ಟಾಟಾ ಸನ್ಸ್, ಟಾಟಾ ಟ್ರಸ್ಟ್, ರತನ್ ಟಾಟಾ ಟ್ರಸ್ಟ್, ಸರ್ ದೊರಾಬ್ಜಿ ಟಾಟಾ ಟ್ರಸ್ಟ್..ಇಷ್ಟೊಂದು ಸಂಸ್ಥೆಗಳ ನಡುವೆ ಟಾಟಾ ಅಂತರಾಳವನ್ನು ಅರ್ಥ ಮಾಡಿಕೊಳ್ಳುವುದೇ ಕಷ್ಟವಾಗಿದೆ. ಅದು ಅಷ್ಟು ಸುಲಭವೂ ಅಲ್ಲ. ಇದರ ಕುರಿತಾದ ವಿವರವಾದ ಡಿಟೇಲ್ಸ್‌ ಇಲ್ಲಿದೆ.
ಮುಂಬೈ (ಅ.10): ಟಾಟಾ ಗ್ರೂಪ್‌ನ ಮಾಜಿ ಅಧ್ಯಕ್ಷ ಮತ್ತು ದೇಶದ ಐಕಾನ್‌ ರತನ್ ಟಾಟಾ ಬುಧವಾರ ನಿಧನರಾದರು. ಟಾಟಾ ಗ್ರೂಪ್‌ನ ಅಧ್ಯಕ್ಷರಾಗಿ ಅವರು ತೋರಿದ ಸಾಧನೆ, ಆ ಮೂಲಕ ದೇಶಕ್ಕೆ ನೀಡಿದ ಕೊಡುಗೆಗಳಿಗೆ ಅವರು ಹೆಸರುವಾಸಿಯಾಗಿದ್ದರು. ಟಾಟಾ ಟ್ರಸ್ಟ್‌ನ ಅಂತರಾಳವಾಗಿರುವ ಎರಡು ಪ್ರಮುಖ ಸಂಸ್ಥೆಗಳಿಗೆ ಅವರು ಚೇರ್ಮನ್‌ ಆಗಿ ಕೆಲಸ ಮಾಡಿದ್ದರು. ಮೇಲ್ನೋಟಕ್ಕೆ ನಿಮಗೆ ಟಾಟಾ ಸಮೂಹದ ಅಂತಾರಾಳ ಅರ್ಥವಾಗೋದೇ ಇಲ್ಲ. ಟಾಟಾ ಸನ್ಸ್ ಅಂದ್ರೆ ಯಾವ ಕಂಪನಿ, ಟಾಟಾ ಸನ್ಸ್‌ಗೂ ಟಾಟಾ ಟ್ರಸ್ಟ್‌ಗೂ, ಟಾಟಾ ಮೋಟಾರ್ಸ್‌ಗೂ ಏನು ಸಂಬಂಧ? ರತನ್ ಟಾಟಾ ಟ್ರಸ್ಟ್, ಸರ್ ದೊರಾಬ್ಜಿ ಟಾಟಾ ಟ್ರಸ್ಟ್‌ನ ಕೆಲಸವೇನು? ಅನ್ನೋದನ್ನ ಅರ್ಥ ಅರ್ಥಮಾಡಿಕೊಳ್ಳೋದು ಅಷ್ಟು ಸುಲಭವೂ ಇಲ್ಲ. ಈ ಬಗ್ಗೆ ಸಣ್ಣ ವಿವರವನ್ನು ಇಲ್ಲಿ ನೀಡಲಾಗಿದೆ.
ರತನ್ ಟಾಟಾ ನಿಧನವು ಈ ಟ್ರಸ್ಟ್‌ಗಳ ಭವಿಷ್ಯದ ಬಗ್ಗೆ ಮತ್ತು ವಿಶಾಲವಾದ ಟಾಟಾ ಲೋಕದಲ್ಲಿ ಆಗಲಿರುವ ಬದಲಾವಣೆಗಳ ಬಗ್ಗೆ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. ಪರಿಣಾಮ ಅರ್ಥ ಮಾಡಿಕೊಳ್ಳುವ ಮುನ್ನ ಟಾಟಾ ಟ್ರಸ್ಟ್‌ಗಳು ಮತ್ತು ಟಾಟಾ ಸನ್ಸ್ ಎಂದರೇನು ಮತ್ತು ಗುಂಪಿನೊಳಗೆ ಪಟ್ಟಿ ಮಾಡಲಾದ ಕಂಪನಿಗಳಿಗೆ ಅಧ್ಯಕ್ಷ ಸ್ಥಾನವು ಏಕೆ ಅಪಾರ ಪ್ರಾಮುಖ್ಯತೆಯನ್ನು ಹೊಂದಿದೆ ಎನ್ನುವುದನ್ನು ತಿಳಿದುಕೊಳ್ಳುವುದು ಅಗತ್ಯ.
ಟಾಟಾ ಸನ್ಸ್ ಕಂಪನಿ: ಟಾಟಾ ಗ್ರೂಪ್‌ನ ವಿಶಾಲ ಸಾಮ್ರಾಜ್ಯದ ಏಕೈಕ ಹೋಲ್ಡಿಂಗ್‌ ಹಾಗೂ ಪ್ರಮೋಟರ್‌ ಕಂಪನಿ ಟಾಟಾ ಸನ್ಸ್. ಉಪ್ಪಿನಿಂದ ಹಿಡಿದು ವಿಮಾನದವರೆಗೂ ಇದು ವ್ಯಾಪಿಸಿದೆ.ಟಾಟಾದ ಎಲ್ಲಾ ಕಂಪನಿಗಳ ನಿರ್ದೇಶನವನ್ನು ರೂಪಿಸುವಲ್ಲಿ ಇದು ನಿರ್ಣಾಯಕ ಪಾತ್ರವನ್ನು ವಹಿಸುತ್ತದೆ. ಸಾಮಾಜಿಕ ಕಾರ್ಯದಲ್ಲಿಯೇ ಗುರುತಿಸಿಕೊಳ್ಳುವ ಟಾಟಾ ಟ್ರಸ್ಟ್‌ಗಳು ಟಾಟಾ ಸನ್ಸ್‌ನಲ್ಲಿ 66% ಪಾಲನ್ನು ಹೊಂದಿದ್ದು, ಗುಂಪಿನ ಭವಿಷ್ಯವನ್ನು ಮುನ್ನಡೆಸುವಲ್ಲಿ ಟಾಟಾ ಟ್ರಸ್ಟ್‌ನ ಮಾತು ನಿರ್ಣಾಯಕವಾಗಿದೆ.
ಟಾಟಾ ಟ್ರಸ್ಟ್‌ಗಳ ಹೃದಯಭಾಗದಲ್ಲಿ ಎರಡು ಪ್ರಮುಖ ಘಟಕಗಳಿವೆ: ಸರ್ ರತನ್ ಟಾಟಾ ಟ್ರಸ್ಟ್ ಮತ್ತು ಸರ್ ದೊರಾಬ್ಜಿ ಟಾಟಾ ಟ್ರಸ್ಟ್. ಒಟ್ಟಾರೆಯಾಗಿ, ಈ ಟ್ರಸ್ಟ್‌ಗಳು ಟಾಟಾ ಸನ್ಸ್‌ನ 51.5% ಕ್ಕಿಂತ ಹೆಚ್ಚಿನ ಪಾಲನ್ನು ಹೊಂದಿದ್ದು, ಅವುಗಳನ್ನು ಸಂಘಟಿತ ನಿರ್ಧಾರಗಳಲ್ಲಿ ಅತ್ಯಂತ ಪ್ರಭಾವಿಗಳನ್ನಾಗಿ ಮಾಡಿದೆ.
ರತನ್ ಟಾಟಾ ಅವರ ನಿಧನದ ಬೆನ್ನಲ್ಲಿಯೇ ಎದುರಾಗಿರುವ ಮುಖ್ಯ ಪ್ರಶ್ನೆ ಏನೆಂದರೆ, ಮುಂದೆ ನಾಯಕ ಯಾರಾಗುತ್ತಾರೆ ಅನ್ನೋದು?
ಟಾಟಾ ಟ್ರಸ್ಟ್‌ಗಳ ಆಡಳಿತ ರಚನೆಯು ಎರಡು ಟ್ರಸ್ಟ್‌ಗಳಾದ್ಯಂತ 13 ಟ್ರಸ್ಟಿಗಳನ್ನು ಒಳಗೊಂಡಿದೆ, ಐದು ವ್ಯಕ್ತಿಗಳು ಸಾಮಾನ್ಯ ಟ್ರಸ್ಟಿಗಳಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಈ ಗುಂಪಿನ ಪ್ರಮುಖ ವ್ಯಕ್ತಿಗಳೆಂದರೆ ಮಾಜಿ ರಕ್ಷಣಾ ಕಾರ್ಯದರ್ಶಿ ವಿಜಯ್ ಸಿಂಗ್, ಆಟೋಮೊಬೈಲ್ ಉದ್ಯಮದ ಲೀಡರ್‌ ವೇಣು ಶ್ರೀನಿವಾಸನ್ ಮತ್ತು ರತನ್ ಟಾಟಾ ಅವರ ಮಲ ಸಹೋದರ ಮತ್ತು ಟ್ರೆಂಟ್ ಅಧ್ಯಕ್ಷ ನೋಯೆಲ್ ಟಾಟಾ. ಟಾಟಾ ಸಮೂಹದೊಂದಿಗೆ ಫೈಟ್‌ಗೆ ಇಳಿದಿದ್ದ ಮಿಸ್ತ್ರಿ ಕುಟುಂಬದೊಂದಿಗೆ ನಿಕಟ ಸಂಪರ್ಕ ಹೊಂದಿರುವ ಆಲೂ ಮಿಸ್ತ್ರಿ ಅವರನ್ನು ನೋಯೆಲ್ ಟಾಟಾ ವಿವಾಹವಾಗಿದ್ದಾರೆ.
ಈಗ ಟಾಟಾ ಟ್ರಸ್ಟ್‌ನ ಮುಂದಿನ ಅಧ್ಯಕ್ಷರ ಬಗ್ಗೆ ಸ್ಪಷ್ಟತೆಯನ್ನು ಸ್ಥಾಪಿಸುವುದು ಅತ್ಯಗತ್ಯ. ಈ ನಾಯಕತ್ವದ ಪಾತ್ರವನ್ನು ಸಾಮಾನ್ಯವಾಗಿ ಟ್ರಸ್ಟಿಗಳಲ್ಲಿ ಬಹುಮತದ ಒಮ್ಮತದ ಮೂಲಕ ತುಂಬಿಸಲಾಗುತ್ತದೆ, ಆಯ್ಕೆ ಪ್ರಕ್ರಿಯೆಯನ್ನು ಟ್ರಸ್ಟ್‌ಗಳ ಭವಿಷ್ಯದ ನಿರ್ದೇಶನಕ್ಕೆ ನಿರ್ಣಾಯಕವಾಗಿಸುತ್ತದೆ.
ಷೇರು ಮಾರುಕಟ್ಟೆಯಲ್ಲಿ ಟಾಟಾ ಸನ್ಸ್‌ನ ಮಹತ್ವ: ಟಾಟಾ ಟ್ರಸ್ಟ್‌ಗಳಲ್ಲಿ ಆಗಲಿರುವ ನಾಯಕತ್ವ ಬದಲಾವಣೆಯ ಪರಿಣಾಮಗಳು ಆಡಳಿತವನ್ನು ಮೀರಿ ವಿಸ್ತರಣೆ ಆಗುತ್ತದೆ. ಟಾಟಾ ಸನ್ಸ್ ಮಾತ್ರವಲ್ಲದೆ,ಷೇರು ಮಾರುಕಟ್ಟೆಯಲ್ಲಿ ಇರುವ ಅಗಾಧ ಟಾಟಾ ಕಂಪನಿಗಳ ಮೇಲೂ ಪರಿಣಾಮ ಬೀರುತ್ತದೆ. ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್ (ಟಿಸಿಎಸ್), ಟಾಟಾ ಮೋಟಾರ್ಸ್, ಟ್ರೆಂಟ್ ಮತ್ತು ಟೈಟಾನ್ ಸೇರಿದಂತೆ 14 ಪ್ರಮುಖ ಕಂಪನಿಗಳಲ್ಲಿ ಟಾಟಾ ಸನ್ಸ್ ಗಮನಾರ್ಹ ಪಾಲನ್ನು ಹೊಂದಿದೆ. ಈ ಹೋಲ್ಡಿಂಗ್‌ಗಳು ಭಾರತೀಯ ಷೇರು ಮಾರುಕಟ್ಟೆಯೊಳಗೆ ಮಾರುಕಟ್ಟೆ ಬಂಡವಾಳೀಕರಣದ ಗಣನೀಯ ಭಾಗವನ್ನು ಹೊಂದಿವೆ.
Ratan Tata Funeral ಪಾರ್ಸಿ ಸಂಪ್ರದಾಯದಲ್ಲಿ ಹೆಣ ಸುಡೋದು ಇಲ್ಲ,ಹೂಳೋದು ಇಲ್ಲ; ಏನಿದು ದಖ್ಮಾ?
ವಾಸ್ತವವಾಗಿ, ಟಾಟಾ ಸನ್ಸ್ ಸುಮಾರು ₹16 ಲಕ್ಷ ಕೋಟಿ ಮಾರುಕಟ್ಟೆ ಬಂಡವಾಳೀಕರಣದ ಮೇಲೆ ಮತದಾನದ ಹಕ್ಕುಗಳನ್ನು ನಿಯಂತ್ರಿಸುತ್ತದೆ. ಈ ಅಪಾರ ಪ್ರಭಾವವು ಟಾಟಾ ಟ್ರಸ್ಟ್‌ನಲ್ಲಿ ಸ್ಥಿರ ಮತ್ತು ದೂರದೃಷ್ಟಿಯ ನಾಯಕತ್ವದ ಪ್ರಾಮುಖ್ಯತೆಯನ್ನು ಒತ್ತಿಹೇಳುತ್ತದೆ, ಏಕೆಂದರೆ ಇದು ಟಾಟಾ ಗ್ರೂಪ್‌ನ ವಿವಿಧ ಉದ್ಯಮಗಳ ಕಾರ್ಯತಂತ್ರದ ದಿಕ್ಕು ಮತ್ತು ಕಾರ್ಯಾಚರಣೆಯ ಸ್ಥಿರತೆಯ ಮೇಲೆ ನೇರವಾಗಿ ಪರಿಣಾಮ ಬೀರುತ್ತದೆ.
ಬದುಕಿಗೊಂದು ಸ್ಪೂರ್ತಿ ಬೇಕಾ, ರತನ್ ಟಾಟಾ ಹೇಳಿರುವ ಟಾಪ್‌-10 ಮಾತುಗಳಿವು!
ಷೇರು ಮಾರುಕಟ್ಟೆಯಲ್ಲಿ ಲಿಸ್ಟ್‌ ಆಗಿರುವ ಟಾಟಾ ಗ್ರೂಪ್ ಕಂಪನಿಗಳಲ್ಲಿ ಟಾಟಾ ಸನ್ಸ್ ಪಾಲು
| ಕಂಪನಿ | ಷೇರು ಪಾಲಿನ ಪ್ರಮಾಣ (%) |
| ಟಿಸಿಎಸ್ | 71.70 |
| ಟಾಟಾ ಮೋಟಾರ್ಸ್ | 40.10 |
| ಟ್ರೆಂಟ್ | 32.40 |
| ಟಾಟಾ ಪವರ್‌ | 45.20 |
| ಟೈಟಾನ್ | 20.80 |
| ಟಾಟಾ ಸ್ಟೀಲ್‌ | 31.70 |
| ಇಂಡಿಯನ್ ಹೋಟೆಲ್ಸ್‌ | 35.60 |
| ಟಾಟಾ ಕನ್ಶುಮರ್‌ | 33.80 |
| ಟಾಟಾ ಇನ್ವೆಸ್ಟ್‌ಮೆಂಟ್‌ | 68.50 |
| ಟಾಟಾ ಎಲೆಕ್ಸಿ | 42.20 |
| ವೋಲ್ಟಾಸ್‌ | 26.60 |
| ಟಾಟಾ ಕೆಮಿಕಲ್ಸ್‌ | 31.90 |
| ಟಾಟಾ ಕಮ್ಯುನಿಕೇಷನ್‌ | 14 |
| ಟಾಟಾ ಟೆಲಿ ಸರ್ವೀಸ್‌ | 19.50 |
| ಹೆಮಿಸ್‌ಫೆರ್‌ ಪ್ರಾಪರ್ಟೀಸ್‌ | 8.30 |