ವೈಟ್‌ ಹೌಸ್‌ನಲ್ಲಿ ಈವರೆಗಿನ ಅತಿದೊಡ್ಡ ದೀಪಾವಳಿ ಸಂಭ್ರಮದಲ್ಲಿ ಭಾಗಿಯಾದ ಅಮೆರಿಕ ಅಧ್ಯಕ್ಷ!

ಅಮೆರಿಕದ ಅಧ್ಯಕ್ಷ ಜೋ ಬಿಡೆನ್‌, ವೈಟ್‌ಹೌಸ್‌ನಲ್ಲಿ ಈವರೆಗಿನ ಅತಿದೊಡ್ಡ ದೀಪಾವಳಿ ಸಂಭ್ರಮವನ್ನು ಮಾಡಿದ್ದಾರೆ. ವೈಟ್‌ಹೌಸ್‌ನ ದೀಪಾವಳಿ ಕಾರ್ಯಕ್ರಮಕ್ಕೆ ಈ ಬಾರಿ ಅಂದಾಜು 200 ಮಂದಿ ಪ್ರಸಿದ್ಧ ಭಾರತೀಯ ಮೂಲದ ಅಮೆರಿಕನ್ನರು ಹಾಜರಿದ್ದರು.  

ವಾಷಿಂಗ್ಟನ್‌ (ಅ.25): ಯುಎಸ್ ಅಧ್ಯಕ್ಷ ಜೋ ಬಿಡೆನ್ ಮತ್ತು ಫರ್ಸ್ಟ್‌ ಲೇಡಿ ಡಾ. ಜಿಲ್ ಬಿಡೆನ್ ಸೋಮವಾರ ಶ್ವೇತಭವನದಲ್ಲಿ ದೀಪಾವಳಿ ಕಾರ್ಯಕ್ರಮವನ್ನು ಆಯೋಜನೆ ಮಾಡಿದ್ದರು. ಈ ಸಂದರ್ಭದಲ್ಲಿ ಉಪಾಧ್ಯಕ್ಷೆ ಕಮಲಾ ಹ್ಯಾರಿಸ್ ಕೂಡ ಉಪಸ್ಥಿತರಿದ್ದರು. ದೀಪಾವಳಿ ಸಂಭ್ರಮದಲ್ಲಿಸುಮಾರು 200 ಪ್ರಖ್ಯಾತ ಭಾರತೀಯ ಅಮೆರಿಕನ್ನರು ಭಾಗವಹಿಸಿದ್ದರು. ಜಾರ್ಜ್ ಬುಷ್ ಆಡಳಿತದಲ್ಲಿ ದೀಪಾವಳಿ ಹಬ್ಬವನ್ನು ಆಚರಿಸಲು ಪ್ರಾರಂಭಿಸಿದ ನಂತರ ಇದು ವೈಟ್ ಹೌಸ್ ಆಯೋಜಿಸಿದ ಅತಿದೊಡ್ಡ ದೀಪಾವಳಿ ಕಾರ್ಯಕ್ರಮ ಎನಿಸಿದೆ. "ನಮ್ಮಲ್ಲಿ ಪ್ರತಿಯೊಬ್ಬರಿಗೂ ಕತ್ತಲೆಯನ್ನು ಹೋಗಲಾಡಿಸುವ ಮತ್ತು ಜಗತ್ತಿಗೆ ಬೆಳಕನ್ನು ತರುವ ಶಕ್ತಿಯಿದೆ ಎಂಬುದನ್ನು ದೀಪಾವಳಿ ನೆನಪಿಸುತ್ತದೆ. ಇಂದು ಶ್ವೇತಭವನದಲ್ಲಿ ಈ ಸಂತೋಷದಾಯಕ ಸಂದರ್ಭವನ್ನು ಆಚರಿಸಲು ನನಗೆ ಸಂತೋಷವಾಗಿದೆ" ಎಂದು ಅಧ್ಯಕ್ಷ ಬಿಡೆನ್ ಟ್ವೀಟ್‌ನಲ್ಲಿ ತಿಳಿಸಿದ್ದಾರೆ. ಪರಮಾಣು ಒಪ್ಪಂದಕ್ಕೆ ಸಹಿ ಹಾಕಿದ್ದು, ನವೆಂಬರ್ 2008 ರಲ್ಲಿ ಆಗಿನ ಯುಎಸ್ ಅಧ್ಯಕ್ಷ ಬರಾಕ್ ಒಬಾಮಾ ಮತ್ತು ಭಾರತದ ಪ್ರಧಾನಿ ಮನಮೋಹನ್ ಸಿಂಗ್ ಜಂಟಿ ಪತ್ರಿಕಾಗೋಷ್ಠಿ ಸೇರಿದಂತೆ ಹಲವಾರು ಭೌಗೋಳಿಕ ರಾಜಕೀಯ ಬೆಳವಣಿಗೆಗಳಿಗೆ ಸಾಕ್ಷಿಯಾಗಿರುವ ಈಸ್ಟ್ ರೂಮ್‌ನಲ್ಲಿ ಸ್ವಾಗತ ಕಾರ್ಯಕ್ರಮವನ್ನು ಆಯೋಜಿಸಲಾಗಿತ್ತು.

ಸಿತಾರ್ ವಾದಕ ರಿಷಬ್ ಶರ್ಮಾ ಮತ್ತು ನೃತ್ಯ ತಂಡ, ದಿ ಸಾ ಡ್ಯಾನ್ಸ್ ಕಂಪನಿಯು ದೀಪಾವಳಿ ಕಾರ್ಯಕ್ರಮದಲ್ಲಿ ವಿಶೇಷ ಪ್ರದರ್ಶನಗಳನ್ನು ಪ್ರಸ್ತುತಪಡಿಸಿತು. 'ಈಸ್ಟ್ ಸ್ಟೇಟ್‌ ಭೋಜನ ಕೋಣೆಯಲ್ಲಿ ಸಂಪುರ್ಣವಾಗಿ ತುಂಬಿ ಹೋಗಿತ್ತು. ಇದು ಭಾರತೀಯ ಅಮೆರಿಕನ್ ಸಮುದಾಯವು ಯುನೈಟೆಡ್ ಸ್ಟೇಟ್ಸ್‌ನಲ್ಲಿ ಏನು ಸಾಧಿಸಿದೆ ಎಂಬುದರ ನಿಜವಾದ ಆಚರಣೆಯಾಗಿದೆ. ದೀಪಾವಳಿಯಂದು ನಮಗೆಲ್ಲರಿಗೂ ಆತಿಥ್ಯ ವಹಿಸಲು ಅಧ್ಯಕ್ಷರು ಮತ್ತು ಶ್ವೇತಭವನದ ಅದ್ಭುತ ಮನ್ನಣೆಯಾಗಿದೆ. ಒಬ್ಬ ಭಾರತೀಯ ಅಮೇರಿಕನಾಗಿ ಇಲ್ಲಿಗೆ ಬಂದಿರುವುದು ನನಗೆ ಬಹಳ ಸೌಭಾಗ್ಯ ಎಂದು ಭಾವಿಸುತ್ತೇನೆ' ಎಂದು ಯುಎಸ್ ಇಂಡಿಯಾ ಬ್ಯುಸಿನೆಸ್ ಕೌನ್ಸಿಲ್ ಅಧ್ಯಕ್ಷ ಅತುಲ್ ಕೇಶಪ್ ಹೇಳಿರುವುದಾಗಿ ಪಿಟಿಐ ವರದಿ ಮಾಡಿದೆ.

ಅಮೆರಿಕಾ ಅಧ್ಯಕ್ಷರಿಗೆ ಏನಾಯ್ತು? ಸ್ಟೇಜ್‌ನಲ್ಲೇ ಅತ್ತಿತ್ತ ವಾಲಿದ Joe Biden... ವಿಡಿಯೋ ವೈರಲ್

'ದೀಪಾವಳಿಯನ್ನು ಆಚರಿಸಲು ಇಲ್ಲಿಗೆ ಬಂದಿರುವುದು ಗೌರವ ಮತ್ತು ಸೌಭಾಗ್ಯ. ಇದಕ್ಕಾಗಿ ಭಾರತೀಯ ಅಮೆರಿಕನ್ನರು ಅಧ್ಯಕ್ಷರು ಮತ್ತು ಪ್ರಥಮ ಮಹಿಳೆಗೆ ಧನ್ಯವಾದ ಅರ್ಪಿಸುತ್ತಾರೆ' ಎಂದು ಯುಎಸ್‌ನ (USA) ಅತಿದೊಡ್ಡ ದಕ್ಷಿಣ ಏಷ್ಯಾದ ದೂರದರ್ಶನ ಚಾನೆಲ್ ಟಿವಿ ಏಷ್ಯಾದ ಅಧ್ಯಕ್ಷ ಮತ್ತು ಸಿಇಒ ಎಚ್‌ಆರ್ ಶಾ ಹೇಳಿದರು. ಏಷ್ಯನ್ ಅಮೆರಿಕನ್ನರು, ಸ್ಥಳೀಯ ಹವಾಯಿಗಳು ಮತ್ತು ಪೆಸಿಫಿಕ್ ದ್ವೀಪವಾಸಿಗಳ ಅಧ್ಯಕ್ಷರ ಸಲಹಾ ಆಯೋಗದ ಸದಸ್ಯ ಅಜಯ್ ಜೈನ್ ಭುಟೋರಿಯಾ, ಆರ್ಥಿಕ ಅಭಿವೃದ್ಧಿಯಲ್ಲಿ ದಕ್ಷಿಣ ಏಷ್ಯಾದ ಸಮುದಾಯದ ಕೊಡುಗೆಗಳನ್ನು ಗುರುತಿಸಲು ಮತ್ತು ಕೋವಿಡ್ ಬಿಕ್ಕಟ್ಟನ್ನು ನಿರ್ವಹಿಸುವ ಸಲುವಾಗಿ ಈ ಕಾರ್ಯಕ್ರಮವನ್ನು ಆಯೋಜಿಸಲಾಗಿದೆ ಎಂದು ಹೇಳಿದರು. ಬಿಡೆನ್ ಅವರು ಆಡಳಿತದ ವಿವಿಧ ಹಂತಗಳಲ್ಲಿ 130 ಕ್ಕೂ ಹೆಚ್ಚು ಇಂಡೋ-ಅಮೆರಿಕನ್ನರನ್ನು ದಾಖಲೆ ಸಂಖ್ಯೆಯಲ್ಲಿ ನೇಮಿಸಿದ್ದಾರೆ ಎಂದು ಅವರು ಹೇಳಿದರು.

ದೀಪಾವಳಿ (Deepavali) ಆಚರಣೆಯನ್ನು ಶ್ಲಾಘಿಸಿದ ಭೂಟೋರಿಯಾ "ಅಧ್ಯಕ್ಷ ಬಿಡೆನ್ ಮತ್ತು ಈ ಆಡಳಿತವು ದಕ್ಷಿಣ ಏಷ್ಯಾದ (South Asia) ಸಮುದಾಯವನ್ನು ಎಷ್ಟು ಪ್ರೀತಿಸುತ್ತದೆ ಮತ್ತು ಗೌರವಿಸುತ್ತದೆ" ಎಂಬ ಸಂದೇಶವನ್ನು ಕಳುಹಿಸಿದೆ ಎಂದು ಹೇಳಿದರು. ಇದಕ್ಕೂ ಮುನ್ನ ಅತಿಥಿಗಳನ್ನು ಸ್ವಾಗತಿಸಿದ ಬಿಡೆನ್, ಶ್ವೇತಭವನದಲ್ಲಿ (White House) ಇಷ್ಟೊಂದು ದೊಡ್ಡ ಪ್ರಮಾಣದಲ್ಲಿ ನಡೆದ ಮೊದಲ ದೀಪಾವಳಿ ಆಚರಣೆ ಇದಾಗಿದೆ ಎಂದು ಹೇಳಿದರು.'ಅಮೆರಿಕದಾದ್ಯಂತ ಇರುವ ಅಗಾಧ ದಕ್ಷಿಣ ಏಷ್ಯಾದ ಸಮುದಾಯವು ಈ ಸಾಂಕ್ರಾಮಿಕ ರೋಗದಿಂದ ದೇಶವು ಬಲವಾಗಿ ಹೊರಹೊಮ್ಮಲು ಸಹಾಯ ಮಾಡಿದೆ' ಎಂದು ಅವರು ಹೇಳಿದರು.