ಮೂಲ ಸೌಕರ್ಯ ಉತ್ಪಾದನೆ ಕ್ಷೇತ್ರದಲ್ಲಿ ಕುಸಿತ: ಅಂಕಿಅಂಶ!

ಒಂದಾದ ಮೇಲೊಂದರಂತೆ ನೆಗೆಟಿವ್ ಸುದ್ದಿಗಳು| ಮೋದಿ ಸರ್ಕಾರಕ್ಕೆ ಏಕಾಏಕಿ ಬಂದೆರಗಿದ ಆಘಾತಕಾರಿ ಸುದ್ದಿಗಳು| ಭಾರತದ ಮೂಲಭೂತ ಉತ್ಪಾದನೆಯಲ್ಲಿ ಕುಸಿತ| ಸತತ ನಾಲ್ಕನೇ ತ್ರೈಮಾಸಿಕದಲ್ಲಿ ಕುಸಿತ ಕಂಡ ಉತ್ಪಾದನೆ| ಉತ್ಪಾದನಾ ವಲಯಗಳ ಮಾರಾಟದಲ್ಲಿ ಇಳಿಕೆ ದಾಖಲು| ಪ್ರಸಕ್ತ ಖಾತೆ ಕೊರತೆ 36.3 ಬಿಲಿಯನ್ ಇದೆ ಎಂದ ಆರ್‌ಬಿಐ| 

ನವದೆಹಲಿ(ಜ.01): ಭಾರತದ ಮೂಲಭೂತ ಸೌಕರ್ಯ ಉತ್ಪಾದನಾ ಕ್ಷೇತ್ರ ಕಳೆದ ಹಣಕಾಸು ವರ್ಷದ ಸತತ ನಾಲ್ಕನೇ ತ್ರೈಮಾಸಿಕದಲ್ಲಿ ಕೂಡ ಕುಸಿದಿದೆ ಎಂದು ಅಂಕಿ ಅಂಶಗಳು ತಿಳಿಸಿವೆ.

ಉತ್ಪಾದನಾ ವಲಯಗಳ ಮಾರಾಟದಲ್ಲಿ ಇಳಿಮುಖವಾಗಿದ್ದು, ಮೂಲಭೂತ ಸೌಕರ್ಯಗಳಲ್ಲಿ ಕೊರತೆ ಎದ್ದು ಕಾಣಿತ್ತಿದೆ ಎಂಬುದು ಅಂಕಿ ಅಂಶಗಳಿಂದ ಬಹಿರಂಗವಾಗಿದೆ.

ಕಳೆದ ಜುಲೈ-ಸೆಪ್ಟೆಂಬರ್ ತ್ರೈಮಾಸಿಕದಲ್ಲಿ ಭಾರತದ ಆರ್ಥಿಕತೆ ಕೇವಲ ಶೇಕಡಾ 4.5ರಷ್ಟು ಏರಿಕೆಯಾಗಿದ್ದು, ಪ್ರಯಾಣಿಕರ ಕಾರು ಮಾರಾಟ ಏಪ್ರಿಲ್‌ನಿಂದ ನವೆಂಬರ್‌ವರೆಗೆ ಶೇ. 18ರಷ್ಟು ಕುಸಿದಿದೆ.

ಅದರಂತೆ ಕಲ್ಲಿದ್ದಲು, ಕಚ್ಚಾತೈಲ, ನೈಸರ್ಗಿಕ ಅನಿಲ, ಸಂಸ್ಕರಣಾಗಾರ ಉತ್ಪನ್ನಗಳು ಮತ್ತು ಸಿಮೆಂಟ್ ಮಾರಾಟದಲ್ಲಿ ಕೂಡ ಗಮನಾರ್ಹ ಇಳಿಕೆ ಕಂಡುಬಂದಿದೆ.

ವಿದ್ಯುದ್ದೀಕರಣ ಕ್ಷೇತ್ರದಲ್ಲಿ ಶೇ. 0.7ರಷ್ಟು ಬೆಳವಣಿಗೆಯಾಗಿದ್ದು ಸ್ಟೀಲ್ ಮತ್ತು ರಸಗೊಬ್ಬರಗಳ ಉತ್ಪಾದನೆ ಮತ್ತು ಮಾರಾಟದಲ್ಲಿ  ಅಲ್ಪ ಪ್ರಮಾಣದ ಬೆಳವಣಿಗೆ ಮಾತ್ರ ಕಂಡುಬಂದಿದೆ.

ಆರ್‌ಬಿಐ ಪ್ರಕಾರ ಪ್ರಸಕ್ತ ಖಾತೆ ಕೊರತೆ ಸೆಪ್ಟೆಂಬರ್ 2019 ರ ತ್ರೈಮಾಸಿಕದವರೆಗೆ 36.3 ಬಿಲಿಯನ್ ಇದ್ದು, ಜಿಡಿಪಿ ಶೇ. 0.9 ಕ್ಕೆ ಕುಗ್ಗಿದೆ.

ಮೂಲಸೌಕರ್ಯ ಕ್ಷೇತ್ರದಲ್ಲಿ ಸರ್ಕಾರದ ಖರ್ಚು ಹೆಚ್ಚಳದ ಭಾಗವಾಗಿ ಮುಂದಿನ ಐದು ವರ್ಷಗಳಲ್ಲಿ ಜಾರಿಗೆ ಬರುವಂತೆ  102 ಲಕ್ಷ ಕೋಟಿ ರೂ.ಗಳ ಮೂಲಸೌಕರ್ಯ ಯೋಜನೆಗಳನ್ನು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಘೋಷಿಸಿರುವ ಬೆನ್ನಲ್ಲೇ ಈ ಅಂಕಿ ಅಂಶ ಹೊರಬಿದ್ದಿದೆ.