ಪರ್ವತಗಳಿಗೆ ಬ್ರಿಜ್‌ ಕಟ್ಟಿದ ಚೀನಾ, ಮೂರೇ ವರ್ಷದಲ್ಲಿ ನಿರ್ಮಾಣವಾಯ್ತು ವಿಶ್ವದ ಅತ್ಯಂತ ಎತ್ತರದ ಸೇತುವೆ!

ಆಕಾಶವನ್ನು ಮುಟ್ಟುವುದು, ಅಸಾಧ್ಯವಾದವುಗಳಿಗೆ ಸೇತುವೆ ಕಟ್ಟುವುದು ಚೀನಾಕ್ಕೆ ಯಾವಾಗಲೂ ಇಷ್ಟ. ಚೀನಾ ಈ ಜೂನ್‌ನಲ್ಲಿ ವಿಶ್ವದ ಅತಿ ಎತ್ತರದ ಸೇತುವೆಯನ್ನು ಅನಾವರಣಗೊಳಿಸಲು ಸಜ್ಜಾಗಿದ್ದು, 2,890 ಮೀಟರ್ ಉದ್ದದ ಹುವಾಜಿಯಾಂಗ್ ಗ್ರ್ಯಾಂಡ್ ಕ್ಯಾನ್ಯನ್ ಸೇತುವೆಯನ್ನು ಗೈಝೌದಲ್ಲಿ ಶೀಘ್ರದಲ್ಲೇ ಉದ್ಘಾಟನೆಗೊಳ್ಳಲಿದೆ.

ನವದೆಹಲಿ (ಏ.9): ಪೀಸಾ ವಾಲುಗೋಪುರ, ಬುರ್ಜ್‌ ಖಲೀಫಾ ಇವೆಲ್ಲವನ್ನೂ ಬಿಡಿ, ಚೀನಾ ನಿರ್ಮಾಣ ಮಾಡುತ್ತಿರುವ ಹುವಾಜಿಯಾಂಗ್ ಗ್ರ್ಯಾಂಡ್ ಕ್ಯಾನ್ಯನ್ ಸೇತುವೆ  ಬಗ್ಗೆ ಒಮ್ಮೆ ಗೂಗಲ್‌ ಮಾಡಿ. ಬಹುಶಃ ಜಗತ್ತಿನಲ್ಲಿ ಯಾರೂ ಮಾಡಲು ಸಾಧ್ಯವಾಗದ ಸಾಧನೆಯನ್ನು ಚೀನಾ ಬರೀ ಮೂರು ವರ್ಷಗಳಲ್ಲಿ ಮಾಡಿದೆ. ವಿಶ್ವದ ಅತೀ ಎತ್ತರದ ಬ್ರಿಜ್‌ ಸಂಪೂರ್ಣವಾಗಿ ಸಿದ್ದವಾಗಿದ್ದು, ಜೂನ್‌ನಲ್ಲಿ ಉದ್ಘಾಟನೆ ಆಗುವ ಸಾಧ್ಯತೆ ಇದೆ. 

ಈ ಬ್ರಿಜ್‌ಅನ್ನು ನೋಡುವಾಗ ನಿಮಗೆ ಸೈನ್ಸ್‌-ಫಿಕ್ಷನ್‌ ಸಿನಿಮಾಗಳು ಕೂಡ ನೆನಪಾಗಬಹುದು. ಅಷ್ಟು ಅದ್ಭುವಾಗಿ ಇದರ ನಿರ್ಮಾಣವಾಗಿದೆ. ಚೀನಾದ ಇತ್ತೀಚಿನ ಎಂಜಿನಿಯರಿಂಗ್ ಮೇರುಕೃತಿಯಾದ ಹುವಾಜಿಯಾಂಗ್ ಗ್ರ್ಯಾಂಡ್ ಕ್ಯಾನ್ಯನ್ ಸೇತುವೆಯನ್ನು ಗುಯಿಝೌ ಪ್ರಾಂತ್ಯದಲ್ಲಿ ನಿರ್ಮಿಸಲಾಗುತ್ತಿದ್ದು, ಇದು ಪೂರ್ಣಗೊಳ್ಳುವ ಹಂತಕ್ಕೆ ತಲುಪಿದೆ. ಜೂನ್ 2025 ರಲ್ಲಿ ಅಧಿಕೃತವಾಗಿ ಉದ್ಘಾಟನೆಗೊಳ್ಳಲಿರುವ ಈ ಗಗನಚುಂಬಿ ಅದ್ಭುತವು ಜಗತ್ತಿನಾದ್ಯಂತ ಸುದ್ದಿ ಮಾಡುತ್ತಿದೆ.

ಒಮ್ಮೆ ಕಾರ್ಯಾಚರಣೆಗೊಂಡರೆ, ಈ ಅದ್ಭುತ ಸೇತುವೆಯು ಗುಯಿಝೌವಿನ ಹುವಾಜಿಯಾಂಗ್ ಗ್ರ್ಯಾಂಡ್ ಕ್ಯಾನ್ಯನ್‌ನ ಎರಡು ಬದಿಗಳನ್ನು ಸಂಪರ್ಕಿಸುವುದಲ್ಲದೆ, ಜಾಗತಿಕ ದಾಖಲೆಗಳನ್ನು ಮುರಿಯಲಿದೆ. ನೆಲದಿಂದ 625 ಮೀಟರ್ (ಸುಮಾರು 2,050 ಅಡಿ) ಎತ್ತರದಲ್ಲಿ ನಿಂತಿರುವ ಇದು ವಿಶ್ವದ ಅತಿ ಎತ್ತರದ ಸೇತುವೆ ಎನಿಸಿಕೊಳ್ಳಲಿದೆ.

2,890 ಮೀಟರ್‌ಗಳಿಗೂ ಹೆಚ್ಚು ಉದ್ದವಿರುವ ಈ ಎಂಜಿನಿಯರಿಂಗ್ ಅದ್ಭುತವು, ಈ ಪ್ರದೇಶದಾದ್ಯಂತ ಪ್ರಯಾಣದ ಸಮಯವನ್ನು ಒಂದು ಗಂಟೆಯಿಂದ ಕೇವಲ ಒಂದು ನಿಮಿಷಕ್ಕೆ ಇಳಿಸುತ್ತದೆ.

ಹುವಾಜಿಯಾಂಗ್ ಗ್ರ್ಯಾಂಡ್ ಕ್ಯಾನ್ಯನ್ ಸೇತುವೆಯು 190 ಕಿಲೋಮೀಟರ್ ಉದ್ದದ ಶಾಂತಿಯನ್-ಪುಕ್ಸಿ ಎಕ್ಸ್‌ಪ್ರೆಸ್‌ವೇಯ ಒಂದು ಭಾಗವಾಗಿದ್ದು, ನೈಋತ್ಯ ಚೀನಾದಲ್ಲಿ ಪ್ರಾದೇಶಿಕ ಸಂಪರ್ಕವನ್ನು ಹೆಚ್ಚಿಸಲು ವಿನ್ಯಾಸಗೊಳಿಸಲಾಗಿದೆ. ಈ ಸೇತುವೆಯ ನಿರ್ಮಾಣವು ಚೀನಾದ ಸಿವಿಲ್ ಎಂಜಿನಿಯರಿಂಗ್ ಮತ್ತು ಮೂಲಸೌಕರ್ಯದಲ್ಲಿನ ತ್ವರಿತ ಪ್ರಗತಿಯ ಅದ್ಭುತ ಪ್ರದರ್ಶನವಾಗಿದೆ.

2022ರಲ್ಲಿ ಇದರ ನಿರ್ಮಾಣ ಕಾರ್ಯ ಆರಂಭವಾಗತ್ತು. ಅಕ್ಷರಶಃ ಎರಡು ಬದಿಯ ಪರ್ವತಗಳನ್ನು ಈ ಬ್ರಿಜ್‌ ಸಂಪರ್ಕಿಸುತ್ತದೆ. ಅಮೆರಿಕದ ಸ್ಯಾನ್‌ಫ್ರಾನ್ಸಿಸ್ಕೋದಲ್ಲಿರುವ ಗೋಲ್ಡನ್‌ ಗೇಟ್‌ ಬ್ರಿಜ್‌ಗಿಂತ 9 ಪಟ್ಟು ಎತ್ತರ ಹೊಂದಿದೆ. ಇದಕ್ಕಾಗಿ ಚೀನಾ ಅಂದಾಜು 280 ಮಿಲಿಯನ್‌ ಯುಎಸ್‌ ಡಾಲರ್‌ ವೆಚ್ಚ ಮಾಡಿದೆ.

ಟಾಪ್ 5 ಅತಿ ಎತ್ತರದ ಸೇತುವೆಗಳು

1. ಸಿದು ನದಿ ಸೇತುವೆ, ಚೀನಾ

ಡೆಕ್ ಎತ್ತರ: 496 ಮೀಟರ್ (1,627 ಅಡಿ)
ಆರಂಭ: 2009
ಪ್ರಕಾರ: ತೂಗು ಸೇತುವೆ
ಸ್ಥಳ: ಹುಬೈ ಪ್ರಾಂತ್ಯ, ಚೀನಾ

ಸಿದು ನದಿ ಸೇತುವೆಯು ವಿಶ್ವದ ಅತಿ ಎತ್ತರದ ಸೇತುವೆ ಎಂಬ ಬಿರುದನ್ನು ಹೊಂದಿದೆ. ಇದು ಸಿದು ನದಿ ಕಮರಿಯನ್ನು ವ್ಯಾಪಿಸಿದೆ ಮತ್ತು ಪರ್ವತ ಪ್ರದೇಶದ ಮೇಲೆ ಅದರ ಸವಾಲಿನ ನಿರ್ಮಾಣದಿಂದಾಗಿ ಎಂಜಿನಿಯರಿಂಗ್‌ ಮಾಸ್ಟರ್‌ಪೀಸ್‌ ಎನ್ನಲಾಗುತ್ತದೆ.

2. ಬಲುವಾರ್ಟೆ ಸೇತುವೆ, ಮೆಕ್ಸಿಕೋ
ಡೆಕ್ ಎತ್ತರ: 403 ಮೀಟರ್ (1,322 ಅಡಿ)
ಆರಂಭ: 2012
ಪ್ರಕಾರ: ಕೇಬಲ್-ಸ್ಟೇಯಿಂಗ್ ಸೇತುವೆ
ಸ್ಥಳ: ಡುರಾಂಗೊ-ಸಿನಾಲೋವಾ ಗಡಿ, ಮೆಕ್ಸಿಕೋ
ಬಲುವಾರ್ಟೆ ಸೇತುವೆಯು ವಿಶ್ವದ ಅತಿ ಎತ್ತರದ ಕೇಬಲ್-ಸ್ಟೇಯಿಂಗ್ ಸೇತುವೆಯಾಗಿದ್ದು, ಮೆಕ್ಸಿಕೋದ ಡುರಾಂಗೊ-ಮಜಾಟ್ಲ್ನ್ ಹೆದ್ದಾರಿಯಲ್ಲಿ ನಿರ್ಣಾಯಕ ಸಂಪರ್ಕವಾಗಿ ಕಾರ್ಯನಿರ್ವಹಿಸುತ್ತದೆ. ಇದು ಲ್ಯಾಟಿನ್ ಅಮೆರಿಕಾದಲ್ಲಿ ವಾಸ್ತುಶಿಲ್ಪದ ಸಾಧನೆಯಾಗಿಯೂ ಗುರುತಿಸಲ್ಪಟ್ಟಿದೆ 

3. ಬಾಲಿಂಗ್ ನದಿ ಸೇತುವೆ, ಚೀನಾ

ಡೆಕ್ ಎತ್ತರ: 370 ಮೀಟರ್ (1,210 ಅಡಿ)
ಆರಂಭ: 2009
ಪ್ರಕಾರ: ತೂಗು ಸೇತುವೆ
ಸ್ಥಳ: ಗುಯಿಝೌ ಪ್ರಾಂತ್ಯ, ಚೀನಾ

ಈ ತೂಗು ಸೇತುವೆ ಬಾಲಿಂಗ್ ನದಿ ಕಣಿವೆಯಾದ್ಯಂತ ವ್ಯಾಪಿಸಿದೆ ಮತ್ತು ಚೀನಾದ ಪರ್ವತ ಪ್ರದೇಶಗಳಲ್ಲಿ ಸಾರಿಗೆ ಮೂಲಸೌಕರ್ಯಕ್ಕೆ ನೀಡಿದ ಕೊಡುಗೆಗೆ ಗಮನಾರ್ಹವಾಗಿದೆ.

4. ಬೀಪಾಂಜಿಯಾಂಗ್ ನದಿ 2003 ಸೇತುವೆ, ಚೀನಾ

ಡೆಕ್ ಎತ್ತರ: 366 ಮೀಟರ್ (1,201 ಅಡಿ)
ಆರಂಭ: 2003
ಪ್ರಕಾರ: ಕಮಾನು ಸೇತುವೆ
ಸ್ಥಳ: ಗುಯಿಝೌ ಪ್ರಾಂತ್ಯ, ಚೀನಾ

ಬೀಪಾಂಜಿಯಾಂಗ್ ನದಿ ಸೇತುವೆಯು ಒಂದು ಕಾಲದಲ್ಲಿ ಜಾಗತಿಕವಾಗಿ ಅತಿ ಎತ್ತರದ ಸೇತುವೆಯಾಗಿತ್ತು.

5. ಐಝೈ ಸೇತುವೆ, ಚೀನಾ

ಡೆಕ್ ಎತ್ತರ: 350 ಮೀಟರ್ (1,150 ಅಡಿ)
ಆರಂಭ: 2012
ಪ್ರಕಾರ: ತೂಗು ಸೇತುವೆ
ಸ್ಥಳ: ಹುನಾನ್ ಪ್ರಾಂತ್ಯ, ಚೀನಾ

ಐಝೈ ಸೇತುವೆಯು ತನ್ನ ಅದ್ಭುತ ನೋಟಗಳು ಮತ್ತು ಪ್ರವಾಸೋದ್ಯಮ ಮೂಲಸೌಕರ್ಯದೊಂದಿಗೆ ಏಕೀಕರಣಕ್ಕೆ ಹೆಸರುವಾಸಿಯಾಗಿದೆ. ಇದು ಎರಡು ಪರ್ವತ ಪ್ರದೇಶಗಳನ್ನು ಸಂಪರ್ಕಿಸುತ್ತದೆ ಮತ್ತು ಸಂದರ್ಶಕರಿಗೆ ಪಾದಚಾರಿ ಮಾರ್ಗಗಳನ್ನು ಒಳಗೊಂಡಿದೆ.