ಈ ನಗರದಲ್ಲಿ ಚಿಂದಿ ಆಯುವವರ ನಿತ್ಯದ ಆದಾಯ 5 ಕೋಟಿ ರುಪಾಯಿ!

ರಾಷ್ಟ್ರ ರಾಜಧಾನಿ ದೆಹಲಿ ನಗರದಲ್ಲಿ ಪ್ರತಿದಿನದ ಕಸದ ರಾಶಿಯಿಂದ ಇ- ತ್ಯಾಜ್ಯಗಳನ್ನು ಹೆಕ್ಕುವ ಮೂಲಕ ಚಿಂದಿ ಆಯುವವರು ಒಟ್ಟಾರೆ ದಿನಕ್ಕೆ 1.5 ಕೋಟಿ ರು. ಗಳಿಸುತ್ತಾರೆ ಎಂದು ವರದಿಯೊಂದು ಹೇಳಿದೆ.

ನವದೆಹಲಿ: ರಾಷ್ಟ್ರ ರಾಜಧಾನಿ ದೆಹಲಿ ನಗರದಲ್ಲಿ ಪ್ರತಿದಿನದ ಕಸದ ರಾಶಿಯಿಂದ ಇ- ತ್ಯಾಜ್ಯಗಳನ್ನು ಹೆಕ್ಕುವ ಮೂಲಕ ಚಿಂದಿ ಆಯುವವರು ಒಟ್ಟಾರೆ ದಿನಕ್ಕೆ 1.5 ಕೋಟಿ ರು. ಗಳಿಸುತ್ತಾರೆ ಎಂದು ವರದಿಯೊಂದು ಹೇಳಿದೆ. ಅಡ್ಮಿನಿಸ್ಟ್ರೇಟಿವ್‌ ಸ್ಟಾಫ್‌ ಕಾಲೇಜ್‌ ಆಫ್‌ ಇಂಡಿಯಾ ನಡೆಸಿದ ಲೆಕ್ಕಪರಿಶೋಧನೆಯಲ್ಲಿ ಈ ಅಚ್ಚರಿಯ ಸಂಗತಿ ಬೆಳಕಿಗೆ ಬಂದಿದೆ.

ಏನಿದು ಕಸದಿಂದ ಕೋಟಿ?

ದೆಹಲಿಯಲ್ಲಿ ಪ್ರತಿ ದಿನ 11,030 ಮೆಟ್ರಿಕ್‌ ಟನ್‌ಗಳಷ್ಟು ಕಸ ಉತ್ಪಾದನೆಯಾಗುತ್ತದೆ. ಇಲ್ಲಿನ ನಿವಾಸಿಗಳು ಎಸೆಯುವ ಈ ಬೃಹತ್ ಪ್ರಮಾಣದ ಕಸದ ಶೇ.10ರಷ್ಟು ಅಥವಾ 1.10 ಲಕ್ಷ ಕೇಜಿ ಪ್ಲ್ಯಾಸ್ಟಿಕ್‌, ಕಬ್ಬಿಣ, ಕಾಗದ, ರಟ್ಟು, ರಬ್ಬರ್‌ ಮತ್ತು ಇತರ ಇ- ತ್ಯಾಜ್ಯವಿರುತ್ತದೆ. ಅಂದರೆ ದೆಹಲಿ ನಿವಾಸಿಗಳು ಪ್ರತಿ ನಿತ್ಯ 1.5 ಕೋಟಿ ರು. ಮೌಲ್ಯದ ಪ್ಲ್ಯಾಸ್ಟಿಕ್‌ ಮತ್ತು ಕಬ್ಬಿಣವನ್ನು ಎಸೆಯುತ್ತಾರೆ.

ನಗರದ ಎಲ್ಲೆಡೆ ಈ ಕಸದಲ್ಲಿ ಚಿಂದಿ ಆಯುವವರು ಪ್ಲಾಸ್ಟಿಕ್‌ ತ್ಯಾಜ್ಯವನ್ನು ಪ್ರತಿ ಕೇಜಿಗೆ 12 ರು.ಗಳಿಗೆ ಮಾರಾಟ ಮಾಡುತ್ತಾರೆ. ಈ ಪ್ರಕಾರ ಪ್ರತಿದಿನ ನಗರದಲ್ಲಿ ಎಲ್ಲ ಚಿಂದಿ ಆಯುವವರು ಒಟ್ಟಾರೆ ಪ್ಲಾಸ್ಟಿಕ್‌ ಮೂಲಕವೇ ಬರೋಬ್ಬರಿ 1.32 ಕೋಟಿ ರು. ಗಳಿಸುತ್ತಾರೆ. ಇದರೊಂದಿಗೆ ಕಬ್ಬಿಣ ಹಾಗೂ ಇತರ ತ್ಯಾಜ್ಯಗಳು ಸೇರಿದರೆ ಈ ಪ್ರಮಾಣ ಒಟ್ಟು 5 ಕೋಟಿ ರು.ಗೂ ಏರಿಕೆಯಾಗುತ್ತದೆ.

ಅಂದರೆ ಕಸದಲ್ಲಿ ಚಿಂದಿ ಆಯುವ ಪ್ರತಿ ವ್ಯಕ್ತಿ ಪ್ರತಿ ದಿನ 14,000 ರು.ಗಳಿಗಿಂತ ಹೆಚ್ಚು ಗಳಿಕೆ ಮಾಡುತ್ತಾರೆ ಮತ್ತು ಅವರ ಮೇಲಿನ ಗುತ್ತಿಗೆದಾರ 25,000 ರು. ಗಳಿಸುತ್ತಾನೆ ಎಂದು ವರದಿ ಹೇಳಿದೆ.