ಧಾರ್ಮಿಕ ಬೋಧಕನಿಗೆ 8,658 ವರ್ಷ ಜೈಲು: ಮಾಡಿದ್ದು ಇದೊಂದೇ ತಪ್ಪು..!

ಮುಸ್ಲಿಂ ರಾಷ್ಟ್ರ ಟರ್ಕಿಯ ಇಸ್ತಾಂಬುಲ್‌ನಲ್ಲಿ ಧಾರ್ಮಿಕ ನಾಯಕನೊಬ್ಬನಿಗೆ ಅಲ್ಲಿನ ಕೋರ್ಟ್‌ ಒಂದು ಆತನ ಆಯಸ್ಸಿಗಿಂತಲೂ ಅಧಿಕ ವರ್ಷಗಳ ಕಾಲ ಜೈಲು ಶಿಕ್ಷೆ ವಿಧಿಸಿದೆ. 8,658 ವರ್ಷಗಳ ಕಾಲ ಧಾರ್ಮಿಕ ನಾಯಕನಿಗೆ ಜೈಲು ಶಿಕ್ಷೆ ವಿಧಿಸಲಾಗಿದ್ದು, ಮರು ವಿಚಾರಣೆ ನಡೆಸಲು ಜೈಲಿನಲ್ಲಿರಿಸಲಾಗಿದೆ.

ಟರ್ಕಿ: ಮುಸ್ಲಿಂ ರಾಷ್ಟ್ರ ಟರ್ಕಿಯ ಇಸ್ತಾಂಬುಲ್‌ನಲ್ಲಿ ಧಾರ್ಮಿಕ ನಾಯಕನೊಬ್ಬನಿಗೆ ಅಲ್ಲಿನ ಕೋರ್ಟ್‌ ಒಂದು ಆತನ ಆಯಸ್ಸಿಗಿಂತಲೂ ಅಧಿಕ ವರ್ಷಗಳ ಕಾಲ ಜೈಲು ಶಿಕ್ಷೆ ವಿಧಿಸಿದೆ. 8,658 ವರ್ಷಗಳ ಕಾಲ ಧಾರ್ಮಿಕ ನಾಯಕನಿಗೆ ಜೈಲು ಶಿಕ್ಷೆ ವಿಧಿಸಲಾಗಿದ್ದು, ಮರು ವಿಚಾರಣೆ ನಡೆಸಲು ಜೈಲಿನಲ್ಲಿರಿಸಲಾಗಿದೆ. ಆದರೆ ಜೈಲು ಶಿಕ್ಷೆ ವಿಧಿಸಲು ಕಾರಣವಾದ ಅಪರಾಧ ಮಾತ್ರ ಕ್ಷುಲ್ಲಕವೆನಿಸಿದೆ. 

ಅದ್ನಾನ್ ಒಕ್ತಾರ್ ಎಂಬಾತನೇ ಹೀಗೆ 8,658 ವರ್ಷ ಜೈಲು ಶಿಕ್ಷೆಗೆ ಗುರಿಯಾದ ಧಾರ್ಮಿಕ ನಾಯಕ. ಹಾಗಂತ ಈತನೇನು ಯಾರನ್ನೋ ಕೊಲೆ ಮಾಡಿಲ್ಲ. ಕೇವಲ ತುಂಡುಡುಗೆಯ ಲಲನೆಯರ ಜೊತೆ ಸಖತ್ ಆಗಿ ಪೋಸ್ ಕೊಟ್ಟಿದ್ದಾನೆ ಅಷ್ಟೇ. ಇದೇ ಈತ ಮಾಡಿದ ದೊಡ್ಡ ತಪ್ಪಾಗಿದ್ದು, ಇಸ್ತಾಂಬುಲ್‌ನ ಕೋರ್ಟ್ (Turkey Court ) ಈತನಿಗೆ 8,658 ವರ್ಷ ಶಿಕ್ಷೆ ಘೋಷಿಸಿದೆ. ಇತ್ತೀಚಿನ ವರ್ಷಗಳಲ್ಲಿ ಮನುಷ್ಯನ ಸರಾಸರಿ ಜೀವಿತಾವಧಿಯೇ 70 ವರ್ಷ, ಅದರಲ್ಲೂ ಕೆಲವೇ ಕೆಲವು ಅದೃಷ್ಟವಂತರು 100 ಬಾರಿಸುವರು. ಹೀಗಿರುವಾಗ 8,658 ವರ್ಷ ಶಿಕ್ಷೆ ನೀಡಿರುವುದು ಅಚ್ಚರಿಗೆ ಕಾರಣವಾಗಿದೆ.

ಅಂದಹಾಗೆ ತುಂಡುಡುಗೆ ಸುಂದರಿಯರ ಜೊತೆ ಪೋಸ್ ಕೊಟ್ಟು ಶಿಕ್ಷೆಗೊಳಗಾದ ಈ ಅದ್ನಾನ್ ಒಕ್ತಾರ್, ಟಿವಿ ಕಾರ್ಯಕ್ರಮವೊಂದರಲ್ಲಿ ಧಾರ್ಮಿಕ ಪ್ರವಚನ ನೀಡುವ ಧಾರ್ಮಿಕ ನಾಯಕ. ಈತನ ಗೃಹಚಾರ ಕೆಟ್ಟಿತ್ತೋ ಏನೋ ಈತ ಭಾರಿ ಮೇಕಪ್ (Makeup) ಜೊತೆ ತುಂಡುಡುಗೆ ಧರಿಸಿದ ಹುಡುಗಿಯರ ಜೊತೆ ಕುಳಿತುಕೊಂಡು ಸೃಷ್ಟಿವಾದ (creationism) ಮತ್ತು ಸಂಪ್ರದಾಯವಾದಿ ಮೌಲ್ಯಗಳ (conservative values) ಬಗ್ಗೆ ಭಾಷಣ ಮಾಡುತ್ತಿದ್ದ ಎಂದು ತಿಳಿದು ಬಂದಿದೆ. ಇದಕ್ಕಾಗಿ ಇಷ್ಟೊಂದು ವರ್ಷ ಶಿಕ್ಷೆ ವಿಧಿಸಿದ ಕೋರ್ಟ್ ಇದರ ಜೊತೆ ಹಲವು ಆರೋಪಗಳನ್ನು ಕೂಡ ಹೊರಿಸಿದೆ. ಇದರಲ್ಲಿ ಲೈಂಗಿಕ ದೌರ್ಜನ್ಯದ ಜೊತೆ ಬೇರೆಯವರ ಸ್ವಾತಂತ್ರ್ಯವನ್ನು ಕಸಿದುಕೊಂಡ ಆರೋಪವನ್ನು ಕೂಡ ಹೊರಿಸಲಾಗಿದೆ. ಈ ಧಾರ್ಮಿಕ ನಾಯಕನ ಜೊತೆ ಇತರ ಹತ್ತು ಜನಕ್ಕೂ ಇಷ್ಟೇ ವರ್ಷದ ಜೈಲು ಶಿಕ್ಷೆಯನ್ನು ಕೋರ್ಟ್ ವಿಧಿಸಿದೆ. 

ಅಲ್ಲಿನ A9 ಹೆಸರಿನ ದೂರದರ್ಶನವೊಂದಕ್ಕೆ  ನೀಡುವ ಕಾರ್ಯಕ್ರಮಗಳಿಂದ ಅದ್ನಾನ್ ಒಕ್ತಾರ್‌ (Adnan Oktar) ಕ್ರಮೇಣ ಕುಖ್ಯಾತಿ ಗಳಿಸುತ್ತಾ ಬಂದಿದ್ದು, ಅಲ್ಲಿನ ಇತರ ಧಾರ್ಮಿಕ ನಾಯಕರು ಈತನ ಈ ಧರ್ಮ ಬೋಧನೆಯನ್ನು ಖಂಡಿಸಿದ್ದಾರೆ. ಇದಾದ ಬಳಿಕ ಪೊಲೀಸರು ಈತನನ್ನು ಬಂಧಿಸಿ ಜೈಲಿಗಟ್ಟಿದ್ದು, ಈಗ ಕೋರ್ಟ್ ಸಾವಿರಾರು ವರ್ಷ ಜೈಲು ಶಿಕ್ಷೆ ಘೋಷಿಸಿದೆ. ಇದಕ್ಕೂ ಮೊದಲು ಕೂಡ ಈತನ ವಿರುದ್ಧ 2018ರಲ್ಲಿ ಪ್ರಕರಣ ದಾಖಲಾಗಿತ್ತು. ಹಣಕಾಸು ಅವ್ಯವಹಾರಕ್ಕೆ ಸಂಬಂಧಿಸಿದಂತೆ ಈತನ ವಿರುದ್ಧ ಅಲ್ಲಿನ ಹಣಕಾಸು ಅಪರಾಧ ವಿಭಾಗ ತನಿಖೆ (financial crimes unit) ನಡೆಸಿತ್ತು. 

ಇದೇ ರೀತಿ ವ್ಯಕ್ತಿಯೊಬ್ಬರಿಗೆ ಸಾವಿರಾರು ವರ್ಷಗಳ ಜೈಲು ಶಿಕ್ಷೆ ಘೋಷಿಸಿದ್ದು, ಇದೇ ಮೊದಲೇನಲ್ಲ. ಕಳೆದ ವರ್ಷ 66 ವರ್ಷ ವ್ಯಕ್ತಿಯೊಬ್ಬನಿಗೆ ನ್ಯಾಯಾಲಯ 1075 ವರ್ಷಗಳ ಜೈಲು ಶಿಕ್ಷೆ ಘೋಷಣೆ ಮಾಡಿತ್ತು, ಲೈಂಗಿಕ ಹಲ್ಲೆ (sexual assault), ಅಪ್ರಾಪ್ತರ ಮೇಲೆ ಲೈಂಗಿಕ ದೌರ್ಜನ್ಯ (sexual abuse), ವಂಚನೆ, ರಾಜಕೀಯ ಹಾಗೂ ರಕ್ಷಣಾ ಬೇಹುಗಾರಿಕೆಯ ಅಪರಾಧಕ್ಕೆ ಸಂಬಂಧಿಸಿದಂತೆ ಈ ಜೈಲು (prison) ಶಿಕ್ಷೆ ವಿಧಿಸಲಾಗಿತ್ತು.