ಅಮೆರಿಕ ಫುಟ್ಬಾಲ್ ಟೂರ್ನಿಯಲ್ಲಿ ‘ರೈತ ಟೀವಿ ಜಾಹೀರಾತು’| 30 ಸೆಕೆಂಡಿನ ಜಾಹೀರಾತು ದರ 40 ಕೋಟಿ ರು!
ನ್ಯೂಯಾರ್ಕ್(ಫೆ.09): ಲಕ್ಷಾಂತರ ಜನರು ವೀಕ್ಷಿಸುವ ಅಮೆರಿಕದ ಜನಪ್ರಿಯ ಫುಟ್ಬಾಲ್ ಚಾಂಪಿಯನ್‌ಶಿಪ್‌ ‘ಸೂಪರ್ ಬೌಲ್‌’ನಲ್ಲಿ ದಿಲ್ಲಿಯಲ್ಲಿ ನಡೆದಿರುವ ರೈತ ಹೋರಾಟದ 40 ಸೆಕೆಂಡಿನ ಟೀವಿ ಜಾಹೀರಾತು ಪ್ರದರ್ಶನಗೊಂಡಿದೆ. ಇಲ್ಲಿನ ಸಿಖ್‌ ಸಮುದಾಯ ಇದನ್ನು ಪ್ರಸಾರ ಮಾಡಿಸಿದ್ದು, ಇದು ಅನೇಕರ ಹುಬ್ಬೇರಿಸಿದೆ.
‘ಸಿಬಿಎಸ್‌ ಚಾನೆಲ್‌ನಲ್ಲಿ ಪ್ರಸಾರವಾಗುವ ಈ ಪಂದ್ಯಾವಳಿಯ ಜಾಹೀರಾತು ಅಷ್ಟುಅಗ್ಗವಲ್ಲ. 30 ಸೆಕೆಂಡಿನ ಒಂದು ಜಾಹಿರಾತಿಗೆ ಸಿಬಿಎಸ್‌, 40 ಕೋಟಿ ರು. ದರ ವಿಧಿಸುತ್ತದೆ’ ಎಂದು ಸಿಎನ್‌ಎನ್‌ ವರದಿ ಹೇಳಿದೆ.
‘ಎಲ್ಲಾದರೂ ಒಂದು ಅನ್ಯಾಯವಾದರೆ ಎಲ್ಲೆಡೆಯ ನ್ಯಾಯಕ್ಕೆ ಬೆದರಿಕೆ’ ಎಂಬ ಮಾರ್ಟಿನ್‌ ಲೂಥರ್‌ ಕಿಂಗ್‌ ಅವರ ಘೋಷವಾಕ್ಯದೊಂದಿಗೆ ಜಾಹೀರಾತು ಆರಂಭವಾಗುತ್ತದೆ. ಫ್ರೆನ್ಸೋ ಸಿಟಿ ಮೇಯರ್‌ ಜೆರ್ರಿ ಡಯರ್‌ ಅವರ, ‘ಭಾರತೀಯ ಸೋದರ ಸೋದರಿಯರೇ ನಿಮ್ಮ ಜತೆ ನಾವಿದ್ದೇವೆ’ ಎಂದು ಹೇಳಿಕೆಯೂ ಪ್ರಸಾರವಾಗುತ್ತದೆ. ಈ ಜಾಹೀರಾತು ಈಗ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್‌ ಆಗಿದೆ.