1500 ಕೋಟಿ ಬಜೆಟ್, 8 ದಿನದಲ್ಲಿಯೇ 3000 ಕೋಟಿ ಕಲೆಕ್ಷನ್: ಭಾರತದಲ್ಲಿಯೂ 57 ಕೋಟಿ ಸಂಪಾದನೆ

ಸಿನಿಮಾ ಬಿಡುಗಡೆಯಾದ 8 ದಿನಗಳಲ್ಲಿ 2989 ಕೋಟಿ ರೂ. ಗಳಿಸಿದೆ. ನಟಿ ಸ್ಕಾರ್ಲೆಟ್ ಜೋಹಾನ್ಸನ್ ಅತಿ ಹೆಚ್ಚು ಸಂಭಾವನೆ ಪಡೆಯುವ ನಟಿ ಎನಿಸಿಕೊಂಡಿದ್ದಾರೆ. ಭಾರತದಲ್ಲಿಯೂ ಈ ಚಿತ್ರ ಉತ್ತಮ ಪ್ರದರ್ಶನ ಕಾಣುತ್ತಿದೆ.

ನವದೆಹಲಿ: ಜುರಾಸಿಕ್ ವರ್ಲ್ಡ್ ಫ್ರಾಂಚೈಸಿ ಮತ್ತು ಯುನಿವರ್ಸಲ್ ಪಿಕ್ಚರ್ಸ್ ಇಂಡಿಯಾದ ಲೇಟೆಸ್ಟ್ ಫಿಲಂ 'ಜುರಾಸಿಕ್ ವರ್ಲ್ಡ್: ರೀಬರ್ತ್' ವಿಶ್ವದಾದ್ಯಂತ ಧೂಳೆಬ್ಬಿಸುತ್ತಿದೆ. ಡೈನೋಸಾರ್ ಕಥೆಯುಳ್ಳ ಸಿನಿಮಾ ಮತ್ತೊಮ್ಮೆ ಜನರನ್ನು ಚಿತ್ರಮಂದಿರದತ್ತ ಕರೆದುಕೊಂಡು ಬರುತ್ತಿದೆ. ಜುರಾಸಿಕ್ ವರ್ಲ್ಡ್: ರೀಬರ್ತ್ ಸಿನಿಮಾ ಬಿಡುಗಡೆಯಾದ 8 ದಿನಗಳ ನಂತರ ಬಾಕ್ಸ್ ಆಫಿಸ್‌ನಲ್ಲಿ 349 ಮಿಲಿಯನ್ ಡಾಲರ್ (2989 ಕೋಟಿ ರೂ) ಕಲೆಕ್ಷನ್ ಮಾಡಿದೆ. ಈ ಚಿತ್ರದ ಲೀಡ್ ರೋಲ್‌ನಲ್ಲಿ ನಟಿಸಿರುವ ನಟಿ ಸ್ಕಾರ್ಲೆಟ್ ಜೋಹಾನ್ಸನ್ ಅತಿ ಹೆಚ್ಚು ಸಂಭಾವನೆ ಪಡೆಯುವ ಕಲಾವಿದೆ ಎಂಬ ಹಿರಿಮೆಗೆ ಪಾತ್ರರಾಗಿದ್ದಾರೆ.

ಇದುವರೆಗೂ ನಟಿ ಸ್ಕಾರ್ಲೆಟ್ ಜೋಹಾನ್ಸನ್ ಅಭಿನಯದ ಸಿನಿಮಾ ವಿಶ್ವದಾದ್ಯಂತ 14.8 ಬಿಲಿಯನ್ ಡಾಲರ್ ಕಲೆಕ್ಷನ್ ಮಾಡಿವೆ. ಈ ಮೂಲಕ ಜೊ ಸ್ಯಾಮುಯೆಲ್ ಎಲ್. ಜಾಕ್ಸನ್ ಮತ್ತು ರಾಬರ್ಟ್ ಡೌನಿ ಅಂತಹ ಸ್ಟಾರ್ ನಟರನ್ನು ಸ್ಕಾರ್ಲೆಟ್ ಜೋಹಾನ್ಸನ್ ಹಿಂದಿಕ್ಕಿದ್ದಾರೆ.

ಭಾರತದಲ್ಲಿಯೂ ಭರ್ಜರಿ ಗಳಿಕೆ

ಜುರಾಸಿಕ್ ವರ್ಲ್ಡ್: ರೀಬರ್ತ್ ಸಿನಿಮಾ ಭಾರತದ ಬಾಕ್ಸ್ ಆಫಿಸ್‌ನಲ್ಲಿ ಒಳ್ಳೆಯ ಗಳಿಕೆಯನ್ನು ಮಾಡಿದೆ. ಇದರ ಜೊತೆಯಲ್ಲಿಯೇ ಬಿಡಗಡೆಯಾದ ಬಾಲಿವುಡ್‌ನ ಮಲ್ಟಿ ಸ್ಟಾರ್ ಸಿನಿಮಾ 'ಮೆಟ್ರೋ ಇನ್ ದಿನೋ' ನೀರಸ ಪ್ರತಿಕ್ರಿಯೆಯನ್ನು ಪಡೆದುಕೊಂಡಿದೆ. ಜುರಾಸಿಕ್ ವರ್ಲ್ಡ್: ರೀಬರ್ತ್ ಬಿಡುಗಡೆಯಾದ ಕೇವಲ 6 ದಿನದಲ್ಲಿಯೇ ಅಂದಾಜು 57.25 ಕೋಟಿ ರೂ. ಕಲೆಕ್ಷನ್ ಮಾಡಿದೆ. ನಿಧಾನಗತಿಯಲ್ಲಿ ಕಲೆಕ್ಷನ್ ಮಾಡುತ್ತಿರುವ ಜುರಾಸಿಕ್ ವರ್ಲ್ಡ್: ರೀಬರ್ತ್ ಭಾರತದಲ್ಲಿಯೇ 100 ಕೋಟಿ ರೂ. ಜೇಬು ತುಂಬಿಸಿಕೊಳ್ಳಲಿದೆ ಎಂದು ಸಿನಿಮಾ ತಜ್ಞರು ವಿಶ್ಲೇಷಣೆ ಮಾಡುತ್ತಿದ್ದಾರೆ.

ವಿಶ್ವದಾದ್ಯಂತ ಎಷ್ಟು ಕಲೆಕ್ಷನ್?

ಜುರಾಸಿಕ್ ವರ್ಲ್ಡ್: ರೀಬರ್ತ್ ವಿಶ್ವದಾದ್ಯಂತ ಒಳ್ಳೆಯ ಮೆಚ್ಚುಗೆಯನ್ನು ಪಡೆದುಕೊಂಡಿದೆ. ದಿನದಿಂದ ದಿನಕ್ಕೆ ಸಿನಿಮಾದ ಕಲೆಕ್ಷನ್ ಏರಿಕೆಯಾಗುತ್ತಲೇ ಇದೆ. ಜುಲೈ 6ರವರೆಗೆ ವಿಶ್ವದಾದ್ಯಂತ ಜುರಾಸಿಕ್ ವರ್ಲ್ಡ್: ರೀಬರ್ತ್ ಸಿನಿಮಾ ಬರೋಬ್ಬರಿ 2,989 ಕೋಟಿ ರು. ಕಲೆಕ್ಷನ್ ಮಾಡಿಕೊಂಡು ಮುನ್ನುಗುತ್ತಿದೆ. ಜುಲೈ 2ರಂದು ಬಿಡುಗಡೆಯಾದ ಈ ಸಿನಿಮಾ ಎಲ್ಲಾ ವರ್ಗದ ಜನರನ್ನು ತನ್ನತ್ತ ಆಕರ್ಷಿಸಿಕೊಳ್ಳುತ್ತಿದೆ.

ಜುರಾಸಿಕ್ ವರ್ಲ್ಡ್: ರೀಬರ್ತ್ ಬಜೆಟ್ ಎಷ್ಟು?

ಈಗಾಗಲೇ ಚಿತ್ರದ ಲಾಭದಲ್ಲಿ ಗಳಿಕೆಯನ್ನು ಮಾಡುತ್ತಿದೆ. ಯುನಿವರ್ಸಲ್ ಪಿಕ್ಚರ್ಸ್ ಇಂಡಿಯಾದ ಈ ಸಿನಿಮಾ 1,541 ಕೋಟಿ ರೂ. ಬಜೆಟ್‌ನಲ್ಲಿ ನಿರ್ಮಾಣವಾಗಿದೆ. ಬಿಡುಗಡೆಯಾದ ಎರಡು ದಿನಗಳಲ್ಲಿ ಚಿತ್ರಕ್ಕೆ ಹಾಕಿದ ಬಂಡವಾಳ ಹಿಂದಿರುಗಿ ಬಂದಿತ್ತು. ಚಿತ್ರದ ಬಜೆಟ್‌ನ ಎರಡು ಪಟ್ಟು ಕಲೆಕ್ಷನ್ ಆಗಿದ್ದು, ಭವಿಷ್ಯದಲ್ಲಿ 6 ರಿಂದ 8 ಸಾವಿರ ಕೋಟಿ ರೂ. ವರೆಗೆ ಹಣ ಸಂಗ್ರಹ ಮಾಡಲಿದೆ ಎಂದು ಚಿತ್ರದ ಅಭಿಮಾನಿಗಳು ಭವಿಷ್ಯ ನುಡಿದಿದ್ದಾರೆ.

ಗ್ಯಾರೆತ್ ಎಡ್ವರ್ಡ್ಸ್ ನಿರ್ದೇಶನದ ವೈಜ್ಞಾನಿಕ ಕಾದಂಬರಿ ಥ್ರಿಲ್ಲರ್ ಚಿತ್ರವೇ ಜುರಾಸಿಕ್ ವರ್ಲ್ಡ್: ರೀಬರ್ತ್ . ಈ ಚಿತ್ರದಲ್ಲಿ ಮೂರು ದೈತ್ಯ ಡೈನೋಸಾರ್‌ಗಳ ಜೆನಿಟಿಕ್ ಅಂಶವನ್ನು ಪಡೆದುಕೊಳ್ಳಲು ಸ್ಕಾರ್ಲೆಟ್ ಜೋಹಾನ್ಸನ್ ಹೋಗುತ್ತಾಳೆ. ಬೋರಾ ಬೆನೆಟ್ ಪಾತ್ರದಲ್ಲಿ ಸ್ಕಾರ್ಲೆಟ್ ಜೋಹಾನ್ಸನ್ ನಟಿಸಿದ್ದಾರೆ. ಜುರಾಸಿಕ್ ಫ್ರಾಂಚೈಸಿಯಲ್ಲಿ ಈ ಸಿನಿಮಾ ಮೂಡಿಬಂದಿದ್ದು, ಎಲ್ಲಾ ಸಿನಿಮಾಗಳಂತೆ ಇದು ಸಹ ಪ್ರೇಕ್ಷಕರನ್ನು ರಂಜಿಸುವಲ್ಲಿ ಸಕ್ಸಸ್ ಆಗುತ್ತಿದೆ. ಮೊದಲಿಗೆ ಎಲ್ಲವೂ ಚೆನ್ನಾಗಿರುತ್ತದೆ. ನಂತರ ಚಿತ್ರದಲ್ಲಿ ಭಯ, ಕಿರುಚಾಟ ಪ್ರಾರಂಭವಾಗುತ್ತದೆ. ಈ ಬಾರಿಯೂ ಇದೇ ರೀತಿಯದ್ದನ್ನು ಕಾಣಬಹುದು ಎಂಬ ವಿಮರ್ಶೆ ಮಾತುಗಳು ಕೇಳಿ ಬಂದಿವೆ.

ಇದನ್ನೂ  ಓದಿ: ಭೂತ-ಪ್ರೇತ ಇಲ್ಲ ಅನ್ನೋ ಸುಂದರ ಹುಡುಗರೇ ಸಸ್ಪೆನ್ಸ್-ಥ್ರಿಲ್ಲರ್ ಕಿರುಚಿತ್ರವನ್ನ ಒಮ್ಮೆ ನೋಡಿ