1654 ಕೋಟಿ ವಿದೇಶಿ ನೇರ ಹೂಡಿಕೆ ಉಲ್ಲಂಘನೆ, ಬೆಂಗಳೂರಿನ Myntra ವಿರುದ್ಧ ED ದೂರು!

ED ಪ್ರಕಾರ, ಮಿಂತ್ರಾ ಮತ್ತು ಅದರ ಸಂಬಂಧಿತ ಘಟಕಗಳು 'ಸಗಟು ನಗದು ಮತ್ತು ಸಾಗಣೆ' ವ್ಯವಹಾರಗಳಾಗಿ ಕಾರ್ಯನಿರ್ವಹಿಸುವುದಾಗಿ ಸುಳ್ಳು ಹೇಳಿಕೊಂಡು ಮಲ್ಟಿ-ಬ್ರಾಂಡ್ ಚಿಲ್ಲರೆ ವ್ಯಾಪಾರ (MBRT) ಚಟುವಟಿಕೆಗಳನ್ನು ನಡೆಸಿವೆ. 

ಬೆಂಗಳೂರು (ಜು.23): ಭಾರತದ ವಿದೇಶಿ ನೇರ ಹೂಡಿಕೆ (FDI) ನಿಯಮಗಳನ್ನು ಉಲ್ಲಂಘಿಸಿದ್ದಕ್ಕಾಗಿ ಜಾರಿ ನಿರ್ದೇಶನಾಲಯ (ED) ಬೆಂಗಳೂರು ಮೂಲದ ಇ-ಕಾಮರ್ಸ್‌ ಕಂಪನಿ ಮಿಂತ್ರಾ (myntra) ವಿರುದ್ಧ ದೂರು ದಾಖಲಿಸಿದೆ. ಪ್ರಸ್ತುವ ವಾಲ್‌ಮಾರ್ಟ್‌ ಮಾಲೀಕತ್ವದಲ್ಲಿರುವ ಇ-ಕಾಮರ್ಸ್ ವೇದಿಕೆಯು ಸಗಟು ವ್ಯಾಪಾರದ ಸೋಗಿನಲ್ಲಿ ಬಹು-ಬ್ರಾಂಡ್ ಚಿಲ್ಲರೆ ಕಾರ್ಯಾಚರಣೆಗಳಲ್ಲಿ ತೊಡಗಿಸಿಕೊಂಡಿದೆ ಎಂದು ಆರೋಪಿಸಿದೆ.

ED ಪ್ರಕಾರ, Myntra ಮತ್ತು ಅದರ ಸಂಬಂಧಿತ ಘಟಕಗಳು 'ಸಗಟು ನಗದು ಮತ್ತು ಸಾಗಣೆ' ವ್ಯವಹಾರಗಳಾಗಿ ಕಾರ್ಯನಿರ್ವಹಿಸುವುದಾಗಿ ಸುಳ್ಳು ಹೇಳಿಕೊಂಡು ಮಲ್ಟಿ-ಬ್ರಾಂಡ್ ಚಿಲ್ಲರೆ ವ್ಯಾಪಾರ (MBRT) ಚಟುವಟಿಕೆಗಳನ್ನು ನಡೆಸಿವೆ. ಇಂತಹ ತಪ್ಪು ನಿರೂಪಣೆಯು, MBRT ಯಲ್ಲಿ ವಿದೇಶಿ ಹೂಡಿಕೆಯ ಮೇಲೆ ಕಠಿಣ ಷರತ್ತುಗಳನ್ನು ವಿಧಿಸುವ ಭಾರತದ FDI ನೀತಿಯನ್ನು ನೇರವಾಗಿ ಉಲ್ಲಂಘಿಸುತ್ತದೆ ಎಂದು ಸಂಸ್ಥೆ ಹೇಳುತ್ತದೆ. ಮಿಂತ್ರಾ ಕಂಪನಿಯು 1,654 ಕೋಟಿ ರೂಪಾಯಿಗಳ ವಿದೇಶಿ ವಿನಿಮಯ ನಿಯಮಗಳನ್ನು ಉಲ್ಲಂಘಿಸಿದೆ ಎಂದು ED ಆರೋಪಿಸಿದೆ.

ಕಂಪನಿಯು ತನ್ನ ಹೆಚ್ಚಿನ ಮಾರಾಟವನ್ನು ಅದೇ ಕಾರ್ಪೊರೇಟ್ ಗುಂಪಿನಲ್ಲಿರುವ ಮಿಸಸ್‌ ವೆಕ್ಟರ್ ಇ-ಕಾಮರ್ಸ್ ಪ್ರೈವೇಟ್ ಲಿಮಿಟೆಡ್ ಮೂಲಕ ನಡೆಸಿದೆ ಎಂದು ಏಜೆನ್ಸಿ ಹೇಳಿಕೊಂಡಿದೆ. ನಂತರ ವೆಕ್ಟರ್ ಸರಕುಗಳನ್ನು ನೇರವಾಗಿ ಅಂತಿಮ ಗ್ರಾಹಕರಿಗೆ ಮಾರಾಟ ಮಾಡಿತು, ಚಿಲ್ಲರೆ (B2C) ವಹಿವಾಟುಗಳನ್ನು ಕಾಗದದ ಮೇಲೆ ಸಗಟು (B2B) ವ್ಯವಹಾರಗಳಾಗಿ ಮರೆಮಾಡಿದೆ.

ತನಿಖಾಧಿಕಾರಿಗಳು, ಗ್ರಾಹಕ ಮಾರಾಟವನ್ನು ಸಗಟು ವ್ಯಾಪಾರ ಎಂದು ಬಿಂಬಿಸುವ ಮೂಲಕ, ಬಹು-ಬ್ರಾಂಡ್ ಚಿಲ್ಲರೆ ವ್ಯಾಪಾರದ ಮೇಲಿನ ಎಫ್‌ಡಿಐ ನಿರ್ಬಂಧಗಳನ್ನು ತಪ್ಪಿಸಲು ವೆಕ್ಟರ್ ಇ-ಕಾಮರ್ಸ್ ಅನ್ನು ಉದ್ದೇಶಪೂರ್ವಕವಾಗಿ ಸ್ಥಾಪಿಸಲಾಗಿದೆ ಎಂದು ಆರೋಪಿಸಿದ್ದಾರೆ.

ಬಹು-ಬ್ರಾಂಡ್ ಚಿಲ್ಲರೆ ವ್ಯಾಪಾರಕ್ಕಾಗಿ ಭಾರತದ ಎಫ್‌ಡಿಐ ಮಾನದಂಡಗಳ ಅಡಿಯಲ್ಲಿ ಕೆಲವನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದೆ. ದೊಡ್ಡ ಪ್ರಮಾಣದ ಚಿಲ್ಲರೆ ಕಾರ್ಯಾಚರಣೆಗಳನ್ನು ನಡೆಸಲು ಸಗಟು ವ್ಯಾಪಾರಕ್ಕಾಗಿ ಉದ್ದೇಶಿಸಲಾದ ಎಫ್‌ಡಿಐ ಅನುಮತಿಗಳನ್ನು ಮಿಂತ್ರಾ ದುರುಪಯೋಗಪಡಿಸಿಕೊಂಡಿದೆ ಎಂದು ಇಡಿ ದೂರು ಆರೋಪಿಸಿದೆ.