ಪತ್ನಿ ಕೋಪ ತಣಿಸಲು ಲಾಟರಿ ಖರೀದಿ, ಒಂದೇ ದಿನದಲ್ಲಿ 16 ಕೋಟಿ ರೂಪಾಯಿ ಜಾಕ್‌ಪಾಟ್!

ಹೆಂಡತಿ ಸಿಟ್ಟಾಗಿದ್ದಾಳೆ. ಮಾತು ಮಾತಿಗೂ ಸಿಡಿದು ಬೀಳುತ್ತಿದ್ದಾಳೆ. ಹೇಗಾದರೂ ಮಾಡಿ ಪತ್ನಿಯ ಕೋಪ ತಣಿಸಬೇಕು ಎಂದು ಎರಡು ಲಾಟರಿ ಖರೀದಿಸಿ ಬಂದಿದ್ದಾನೆ. ಈತನ ಪ್ರಯತ್ನಕ್ಕೆ ಪತ್ನಿ ಕೋಪ ಇಳಿದಿರಲಿಲ್ಲ. ಆದರೆ ಫಲಿತಾಂಶ ಪ್ರಕಟಗೊಂಡ ಬೆನ್ನಲ್ಲೇ, ಪತ್ನಿ ಕೋಪ ನೀರಾಗಿದೆ. ಕಾರಣ ಈ ಲಾಟರಿ ಟಿಕೆಟ್ ಮೂಲಕ 16 ಕೋಟಿ ರೂಪಾಯಿ ಗೆದ್ದಿದ್ದಾರೆ.

ಸೌಥ್ ವೇಲ್ಸ್(ಮಾ.14): ಮನೆಯಲ್ಲಿ ಗಂಡ ಹೆಂಡತಿಗೆ ಜಗಳ ಆಗಿದೆ. ಒಂದೆರೆಡು ದಿನ ಪತ್ನಿ ಮಾತು ಬಿಟ್ಟಿದ್ದಾಳೆ. ಸಮಾಧಾನ ಪಡಿಸಲು ಪತಿ ಒಂದಷ್ಟು ಪ್ರಯತ್ನ ಮಾಡಿದ್ದಾನೆ. ಆದರೆ ಪತ್ನಿಯ ಕೋಪ ಮಾತ್ರ ತಣ್ಣಗಾಗಿಲ್ಲ.  ಕೆಲಸದ ನಿಮಿತ್ತ ಮನೆಯಿಂದ ಹೊರಹೋದ ಪತಿ ವಾಪಸ್ ಬರುವಾಗ ಒಂದು ಪ್ಲಾನ್ ಮಾಡಿದ್ದಾನೆ.  ಎರಡು ಲಾಟರಿ ಟಿಕೆಟ್ ಖರೀದಿಸಿ ಪತ್ನಿಯ ಕೋಪ ತಣಿಸುವ ಪ್ರಯತ್ನಕ್ಕೆ ಕೈಹಾಕಿದ್ದಾನೆ. ಇದರಿಂದ ಎರಡು ಟಿಕೆಟ್ ಖರೀದಿಸಿ ಮನೆಗೆ ಬಂದಿದ್ದಾನೆ. ಆದರೆ ಪತ್ನಿ ಕೋಪ ಮಾತ್ರ ತಣ್ಣಗಾಗಿಲ್ಲ. ಇತ್ತ ಪತಿ ಇನ್ನೇನು ಮಾಡಲು ಸಾಧ್ಯ ಎಂದು ಚಿಂತೆಯಲ್ಲೇ ಮುಳುಗಿದ. ಆದರೆ ಫಲಿತಾಂಶ ಬಂದಾಗ ಪತ್ನಿಯ ಕೋಪ ನೀರಾಗಿತ್ತು. ಕಾರಣ ಈತನ ಖರೀದಿಸಿದ 2 ಲಾಟರಿ ಟಿಕೆಟ್‌ಗೆ ಜಾಕ್‌ಪಾಟ್ ಹೊಡೆದಿತ್ತು. ಬರೋಬ್ಬರಿ 16 ಕೋಟಿ ರೂಪಾಯಿ ಗೆದ್ದ ಖುಷಿಯಲ್ಲಿ ಇದೀಗ ದಂಪತಿ ಪ್ಲಾನ್ ಮೇಲೆ ಪ್ಲಾನ್ ಮಾಡುತ್ತಿದ್ದಾರೆ. ಈ ಲಾಟರಿ ಜಾಕ್‌ಪಾಟ್ ಘಟನೆ ನಡೆದಿದ್ದು, ಆಸ್ಟ್ರೇಲಿಯಾದ ನ್ಯೂ ಸೌತ್ ವೇಲ್ಸ್‌ನಲ್ಲಿ.

ಜಾಕ್‌ಪಾಟ್ ದಂಪತಿಗಳು ಪ್ರತಿ ವಾರ ಬೆಟ್ಟಿಂಗ್ ಆಡುತ್ತಾರೆ. ನಿಯಮಿತವಾಗಿ ಬೆಟ್ಟಿಂಗ್ ಆಡಿ ಖುಷಿ ಪಡುತ್ತಾರೆ. ಆದರೆ ಕಳೆದ ಒಂದು ವಾರ ಬೆಟ್ಟಿಂಗ್ ಆಡುವಾಗ ಪತ್ನಿ ನೋಂದಣಿ ನಂಬರ್ ಹಾಕಲು ಮರೆತಿದ್ದಾನೆ. ತಾನೊಬ್ಬನೆ ಬೆಟ್ಟಿಂಗ್ ಆಡಿದ್ದಾನೆ. ಇದು ಪತ್ನಿಯನ್ನು ಕೆರಳಿಸಿದೆ. ಇತ್ತೀಚೆಗೆ ನಾನು ಇದ್ದೇನೆ ಅನ್ನೋದೇ ಮರತಿದ್ದಾರೆ. ನನ್ನ ನಂಬರ್ ಹಾಕದೆ ಅವರೊಬ್ಬರೇ ಬೆಟ್ಟಿಂಗ್ ಆಡಿದ್ದಾರೆ. ಇಷ್ಟು ವರ್ಷ ನಾವಿಬ್ಬರು ಬೆಟ್ಟಿಂಗ್ ಆಡುತ್ತಿದ್ದೇವು. ಇದೀಗ ಪತಿ ಬದಲಾಗಿದ್ದಾರೆ ಎಂದು ಪತ್ನಿ ಒಂದೇ ಸಮನೆ ತರಾಟೆಗೆ ತೆಗೆದುಕೊಂಡಿದ್ದಾಳೆ. 

ಪತ್ನಿಯನ್ನು ಸಮಾಧಾನಪಡಿಸಲು ಹಲವು ಪ್ರಯತ್ನ ಮಾಡಿದ್ದಾನೆ. ಆದರೆ ಯಾವುದೂ ಕೈಗೂಡಲಿಲ್ಲ. ಕೆಲದ ನಿಮಿತ್ತ ಹೊರಗೆ ಹೋದಾಗ ಬೆಟ್ಟಿಂಗ್ ಅಸಮಾಧಾನವನ್ನು ಇನ್ನೊಂದು ರೀತಿಯ ಬೆಟ್ಟಿಂಗ್ ಮೂಲಕ ಸರಿಪಡಿಸಲು ಪತಿ ಪ್ಲಾನ್ ಮಾಡಿದ್ದಾನೆ. ಹೀಗಾಗಿ ಎರಡು ಲಾಟರಿ ಟಿಕೆಟ್ ಖರೀದಿಸಿದ್ದಾನೆ. ಬಳಿಕ ಮನೆಗೆ ಬಂದು ಪತ್ನಿಗೆ ಲಾಟರಿ ಟಿಕೆಟ್ ನೀಡಿ, ಬೆಟ್ಟಿಂಗ್‌ ಮಿಸ್ ಮಾಡಿದ ಕಾರಣ ಅದಕ್ಕಿಂತ ದೊಡ್ಡ ಜಾಕ್‌ಪಾಟ್ ಲಾಟರಿ ತಂದಿದ್ದೇನೆ ಎಂದು ಸಮಾಧಾನ ಪಡಿಸಿದ್ದಾನೆ.

ಪತಿಯ ಲಾಟರಿ ಟಿಕೆಟ್ ನೋಡಿ ಪತ್ನಿಯ ಕೋಪ ಆರಿಲ್ಲ. ಮತ್ತೆ ಮತ್ತೆ ಪತಿಯನ್ನು ಚುಚ್ಚು ಮಾತುಗಳಿಂದ ತರಾಟೆಗೆ ತೆಗೆದುಕೊಂಡಿದ್ದಾಳೆ. ಒಂದೆರಡು ದಿನದ ಬಳಿಕ ಲಾಟರಿ ಫಲಿತಾಂಶ ಬಂದಿದೆ. ಮೊದಲ ಟಿಕೆಟ್ ನಂಬರ್ ಚೆಕ್ ಮಾಡಿದಾಗ ಜಾಕ್ ಪಾಟ್. 8 ಕೋಟಿ ರೂಪಾಯಿ ಬಹುಮಾನ. ಎರಡನೇ ಟಿಕೆಟ್ 8.4 ಕೋಟಿ ರೂಪಾಯಿ. ಒಟ್ಟು 16.4 ಕೋಟಿ ರೂಪಾಯಿ ಜಾಕ್‌ಪಾಟ್.

ಖುಷಿಯಿಂದಲೇ ಪತ್ನಿಗೆ ಹೇಳಿದ್ದಾನೆ. ಪತ್ನಿಗೆ ನಂಬಲು ಸಾಧ್ಯವಾಗಿಲ್ಲ. ಮತ್ತೆ ಮತ್ತೆ ನಂಬರ್ ನೋಡಿ ಖಚಿತಪಡಿಸಿಕೊಂಡಿದ್ದಾರೆ. ಇದೀಗ ಪತಿ ಪತ್ನಿ ನಡುವಿನ ಜಗಳ ಒಂದೇ ನಿಮಿಷದಲ್ಲಿ ಮಾಯವಾಗಿದೆ. ಇದೀಗ 16.4 ಕೋಟಿ ರೂಪಾಯಿ ಮೊತ್ತವನ್ನು ಎಲ್ಲಿ ಹೂಡಿಕೆ ಮಾಡಬೇಕು ಅನ್ನೋ ಚರ್ಚೆ ನಡೆಸುತ್ತಿದ್ದಾರೆ. ಮಕ್ಕಳಿಗಾಗಿ ಮನೆ ಖರೀದಿಸಲು ಮುಂದಾಗಿದ್ದಾರೆ.