚೋಪ್ರಾ ಸಂದರ್ಶನವೊಂದರಲ್ಲಿ ಐದು ಪ್ರಮುಖ ಕಾರಣಗಳನ್ನು ಬಹಿರಂಗಪಡಿಸಿದ್ದಾರೆ.  

ಪ್ರಿಯಾಂಕಾ ಚೋಪ್ರಾ ಹಾರ್ಪರ್ ಬಜಾರ್ ಮ್ಯಾಗಜೀನ್‌ಗೆ ನೀಡಿದ ಸಂದರ್ಶನದಲ್ಲಿ ನಿಕ್ ಜೋನಸ್‌ರನ್ನು ತಮ್ಮ ಜೀವನ ಸಂಗಾತಿಯನ್ನಾಗಿ ಮಾಡಿಕೊಳ್ಳಲು ಕಾರಣಗಳನ್ನು ತಿಳಿಸಿದ್ದಾರೆ. ಕುಟುಂಬ ಬಯಸುವ ಸಂಗಾತಿಯನ್ನು ಅವರು ಬಯಸಿದ್ದರು. ಅಷ್ಟೇ ಅಲ್ಲ, ಮದುವೆಯ ನಂತರ ಅವರು ಬದುಕಲು ಬಯಸಿದ ಕೆಲವು ಷರತ್ತುಗಳೂ ಇದ್ದವು.

“ಮೊದಲನೆಯದಾಗಿ ಪ್ರಾಮಾಣಿಕತೆ. ಏಕೆಂದರೆ ನನ್ನ ಹಿಂದಿನ ಕೆಲವು ಸಂಬಂಧಗಳಲ್ಲಿ ನಾನು ಹಲವು ಬಾರಿ ಮೋಸ ಹೋಗಬೇಕಾಯ್ತು. ಇದರಿಂದ ನನಗೆ ತುಂಬಾ ನೋವಾಯಿತು” ಎಂದು ಪ್ರಿಯಾಂಕಾ ಹೇಳಿದ್ದಾರೆ. 

ಎರಡನೆಯದಾಗಿ, ಅವರಿಗೆ ಕುಟುಂಬದ ಮೌಲ್ಯದ ಅರಿವು ಇರಬೇಕಿತ್ತು ಎಂದು ಪ್ರಿಯಾಂಕಾ ಹೇಳಿದರು.

ಮೂರನೆಯದಾಗಿ, ಅವರು ತಮ್ಮ ವೃತ್ತಿಯನ್ನು ಗಂಭೀರವಾಗಿ ಪರಿಗಣಿಸಬೇಕಿತ್ತು. ಏಕೆಂದರೆ ನಾನು ನನ್ನ ವೃತ್ತಿಯನ್ನು ಗಂಭೀರವಾಗಿ ಪರಿಗಣಿಸುತ್ತೇನೆ ಎಂದು ಪ್ರಿಯಾಂಕಾ ಹೇಳಿದರು.

ನಾಲ್ಕನೆಯದಾಗಿ, ಸೃಜನಶೀಲರಾಗಿರುವ ಮತ್ತು ನನ್ನೊಂದಿಗೆ ದೊಡ್ಡ ಕನಸು ಕಾಣುವ ವ್ಯಕ್ತಿಯನ್ನು ನಾನು ಬಯಸಿದ್ದೆ ಎಂದು ಪ್ರಿಯಾಂಕಾ ಹೇಳಿದರು.

ಐದನೆಯದಾಗಿ, ನನ್ನಂತೆಯೇ ದೃಢವಾದ ಇಚ್ಛಾಶಕ್ತಿ ಮತ್ತು ಮಹತ್ವಾಕಾಂಕ್ಷೆಯನ್ನು ಹೊಂದಿರುವ ವ್ಯಕ್ತಿಯನ್ನು ನಾನು ಬಯಸಿದ್ದೆ ಎಂದು ಪ್ರಿಯಾಂಕಾ ಹೇಳಿದರು.

ನಿಕ್ ಜೋನಸ್‌ರಲ್ಲಿ ಈ ಗುಣಗಳು ಇಲ್ಲದಿದ್ದರೆ ನಾನು ಅವರನ್ನು ಎಂದಿಗೂ ಮದುವೆಯಾಗುತ್ತಿರಲಿಲ್ಲ ಎಂದು ಪ್ರಿಯಾಂಕಾ ಹೇಳಿದ್ದಾರೆ. “ನಿಮಗೆ ಸಮಾನವಾದ ವ್ಯಕ್ತಿಯನ್ನು ನೀವು ಹುಡುಕಬೇಕು. ಗೌರವವು ಪ್ರೀತಿ ಮತ್ತು ವ್ಯಾಮೋಹಕ್ಕಿಂತ ಭಿನ್ನವಾಗಿದೆ. ನಿಮ್ಮ ಕನಸಿನ ರಾಜಕುಮಾರ ಸಿಗುವವರೆಗೆ ನೀವು ಹಲವು ಆಯ್ಕೆಗಳನ್ನು ಪ್ರಯತ್ನಿಸಬೇಕಾಗುತ್ತದೆ” ಎಂದು ಅವರು ಹೇಳಿದರು.

ಪ್ರಿಯಾಂಕಾ ಚೋಪ್ರಾ ಮತ್ತು ನಿಕ್ ಜೋನಸ್ 2018ರ ಡಿಸೆಂಬರ್ 1 ಮತ್ತು 2 ರಂದು ಜೋಧ್‌ಪುರದ ಉಮೈದ್ ಭವನ ಅರಮನೆಯಲ್ಲಿ ಕ್ರಿಶ್ಚಿಯನ್ ಮತ್ತು ಹಿಂದೂ ಸಂಪ್ರದಾಯದಂತೆ ವಿವಾಹವಾದರು. 2022 ರಲ್ಲಿ ಸರೋಗಸಿ ಮೂಲಕ ಅವರ ಮಗಳು ಮಾಲ್ತಿ ಮೇರಿ ಚೋಪ್ರಾ ಜೋನಸ್ ಜನಿಸಿದರು.

ಪ್ರಿಯಾಂಕಾ ಚೋಪ್ರಾ ತಮ್ಮ ಸಹೋದರ ಸಿದ್ಧಾರ್ಥ್ ಅವರ ವಿವಾಹದಲ್ಲಿ ಭಾಗವಹಿಸಲು ಪ್ರಸ್ತುತ ಭಾರತಕ್ಕೆ ಬಂದಿದ್ದಾರೆ.   ಕಳೆದ ತಿಂಗಳು, ಅವರು ಇನ್ಸ್ಟಾಗ್ರಾಮ್ನಲ್ಲಿ ತೆಲಂಗಾಣದ ಚಿಲ್ಕೂರ್ ಬಾಲಾಜಿ ದೇವಸ್ಥಾನಕ್ಕೆ ಭೇಟಿ ನೀಡಿದ ಚಿತ್ರಗಳು ಮತ್ತು ವೀಡಿಯೊಗಳ ಸರಣಿಯನ್ನು ಹಂಚಿಕೊಂಡಿದ್ದಾರೆ. ಇದರ ಜೊತೆಗೆ ಸ್ಟಾರ್ ನಿರ್ಧೇಶಕ ಎಸ್ಎಸ್ ರಾಜಮೌಳಿ ಅವರ ಮುಂದಿನ ಚಿತ್ರದಲ್ಲಿ ಮಹೇಶ್ ಬಾಬು ಜೊತೆಗೆ ನಟಿಸಲಿದ್ದು, ಅದರ ಶೂಟಿಂಗ್ ಕೂಡ ನಡೆಯುತ್ತಿದೆ ಎಂದು ವರದಿಯಾಗಿದೆ.