ನೆಲದಡಿ ಪತ್ತೆಯಾಯ್ತು 3,787 ಮೂಳೆಗಳು, 7 ಮಂದಿಯನ್ನು ಹತ್ಯೆಗೈದ ಶಂಕೆ!

* ಶಂಕಿತ ಆರೋಪಿ ಮನೆಯೊಳಗೆ ಪತ್ತೆಯಾಯ್ತು ರಾಶಿ ರಾಶಿ ಮೂಳೆಗಳು * ಹದಿನೇಳು ಮಂದಿಯ ಮೂಳೆಗಳಿರಬಹುದೆಂಬ ಶಂಕೆ * ಪೊಲೀಸ್ ಕಮಾಂಡರ್ ಪತ್ನಿ ನಾಪತ್ತೆ ಪ್ರಕರಣದಿಂದ ಸಿಕ್ಕಾಕೊಂಡ ಆರೋಪಿ

ಮೆಕ್ಸಿಕೋ ಸಿಟಿ(ಜೂ.13): ಮೆಕ್ಸಿಕನ್ ಸಿಟಿಯಲ್ಲಿರುವ ಮನೆಯೊಂದನ್ನು ಅಗೆಯುವ ವೇಳೆ 3,787 ಮೂಳೆಯ ಭಾಗಗಳು ಪತ್ತೆಯಾಗಿವೆ. ಇವು ಹದಿನೇಳು ವಿಭಿನ್ನ ವ್ಯಕ್ತಿಗಳ ಮೂಳೆಗಳೆನ್ನಲಾಗಿದೆ.  ಇಲ್ಲಿ ಮೇ 17ರಿಂದ ಈ ಅಗೆಯುವ ಕಾರ್ಯ ಆರಮಭವಾಗಿತ್ತು. ಆದರೀಗ ಪರಿಸ್ಥಿತಿ ಅವಲೋಜಕಿಸಿದ ಅಧಿಕಾರಿಗಳು ಈ ಕಾರ್ಯ ಇಲ್ಲಿಗೇ ನಿಲ್ಲುವುದಿಲ್ಲ ಎಂದಿದ್ದಾರೆ. ಶಂಕಿತ ಆರೋಪಿ ವಾಸಿಸುತ್ತಿದ್ದ ಮನೆಯೊಳಗಿನ ಸಂಪೂರ್ಣ ನೆಲವನ್ನು ತನಿಖಾಧಿಕಾರಿಗಳು ಅಗೆದಿದ್ದಾರೆನ್ನಲಾಗಿದೆ. 

ಪ್ರಕರಣ ಬಹಿರಂಗಗೊಂಡಿದ್ದು ಹೇಗೆ?

ಮೆಕ್ಸಿಕನ್ ಟಿಟಿ ಕಾನೂನಿನ ಅನ್ವಯ ಸದ್ಯ ಈ ಆರೋಪಿಯ ಹೆಸರನ್ನು ಬಹಿರಂಗಪಡಿಸಿಲ್ಲ. ಆದರೆ ಪೊಲೀಸ್ ಕಮಾಂಡರ್ ಒಬ್ಬ ತನ್ನ ಪತ್ನಿ ನಾಪತ್ತೆಯಾದಾಗ ಈ ವ್ಯಕ್ತಿಯ ಮೇಲೆ ಅನುಮಾನಪಟ್ಟು ಬಂಧಿಸಿದಾಗ ಈತ ಪೊಲೀಸರ ಬಲೆಗೆ ಬಿದ್ದಿದ್ದಾನೆ.

ಈ ಶಂಕಿತ ವ್ಯಕ್ತಿ ಪೊಲೀಸ್ ಕಮಾಂಡರ್ ಪತ್ನಿಯ ಪರಿಚಿತನಾಗಿದ್ದ. ಆತನೇ ಖರೀದಿಗೆಂದು ಹೋಗುವಾಗ ಆಕೆಯನ್ನು ಕರೆದೊಯ್ಯುತ್ತಿದ್ದ. ಆದರೆ ಅದೊಂದು ದಿನ ಕಮಾಂಡರ್ ಪತ್ನಿ ಮನೆಗೆ ಮರಳಿ ಬಂದಿಲ್ಲ. ಹೀಗಾಗಿ ಪೊಲೀಸ್ ಕಮಾಂಡರ್‌ಗೆ ಈ ಮಿಸ್ಸಿಂಗ್ ಕೇಸ್ ಹಿಂದೆ ಈ ವ್ಯಕ್ತಿ ಕೈವಾಡ ಇದೆ ಎಂಬ ಅನುಮಾನ ಮೂಡಿದೆ. ಸಿಸಿಟಿವಿ ಕ್ಯಾಮೆರಾದಲ್ಲೂ ಮಹಿಳೆ ಆ ಶಂಕಿತ ವ್ಯಕ್ತಿಯ ಮನೆಗೆ ಹೋಗುವ ದೃಶ್ಯಗಳಿದ್ದರೂ, ಮರಳಿ ಬರುವ ದೃಶ್ಯಗಳಿಲಿಲ್ಲ. ಇದಾದ ಬಳಿಕ ಮಹಿಳೆಯ ವಸ್ತುಗಳು ಶಂಕಿತ ವ್ಯಕ್ತಿಯ ಮನೆಯಲ್ಲಿ ಪತ್ತೆಯಾಗಿವೆ.

ಕಪಾಟಿನಲ್ಲಿತ್ತು ಹಲವಾರು ಐಡಿಗಳು

ಮನೆಯೊಳಗಿದ್ದ ಕಪಾಟಿನಲ್ಲಿ ಅನೇಕ ಐಡಿಗಳು ಪತ್ತೆಯಾಗಿವೆ. ಇನ್ನು ಈ ಐಡಿಗಳೆಲ್ಲವೂ ಕಳೆದ ಕೆಲ ವರ್ಷದಿಂದ ನಿಗೂಢವಾಗಿ ನಾಪತ್ತೆಯಾಗಿದ್ದವರದಾಗಿತ್ತು. ಇನ್ನು ನೆಲದಡಿ ಸಿಕ್ಕ ಮೂಳೆಗಳೂ ಇವರದ್ದೆನ್ನಲಾಗಿದೆ. ಸದ್ಯ ಮೂಳೆಗಳ ಅಧ್ಯಯನ ಆರಂಭಿಸಲಾಗಿದೆ. ಬಹಳಷ್ಟು ಸ್ವಚ್ಛಗೊಳಿಸಿದ ಬಳಿಕ ಈ ಮೂಳೆಗಳ ಗುರುತು ಪತ್ತೆ ಹಚ್ಚುವ ಕಾರ್ಯ ಆರಂಭಿಸಿದ್ದೇವೆ. ಈವರೆಗೂ ಪತ್ತೆ ಹಚ್ಚಲಾದ ಮೂಳೆಗಳಿಂದ ಇವು ಒಟ್ಟು ಹದಿನೇಳು ಮಂದಿಯ ಮೂಳೆಗಳೆಂದು ಹೇಳಬಹುದು ಎಂದಿದ್ದಾರೆ.