ಕೊರೋನಾ ವೈರಸ್; ಹಲಸಿನ ಹಣ್ಣಿಗೆ ಬೇಡಿಕೆ, ಕೋಳಿ ಬೆಲೆ ಪಾತಾಳಕ್ಕೆ!

ಕೊರೋನಾ ವೈರಸ್ ಹರಡುತ್ತಿರುವ ಕಾರಣ  ಬಹುತೇಕ ವ್ಯವಹಾರಗಳು ಬಂದ್  ಆಗಿವೆ. ಇನ್ನು ಕೋಳಿ ಮಾಂಸದಿಂದ ಕೊರೋನಾ ಹರಡುತ್ತಿದೆ ಅನ್ನೋ ವದಂತಿ ಬೆನ್ನಲ್ಲೋ ಹಕ್ಕಿ ಜ್ವರ ಕಾಣಿಸಿಕೊಂಡಿದ್ದು, ಜನರು ಕೋಳಿ ಮಾಂಸ ತ್ಯಜಿಸಿ ಸಸ್ಯಾಹಾರಿಗಳಾಗಿದ್ದಾರೆ. ಇತ್ತ ಹಲಸಿನ ಹಣ್ಣಿಗೆ ಭಾರಿ ಬೇಡಿಕೆ ನಿರ್ಮಾಣವಾಗಿದೆ.

ಮುಂಬೈ(ಮಾ.12): ಭಾರತದಲ್ಲಿ ಕೊರೋನಾ ವೈರಸ್ ಪ್ರಕರಣಗಳು ಪತ್ತೆಯಾದ ಬೆನ್ನಲ್ಲೇ ಹೆಚ್ಚಿನ ಮುತುವರ್ಜಿವಹಿಸಲಾಗಿದೆ. ಆರೋಗ್ಯ ಇಲಾಖೆ ಕೊರೋನಾ ಹರಡದಂತೆ ಶ್ರಮವಹಿಸುತ್ತಿದೆ. ಇತ್ತ ವ್ಯಾಪಾರ ವಹಿವಾಟುಗಳು ಸ್ಥಗಿತಗೊಂಡಿದೆ. ಕೋಳಿ ಮಾಂಸದಿಂದ ಕೊರೋನಾ ವೈರಸ್ ಹರಡುತ್ತಿದೆ ಅನ್ನೋ ವದಂತಿ ಬೆನ್ನಲ್ಲೇ ಹಕ್ಕಿ ಜ್ವರ ಕಾಣಿಸಿಕೊಂಡಿದ್ದು,  ಜನರು ಕೋಳಿ ಮಾಂಸದತ್ತ ತಿರುಗಿ ನೋಡುತ್ತಿಲ್ಲ.

ಕೋಳಿ ಮಾಂಸ ಕೇಜಿಗೆ 8 ರೂಪಾಯಿ, 10 ರೂಪಾಯಿ, 15 ರೂಪಾಯಿಗಳಲ್ಲಿ ಮಾರಾಟ ಮಾಡಲಾಗುತ್ತಿದೆ. ಆದರೂ ಕೋಳಿ ಮಾಂಸಕ್ಕೆ ಬೇಡಿಕೆ ಇಲ್ಲದಾಗಿದೆ. ಪೌಲ್ಟ್ರಿ ಉದ್ಯಮ ತೀವ್ರ ನಷ್ಟಕ್ಕೆ ಸಿಲುಕಿದೆ. ಪೌಲ್ಟ್ರಿ ನಡೆಸುತ್ತಿರುವ ರೈತರು ಪ್ರತಿ ಕೋಳಿಯಿಂದ 100 ರಿಂದ 130 ರೂಪಾಯಿ ನಷ್ಟ ಅನುಭವಿಸುತ್ತಿದ್ದಾರೆ.

ಕೋಳಿ ಮಾಂಸ  ತಿನ್ನದೆ ಇರಲು ಸಾಧ್ಯವಾಗದವರು ಇದಕ್ಕೆ ಪರ್ಯಾಯ ಎಂದೇ ಕರೆಸಿಕೊಂಡಿರುವ ಹಲಸಿನ ಕಾಯಿ ಮೊರೆ ಹೋಗುತ್ತಿದ್ದಾರೆ. ಕೋಳಿ ಪ್ರೀಯರು ಇದೀಗ ಹಲಸಿನ ಕಾಯಿಗೆ ಶಿಫ್ಟ್ ಆಗಿರುವ ಕಾರಣ ಹಲಸಿನ ಕಾಯಿ ಹಾಗೂ ಹಲಸಿನ ಹಣ್ಣಿಗೆ ಭಾರಿ ಬೇಡಿಕೆ ಬರುತ್ತಿದೆ. ಸಾಮಾನ್ಯವಾಗಿ ಕೆಜಿಗೆ 50 ರಿಂದ 80 ರೂಪಾಯಿ ಇದ್ದ ಹಲಸಿನ ಹಣ್ಣು ಇದೀಗ  180 ರಿಂದ 200 ರೂಪಾಯಿಗೆ ಏರಿಕೆಯಾಗಿದೆ.