ಶೂಟಿಂಗ್ ವೇಳೆ ಚಾವಣಿ ಕುಸಿದು ನಟ ಅರ್ಜುನ್ ಕಪೂರ್‌, ಜಾಕಿ ಭಗ್ನಾನಿಗೆ ಗಾಯ

ಸಿನಿಮಾವೊಂದರ ಹಾಡಿನ ದೃಶ್ಯದ ಶೂಟಿಂಗ್ ವೇಳೆ ಬಾಲಿವುಡ್ ನಟರಾದ ಅರ್ಜುನ್ ಕಪೂರ್ ಮತ್ತು ಜಾಕಿ ಭಗ್ನಾನಿ, ನಿರ್ದೇಶಕ ಮುದಾಸರ್ ಅಜೀಜ್ ಅವರ ಮೇಲೆ ಚಾವಣಿಯ ಒಳಮೈ ಕುಸಿದು ಗಾಯಗೊಂಡ ಘಟನೆ ನಡೆದಿದೆ. ಮುಂಬೈನ ರಾಯಲ್ ಪಾಮ್ಸ್‌ನಲ್ಲಿ ಶೂಟಿಂಗ್ ವೇಲೆ ಘಟನೆ ನಡೆದಿದ್ದು, ಇವರಲ್ಲದೇ ಅಲ್ಲಿದ್ದ ಹಲವು ಸಿಬ್ಬಂದಿಗೂ ಗಾಯಗಳಾಗಿವೆ ಎಂದು ವರದಿಯಾಗಿದೆ. 'ಮೇರೆ ಹಸ್ಬೆಂಡ್‌ ಕಿ ಬೀವಿ' ಚಿತ್ರದ ಚಿತ್ರದ ಹಾಡಿನ ಶೂಟಿಂಗ್ ವೇಳೆ ಈ ಘಟನೆ ನಡೆದಿದೆ.

ಫೆಡರೇಶನ್ ಆಫ್ ವೆಸ್ಟರ್ನ್ ಇಂಡಿಯಾ ಸಿನಿ ಎಂಪ್ಲಾಯೀಸ್‌ನ ಅಶೋಕ್ ದುಬೆ ಅವರು ನೀಡಿದ ಮಾಹಿತಿಯಂತೆ, ಈ ಘಟನೆಯು ಸೌಂಡ್‌ ಬಾಕ್ಸ್‌ನ ಕಂಪನಗಳಿಂದ ಸಂಭವಿಸಿದೆ ಎಂದು ವರದಿಯಾಗಿದೆ. ರಾಯಲ್ ಪಾಮ್ಸ್‌ನಲ್ಲಿರುವ ಇಂಪೀರಿಯಲ್ ಪ್ಯಾಲೇಸ್‌ನಲ್ಲಿ ಹಾಡಿನ ಚಿತ್ರೀಕರಣ ನಡೆಯುತ್ತಿದ್ದಾಗ, ಸ್ಥಳದ ಸೀಲಿಂಗ್ ಕುಸಿದು ಅರ್ಜುನ್ ಕಪೂರ್, ಜಾಕಿ ಭಗ್ನಾನಿ ಮತ್ತು ಮುದಾಸರ್ ಅಜೀಜ್ ಗಾಯಗೊಂಡರು. ಬಹಳ ಸಮಯದಿಂದ ಅಲ್ಲಿ ಇದೇ ರೀತಿಯ ಶೂಟ್ ನಡೆಯುತ್ತಿರುವುದರಿಂದ ಧ್ವನಿಯ ಕಂಪನಕ್ಕೆ ಒಳಗಾಗಿ  ಸೆಟ್ ನಡುಗಲು ಶುರುವಾಗಿ ಸೀಲಿಂಗ್‌ನ ಮೇಲ್ಮೈ ಕುಸಿಯಿತು ಎಂದು ಅಶೋಕ್ ದುಬೆ ಹೇಳಿದ್ದಾಗಿ ವರದಿಯಾಗಿದೆ. 

ಘಟನೆಗೆ ಸಂಬಂಧಿಸಿದಂತೆ ಸುರಕ್ಷತಾ ಕಾಳಜಿಗಳ ಬಗ್ಗೆ ಗಮನ ಹರಿಸಲು ಸಿನಿ ಉದ್ಯೋಗಿಗಳ ತಂಡವು ಮಹಾರಾಷ್ಟ್ರದ ಮುಖ್ಯಮಂತ್ರಿ, ಉಪಮುಖ್ಯಮಂತ್ರಿ ಮತ್ತು ಬಿಎಂಸಿಗೆ ಪತ್ರ ಬರೆದಿದೆ ಎಂದು ಅಶೋಕ್ ದುಬೆ ಹೇಳಿದರು. ಈ ಮಧ್ಯೆ, ನೃತ್ಯ ಸಂಯೋಜಕ ವಿಜಯ್ ಗಂಗೂಲಿ ಈ ಬಗ್ಗೆ ಮಾಹಿತಿ ನೀಡಿದ್ದು, 'ನಾವು ಒಂದು ಹಾಡಿನ ಚಿತ್ರೀಕರಣ ಮಾಡುತ್ತಿದ್ದೆವು, ಮತ್ತು ಮೊದಲ ದಿನ ಚೆನ್ನಾಗಿ ನಡೆಯಿತು. ಎರಡನೇ ದಿನ, ಸಂಜೆ 6 ಗಂಟೆಯ ಸುಮಾರಿಗೆ ನಾವು ಚಿತ್ರೀಕರಣ ಮಾಡುವವರೆಗೆ ಎಲ್ಲವೂ ಸರಿಯಾಗಿ ನಡೆಯುತ್ತಿತ್ತು. ನಾವು ಮಾನಿಟರ್‌ನಲ್ಲಿದ್ದಾಗ ಇದ್ದಕ್ಕಿದ್ದಂತೆ ಸೀಲಿಂಗ್ ಕುಸಿದುಬಿತ್ತು. ಅದೃಷ್ಟವಶಾತ್, ಅದು ಭಾಗಗಳಾಗಿ ಬಿದ್ದಿತು ಮತ್ತು ನಮ್ಮನ್ನು ರಕ್ಷಿಸಲು ನಮಗೆ ಒಂದು ತೊಟ್ಟಿ ಇತ್ತು. ಸಂಪೂರ್ಣ ಸೀಲಿಂಗ್ ನಮ್ಮ ಮೇಲೆ ಬಿದ್ದಿದ್ದರೆ, ದೊಡ್ಡ ಅನಾಹುತವಾಗುತ್ತಿತ್ತು, ಆದರೆ ಘಟನೆಯಿಂದ ಅನೇಕ ಜನರು ಇನ್ನೂ ಗಾಯಗೊಂಡಿದ್ದರು. ಈ ಹಳೆಯ ಸ್ಥಳಗಳನ್ನು ಹೆಚ್ಚಾಗಿ ಚಿತ್ರೀಕರಣಕ್ಕಾಗಿ ಬಳಸಲಾಗುತ್ತದೆ ಮತ್ತು ನಿರ್ಮಾಣ ಕಂಪನಿಗಳು ಈ ಸುರಕ್ಷತಾ ಕ್ರಮಗಳನ್ನು ಪರಿಶೀಲಿಸಲಾಗಿದೆ ಎಂದು ನಮಗೆ ಖಚಿತಪಡಿಸುತ್ತಾರೆ. ಆದಾಗ್ಯೂ, ಚಿತ್ರೀಕರಣಕ್ಕೆ ನೀಡುವ ಮೊದಲು ಸ್ಥಳದ ಸುರಕ್ಷತೆಯನ್ನು ಹಲವು ಬಾರಿ ಸರಿಯಾಗಿ ಪರಿಶೀಲಿಸಲಾಗಿರುವುದಿಲ್ಲ ಎಂದು ಅವರು ಮಾಹಿತಿ ನೀಡಿದ್ದರು. 

ಅರ್ಜುನ್ ಕಪೂರ್ ಹಾಗೂ ಭೂಮಿ ಫೆಡ್ನೆಕರ್‌ ಜೊತೆಗಿರುವಾಗ ಈ ಹಾಡಿನ ಶೂಟಿಂಗ್ ನಡೆಯುತ್ತಿತ್ತು. ಅರ್ಜುನ್ ಮತ್ತು ಭೂಮಿ ಫೆಡ್ನೆಕರ್‌ ಅವರು ಈ ಹಿಂದೆ ಬ್ಲರ್ ನಿರ್ದೇಶಕ ಅಜಯ್ ಬಹ್ಲ್ ಅವರ ರೊಮ್ಯಾಂಟಿಕ್ ಥ್ರಿಲ್ಲರ್ ಚಿತ್ರ ದಿ ಲೇಡಿ ಕಿಲ್ಲರ್ ನಲ್ಲಿ ಜೊತೆಯಾಗಿ ನಟಿಸಿದ್ದರು. ಆದರೆ ಟಿ-ಸೀರೀಸ್ ನಿರ್ಮಾಣ ಸಂಸ್ಥೆ ಎದುರಿಸಿದ ಸಮಸ್ಯೆಗಳಿಂದಾಗಿ, ಈ ಚಿತ್ರವು ಕೆಲವೇ ಥಿಯೇಟರ್‌ಗಳಲ್ಲಿ ಬಿಡುಗಡೆಯಾಯ್ತು. ಯಾವುದೇ ಪ್ರಚಾರಗಳಿಲ್ಲದೆ ಬಿಡುಗಡೆಯಾದ ಈ 'ದಿ ಲೇಡಿ ಕಿಲ್ಲರ್' ಮೊದಲ ದಿನದಂದು ಭಾರತದಾದ್ಯಂತ ಕೇವಲ 293 ಟಿಕೆಟ್‌ಗಳು ಮತ್ತು ಒಟ್ಟಾರೆಯಾಗಿ 500 ಟಿಕೆಟ್‌ಗಳನ್ನು ಮಾತ್ರ ಮಾರಾಟ ಮಾಡಲು ಸಾಧ್ಯವಾಯಿತು. ₹45 ಕೋಟಿ ಬಜೆಟ್‌ನಲ್ಲಿ ನಿರ್ಮಿಸಲಾದ ಈ ಸಿನಿಮಾ ಕೇವಲ ₹60,000 ಗಳಿಸಿತ್ತು. ನಂತರ, ಅದನ್ನು ಯೂಟ್ಯೂಬ್‌ನಲ್ಲಿ ಸದ್ದಿಲ್ಲದೆ ಬಿಡುಗಡೆ ಮಾಡಲಾಯ್ತು.